“Tukuna na Vosa ni Kalou ena Doudou”

“E sobuti ira . . .na yalo tabu ra qai tukuna na vosa ni Kalou ena doudou.”​—CAKA. 4:31.

1, 2. Na cava meda sasagataka tiko ga kina me laulau noda cakacaka vakaitalatala?

NI VO e tolu na siga me mate o Jisu, a tukuna kina vei ratou nona tisaipeli: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” Ni bera ni lesu i lomalagi, a vakaroti ira nona imuri o Jisu mera ‘vakavulici ira na lewe ni veivanua kece ga mera muria na ka kece ga e vakarota vei ira.’ A yalataka vei ratou nona imuri ni na tiko vata kei ira “me yacova na ivakataotioti ni veika vakavuravura.”​—Maciu 24:14; 26:​1, 2; 28:​19, 20.

² Nida iVakadinadina i Jiova, eda na cakava tale ga na cakacaka a tekivutaki ena imatai ni senitiuri. E sega ni dua tale na cakacaka ni veivakabulai e tautauvata kei na kena vunautaki na Matanitu ni Kalou kei na veivakatisaipelitaki. Bibi gona me laulau noda cakacaka vakaitalatala! Eda na veivosakitaka ena ulutaga qo na sala ena dusimaki keda kina na yalo tabu, meda vosa kina ena doudou ena cakacaka vakaitalatala. Na rua na ulutaga ena vulici e tarava ena vakaraitaka na sala e dusimaki keda kina na yalo tabu meda maqosa ena noda veivakavulici da qai vunau wasoma.

Meda Doudou

3. Na cava ena vinakati kina na doudou nida vunautaka na itukutuku ni Matanitu ni Kalou?

³ E ka dokai dina meda cakava noda ilesilesi vaKalou ena noda kacivaka na Matanitu ni Kalou. Ia e tu tale ga eso na ka ena vakadredretaka na noda cakava na cakacaka qo. Eso era ciqoma na itukutuku vinaka ni Matanitu ni Kalou, ia e levu era vakataki ira ga ena gauna i Noa. E tukuna o Jisu nira “sega ni bau kauai me yacova ni tekivu na waluvu qai kuitaki ira kece.” (Maciu 24:​38, 39) Ra tiko tale ga o ira era dau veitusaqati kei ira na dau vakalialiai keda. (2 Pita 3:3) Era na tusaqati keda o ira era veiliutaki, o ira eda vuli vata se cakacaka vata, se o ira sara mada ga noda lewe ni vuvale. Kuria qori, ni tiko noda dui malumalumu, me vaka na mamadua kei na noda ririkotaka nodra na sega ni ciqomi keda na tamata. Levu sara na ka e rawa ni vakadredretaka noda ‘dolava na gusuda’ kei na noda vosa ena “doudou.” (Efeso 6:​19, 20) E vinakati na doudou meda vunautaka tiko ga kina na vosa ni Kalou. Eda na rawata vakacava qori?

4. (a) Na cava na doudou? (b) A doudou vakacava o Paula me vosa vei ira e Cesalonaika?

⁴ Na vosa vaKirisi e vakadewataki me “doudou” e vakaibalebaletaki me “vosa vakamatata, vosa dina, vosa vakadodonu.” Na vosa qori e dusia na “yaloqaqa, nuidei, . . . sega ni rere.” Sega ni kena ibalebale ni veibeci na doudou. (Kolo. 4:6) Nida doudou eda na saga ena gauna vata qori meda veiyaloni tiko ga kei ira na tamata kece. (Roma 12:18) Nida vunautaka tiko na itukutuku vinaka ni Matanitu ni Kalou, ena vinakati na doudou salavata kei na noda dau vosa vakamatau, meda kua kina ni vakatarabetaki ira na vakarorogo. Me rawati na doudou, ena vinakati kina eso na itovo ena sasagataki me bucini. Na doudou va qo e sega ni rawati ena noda kaukaua ga. Nira ‘vakalolomataki mai Filipai’ o Paula kei ratou nona itokani, e rawa vakacava me ratou “doudou” ni vosa vei ira e Cesalonaika? “Ena veivakaukauataki ni Kalou,” e vola o Paula. (Wilika 1 Cesalonaika 2:2.) E rawa ni vakaukauataki keda o Jiova meda doudou qai vakaotia noda rere.

