Vakamareqeta Nomu iTavi ena iVavakoso

“Sa cakava na Kalou na veitiki ni yago me tu yadua, me vaka na nona lewa.”​—1 KOR. 12:18.

1, 2. (a) Eda kila vakacava ni tiko na noda itavi ena ivavakoso? (b) Na taro cava ena veivosakitaki ena ulutaga qo?

ME TEKIVU mai na nodra gauna na Isireli makawa, e vakayagataka o Jiova nona ivavakoso me vakani ira kina vakayalo nona tamata qai dusimaki ira. Kena ivakaraitaki, nira valuta oti na koro o Ai na Isireli, a “wilika [o Josua] na vosa kece ni vunau, na vosa ni veivakalougatataki kei na vosa ni veivakarusai, me vaka na ka kecega sa volai e nai vola ni vunau . . . e na matadra nai soqosoqo taucoko ni Isireli.”​—Josua 8:34, 35.

² Ena imatai ni senitiuri S.K., a tukuna na yapositolo o Paula vua na qase ni ivavakoso o Timoci, ni “vale ni Kalou” na ivavakoso vaKarisito, e ‘duru e yavu ni ivakavuvuli dina.’ (1 Tim. 3:15) Nikua, e dusi ira tiko na lotu vaKarisito dina e vuravura raraba na “vale” ni Kalou. Ena wase 12 ni imatai ni nona ivola uqeti vakalou o Paula vei ira e Korinica, a vakatauvatana o koya na ivavakoso ina dua na yago. E tukuna ni duidui na nodra itavi na tikiniyago, ia era yaga kece. E vola o Paula ni “tuvana na Kalou . . . na veitiki ni yago yadua me vaka na lomana.” A vakaraitaka tale ga “na veitiki ni yagoda malumalumu sa yaga sara ki na noda bula kei na veitiki ni yagoda e sega so ni rairai vinaka eda sa dau qarauna vakalevu.” (1 Kor. 12:18, 23, VV) Ena vuku ni tikina qo, na nona itavi e dua e yalodina ena vale ni Kalou e sega ni vinaka se lailai sobu ni vakatauvatani kei na nona itavi e dua tale na tacina lotu vaKarisito yalodina. E duidui ga na nodra itavi. Eda na kila vakacava na noda itavi ena ituvatuva ni Kalou, da qai vakamareqeta? Na cava eso na ka ena vakatau kina na noda itavi ena ivavakoso? Eda na vakaraitaka vakacava ‘na noda toso’?​—1 Tim. 4:15, NW.

O na Vakamareqeta Vakacava na Nomu iTavi?

3. Na cava e dua na sala eda na kila kina noda itavi ena ivavakoso? Eda na vakamareqeta vakacava?

³ Na sala eda na kila kina noda itavi ena ivavakoso da qai vakamareqeta, ya noda tokona “na dauveiqaravi yalo dina ka vuku,” kei na kena iLawalawa Dauvakatulewa. (Wilika Maciu 24:45-47, VV.) E vinaka meda dikeva na ivakarau ni noda talairawarawa ina veidusimaki ni dauveiqaravi qo. Me kena ivakaraitaki, ena veiyabaki sa sivi eda dusimaki ena veika e vauca na isulusulu kei na sasauni, na ka ni veivakamarautaki kei na vakayagataki cala ni Internet. Eda talairawarawa beka ena ivakasala yaga qo meda taqomaki kina vakayalo? Vakacava na veivakadreti me dua noda ituvatuva dei ni sokalou vakavuvale? Eda talairawarawa beka ina ivakasala qori, da qai tuvanaka e dua na yakavi ni sokalou vakavuvale? Ke da dawai, e tiko beka na gauna eda vuli iVolatabu kina? Ena vakalougatataki keda yadudua o Jiova, vaka kina vakavuvale ke da muria deivaki na nona veidusimaki na dauveiqaravi yalodina.

4. Na cava meda nanuma tiko nida vakatulewataka eso na ka e baleti keda?

⁴ Era nanuma eso ni vakatau ga vei keda na noda digitaka na ka ni veivakamarautaki, isulusulu kei na sasauni. Ia na lotu Vakarisito e vakamareqeta nona itavi ena ivavakoso, ena sega ni yavutaka nona vakatulewa ena nona nanuma ga. Meda dau vakasamataka tale ga vakabibi na rai i Jiova e volai ena nona Vosa na iVolatabu. Na itukutuku e tu kina me ‘cinava na yavada, me vakararamataka tale ga na noda sala.’ (Same 119:105) E ka vakayalomatua gona meda nanuma ni noda vakatulewa ena tara na noda cakacaka vakaitalatala kei ira tale eso ena loma kei na taudaku ni ivavakoso.​—Wilika 2 Korinica 6:3, 4.

