Taro na Dauwiliwili

Erau Duabau Vakacava O Jisu kei Tamana?

E tukuna o Jisu: “Keirau sa dua bauga kei Tamaqu.” (Joni 10:30) So era nanuma ni vosa qo e vakaraitaka ni rau tiki ni letoluvakalou. Qori beka na ka e vakaibalebaletaka o Jisu?

Meda dikeva mada na tikina yavolita. Ena tikina e  25, a vakaraitaka o Jisu ni dau cakava na ka ena yaca i Tamana. Ia na tikina e  27 ina 29, e tukuna kina na vosa vakatautauvata ni sipi a solia vua o Tamana. Ke a tukuna e kea ni rau tautauvata kei Tamana, a rawa sara ga ni vakasesei ira na vakarorogo. Ia a vakaibalebaletaka tiko ga o Jisu, ni ‘rau duavata kei Tamana, ena sega gona ni kaliraki laivi na sipi mai na ligana, me vaka ga na kena sega ni rawa ni kaliraki mai na liga i Tamana.’ Qo e via tautauvata kei na nona tukuna e dua na gone vei ira na meca i tamana, ‘Kevaka o veivala kei tamaqu, o sa veivala tiko kei au.’ Ena sega ni rawa ni tukuni ni rau tautauvata na gone qori kei tamana. Eda siqema rawa ga ni rau veivolekati dina.

O Jisu kei na Tamana o Jiova e rau “duabau” ena vakasama, ni duavata na nodrau inaki, ivakatagedegede, kei na itovo. A sega ni via lewai koya ga o Jisu ni vakatauvatani kei Setani na Tevoro, vaka kina o rau na imatai ni veiwatini o Atama kei Ivi. E kaya o Jisu: “Ni sega ni dua na ka e cakava vaka i koya ga na Luvena, e cakava ga na ka e raica ni cakava tiko ko Tamana. Na ka ga e cakava na Tamana, e cakava tale ga na Luvena.”​—Joni 5:19, VV; 14:10; 17:8.

Na veivolekati qo e vakaraitaka ni rau sega ni tautauvata, e dui tiko na nodrau itovo. E tiko ga na ka e vakila o Jisu, na ka e vakasamataka, na ituvaki e sotava, kei na galala ni nona vakatulewa. Ia a digitaka me vakamalumalumu vei Tamana. E tukuna o Jisu ena Luke 22:42: “Me kakua ni yaco na noqu lewa, me yaco ga na nomuni lewa.” Ena veicalati na vosa qo ke a tautauvata nodrau vakatulewa kei Tamana. Ke rau dua ga o Jisu kei Tamana, cava na vuna a masu kina vua na Kalou qai tukuna ena yalomalumalumu ni sega ni kila na ka e kila duadua ga o Tamana.​—Maciu 24:36.

Levu na lotu era qarava na kalou era kilai nira dau veisei ra qai veivala vakavuvale. Ena itukuni makawa vaKirisi me kena ivakaraitaki, o Cronus a saqati Uranus na tamana, qai kani ratou na luvena. E duidui sara na nodrau duavata na Kalou o Jiova kei na luvena o Jisu ni yavutaki ena loloma dina! Na duavata e laurai vei Jiova kei Jisu e uqeti keda sara ga meda lomani rau! Dua dina na ka dokai ni rawa vei keda meda volekati rau, erau cecere sara vei keda na ibulibuli kece e lomalagi kei vuravura. Ena vukudra nona imuri, a masulaka o Jisu: ‘Au kerea mera duabau kece ga, me vaka daru sa duabau, Tamaqu, mera duabau kei kedaru: me vakadinata o vuravura ni oni talai au mai.’​—Joni 17:20, 21.

Koya gona, nona tukuna o Jisu, “keirau sa dua bauga kei Tamaqu,” e sega ni kena ibalebale ni rau tiki ni Letoluvakalou. Nodrau veivolekati ga e vaka nodrau veidredreti e rua.