Na Rerevaka na Kalou​—“Sai Vakavuvuli Vuku”

NA KANA magiti levu sa vakarautaki tu ena nona tepeli na vuku dina. Sa “talai ira yani na nona goneyalewa: sa kaci tu e na veitiki ni koro e cecere, ka vaka Ko koya sa sega ni vuku, me curu mai kike: ko koya sa sega ni yalomatua, sa kaya kina vua, Mo lako mai, mo mai kania na noqu madrai, ka gunuva na waini ka’u sa ulia: biuti ira na lialia, mo bula; ka muria na sala ni vuku.”​​—Vosa Vakaibalebale 9:​1-6.

Kevaka eda dau kana mai na tepeli ni vuku ena sega ni yacovi keda e dua na ka ca se meda rarawa. E uqeti na vosa vakaibalebale, e tu kina na vosa ni vuku e yavutaki sara ga vakalou, kevaka gona eda rogoca da qai muria na kena ivakavuvuli, ena vinaka na noda sala. E vakamacalataki oqo ena Vosa Vakaibalebale 15:​16-​33.a Nida muria na veivakasalataki leleka era koto kina, ena vukei keda meda lomavakacegu ena ka sa tu vei keda, da toso tiko ga i liu, da qai marautaka noda bula. Ena vukei keda tale ga meda dau vakatulewa vinaka, da qai muria tiko ga na sala ina bula.

E Vinaka Cake ni Lailai ga na iYau

“Sa vinaka na ka lailai sa tu vata kei na rerevaki Jiova, ka ca nai yau levu sa tu vata kei na rarawa,” e kaya o Tui Solomoni e Isireli makawa. (Vosa Vakaibalebale 15:16) Sa bau ka vakalialia dina meda vakalecalecavi koya na Dauveibuli, da qai vakaliuca ena noda bula na rawati ni iyau vakavuravura. Na mataqali bula vaka oqori ena kauta ga mai na lomaocaoca kei na nuiqawaqawa. Sa na bau vakamadua dina me dua e kidava ni sa qase na kena sega ni yaga se vakainaki na nona bula taucoko! E sega ni ka vukutaki me kumuni na iyau qai salavata tu na “rarawa.” E vinaka cake meda vulica na sala meda lomavakacegu kina ena ka ga sa tu vei keda da qai bulataka! Na lomavakacegu dina ena rawati ga ena rerevaki Jiova​​—noda veiwekani kei koya​​—sega ni iyau eda taukena.​​—1 Timoci 6:​6-8.

Ni vakabibitaka na kena vinaka cake na veiwekani voleka kei ira e so tale mai na levu ni ka eda taukena, e kaya o Solomoni: “Sa vinaka me da kana rourou ka veilomani ga, ka ca me da kana pulumokau uro ka veicati tiko.” (Vosa Vakaibalebale 15:17) Io, e vinaka me tiko na veilomani ena dua na vuvale mai na kena laukana na kakana urouro. Ena vuvale itubutubu le dua, ena rairai lailai beka na ka e tu e vale. So tale na vanua ena rawa ni vakarautaki ga na kakana lailai sara. Ia, ke tiko na loloma kei na veikauaitaki era na marau na lewenivuvale.

So sara mada ga na vuvale era dau veilomani era na sotava na ituvaki dredre. E dua na lewenivuvale ena rairai tukuna se cakava na ka e vakacudruya e dua tale vei iratou. Ia, na cava e rawa ni cakava o koya e vakacudrui? E kaya na Vosa Vakaibalebale 15:18: “A tamata daucudru sa dauvakatubura na veileti: ia ko koya sa berabera ni cudru sa tarova na veileti.” E uqeta na tiko veiyaloni kei na veivinakati na vosa e tau vakayalovinaka, sega ni cudrucudru. Na ivakasala oqo ena yaga ena so tale na ka eda dau cakava, okati kina ena loma ni ivavakoso kei na cakacaka vakavunau.

