Bulataka na Loloma e Sega ni Seavu Rawa
“E vosota na ka kece . . . E sega vakadua ni seavu na loloma.”—1 KOR. 13:7, 8.
1. (a) Na cava e kilai me baleta na loloma? (b) Na cava e lomani vakalevu nikua?
E LEVU na ka e tukuni me baleta na loloma. E vakacaucautaki na itovo qo, lagati tale ga na kena sere ni dodomo. Eda gadreva vakalevu na tamata na loloma. E tabaki ena ivola qai vakaraitaki ena iyaloyalo na loloma e yavutaki ena veidomoni qai volitaki tu e levu nikua. Sa sega tale ga ni lomani na Kalou nikua, ra qai sega ni veilomani na kawatamata. E dina kina na ka e kaya na iVolatabu me baleta na iotioti ni veisiga qo. Nira na “dau lomani ira ga na tamata, era na lomana na ilavo, . . . era na lomana ga na marau era sega ni lomana na Kalou.”—2 Tim. 3:1-5.
2. Na cava e veivakasalataki kina na iVolatabu me baleta na loloma e veivakacalai?
2 E rawa ni dauloloma na tamata. Ia e vakasalataki keda na Vosa ni Kalou meda qaqarauni ena loloma e veivakacalai. E tukuna na iVolatabu na ka ena yaco ke bucini e lomada na loloma va qori. (1 Tim. 6:9, 10) O nanuma lesu na ka a vola na yapositolo o Paula me baleti Timasa? Dina ni dau veitokani kei Paula, ia e lomana na vuravura. (2 Tim. 4:10) A vakasalataki ira na lotu vaKarisito o Joni na vakarerevaki ni noda lomani vuravura. (Wilika 1 Joni 2:15, 16.) Ni lomani o vuravura kei na ka e sega ni tawamudu, e sega ni uasivia na noda lomana na Kalou kei na ka e vu mai vua.
3. Na sasaga cava ena vinakati vei keda, na taro cava soti e basika kina?
3 Eda sega ni tiki kei vuravura, ia eda bula tiko kina. E ka gona ni sasaga meda valuta na rai ni vuravura me baleta na loloma e veivakacalai. E bibi gona meda qaqarauni ena veivakacalai ni loloma qo. Ena vuku i cei meda bucina da qai vakaraitaka kina na loloma? Na cava eso na ka ena dusimaki keda meda vakaraitaka kina na loloma e sega ni seavu rawa? Ena yaga vakacava noda muria qori, ena tara vakacava noda veisiga ni mataka? E bibi me yavutaki ena rai vaKalou na kedra isau meda dusimaki kina.
Vakabulabulataka Tiko ga Nomu Lomani Jiova
4. Ena tubu vakacava noda lomana na Kalou?
4 Ni bucini e dua na ka, e vakaibalebaletaki ena kena sasagataki me tubu. Vakasamataka mada nona sasaga vakaukaua na dauteitei me vakarautaka na qele kei na nona teivaka na itei. E namaka o koya me na tubu na itei ya. (Iper. 6:7) E tautauvata tale ga nida lomani Jiova, e dodonu me tubu tiko ga. Na cava meda cakava me rawa ni yaco kina qo? E dodonu meda vakalewa vinaka na lomada na vanua e bucini kina na sore ni tei ni ka dina ni Matanitu ni Kalou. Eda na cakava qori nida vulica vagumatua na Vosa ni Kalou, me vakalevutaka noda kilai koya. (Kolo. 1:10) Nida tiko da qai vakaitavi vakawasoma ena soqoni, ena vakalevutaka tale ga noda kilaka. Eda dau sasagataka vagumatua meda vakalevutaka noda kilaka?—Vkai. 2:1-7.
5. (a) Eda na kila vakacava na itovo uasivi i Jiova? (b) Na cava o rawa ni tukuna me baleta na lewadodonu, vuku kei na kaukaua ni Kalou?
