Toro Voleka Vua na Kalou
E Kila ni Vakaiyalayala na ka Eda Rawata
“SA DUA na ka na noqu sasaga, ia au kila ni se sega ga ni vinaka.” A tukuna qori e dua na marama a saga me vakamarautaka na Kalou. E vakadonuya beka na Kalou o Jiova na nodra sasaga vagumatua o ira era sokaloutaki koya? E kauaitaka beka na ka era rawata ena vuku ni ka era kila kei na kedra ituvaki? Me saumi na taro qori, ena yaga meda raica mada na ka e tukuni ena Lawa a soli vei Mosese ena Vunau ni Soro 5:2-11 me baleta na veimataqali isoro.
Ena Lawa, e duidui na isoro e lavaka na Kalou me cabori me vosoti kina na ivalavala ca. Na ituvaki ena Vunau ni Soro e baleta e dua e caka cala sega ni nakita. (Tikina e 2-4) Ni sa kila na cala ni ka e cakava, ena vakatusa nona ivalavala ca, qai cabora e dua na isoro ni caka cala—‘e dua na luve ni sipi yalewa se na me.’ (Tikina e 5, 6) Ia vakacava ke sega ni rawata me cabora e dua na sipi se na me, baleta ni dravudravua? E lavaki beka ena Lawa me lai taura vakadinau na manumanu ya? Me cakacaka beka me yacova ni sa volia rawa e dua na manumanu, oti me qai sorovaki na nona ivalavala ca?
Nida vakasamataka na veikauaitaki vakayalololoma i Jiova, e tukuna na Lawa: “Kevaka sa sega ni rawata ko koya e dua na lami, me qai kauta mai vei Jiova e na vuku ni nonai valavala ca, e rua na soqe, se rua na luve ni ruve.” (Tikina e 7) Na matavosa “kevaka sa sega ni rawata” e rawa ni vakadewataki tale ga “ke sa sega ni ceguva rawa.” Ke dua na Isireli sa sega ni rawata me volia e dua na sipi baleta ni sa rui dravudravua, ena marau na Kalou me ciqoma na isoro cava ga e ceguva rawa na kena isau—e rua na soqe se rua na ruve.
Ia vakacava ke dua e sega tale ga ni volia rawa e rua na ruve se rua na soqe? E tukuni ena Lawa, “me qai kauta mai ko koya sai valavala ca me nonai madrali e dua na omeri madrai droka vinaka mei soro ni valavala ca.” (Tikina e 11) A vakadonuya o Jiova vei ira na dravudravua sara mera cabora na isoro ni ivalavala ca e sega ni vakayagataki kina na dra.a E Isireli, era sega ni vakuai na dravudravua ena veivakalougatataki ni isoro ni ivalavala ca se na nodra saga mera veiwekani vinaka kei na Kalou.
Na cava eda vulica me baleti Jiova ena lawa me baleta na isoro ni caka cala? E Kalou yalololoma, dau veinanumi, e kauaitaka ni vakaiyalayala ga na ka era rawa ni cakava na sokalou vua. (Same 103:14) Ke mani dredre na ituvaki eda sotava, ena vuku ni bula vaqase, tautauvimate, icolacola vakavuvale se so tale, e vinakata o Jiova meda voleka vua, me vinaka tiko ga noda veiwekani kei koya. E vakacegui keda dina nida kila ni marautaka o koya meda cabora vua na ka eda rawata.
[iVakamacala e ra]
a E bibi ena vosoti ni valavala ca na dra ni manumanu e cabori me isoro, e raica na Kalou me ka tabu. (Vunau ni Soro 17:11) Kena ibalebale beka ya ni tawayaga na madrai era cabora na dravudravua? Sega. E marautaka o Jiova ni cabori ena yalomalumalumu, e vu tale ga mai lomadra. O ira na lewenimatanitu kece—okati kina o ira na dravudravua—e buluti na nodra ivalavala ca ena dra ni manumanu e cabo vua na Kalou ena Siga ni Veibuluti.—Vunau ni Soro 16:29, 30.