5. Na cava meda qarauna kina na yalo ni via lewai keda ga?

⁵ E takalevu na “yalo sa cakacaka tiko e lomadra era sa dautalaidredre,” e vaka tu na cagi eda ceguva. (Efeso 2:2) E rawa ni vakacalai keda na yalo qori meda nanuma kina ni sega ni yaga me dusimaki keda na isoqosoqo i Jiova. Eda sega ni via vakataki Tiotirifi ena nona ‘sega ni via vakacegui Joni na yapositolo. (3 Joni 9, 10) Eda na qarauna meda kua ni bucina na yalo ni via lewai keda ga. Meda kua mada ga ni tauca na vosa se da cakava na ka meda saqata kina na ituvatuva e vakayagataka tiko o Jiova nikua me dau dusimaki keda. (Tiko 16:1-3) Meda vakamareqeta ga na noda itavi dokai meda tokoni koya na dauveiqaravi. Meda tu vakarau gona na talairawarawa qai yalomalumalumu vei ira na liutaka tiko na ivavakoso.​—Wilika Iperiu 13:7, 17.

6. Na cava meda vakasamataka vinaka kina na keda ituvaki?

⁶ Dua tale na sala eda na vakamareqeta kina noda itavi ena ivavakoso oya meda kila vinaka na keda ituvaki, da qai saga meda ‘doka na noda cakacaka vakavunau’ me vakalagilagi kina o Jiova. (Roma 11:13) So era painia tudei. So era cakacaka ena so tale na taba ni veiqaravi vakatabakidua me vaka na daukaulotu, ivakatawa dauveilakoyaki, se ra lewe ni vuvale e Peceli era tu e veiyasa i vuravura. Levu na mataveitacini era veivuke ena tara Kingdom Hall. E dua na iwase levu ni dauveiqaravi i Jiova era qarava vakavinaka na nodra bula vakayalo na nodra vuvale, ra qai cakacaka vakavunau e veimacawa. (Wilika Kolosa 3:23, 24.) Nida tu vakarau na cakava na cakacaka ni Kalou, da qai qaravi koya mai vu ni lomada, eda na nuidei ni tiko na noda itavi ena nona ituvatuva.

Eso na Ka ena Vakatau Kina na Noda iTavi

7. Vakamacalataka se na tara vakacava noda veiqaravi ena ivavakoso na keda ituvaki.

⁷ E bibi meda vakalewa vinaka na keda ituvaki, ni qo e dua toka na yavu ena vakatau kina na ka eda cakava ena ivavakoso. Me kena ivakaraitaki, e duidui na itavi ena qarava e dua na tacida tagane ena ivavakoso ni vakatauvatani kei na dua na tacida yalewa. Noda qaravi Jiova ena vakatau ena noda yabaki ni bula, ituvaki vakayago, kei na so tale na ka. E tukuna na Vosa Vakaibalebale 20:29: “Sa nodra ka ni lagilagi na cauravou ni ra sa kaukauwa: kei na nodrai ukuuku na qase na ulu sika.” E rawa nira cakacaka vagumatua na itabagone ena ivavakoso ni tu vei ira na kaukaua, ena yasana adua era yaga vakalevu ina ivavakoso na itabaqase nira vuku ra qai qaseta na bula. Meda nanuma tale ga ni ka kece eda cakava ena isoqosoqo i Jiova e rawa ga ena vuku ni loloma soli wale ni Kalou.​—Caka. 14:26; Roma 12:6-8.

8. E vakatau vakacava na noda veiqaravi ena ivavakoso na ka eda via cakava?

⁸ Na nodrau ivakaraitaki e rua na veitacini yalewa e vakaraitaka e dua tale na yavu ena vakatau kina na ka eda cakava ena ivavakoso. Rau rawata ruarua nodrau vuli, qai tautauvata vinaka na kedrau ituvaki. A uqeti rau na nodrau itubutubu me rau sauva na cakacaka vakapainia tudei ni oti ga nodrau vuli. Ni oti ga nodrau vuli, a cakacaka vakapainia sara e dua vei rau, qai cakacaka saumi e dua tale. Na cava e duidui kina nodrau vakatulewa? A vakatau sara ga vei rau na ka rau via cakava. E tautauvata tale ga qori kei keda. Meda vakasamataka vakabibi na ka eda via cakava ena noda qarava na Kalou. Eda rawa beka ni vakalevutaka noda veiqaravi, ke vinakati mada ga kina meda veisautaka na keda ituvaki?​—2 Kor. 9:7.