5 E vakavotui na itovo i Jiova ena nona Vosa. Nida vulica na iVolatabu da qai sasagataka na kilaka me baleti koya, eda na vakavinavinakataka kina nona itovo talei me vaka na lewadodonu, kaukaua, vuku, kei na nona loloma uasivi. Nona ivalavala e yavutaki ena lewadodonu kei na nona lawa uasivi. (Vkru. 32:4; Same 19:7) Eda rawa tale ga ni vakasamataka na cakacaka kece i Jiova da qai qoroya na uasivi ni nona vuku. (Same 104:24) E vakadeitaka tale ga na lomalagi kei na vuravura ni vu ni kaukaua kece o Jiova qai sega ni vakatauvatani rawa nona kaukaua.—Aisea 40:26.
6. E vakaraitaka vakacava na Kalou ni dauloloma, ena uqeti iko vakacava qo?
6 Na cava e kilai mai na itovo talei ni Kalou, na loloma? E uasivi qai yaga kece vei keda na kawatamata. E vakaraitaka na Kalou na loloma qori, nona vakarautaka na isoro me vakabulai kina na kawatamata. (Wilika Roma 5:8.) E tu vakarawarawa na isolisoli qo vei ira na kawatamata kece. Ia o ira ga na doka na loloma ni Kalou ra qai vakabauta na Luvena, ena yaga vei ira na isolisoli qo. (Joni 3:16, 36) Nona soli luvena mai na Kalou me isoro ni noda ivalavala ca, e dodonu me uqeti keda meda dolea lesu nona loloma.
7, 8. (a) Me rawa nida lomana na Kalou, na cava ena vinakati vei keda? (b) Na ituvaki cava era na muria tiko ga kina na dauveiqaravi ni Kalou na nona ivunau?
7 Eda na vakaraitaka vakacava noda lomana na Kalou, nida dolea lesu na ka e cakava ena vukuda? E vakasakiti dina na isaunitaro uqeti vaKalou qo: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.” (1 Joni 5:3) Io, nida lomana na Kalou o Jiova, ena uqeti keda kina meda muria nona ivunau. Ya na vuna eda tukuna kina na yacana kei na nona Matanitu, ni na yaga vei ira tale eso. Nida cakava qori mai vu ni lomada, e vakaraitaka nida muria na ivunau ni Kalou ena inaki savasava.—Maciu 12:34.
8 Era sasaga tiko ga vagumatua na tacida e veiyasa i vuravura mera muria na ivunau ni Kalou, dina ni sega ni kauaitaki qai sega ni taleitaki vakalevu na itukutuku ni Matanitu ni Kalou. Era sega ni vakawelewele ena nodra saga me vakayacori vinaka na cakacaka vakaitalatala. (2 Tim. 4:5) Ena uqeti keda tale ga qo meda gumatua ni tukuna vei ira tale eso na veika me baleta na Kalou kei na noda muria kece nona ivunau.
Vuna Eda Lomana Kina Noda Turaga o Jisu Karisito
9. Na cava a vosota o Karisito kei na cava a uqeti koya?
9 Me ikuri ni noda lomana na Kalou, e tu tale ga e levu na vuna eda lomana kina na Luvena. Eda sega ni bau raici Jisu, ia noda vulica e levu na ka me baleti koya, ena titobu kina noda lomani koya. (1 Pita 1:8) Na cava eso na ka e vosota o Jisu? Ni cakava tiko na loma i Tamana, era sevaki koya na tamata qai sega ni dua na yavu vinaka era cakava kina qori. A vakacacani, beitaki vakailasu, vosabeci, qai sotava eso tale na ituvaki dredre. (Wilika Joni 15:25.) Nona lomani Tamana o Jisu a uqeti koya kina me vosota na ka dredre kece qori. Ni uqeti koya gona na loloma, a rawa ni vakarautaka kina nona isoro ni veivoli vei keda kece, ena nona mai mate.—Maciu 20:28.
