Vuna e Yaga Kina Nikua na iVolatabu
“E vakavuna na Kalou na volai ni iVolatabu, e yaga me . . . veidusimaki ena bula ni tamata.”—2 TIMOCI 3:16, The Jerusalem Bible.
SA VINAKA cake ena veisenitiuri sa oti nodra bula e levu ena veivanua, ni uqeti ira na iVolatabu mera veisautaka nodra ivakarau ni bula. E tukuni ena tikinivolatabu mai cake ni yaga na iVolatabu ni vakavuna na Kalou. Na iVolatabu e tukuna vei keda na nanuma ni Kalou, dina ga nira vola na tamata. E tukuna: “Era a vosataka ga na tamata na vosa ni Kalou me vaka sa vakauti ira kina na Yalo tabu.”—2 Pita 1:21, VV.
Qo e rua na sala e yaga kina na iVolatabu. Kena imatai, e tukuna na ka dina me baleta na ivakarau ni bula e vinaka cake. Kena ikarua, ena uqeta e dua me veisautaka nona ivakarau ni bula me vinaka cake kina. Meda veivosakitaka mada e rua na sala qori.
Kilai na iSausau e Yaga
E yalataka na Kalou ena iVolatabu: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” (Same 32:8) Na Kalou e veivakasalataki, e vukei keda tale ga meda kila na ka kece e vauci ena dua na ituvaki. Nida kila gona na isausau e yaga, eda na sega ni vakaogai keda ena veika e tawayaga.
Kena ivakaraitaki, e levu nikua era vinakata mera rogo se rawaka. Levu na ivola e tabaki me dusimaka e dua me cakava vakataki koya na ka, e uqeta na veisisivitaki ni rogo kei na vutuniyau. Ia e kaya na iVolatabu: ‘Na veivuvutaki e ka wale, e ka ni oca ina yalo.’ “O koya sa lomana na siliva ena sega ni mamau e na siliva.” (Dauvunau 4:4; 5:10) Vakacava e yaga tale ga vei keda nikua na ivakasala qori?
Na yaga ni ivakasala ena iVolatabu e vakadinadinataki ena bula i Akinori mai Japani. A nona isausau me tauri ivola ena dua na univesiti rogo, me cakacaka tale ga ena dua na kabani rogo. E rawata ruarua nona isausau qori, dina ga nira sasagataka e levu. A rawata na veika e vinakata, ia a sega ni marau, a vakatauvimatetaki koya ga na nona wawale kei na lomaocaoca, ra qai kuria nona rarawa na nona itokani. A nanuma me walia nona lomabibi ena gunu alakaolo, bau vakasamataka tale ga me vakamatei koya. Ia a vuli iVolatabu kei ira na iVakadinadina i Jiova. Na ka e vulica e vakadodonutaka nona rai ena ka me vakabibitaka ena nona bula. Sega ni bera sa yali na tauvimate e vu mai na nona lomaocaoca. Ni sega ni lewai koya na dokadoka kei na rogo, a vakadinadinataka o Akinori na ka e tukuna na Vosa Vakaibalebale: “Na lomavakacegu e vu ni bula ina yago.”—Vosa Vakaibalebale 14:30, The Holy Bible—New International Version.
Na cava o nanuma ni isausau yaga duadua? Na cava ena vakavu marau dina? Na dei ni nomu vakawati? Nomu susugi ratou vinaka na luvemu? Na levu ni nomu itokani? Nomu marautaka na bula? Era isausau yaga kece qori ni veiuqeti kina na iVolatabu, ia e sega ni bibi duadua ena noda bula. E yaga na ivakasala e tukuna na iVolatabu ni bibi me marautaki kina na bula: “Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau 12:13) Ke da cakava qori, ena vakainaki noda bula, eda na lomavakacegu, eda na marau tale ga. E vakadeitaka na iVolatabu: ‘O koya e vakararavi vei Jiova ena kalougata.’—Vosa Vakaibalebale 16:20.
Uqeta na Veisau na iVolatabu
E vola na yapositolo o Paula: “Ni sa bula na vosa ni Kalou, ka kaukauwa.” Na iVolatabu e gata me vaka na iseleiwau batirua, ena vakatakila na nona nanuma e dua kei na inaki ni lomana. (Iperiu 4:12) E rawa sara ga ni uqeti koya me veisautaka nona ivakarau ni bula, ni na vakatakila vua na ka dina me yavutaki kina na nona rai, sega ni ka ga e nanuma. O ira na yalomalumalumu era na liaca ni dodonu mera veisau. A kaya o Paula me baleti ira eso na lotu vaKarisito mai Korinica, era daubutako, daumateni, dauveibutakoci, se ra cakava tu e liu eso na ivalavala va ya: ‘Eso vei kemuni a va tu ya e liu. Ia qo oni sa vakasavasavataki ena yalo ni Kalou.’ (1 Korinica 6:9-11, VV) E se vakadinadinataki tiko ga nikua na veiuqeti ni yalo tabu i Jiova ena nona veisautaka e dua na nona bula.