9, 10. Na cava meda cakava ke sega ni gu na lomada meda vakarabailevutaka na noda qaravi Jiova?

⁹ Vakacava ke sega ni gu na lomada meda vakarabailevutaka noda qaravi Jiova, da qai vakamumuri wale tu ga ena ivavakoso? E tukuna o Paula ena nona ivola vei ira e Filipai: “Ni sai koya na Kalou sa cakacaka e na lomamudou me vaka na nona lewa vinaka, mo dou nakita ka kitaka talega.” Io, e rawa ni uqeta na lomada o Jiova me veisau na ka eda vinakata, se na veika eda gadreva.​—Fpai. 2:13; 4:13.

¹⁰ Eda rawa gona ni kerei Jiova me uqeti keda meda cakava na lomana. E cakava qori o Tui Tevita e Isireli makawa. A masuta: “Kemuni Jiova, mo ni vakatakila mai vei au na nomuni sala; ni vakavulici au e na nomuni lakolako. Tuberi au e na nomuni dina, ka vakavulici au: ni sai kemuni na Kalou na noqui vakabula; ka’u sa waraki kemuni e na veisiga kecega.” (Same 25:4, 5) Eda rawa ni cakava tale ga qori nida kerei Jiova me vu mai lomada noda vakamarautaki koya. Nida vakasamataka na nodrau kauaitaka na Kalou o Jiova kei Luvena na ivakarau ni noda veiqaravi, ena tuburi keda na yalo ni vakavinavinaka. (Maciu 26:6-10; Luke 21:1-4) Na yalo ni vakavinavinaka qori ena uqeti keda meda toso vakayalo. E vakaraitaka na parofita o Aisea na rai meda vakatotomuria. Ni taroga o Jiova: “Ko cei me’u tala, ia ko cei ena lako e na vuku i keitou?” a sauma na parofita: “Koi au oqo; mo ni talai au.”—Aisea 6:8.

Toso Vakayalo —Ena Sala Cava?

11. (a) Na cava mera sauva kina na mataveitacini tagane na itavi ena isoqosoqo? (b) Ena rawata vakacava na tacida tagane me qarava na itavi ena ivavakoso?

¹¹ Era papitaiso ena yabaki vakacakacaka ni 2008 e le 289,678. E matata vakasigalevu ni vinakati na mataveitacini tagane mera veiqaravi. Ena raica vakacava qo na tagane lotu vaKarisito? Ena saga me sauva na ivakatagedegede vakaivolatabu ni dauveiqaravi ni ivavakoso kei na qase ni ivavakoso. (1 Tim. 3:1-10, 12, 13; Taito 1:5-9) Ena rawata vakacava na tacida tagane na ivakatagedegede vakaivolatabu qori? Me dau gumatua ena cakacaka vakavunau, me qarava vinaka na itavi e lesi kina ena ivavakoso, me vakavinakataka nona saumitaro ena soqoni, kei na nona kauaitaki ira na tacina vakayalo. Ni cakava qori, e vakaraitaka ni vakamareqeta nona itavi ena ivavakoso.

12. Era na vakaraitaka vakacava na itabagone nodra gugumatua na qaravi Jiova?

¹² Na toso cava e rawa nira cakava na cauravou ena ivavakoso, vakabibi o ira na itabagone? E rawa nira saga mera “yalomatua,” ra qai “vuku vakayalo” nira vulica na iVolatabu. (Kolo. 1:9) Ena yaga tale mera gonevuli gugumatua ni Vosa ni Kalou, ra qai vakaitavi wasoma ena cakacaka vakavunau. Mera saga tale ga na cauravou mera rawata na ivakatagedegede mera curu ina “katuba levu ka yaga,” ni levu tu na taba ni veiqaravi vakatabakidua. (1 Kor. 16:9) Nodra vakatulewataka mera qaravi Jiova ena sala qo e veivakacegui dina, era na vakalougatataki tale ga kina vakalevu.​—Wilika Dauvunau 12:1.

13, 14. Era na vakaraitaka vakacava na yalewa matua nira vakamareqeta nodra itavi ena ivavakoso?