10, 11. Ena ka kece e cakava o Karisito ena vukuda, na cava meda nakita dei meda cakava?
10 E uqeti keda na ka a cakava o Jisu. Nida vakasamataka na ka a cakava ena vukuda, ena qaqaco kina noda lomani koya. Nida nona imuri, e bibi gona meda bucina da qai vakaraitaka tiko ga na loloma vaKarisito. Nida cakava qori eda na muria tiko ga kina na nona ivakaro meda vunautaka na Matanitu ni Kalou kei na noda veivakatisaipelitaki.—Maciu 28:19, 20.
11 Me vaka ga na loloma a vakaraitaka o Karisito, ena uqeti keda qo meda vakacavara vinaka noda ilesilesi ni bera na icavacava. (Wilika 2 Korinica 5:14, 15.) Na loloma a vakaraitaka o Karisito e tiki bibi ni kena vakayacori na inaki ni Kalou vei keda. Na ivakaraitaki e kotora meda muria vakavoleka, e rawa kina meda vakaitavi ena kena vakayacori na inaki ni Kalou. Me rawa qo, ena vinakati meda lomana na Kalou ena noda vinaka taucoko. (Maciu 22:37) Noda vulica kei na noda muria na ivakavuvuli i Jisu, eda sa vakaraitaka tiko nida lomani koya, da qai nakita dei meda tokona na cecere ni Kalou ena ituvaki cava ga, me vaka ga a cakava o Jisu.—Joni 14:23, 24; 15:10.
Saga Tiko ga na iValavala sa Uasivi Cake
12. Na cava e vakaibalebaletaka o Paula nona tukuna na “ivakarau e uasivi”?
12 E vakatotomuri Jisu vinaka na yapositolo o Paula. Nona vakatotomuri Karisito vakavoleka, a rawa kina vua me vosa ena doudou ena nona uqeti ira na tacina vakayalo mera vakatotomuri koya. (1 Kor. 11:1) A uqeti ira na lotu vaKarisito e Korinica mera gumatua tiko ga ena nodra saga na isolisoli ni yalo tabu me vaka na veivakabulai kei na duivosavosa e daucaka ena imatai ni senitiuri. Ia e tukuna o Paula na ka e bibi cake me vakaliuci. E vakamacalataka ena 1 Korinica 12:31: “Au vakaraitaka vei kemuni na ivakarau e uasivi.” E tukuni tiko ena wase tarava na ivakarau uasivi ni loloma. Ena sala cava e ivakarau uasivi kina na loloma? E vakamatatataka o Paula na kena ibalebale. (Wilika 1 Korinica 13:1-3.) Kaya mada ke tu vei Paula na kaukaua me cakava kina eso na ka e veivakurabuitaki, qai sega vua na loloma, cava ena rawata? Sega sara ni dua na ka! Ena veiuqeti ni yalo tabu a vakamacalataka kina na ka dina. E vakasakiti dina nona tukuna na vakasama qo, ena rawa ni yaga tale ga vei keda!
13. (a) Na cava na tikinivolatabu ni yabaki 2010? (b) Ena sala cava e sega ni seavu kina na loloma?
13 E vakamacalataka tarava o Paula na ibalebale dina ni loloma. (Wilika 1 Korinica 13:4-8.) Mo dikeva mada na ivakarau ni nomu loloma. Vakasamataka vakavinaka na iotioti ni yatuvosa ena tikina e 7 kei na imatai ni yatuvosa ena tikina e 8: ‘Na loloma e vosota na ka kece. E sega vakadua ni seavu,’ qori noda tikinivolatabu ni yabaki 2010. Ena tikina e 8, e cavuta o Paula ni na oti yani na isolisoli ni yalo tabu, qo e okati kina na parofisai kei na duivosavosa e dau caka ena gauna a tauyavu kina na ivavakoso vaKarisito. E bibi gona me vakaraitaki tiko ga na loloma. O Jiova e vu ni loloma, qai tawamudu. Koya gona ena sega ni seavu na nona loloma se me oti rawa. Ena dei tiko ga na nona itovo na noda Kalou tawamudu.—1 Joni 4:8.