O Mario e dua na turaga raravisa mai Urope, e dau kana mariwana, e volitaka tale ga. Ni vesuki koya ena dua na gauna na ovisa ni kune vua na wainimategaga, a vakamavoataka na ovisa ya, vakacacana tale ga nona motoka ena levu ni nona katakata. Sa voravora mada nona itovo, sega ni cakacaka, qai bini na nona dinau. E kila ni na sega ni walia rawa ga vakataki koya nona leqa, mani vulica na iVolatabu. A veisau na kena irairai ni toso nona vuli, sega ni vakayagataka na wainimategaga se volitaka, yalomalua tale ga. Nira kurabui e levu era kila nona ivalavala e liu, era dau taroga sara ga, “Mario, o iko dina qori?”
Na cava a uqeti ira era vakataki Akinori kei Mario mera veisau, ra qai vakila na lomavakacegu kei na marau? A uqeti ira na veika vou era kila me baleta na Kalou ena nodra vulica na iVolatabu. Na ivakasala duadua ga ni Kalou e yaga ena noda marautaka na bula ena gauna qo, da nuitaka tale ga na bula tawamudu e se bera mai. Me vaka e dua na Tama, e tukuna vei keda ena nona Vosa o Jiova: ‘Mo rogoca, na luvequ, vakabauta na noqu vosa; ena qai vuqa na yabaki ni nomu bula. Ni o lako, ena sega ni vakaleqai na yavamu, ni o cici, o na sega ni tarabe. Taura matua na ivakavuvuli, kua ni laiva, mo vakabauta ni vu ni nomu bula.’ (Vosa Vakaibalebale 4:10-13) E yaga duadua meda qara na nona ivakasala na Dauveibuli.
[Kato/iYaloyalo ena tabana e 7]
iVakasala e Yaga Nikua
E tu ena iVolatabu na ivakasala e bibi qai yaga me dusimaki keda ena basoga ni noda bula kece. Qo eso na kena ivakaraitaki:
• Veimaliwai Vinaka kei Ira Tale Eso
“Na ka vakaaduaga dou sa vinakata me ra kitaka vei kemudou na tamata, dou kitaka vaka talega kina vei ira.”—Maciu 7:12.
“Ni na uasivi cake ko koya sa lailai sara vei kemudou kecega.”—Luke 9:48.
“Dauvakacegui ira na vulagi.”—Roma 12:13.
• Vorati ni iTovo Ca
“Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.”—Vosa Vakaibalebale 13:20.
“Mo kakua ni tiko kei ira era daugunu waini.”—Vosa Vakaibalebale 23:20.
“Mo kakua ni veiwekani kei na tamata daucudru.”—Vosa Vakaibalebale 22:24.
• Dei na Vakawati
“Ia mo dou dui lomana yadua na watina me vakataki koya; ia na yalewa, me vakarokorokotaka na watina.”—Efeso 5:33.
“Dou qai vakaisulu . . . e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede: dou veivosoti vakai kemudou, ka kakua ni veicudruvi.”—Kolosa 3:12, 13.
• Nodra Vakavulici na Gone
“Vakatavulica na gone e na sala e dodonu me lako kina: ia ni sa qase mai, ena sega ni lako tani maikina.”—Vosa Vakaibalebale 22:6.
“Kemuni na i tubutubu, ni kakua ni dau vakacudrui ira na luvemuni ia mo ni dau vakavulici ira ga e na i vakarau kei na i vakavuvuli ni Turaga.”—Efeso 6:4, VV.
• Me Kua na Veileti
“A vosa vakayalovinaka sai vakamalumu ni cudru: ia na vosa vakararawa sa vakatubura na cudru.”—Vosa Vakaibalebale 15:1.
“Dou veiuasiviti e na veivakarokorokotaki.”—Roma 12:10.
O ira mada ga na veitokani era dau vakaivolataka na nodra ka ni bisinisi me kua kina na veiba. A vola kina na tamata ni Kalou o Jeremaia: “Ka’u a vola na kenai vola, ka dregata, ka kaciva eso na tamata me vakadinadinataka, ka sa vakarauta nai lavo e nai vakarau ni bibi.”—Jeremaia 32:10.
• Rai Donu
“A ka kecega sa dina, . . . daulomani, . . . rogorogo vinaka; ia kevaka sa dua na ka e vinaka, se na ka e daudokai, dou nanuma na veika oqo.”—Filipai 4:8.
E sega ni veiuqeti na iVolatabu ena rai cala kei na “daudidi.” Ia e kaya: “Dou reki e nai nuinui.”—Juta 4, 16; Roma 12:12.
Eda na lomavakacegu qai marau ena gauna qo nida muria na ivakavuvuli totoka qori, ena vakadonui keda tale ga na Kalou qai vakalougatataki keda. E tukuna na iVolatabu: “Era na taukena na vanua ko ira na yalododonu, ka tiko kina ka sega ni mudu.”—Same 37:29.
[iYaloyalo ena tabana e 5]
Ni se dua na daunibisinisi o Akinori (imawi), rau marautaka tiko nikua vakaveiwatini na tukuni ni ka dina ena iVolatabu