¹³ E rawa tale ga nira vakaraitaka na tacida yalewa nira vakamareqeta nodra itavi nira vakayacora na ka e tukuna na Same 68:11 (NW): “Sa solia na vosa o Jiova: era mataivalu levu na yalewa sa tukuna na itukutuku vinaka.” Dua na sala era vakavinavinakataka kina nodra itavi ena ivavakoso oya na nodra veivakatisaipelitaki. (Maciu 28:19, 20) Nira vakaitavi vakalevu ena cakacaka vakaitalatala kei na nodra vakuai ira, era vakaraitaka kina na tacida yalewa lotu vaKarisito nira vakamareqeta nodra itavi ena ivavakoso.

¹⁴ A vola o Paula vei Taito: “O ira talega na yalewa qase [“matua,” NW] . . . me ra dauvakatavulica na ka vinaka; me ra vakayalomatuataki ira na yalewa era tamata bula, me ra lomani ira na watidra, me ra lomani ira na luvedra, me ra lomavuku, me ra lomasavasava, me ra dautiko mai nodratou, me ra yalovinaka, me ra dautalairawarawa vei ira na watidra, me kakua kina ni vosavakacacataki na vosa ni Kalou.” (Taito 2:3-5) Era veivakauqeti vakalevu ena ivavakoso na yalewa matua vakayalo! Era ivakaraitaki vinaka ena nodra vakamareqeta na nodra itavi ena ivavakoso nira doka na tacida tagane era veiliutaki, ra qai vakatulewataka vakayalomatua na veika e vauca na isulusulu, sasauni kei na ka ni veivakamarautaki.

15. Na cava me cakava e dua na tacida yalewa e dawai me kua kina ni galili?

¹⁵ Ena so na gauna ena sega ni matata vua na tacida yalewa dawai na nona itavi ena ivavakoso. E tukuna e dua na tacida yalewa e sotava na ituvaki qo: “Na bula vakadawai e rawa ni galili ena so na gauna.” Ni tarogi se vosota vakacava na ituvaki ya, e tukuna: “Na masu kei na vuli vakataki au e vakamatatataka tale vei au na noqu itavi ena ivavakoso. Au vulica na sala e raici au kina o Jiova. Au qai saga meu vukei ira eso tale ena ivavakoso. E uqeti au meu veikauaitaki, meu kua ni nanumi au ga.” A tukuna o Jiova vei Tevita ena Same 32:8: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” Io, e kauaitaki keda kece nona tamata o Jiova, okati kina o ira na tacida yalewa era dawai, ena vukei keda kece meda kila na noda itavi ena ivavakoso.

Marautaka Nomu iTavi!

16, 17. (a) Na cava e vakatulewa vinaka duadua kina noda ciqoma na veisureti i Jiova meda lewe ni nona isoqosoqo? (b) Eda na vakamareqeta vakacava noda itavi ena isoqosoqo i Jiova?

¹⁶ Sa vakarautaka vakayalololoma o Jiova na sala meda volekati koya kina. E tukuna o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:44) E vica vata na bilioni na iwiliwili ni lewenivanua e vuravura, e sureti keda yadudua o Jiova meda lewena nona isoqosoqo ena gauna qo. E vakatulewa vinaka duadua na noda ciqoma na veisureti qori. E vakainaki qai vakaibalebale kina noda bula. Sa na bau wacava noda marau kei na noda lomavakacegu nida kila ni tiko noda itavi ena ivavakoso!

¹⁷ E lagata na daunisame: “I Jiova, au sa vinakata na vale ko ni sa dautiko kina.” E tomana: “Sa tu ga na yavaqu e na vanua vinaka: ka’u na vakavinavinaka vei Jiova e nai soqosoqo.” (Same 26:8, 12) E lesia na Kalou dina na noda itavi yadua ena nona isoqosoqo. Eda na vakamareqeta na noda itavi nida muria tiko ga na veidusimaki vakalou, da qai ogaoga na qarava na Kalou.

O se Nanuma Tiko?

• Na cava eda kaya kina ni lotu vaKarisito kece e tiko nodra itavi ena ivavakoso?

• Eda na vakaraitaka vakacava nida vakamareqeta noda itavi ena isoqosoqo ni Kalou?

• Na cava eso na ka ena vakatau kina noda itavi ena ivavakoso?

• Eda na vakamareqeta vakacava na lotu vaKarisito na noda itavi ena ituvatuva ni Kalou, se da qase se gone?

[iYaloyalo ena tabana e 16]

Era na sauva vakacava na tagane na itavi ena ivavakoso?

[iYaloyalo ena tabana e 17]

Era na vakaraitaka vakacava na tacida yalewa nira vakamareqeta nodra itavi ena ivavakoso?