Ni ‘Caramaki tu na Sala’

Na vosa vakaibalebale e tarava e vakamacalataki kina na nodra duidui na sega ni dau kauaitaka na vosa ni vuku kei ira na kauai kina. “A nona sala na vucesa sa vaka na bai soni,” e kaya na tui vuku, “ia na nodra sala na yalododonu sa caramaki tu.”​​—Vosa Vakaibalebale 15:19.

Na bai soni e vakavotona, qai dau veilauti mosimosi. O ira na tamata vucesa era dau vakasamataka tu ga na leqa ena sotavi me rawa ni nodra iulubale ni na vakalatilati ina nodra sasaga. Ena yasana adua, o ira na yalododonu era sega ni lomaleqataka na ka ena rairai vakataotaka nodra cakacaka. Ia, era dau gumatua ga ena cakacaka ra qai sega ni vakaweleweletaka na ka e tu me caka. Era bulata gona e levu sara na ka mosimosi era rawa ni vakaleqai kina ke ra a dau vakawelewele. Na nodra sala sa “caramaki tu,” qai sega na ka e vakataotaka. Era na toso tiko ga i liu ra qai marautaka na nodra rawaka.

Taura mada me kena ivakaraitaki, na kena rawati na kilaka ena Vosa ni Kalou me matua kina e dua. E gadrevi na sasaga. Ia, e rawa sara ga ni vakaiulubaletaka e dua nona sega ni vuli vinaka, sega ni kila vinaka na wilivola, se sega ni dau nanuma vinaka na ka me vu ni nona sega ni dau vulica vagumatua na iVolatabu. Ena vinaka cake sara me kua ni dau vakasamataki tiko na veika oqori me vakalatilati ena kena rawati na kilaka! Ke lailai sara mada ga na ka eda kila tu, eda se rawa tiko ga ni vakavinakataka na ivakarau ni noda wilivola kei na noda kila na ka eda wilika tiko, de dua ena gadrevi ena so na gauna meda vakayagataka na ivolavosa. Na rai donu ena vukei keda meda rawata na kilaka da qai toso vakayalo.

Ni ‘Marau o Tama’

“A gone vuku sa marau kina ko tamana,” e kaya na tui kei Isireli, “ia na tamata lialia sa beci tinana.” (Vosa Vakaibalebale 15:20) Era dau marau na itubutubu nira vakatulewa vakavuku na luvedra, se vakaevei? Io, ena gadrevi na nodrau veituberi kei na veivakavulici na itubutubu me qai rawati na marau vaka oqori. (Vosa Vakaibalebale 22:6) Na gone vuku gona ena ivurevure ni marau vei rau na nona itubutubu! Ia na gone lialia ena dau vakamosia tu ga na lomadrau na nona qase.

Ena nona vakamacalataka na tui vuku e dua tale na ibalebale ni “marau” e kaya: “Sa ka ni marau na lialia vei koya sa sega ni vakayalo: ia na tamata lomavuku sa vakadodonutaka na nonai lakolako.” (Vosa Vakaibalebale 15:21) O ira na dau muri lomadra ga era dau taleitaka na ka lialia ra qai marautaka na ka ena sega ni solia vei ira na lomavakacegu. Ia, na tamata lomavuku e raica ni ka lialia na ‘lomani vakalevu ni marau qai lomani vakalailai na Kalou.’ (2 Timoci 3:​1, 4) Ni muria na ivakavuvuli vakalou ena sega ni cakacala qai dodonu tu ga nona sala.

Ni “Vakataudeitaki”

Ni bulataki na ivakavuvuli vakalou ena yaga ena so tale na basoga ni noda bula. E kaya na Vosa Vakaibalebale 15:22: “Ni sa sega na bose, sa sega ni yaco na ka e nanumi: ia ni ra sa lewe vuqa na daubose, sa vakataudeitaki.”

Na bose e kena ibalebale na veivosaki vakadodonu e sega ni wereubiubi ena kedratou maliwa e le vica. Na vosa vakaIperiu e vakadewataki me “bose” e cavuti tiko me ilawalawa dau veivosaki se “nodrai soqosoqo” ena Same 89:7. Oqo e kena ibalebale na veivosaki bibi. E sega ni veivosaki wale tu ga, ia e talaucaki sara ga kina na ka dina e dui tu e lomadra na veivosaki tiko kei na nodra nanuma. Nira veivosaki vaka oqori na veiwatini vaka kina o ira na itubutubu kei ira na luvedra, era na vakila na vakacegu kei na duavata. Ia, ke sega ena kune na leqa kei na bula rarawa ena loma ni vuvale.

