Eda Dau Okati Jiova me Tamada?

“TURAGA, vakavulici keitou mada me keitou kila na ivakarau ni masu.” Ni cavuta oti na vosa qori e dua na tisaipeli, a tukuna sara o Jisu: “Ni dou masu, dou kaya, ‘Tamai keimami, me dokai na yacamuni. Me yaco mai na nomuni matanitu.’” (Luke 11:​1, 2) A rawa sara ga ni vakayagataka o Jisu eso na icavuti vei Jiova me vaka na ‘Koya sa Kaukaua,’ ‘Dau Veivakavulici Levu,’ ‘Dauveibuli,’ ‘Dede sara Nona Bula,’ kei na ‘Tui Tawatubu.’ (Vkte. 49:25; Aisea 30:20; 40:28; Tani. 7:9; 1 Tim. 1:17) Ia a vakayagataka ga na icavuti “Tamaqu.” Na vuna? De dua e vinakata meda torovi Koya e cecere duadua e lomalagi kei vuravura me vaka ga nona torova e dua na gone yalomalumalumu na tamana dau yalololoma.

Eso e dau dredre mera okata na Kalou me Tamadra. E tukuna vakadodonu e dua na lotu vaKarisito o Atsuko,a “Ni oti e vica na yabaki noqu papitaiso, e dau dredre meu toro voleka vei Jiova, dredre tale ga meu masu vua me vaka e Tamada.” A tukuna na vuna, “A sega ni dau kauaitaki au o tamaqu dina.”

Ena iotioti ni veisiga qo, e tu yadua sara me laurai na “veilomani vakaveiwekani” me vaka e namaki vua e dua na tama. (2 Tim. 3:​1, 3) Koya gona e sega ni kurabuitaki na nodra duavata kei Atsuko e levu nikua. Ia e veiuqeti dina noda kila ni tiko na vuna vinaka meda vakabauta kina ni o Jiova e Tamada dauloloma.

E Dau Veikaroni Yalololoma o Jiova

Me rawa nida okati Jiova me Tamada, ena vinakati meda kilai koya sara vakavinaka. E tukuna o Jisu: “E sega ni dua e kila vinaka na Luvena, na Tamana ga, e sega tale ga ni dua e kila vinaka na Tamana, na Luvena ga.” (Maciu 11:27) Dua na sala eda na kila vinaka kina na Tamada o Jiova, qori noda vakasamataka vakavinaka na ka e tukuna o Jisu me baleta na Kalou dina. Na cava ya?

E vakabauta o Jisu ni Vunibula o Jiova, a tukuna kina: “Au bula tale ga ena vuku i Tamaqu.” (Joni 6:57) Eda vakabauta tale ga ni noda bula e vakavuna na Tamada. (Same 36:9; Caka. 17:28) Na cava e solia kina o Jiova na bula vei keda na kawatamata? E sega beka ni yavutaki qori ena loloma? Ni lomani keda, e dodonu gona meda dolea lesu.

Na ivakaraitaki levu duadua ni nona loloma na Kalou, qo nona soli luvena me isoro ni veivoli. Na ivakaraitaki ni loloma qo e rawa kina vua na kawatamata ivalavala ca me veiwekani voleka kei Jiova ena vuku i Luvena lomani. (Roma 5:12; 1 Joni 4:​9, 10) Me vaka ni dau vakayacora kece na Tamada vakalomalagi na nona yalayala, eda nuidei ni o ira e lomani koya ra qai talairawarawa vua, era na marautaka tale ga na bula “galala lagilagi era vakila tu na luve ni Kalou.”​—Roma 8:21.

E veisiga e “vakacabea na matanisiga” na Tamada vakalomalagi. (Maciu. 5:45) E sega ni gadrevi meda masulaka qori, ia eda dau gadreva dina na kena katakata! E kila vinaka tu na Tamada na ka e yaga vei keda, qai vakarautaka na veika kece qori ni bera mada ga nida kerea. Bibi gona meda tikica eso na gauna meda vakasamataka kina vakatitobu nona dau kauaitaki ira nona ibulibuli kei na sala eda na vakatotomuri koya kina.​—Maciu 6:​8, 26.

E Dau ‘Veikaroni’ na Tamada

E vakadeitaka na parofisai i Aisea vei ira na tamata ni Kalou ena gauna makawa: “Ena veitosoyaki na veiulunivanua, ena sega ni toka dei na veidelana, ia ena sega ni oti rawa na nodaru veitokani, se me yavalati na nodaru veidinadinati ni sautu, e kaya o Jiova, o Koya e dau karoni iko vinaka.” (Aisea 54:​10, The Bible in Living English) A vakadeitaki na tikina qo ena masu i Jisu ena otioti ni nona bogi e vuravura, a vakaraitaka kina ni ‘dauveikaroni’ o Jiova. Me baleti ira nona tisaipeli, a masuta o Jisu: “Eratou se tiko e vuravura, ia o yau au sa lako yani vei kemuni. Tamaqu yalosavasava, ni taqomaki iratou ena vuku ni yacamuni.” (Joni 17:​11, 14) O Jiova e kauaitaki ira qai karoni ira na imuri i Jisu.