5. E ratou vakaukauataki vakacava vei Jiova o Pita, Joni, kei na so tale na tisaipeli mera doudou?

⁵ Ena nodra veitusaqati na “veiliutaki [vei ira na tamata], ira na qase, kei ira na vunivola,” rau qai tukuna na yapositolo o Pita kei Joni: “Ke oni nanuma ni dodonu me keirau vakarorogo vei kemuni me kua vua na Kalou, qori moni qai lewa. Ia o keirau, keirau na sega ni galuvaka na ka keirau raica kei na ka keirau rogoca.” Rau sega ni kerea na yapositolo me tini na veivakacacani ra sotava voli, ia rau duavata o Pita, Joni kei ira na itokani vakabauta vata ena nodra masuta: “Jiova, moni rogoca na nodra veivakarerei, moni vakadoudoutaki keimami na nomuni dauveiqaravi me keimami tukuna na nomuni vosa.” (Caka. 4:​5, 19, 20, 29) Na cava e cakava o Jiova ena nodra kerekere? (Wilika Cakacaka 4:31.) E vakaukauataki ira mera doudou ni vakayagataka nona yalo tabu. E rawa ni vakaukauataki keda tale ga na yalo tabu ni Kalou. Koya gona, eda na rawata vakacava na yalo tabu ni Kalou qai dusimaki keda ena cakacaka vakaitalatala?

Rawati na Doudou

6, 7. Eda na rawata vakacava na yalo tabu ni Kalou? Tukuna eso na kena ivakaraitaki.

⁶ Meda rawata na yalo tabu e bibi meda kerea vua na Kalou. E tukuna o Jisu vei ira na vakarogoci koya: “Ke sa rawa vei kemudou na tamata ivalavala ca mo dou solia na ka vinaka vei ira na luvemudou, sa na qai wacava na Tamada mai Lomalagi ni na solia na yalo tabu vei ira era kerea vua!” (Luke 11:13) E bibi gona meda kerea tiko ga ena masu na yalo tabu. Ke da rere ni vakaitavi ena so tale na basoga ni cakacaka vakavunau​—na vunau ena salatu, vunau tawalokuci, se vunau ena vanua ni bisinisi​—e vinaka meda masu vei Jiova nida kerea nona yalo tabu me vakaukauataki keda meda doudou.​—1 Ces. 5:17.

⁷ Qori na ka e cakava e dua na yalewa lotu vaKarisito o Rosa.a Dua na siga ena nona tiko ena valenicakacaka, a wilika tiko e dua na qasenivuli rau cakacaka vata na kedra ivolatukutuku na gone era vakalolomataki mai na dua tale na Koronivuli. E rarawataka dina na qasenivuli qo na ka e wilika, mani tukuna kina, “Na cava sa manata tiko na vuravura qo?” A sega ni vakaweleweletaka o Rosa na gauna va qo me vunau sara kina. Na cava e cakava me rawa kina ni yaloqaqa ni tekivutaka na veivosaki? “Au masu vei Jiova qai kerea nona yalo tabu me vakaukauataki au,” e tukuna o Rosa. A vunau sara vua qai tuvanaka me tomani tale na veivosaki. Raica mada qo nona ivakaraitaki e dua na gonelailai yabaki lima o Milane, e vakaitikotiko e Niu Yoka. E tukuna o Milane: “Ni bera niu lai vuli, keirau dau masu kei tinaqu vei Jiova.” Na cava rau masulaka? Me doudou o Milane ni tutaka nona vakabauta me na tukuna na veika me baleta nona Kalou! E tukuna o tinana: “E yaga dina qo vei Milane ni rawa ni vakamacalataka nona vakabauta me baleta na siga ni sucu, na veiolodei kei na nona sega ni solevutaka na veisoqo va qori.” E sega beka ni vakaraitaka na tikina qo ni yaga na masu ena gauna e vinakati kina na doudou?