Na Loloma e Vosota na Ka Kece
14, 15. (a) Ena yaga vakacava na loloma nida vosota na ka dredre? (b) Na cava e sega kina ni cakitaka nona vakabauta e dua na tacida itabagone?
14 Era vosota rawa vakacava na lotu vaKarisito na ituvaki dredre, kei na leqa e dau basika? Qori e yavutaki ena nodra loloma dina vaKarisito. Na loloma va qo e sega ni baleta ga na noda solia na ka eda taukena. E okati kina na noda yalodina tiko ga me yacova na mate ena vuku i Karisito. (Luke 9:24, 25) Meda vakasamataka mada nodra yalodina na iVakadinadina donuya na iKarua ni iValu levu, nira vakalolomataki ena keba ni veivakararawataki, keba ni veivakacakacakataki kei na valeniveivesu.
15 A vakaraitaki vinaka ena tikina qo o Wilhelm e dua na itabagone ni Jamani. A rawa sara ga ni cakitaka nona vakabauta, ia a yalodina tiko ga, dina nira yatuni tu e matana na ilawalawa sotia ni Nazi mera vanai koya. Ena nona ivola ni tatau vei ratou nona matavuvale, a vola: “E bibi duadua meda lomana na Kalou, me vaka ga a vakarota noda iliuliu o Jisu Karisito. Ke da yalodina vua, ena vakalougatataki keda o koya.” E muri a qai tabaki ena dua na ulutaga ni Vale ni Vakatawa, a vola kina e dua nona lewe ni vuvale, ni kaya: “Ena ituvaki dredre kece qori, keitou saga vakavuvale me vakaliuci tiko ga na neitou lomana na Kalou.” E levu na tacida ena gauna qo era vakaraitaka tale ga na loloma va qori nira bala e valeniveivesu mai Armenia, Eritrea, Sauca Korea, kei na so tale na vanua. Era yalodina tiko ga na tacida qo ena nodra lomani Jiova.
16. Na ituvaki dredre cava era vosota voli na tacida e Malawi?
16 E duidui na ituvaki dredre e vakilai ena levu na vanua, e vakatovolei kina nodra vakabauta kei na nodra vosota na tacida. Rauta ni 26 na yabaki nodra vosota voli na iVakadinadina i Jiova e Malawi, na vakatatabu ni matanitu, veitusaqati kei na levu tale na ka vakaloloma. E vakalougatataki nodra vosota. Gauna e tekivu kina na veitusaqati, era le 18,000 na iVakadinadina i Jiova ena vanua ya. Ni oti e tolusagavulu na yabaki, e tubu na kedra iwiliwili me 38,393. Levu na vanua era vakila tale ga na tubu va qori.
17. Na cava era sotava eso ena vuvale era sega ni tiko kece ena dina? Na cava era vosota rawa kina na ituvaki dredre?
17 E ka mosimosi toka nira vakacacani na dauveiqaravi ni Kalou, ia e duatani sara ke vakacacani e dua na lotu vaKarisito ena nona vuvale. E rawa ni vakavu lomaocaoca o ira na weka se lewe ni vuvale. A sega li ni tukuna o Jisu ni na yaco qo? Io, e levu era vakadinadinataka na dina ni nona vosa. (Maciu 10:35, 36) Levu na itabagone era vosota nodra veitusaqati nodra itubutubu era sega ni tiko ena vakabauta. Eso era vakatalai tani mai vale, ra qai tu vakarau na iVakadinadina yalololoma mera kauti ira e nodra vale. So era sega tale ni qai okati mera lewe ni vuvale. Na cava era vosota rawa kina na ituvaki dredre kece ya? E sega wale ga ni nodra veilomani vakamataveitacini, ia nodra lomani Jiova dina kei na Luvena.—1 Pita 1:22; 1 Joni 4:21.