Nida dau vakatulewa bibi, e ka vakayalomatua me muri na ivakasala oqo: ‘Nira sa lewe vuqa na dau veivosaki sa vakataudeitaki.’ Kena ivakaraitaki, ke dua e vakatulewataka tiko na veiqaravi vakavuniwai cava me caka, sega beka ni ka vakayalomatua me taroga tale e rua se tolu na vuniwai, vakabibi ke rui leqataki na kena ituvaki?

Sa qai bibi sara na veivosaki ni qaravi na itavi vakayalo. Nira veivosaki na qase ni ivavakoso ra qai vakayagataka na ivakasala momona era cauraka, ena yaco dina me “vakataudeitaki” na bose. Kuria oya, mera kua ni tu vakasuka na ivakatawa vou mera kere ivakasala vei ira na qase ni ivavakoso matua, vakauasivi ke dredre na itavi era vakarau qarava.

Ni ‘Marau na Tamata ena Vuku ni Nona Vosa’

E yaga vakacava na vosa vakayalomatua? “Sa na marau na tamata e na vuku ni vosa ni gusuna,” e kaya na tui kei Isireli, “ia na kena vinaka na vosa e na gauna e yaga kina!” (Vosa Vakaibalebale 15:23) Eda dau marau beka ni yaga na kena muri na ka eda tukuna se noda veivakasalataki? Ia me yaga na noda ivakasala, e rua na ka meda cakava.

Kena imatai oya me yavutaki sara ga na ivakasala ena Vosa ni Kalou, na iVolatabu. (Same 119:105; 2 Timoci 3:​16, 17) Me qai tau donu. So mada ga na vosa dina e tau ena gauna cala e dau veivakaleqai sara ga. Kena ivakaraitaki, ena sega ni yaga se ka vakayalomatua me vakasalataki e dua ni se bera ni rogoci na ka e tukuna. E bibi kina meda ‘kusarawa yadua me vakarorogo, da berabera ga ni vosa’!​​—Jemesa 1:​19.

‘Na Sala ni Bula sa Koto i Cake’

E kaya na Vosa Vakaibalebale 15:24: “A nona sala ni bula na vuku sa koto kicake, me lako tani kina ko koya mai eli sa koto kira.” Na tamata vuku ena sega ni muria na sala ena tini i eli, na nodra ibulubulu na kawatamata. Ena cata na itovo e veivakaleqai me vaka na veiyacovi vakasisila, vakayagataki ni wainimate gaga, kei na daumateni​​—ena sega kina ni matedole. Ena muria ga na sala e basika ina bula.

Ia, raica na kena veibasai me baleti ira na tamata lialia: “Ena vakarusa ga ko Jiova na nona vale na viavialevu: ia ena vakataudeitaka nai yalayala ni nona vanua na yada. A ka vakasisila vei Jiova na ka era nanuma ko ira nai valavala ca: ia sa vosa kamikamica na nodra vosa na yalosavasava. E dau vakararawataka na nona vale ko koya na daukocokoco; ia ko koya sa cata nai solisoli [veivaqumi] ena bula.”​​—Vosa Vakaibalebale 15:​25-​27.

Ni vakaraitaka na ka ena vukei keda meda kua ni coko ena so na leqa, e kaya kina na tui kei Isireli: “A lomana na yalododonu sa daunanuma na ka me kaya: ia mai na gusudra na tamata ca sa tovure tu na ka ca.” (Vosa Vakaibalebale 15:28) E yaga dina na vosa vakaibalebale oqo! Na ka ca e dau tovure mai na gusudra na tamata ca. Ke da dau vakasamataka e liu na vu ni kena yaco e dua na ka, vauci kina na kedra ituvaki kei na lomadra e so tale, eda na rairai sega ni cavuta na ka eda na qai veivutunitaka e muri.