E dua na sala e taqomaki keda kina o Jiova mai na ilawaki qaseqase i Setani, ya nona vakarautaka na kakana vakayalo ena kena gauna donu ni vakayagataka na “dauveiqaravi e yalodina e vuku.” (Maciu 24:45) E rui bibi dina noda vakayagataka na kakana vakayalo qori ke da vinakata meda “vakaiyaragi ena iyaragi kece ni Kalou.” Vakasamataka mada e dua na kena ivakaraitaki, “na isasabai levu ni vakabauta,” eda rawa ni “bokoca kina na gasau waqa kece i koya na Vunica.” (Efeso 6:​11, 16) Na vakabauta ena taqomaki keda mai na veivakaleqai vakayalo qai ivakadinadina ni dau karoni keda o Jiova.

Nida vakasamataka na nona ivakarau ni bula na Luve ni Kalou e vuravura, eda na vulica vakalevu kina na nona yalololoma na Tamada vakalomalagi. Vakasamataka na italanoa ena Marika 10:​13-16. E tukuna kina o Jisu vei ira nona tisaipeli: “Laivi ira na gonelalai mera lako mai vei au.” Nira torovi Jisu yani na gonelalai, e mokoti ira qai vosa vakalougatataki ira. Sega ni vakabekataki nira marautaka dina na nodra kauaitaki! Ena vosa gona i Jisu: “O koya e raici au e raici Tamaqu,” e macala kina ni vinakata na Kalou dina meda torovi koya.​—Joni 14:9.

E sega ni vakaiyalayala na loloma i Jiova. E dau vakarautaka na ka eda gadreva qai dau veikaroni, e vinakata meda toro voleka vua. (Jeme. 4:8) Macala gona vakasigalevu ni Tamada vinaka duadua o Jiova!

E Yaga Vakalevu Vei Keda!

E yaga vakalevu ke da okati Jiova me Tamada vakalomalagi dauloloma qai dau veikaroni. (Vkai. 3:​5, 6) A yaga vei Jisu nona nuitaki Tamana vakatabakidua. E tukuna o Karisito vei ratou nona tisaipeli: “Niu sega ni tiko duadua, e tiko vata kei au na Tamaqu e talai au mai.” (Joni 8:16) E kila deivaki ni na tokoni koya o Jiova. Kena ivakaraitaki ena gauna a papitaiso kina, a tokoni koya vakayalololoma o Tamana ena nona kaya: “Qo na Luvequ lomani, au vakadonuya.” (Maciu 3:​15-17) Ni voleka sara toka ga ni mate, a kacivaka yani o Jisu: “Tamaqu, au sa solia na noqu bula ina ligamuni.” (Luke 23:46) E se qaqaco vinaka tiko ga nona nuitaki Tamana o Jisu.

E rawa tale ga ni dina qo vei keda. Ni totaki keda o Jiova, na cava meda rerevaka? (Same 118:6) O Atsuko, me vaka e vakamacalataki ena itekitekivu ni ulutaga qo, e dau nuitaka ga nona kaukaua me walia kina nona leqa. Ia e mani vulica na bula kei na cakacaka vakaitalatala i Jisu, e kauaitaka sara vakabibi na nodrau veiwekani voleka o Jisu kei na Tamana vakalomalagi. Na cava e yaco? E tukuna o Atsuko: “Au sa qai kila na ibalebale ni tiko e dua na tamaqu kei na vuna meu vakanuinui kina vua.” E tomana: “Au vakila na bula vakacegu kei na marau. E sega ni dua na ka meda leqataka.”

E yaga vakacava noda okati Jiova me Tamada? Era dau lomani ira nodra itubutubu na gone, ra qai vinakata mera vakamarautaki ira. Ni yavutaki ena loloma, e dau cakava o Jisu na ‘ka kece e vinakata o Tamana.’ (Joni 8:29) Koya gona noda lomana na Tamada vakalomalagi, ena uqeti keda meda ‘vakavinavinakataki’ koya.​—Maciu 11:25; Joni 5:19.

Na Tamada ena ‘Taura Matua na Ligada iMatau’

E vakarautaka tale ga na Tamada vakalomalagi na yalona tabu me “dauveivuke.” E tukuna o Jisu ni yalo tabu ena “vakatakila vei kemudou na ka dina kece.” (Joni 14:​15-17; 16:​12, 13) Eda na kilai koya vinaka kina na Tamada, ena “talaraki [tale ga] na veika e sa vakawakana tu.” Qori na ivakavuvuli vakatamata, nanuma cala, se na ivakavuvuli sega ni matata ena qai “veisautaka na nanuma kece [qori] me vakamalumalumutaki vei Karisito.” (2 Kor. 10:​4, 5) Koya gona meda kerea vei Jiova nona “dauveivuke,” da qai nuidei tale ga ni na ‘solia na Tamada mai lomalagi na yalo tabu vei ira era kerea.’ (Luke 11:13) E veiganiti gona meda kerea na veivuke ni yalo tabu meda toro voleka kina vei Jiova.

Ni lako vata tiko kei tamana e dua na gonelailai, ena sega ni rere, ena nuidei tale ga ni kila ni na taqomaki koya o tamana. Ke da okata me Tamada o Jiova, eda na vakacegui ena vosa qo: “Sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.” (Aisea 41:13) E ka dokai dina meda “lako vata” kei na Kalou me tawamudu. (Maika 6:8) Meda cakava tiko mada ga na lomana, eda na vakila kina na marau, nona loloma, kei na veitaqomaki, nida okati Jiova me Tamada.

[iVakamacala e ra]