18. E yaga vakacava vei rau na veiwatini lotu vaKarisito na loloma e vosota na ka kece?
18 E levu tale na ituvaki ena yaga kina na loloma e vosota na ka kece. Ena bula vakawati, na loloma e rawa ni rau doka kina na veiwatini na vosa i Jisu ni kaya: “Na ka sa vauca vata na Kalou me kua ni tawasea na tamata.” (Maciu 19:6) Ni ‘vakararawataki na yagodrau,’ e bibi gona vei rau na veiwatini lotu vaKarisito me rau kua ni guilecavi Jiova ena nodrau bula vakawati. (1 Kor. 7:28) E tukuna nona Vosa ni ‘loloma e vosota na ka kece ga.’ Koya gona ni rau sulumaka na itovo qo, erau na duavata kina, ena kaukaua qai dei tale ga nodrau bula vakawati.—Kolo. 3:14.
19. Na cava era cakava na dauveiqaravi ni Kalou ni yaco na leqa tubukoso?
19 Na loloma e vosota na ka kece, e yaga tale ga ena gauna ni leqa tubukoso. E vakadinadinataki qori ena gauna a yaco kina na uneune ena ceva kei Peru kei na vakacaca ni cagilaba o Katrina ena veivanua e Mereke. Levu na tacida e vakacacani nodra vale kei na nodra iyau. Na loloma e uqeti ira kina na ivavakoso e vuravura raraba mera cautaka na iyaya ni vakacoko, kei ira na bolecakacaka mera veivuke ena taravaki ni vale kei na vakavinakataki ni Kingdom Hall. E dusia vakamatata na ivakaraitaki qori nira dau veilomani ra qai veikauaitaki na tacida ena veigauna kece ga.—Joni 13:34, 35; 1 Pita 2:17.
Sega ni Seavu na Loloma
20, 21. (a) Na cava e uasivi duadua kina na loloma? (b) Na cava mo dau loloma kina?
20 Eda vakadinata na dauveiqaravi i Jiova nikua ni ka vakayalomatua na sasagataki ni loloma. E uasivi ena veituvaki kece ni bula. Dikeva mada nona vakabibitaka na ka dina qori na yapositolo o Paula. Kena imatai, a tukuna ni na seavu yani na isolisoli ni yalo tabu, ena qai yaco me matua sara na ivavakoso lotu vaKarisito. E tinia nona ivakamacala: “Ena dei tu ga na tolu na ka qo, na vakabauta, na inuinui, na loloma; vei iratou qo e uasivi ga na loloma.”—1 Kor. 13:13.
21 Ena yaco dina ga na ka eda vakabauta, koya gona ena sega tale ni gadrevi na vakabauta ena gauna era vakayacori kece kina. Eda na sega ni nuitaka tale meda raica na veika e yalataki ni sa vakavoui na ka kece ga. Ia vakacava na loloma? Ena sega ni seavu rawa, se me oti rawa, ena dei tu ga. Nida vakanamata tiko ina bula tawamudu, ena qai levu tale na ka eda na vulica me baleta na loloma ni Kalou. Nida cakava na loma ni Kalou ena noda vakaliuca na loloma e sega ni seavu rawa, eda na bula tawamudu kina.—1 Joni 2:17.
O na Sauma Vakacava?
• Na cava meda qarauna kina na loloma e veivakacalai?
• Na cava eda na vosota ni tiko vei keda na loloma?
• Ena sega ni seavu vakacava na loloma?
[Tikina bibi ena tabana e 27]
Na tikinivolatabu ni yabaki 2010: ‘Na loloma e vosota na ka kece. E sega vakadua ni seavu.’—1 Kor. 13:7, 8.
[iYaloyalo ena tabana e 25]
Noda lomana na Kalou ena uqeti keda meda vakadinadinataki koya
[iYaloyalo ena tabana e 26]
Na loloma e uqeti ira na tacida e Malawi mera vosota kina na ituvaki dredre