Na cava gona na yaga ni noda rerevaka na Kalou da qai ciqoma na nona veivakavulici? E sauma na turaga vuku: “Sa yawa tiko ko Jiova vei ira nai valavala ca: ia na nodra masu na yalododonu ena rogoca ko koya.” (Vosa Vakaibalebale 15:29) E yawaki ira na tamata ca na Kalou dina. “O koya sa vaqara tani na daligana me kakua ni rogoca na vunau,” e kaya na iVolatabu, “ena ka vakasisila na nona masumasu.” (Vosa Vakaibalebale 28:9) O ira na rerevaka na Kalou ra qai dau caka dodonu era na rawa ni torovi koya nira nuidei ni na rogoci ira.

Na Cava e ‘Vakamarautaka na Loma ni Tamata’

E kaya o Solomoni ena dua na vosa vakatautauvata e vakavure vakasama: “A rarama ni mata sa marau kina na loma ni tamata: ia nai rogorogo vinaka sa uro kina na suina.” (Vosa Vakaibalebale 15:30) E dau “uro” na uto ni sui. Oqo ena vakaukauataka na yago qai marau kina na loma ni tamata. E vakavotui na marau oqori ena serau ni matana. E dau yaco oqori ni ciqomi na itukutuku se irogorogo vinaka!

Sega beka ni dau veivakayaloqaqataki nida rogoca na tubu ni kedra iwiliwili na sokaloutaki Jiova e vuravura raraba? Nida kila na veika sa vakayacori tiko ena vunautaki ni Matanitu ni Kalou kei na cakacaka ni veivakatisaipelitaki, e dau uqeti keda sara ga meda vakaitavi vakalevu ena cakacaka vakavunau. (Maciu 24:14; 28:​19, 20, VV) Eda dau marautaka na kedra itukutuku na sa mai vakalou vei Jiova ra qai sokalou dina. Ni dau veiuqeti vaka oqori na “[i]tukutuku vinaka mai na vanua yawa,” sa qai bibi gona meda dau vola vakadodonu na itukutuku ni noda cakacaka vakavunau!​​—Vosa Vakaibalebale 25:25.

“Sa Muri na Vakarokorokotaki ka Liu na Yalomalumalumu”

Nona vakabibitaka ni yaga me dau ciqomi na veivakavulici se veivunauci, e kaya kina na tui vuku: “A daliga sa dauvakarogoca na vunau ni bula sa na dautiko vata kei ira na vuku. O koya sa bese ni vunauci sa cata na yalona: ia ko koya sa vakarorogo ki na vunau ena lomavuku mai.” (Vosa Vakaibalebale 15:​31, 32) E dau tara na lomadra na tamata na veivunauci se veivakavulici qai veisautaki ira, me vinaka kina na ivakarau ni nodra vakasama. Sa rauta me dau ‘vakaseva na ka lialia sa vauci tu e lomana na gone’ na “kuita ni veivakatavulici.” (Vosa Vakaibalebale 22:15) O koya e ciqoma na veivakavulici ena vinaka na inaki ni lomana. Ena yasana adua na cati ni veivakavulici e tautauvata ga na kena cati na bula.

E yaga dina meda marautaka na veivakavulici ni vuku da qai ciqoma ena yalomalumalumu. Eda na sega wale ga ni lomavakacegu, da toso, da marau, da rawaka, ia eda na rokovi da qai rawata tale ga kina na bula. E tinia na Vosa Vakaibalebale 15:33: “A rerevaki Jiova sai vakavuvuli vuku; a sa muri na vakarokorokotaki ka liu na yalomalumalumu.”

[iVakamacala e ra]

[iYaloyalo ena tabana e 17]

Na vuvale dau veilomani e vinaka cake sara vakalevu mai na kakana urouro

[iYaloyalo ena tabana e 18]

Kevaka mada ga eda lekata tiko e so na ka, na rai dodonu ena vukei keda meda rawata na kilaka

[iYaloyalo ena tabana e 19]

Na bose vata e dau vakavotui kina na veika dina e tu e loma ni tamata kei na nona nanuma

[iYaloyalo ena tabana e 20]

O kila se sala cava e ‘uro kina na sui ena irogorogo vinaka’?