8. Na cava eda vulica vua na parofita o Jeremaia me baleta na sasagataki ni doudou?

⁸ Nanuma tale ga na ka e vukei koya na parofita o Jeremaia me doudou. Ena gauna e lesi Jeremaia kina o Jiova me parofita ni veimatanitu, e sauma o Jeremaia: “Ka’u sa sega ni kila vosa: ni’u sa gone ga koi au.” (Jere. 1:​4-6) Ni toso na gauna, e kaukaua qai veivakamuai nona vunau o Jeremaia, ra qai raici koya e levu me dua e kacivaka na itukutuku ni veivakarusai. (Jere. 38:4) Ena loma ni 65 na yabaki, e vunautaka tiko ena doudou na siga ni veilewai i Jiova. E kilai vinaka e Isireli nona yaloqaqa kei na nona doudou. E vakadinadinataki qo ni oti e 600 na yabaki, qo ena nona dau doudou ena vosa o Jisu, era nanuma kina e levu ni qo ga o Jeremaia e vakaturi tale mai na mate. (Maciu 16:​13, 14) A valuta vakacava o Jeremaia nona mamadua? E tukuna o koya: “Sa tu e lomaqu [na vosa ni Kalou] me vaka na bukawaqa, sa sogo tu e na suiqu, ia ka’u sa oca ni’u kinoca.” (Jere. 20:9) Io, na vosa i Jiova e vakaukauataki Jeremaia qai uqeti koya me vosa.

9. E rawa ni uqeti keda vakacava na vosa ni Kalou me vaka ga e yaco vei Jeremaia?

⁹ Ena ivola i Paula vei ira e Iperiu, e vola kina: “E bula na vosa ni Kalou qai kaukaua, e gata cake mai na iseleiwau batirua, e suaka me wasea na yagoda kei na lomada, na noda isema kei na uro e loma ni suida, me vakavotuya na nanuma kei na inaki ni lomada.” (Iper. 4:12) Na itukutuku se vosa ni Kalou ena uqeti keda me vaka ga a yaco vei Jeremaia. Dina nira vakayagataki na tagane mera vola na iVolatabu, ia e sega ni yavutaki ena vuku vakatamata na ivola qori, ia e vakavuna ga na Kalou. Ena 2 Pita 1:​21, eda wilika: “Ni sega ni vu ena lewa ni tamata na parofisai, e tukuna ga na tamata na ka e vinakata na Kalou ena veiuqeti ni yalo tabu.” Nida tikica na gauna meda vulica kina na iVolatabu, ena levu na itukutuku uqeti vaKalou ena kasa ena noda vakasama. (Wilika 1 Korinica 2:10.) Ena vaka na “bukawaqa” na itukutuku qori qai dredre meda galuvaka.

10, 11. (a) Me vakacava noda ivakarau ni vuli ke da vinakata meda doudou ena vosa? (b) Tukuna e dua na ikalawa o na muria mo vakavinakataka kina nomu ivakarau ni vuli.

¹⁰ Me yaga noda vuli iVolatabu vakataki keda, ena vinakati me muri e dua na ivakarau ni vuli me tara sara ga na lomada. Kena ivakaraitaki, a raivotutaka na parofita o Isikeli na kena tukuni vua me kania na ivola vivigi, qai lewe tiko ni vola qori na itukutuku bibi me kacivaki vei ira na sega ni taleitaka. A vinakati me kania o Isikeli na itukutuku oya, me bulataka sara ga. Ena vakavu marau nona kacivaka na itukutuku qori​—me vaka ga na kamikamica ni oni.​—Wilika Isikeli 2:8–3:​4, 7-9.

¹¹ E tautauvata vinaka na keda ituvaki kei na gauna i Isikeli. Nikua, e levu era sega ni via rogoca na iVolatabu. Koya gona meda doudou tiko ga na vunau, e bibi meda vulica na iVolatabu ena sala eda rawa ni kila da qai vakabauta na ka e tukuni kina. Me caka vakawasoma noda vuli​—kua ni caka tu ga me rawa se me caka ga vagauna. Meda duavata mada ga kei na daunisame ena nona lagata: “Me vinaka vei kemuni na vosa ni gusuqu, kei na vakanananu ni yaloqu, i Jiova, na noqu uluvatu, kei na noqui vakabula.” (Same 19:14) Bibi gona meda tikica na gauna meda vakananuma kina na ka eda vulica, me rawa ni kasa dei e lomada na ka dina ena iVolatabu! Meda saga meda vakavinakataka tiko ga noda vuli vakataki keda.b

12. E yaga vakacava na soqoni vaKarisito meda dusimaki ena yalo tabu?

¹² E dua tale na sala ena yaga kina vei keda na yalo tabu ni Kalou oya noda “dau veinanumi, meda veivakauqeti, meda veilomani, meda caka vinaka tale ga, meda kua ni vakawaletaka na soqoni.” (Iper. 10:​24, 25) Nida sasagataka meda tiko vakawasoma ena soqoni vaKarisito, noda vakadirorogo vinaka, kei na noda bulataka na ka eda vulica, qori e sala vinaka duadua eda na dusimaki kina ena yalo tabu. Koya gona, sega beka ni veidusimaki tiko na yalo tabu i Jiova ena ivavakoso?​—Wilika Vakatakila 3:6.

Yaga ni Doudou

13. Na cava eda vulica vei ira na lotu vaKarisito ena imatai ni senitiuri ena nodra vakayacora vinaka sara nodra cakacaka vakavunau?

¹³ E igu kaukaua duadua ena lomalagi kei na vuravura na yalo tabu, e rawa ni vakaukauataki ira na tamata mera cakava na loma i Jiova. Ena veidusimaki ni yalo tabu a rawa kina vei ira na lotu vaKarisito ena imatai ni senitiuri mera vakayacora vinaka sara nodra cakacaka vakavunau. Era vunautaka na itukutuku vinaka “vei ira na kabuli kece e ruku i lomalagi.” (Kolo. 1:23) E levu vei ira qori era sega ni ‘vuli vinaka sara qai tauvanua ga,’ macala gona ni uqeti ira e dua na ka e kaukaua sara.​—Caka. 4:13.

14. Na cava meda cakava meda ‘uqeti kina ena yalo tabu’?

¹⁴ Ni salavata kei na noda bula na veidusimaki ni yalo tabu, ena uqeti keda qo meda doudou tiko ga ni vakaitavi ena cakacaka vakaitalatala. Nida masuta wasoma na yalo tabu, noda vuli vakataki keda, noda vakananuma vakatitobu na ka eda wilika kei na noda tiko wasoma ena soqoni vaKarisito ena rawa kina ni ‘uqeti keda na yalo tabu.’ (Roma 12:11)E vakamacalataka na iVolatabu ‘e dua na Jiu na yacana o Apolosa, e kai Alekisadria, e tagane gusumacala, e yaco yani e Efeso’ qai “gumatua ena veiuqeti ni yalo tabu me tukuna, me vakavulica tale ga vakadodonu na veika me baleti Jisu.” (Caka. 18:​24, 25) Ni ‘uqeti keda na yalo tabu’ eda na doudou nida vunau e veivale kei na noda vunau tawalokuci.​—Roma 12:11.

15. Ena yaga vakacava vei keda nida vosa ena doudou?

¹⁵ Ena yaga sara vei keda nida doudou vakalevu ena cakacaka vakavunau. Ena vinaka kina na ivakarau ni noda rai, nida na raica kina na bibi kei na yaga ni cakacaka qo. Noda sasaga ena vinaka tiko ga baleta nida marau sara vakalevu ni vuavuaivinaka noda cakacaka vakaitalatala. Eda na yalogu vakalevu baleta nida kauaitaka vakabibi na kena vakatotolotaki na cakacaka ni vunau.

16. Na cava meda cakava ke luluqa noda guta na cakacaka vakaitalatala?

¹⁶ Vakacava ke sa luluqa noda guta na cakacaka vakaitalatala ena gauna qo, ni vakatauvatani kei na veigauna sa oti? Bibi gona meda dikevi keda. E vola o Paula: “Ni dikevi kemuni tiko ga se oni tudei tiko ena vakabauta se sega, ni dau vakadeitaka se o cei dina o kemuni.” (2 Kor. 13:5) Tarogi iko: ‘E se uqeti au tiko na yalo tabu? Au dau masulaka vei Jiova nona yalo tabu? E vakaraitaka beka noqu masu niu nuitaki koya meu cakava kina nona inaki? E vakaraitaka beka na qaqa ni noqu masu niu doka na itavi ni kena vunautaki na itukutuku vinaka? E vakacava sara mada na ivakarau ni noqu vuli? E vakacava na levu ni gauna au dau vakasamataka kina vakatitobu na ka au wilika kei na ka au rogoca? E vakacava na levu ni noqu vakaitavi ena soqoni kece vaKarisito?’ Nida vakasamataka vakavinaka na taro kece qori, ena yaga sara vakalevu ena noda raica na vanua eda lekata toka da qai saga sara me vakavinakataki.

Me Vukei Iko na Yalo ni Kalou Mo Doudou

17, 18. (a) E vakacava sara mada na levu ni cakacaka vakavunau nikua? (b) Eda na “doudou” vakacava ni vunautaka na itukutuku vinaka ni Matanitu ni Kalou?

¹⁷ A tukuna o Jisu vei ira nona tisaipeli ena gauna a vakaturi kina: “Dou na vakaukauataki ni sobuti kemudou na yalo tabu, dou na qai tukuni au e Jerusalemi, e Jutia, e Samaria, kei na veivanua yawa sara kei vuravura.” (Caka. 1:8) E sa qai levu cake sara nikua na cakacaka a tekivutaki ena gauna ya. Voleka ni vitu na milioni na iVakadinadina i Jiova era vunautaka tiko na itukutuku vinaka ena sivia na 230 na veivanua, era qai vakayagataka e rauta ni 1.5 na bilioni na aua e veiyabaki ena cakacaka qo. E vakasakiti dina meda guta ni vakaitavi ena cakacaka qo, ni qo ga na gauna me na caka kina!

¹⁸ Me vaka ga ena imatai ni senitiuri, na cakacaka vakavunau e vuravura raraba e caka ena veidusimaki ni yalo tabu ni Kalou. Nida muria na veidusimaki ni yalo tabu, eda na “doudou” ena cakacaka vakaitalatala. (Caka. 28:31) Koya gona, me dusimaki keda mada ga na yalo tabu nida vunautaka na itukutuku vinaka ni Matanitu ni Kalou!

[iVakamacala e ra]

Na Cava o Vulica?

• Na cava meda doudou kina ni tukuna na vosa ni Kalou?

• Na idusidusi cava a yaga vei ira na tisaipeli ena gauna eliu mera vosa kina ena doudou?

• Na sala cava eda rawa kina ni doudou?

• E yaga vakacava noda saga na doudou?

[iYaloyalo ena tabana e 7]

Ena sala cava e rawa ni vukei luvedra kina na itubutubu mera doudou?

[iYaloyalo ena tabana e 8]

Nomu masu vakalekaleka e rawa ni yaga ena nomu doudou ena cakacaka vakaitalatala