Vakatotomuri Jisu Nida Vunau ena Doudou

“Keitou sa qai doudou ga . . . me tukuna sara vei kemudou nai tukutuku-vinaka.”​—1 CES. 2:2.

1. Na cava e totoka kina na itukutuku vinaka ni Matanitu ni Kalou?

E KA totoka dina meda rogoca na itukutuku vinaka! Na itukutuku vinaka duadua na itukutuku ni Matanitu ni Kalou. E vakadeitaka na itukutuku vinaka qo ni sa na oti vakadua na rarawa, tauvimate, mosi, lolosi kei na mate. E vakaraitaka vei keda na inuinui ni bula tawamudu, na inaki ni Kalou, kei na sala meda veiwekani voleka kina kei koya. O na rairai nanuma nira na marautaka kece na tamata na rogoca na itukutuku a wasea o Jisu. Ka ni rarawa ni a sega ni vaka kina.

2. Vakamacalataka na vosa i Jisu: ‘Niu sa lako mai meu veitawasei.’

² A tukuna o Jisu vei ratou nona tisaipeli: “Dou kakua ni vakasama ni’u sa lako mai me’u kauta mai ki vuravura na veivinakati: au sa sega ni lako mai me’u kauta mai na veivinakati, ai seleiwau ga. Ni ka’u sa lako mai me tawasei rau na veitamani-tagane, kei na veitinani-yalewa, kei na veivugoni-yalewa talega. Ia ena nona meca na tamata ko ira na nona lewe-ni-vale.” (Maciu 10:34-36) E levu era sega sara ga ni taleitaka na itukutuku vinaka. Eso era bau cati ira sara ga na tukuna tiko na itukutuku qo, dina nira veiwekani voleka.

3. Na cava e vinakati vei keda me rawa nida qarava vinaka kina noda cakacaka vakavunau?

³ Eda vunautaka na ka dina vata ga a tukuna o Jisu. E levu ena gauna qo e tautauvata nodra rai kei ira na bula ena gauna i Jisu. E sega ni kurabuitaki na tikina qori, a kaya o Jisu vei ratou na nona tisaipeli: “Sa sega ni levu na tamata ka lailai na nona turaga. Kevaka era a vakacacani au, era na vakacacani kemudou talega.” (Joni 15:20) Eda sega soti ni tusaqati vakaukaua ena levu na vanua, ia eda beci ga qai sega ni kauaitaki. E vinakati gona na vakabauta kei na yaloqaqa meda vosota, me rawa nida vunautaka tiko ga ena doudou na itukutuku vinaka.​—Wilika 2 Pita 1:5-8.

4. Na cava a bibi kina vei Paula me vunau ena “doudou”?

⁴ Ena rairai dredre ena so na gauna mo vunau, se e sega ni rawarawa eso na ka e vauci kina. Ke vaka kina, o sega ni sotava duadua tiko na leqa qori. Na yapositolo o Paula a doudou qai sega ni rere na vunau, a buta vinaka tale ga ena ka dina, ia ena so na gauna a dredre vua me vunau. A vola o Paula vei ira na lotu vaKarisito e Cesalonaika: “Ni keitou a vakararawataki mada eliu, ka vakacacani sara mai Filipai, me vaka dou sa kila, keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.” (1 Ces. 2:2) E Filipai, a vakarota na mataveilewai me rau warolaki ena kau o Paula kei Sailasa, me rau biu e valeniveivesu qai vesu ena ivesu kau. (Caka. 16:16-24) Ia, rau “sa qai doudou ga” o Paula kei Sailasa me rau vunau tiko ga. Eda na vakatotomuri rau vakacava? Me saumi na taro qo, meda dikeva mada na ka a uqeti ira na dauveiqaravi ni Kalou ena gauna vakaivolatabu mera tukuna ena doudou na veika dina me baleti Jiova, meda vulica tale ga na sala eda rawa ni vakatotomuri ira kina.

Bibi Mera Doudou Nira Tusaqati

5. Na cava e vinakati kina na doudou vei ira na dau yalodina vei Jiova?

⁵ E sega ni vakabekataki ni ivakaraitaki uasivi ni yaloqaqa kei na doudou o Jisu Karisito. Me tekivu mai na bula ni kawatamata, a vinakati mera doudou o ira na yalodina vei Jiova. Na vuna? Ni oti na veivorati i Iteni, a parofisaitaka o Jiova nira na veimecaki o ira na qaravi Kalou kei ira na qaravi Setani. (Vkte. 3:15) E votu na veimecaki qo ena gauna a labati kina na turaga yalododonu o Epeli. A labati koya o tuakana. Dua na gauna e muri, a tusaqati tale ga o Inoki, e dua na turaga yalodina a bula ni bera na waluvu. A parofisaitaka o koya ni na lako mai na Kalou kei na nona agilosi yalosavasava me totogitaki ira na tamata ca. (Juta 14, 15) E levu era sega ni taleitaka na itukutuku qori. Era cati Inoki qai rawa sara ga nira labati koya ke sega ni tinia koso nona bula na Kalou. E vakaraitaka dina o Inoki na doudou!​—Vkte. 5:21-24.

6. Na cava a vinakati kina vei Mosese me doudou na vosa vei Fero?

⁶ Meda vakasamataka tale ga nona doudou o Mosese me vosa vei Fero. E dua na iliuliu o Fero qai raici me dua a sega wale ga ni matataka na kalou, ia e okati sara ga me kalou, na luve ni kalou ni matanisiga o Ra. Kena irairai, me vakataki ira ga na Fero eliu, a sokaloutaka o koya na nona ivakatakarakara. Na nona vosa e lawa; na ka ga e vakatulewataka ena yaco. Ni tu vua na lewa, salavata kei na qaciqacia kei na yalodredre, a sega ni matau vei Fero me dua e tukuna vua na ka me caka. A lai vosa gona vua o Mosese, na ivakatawa ni sipi yalomalumalumu, e lai raici Fero vakavica—a sega ni sureti qai sega ni taleitaki nona veisiko yani. Na cava a parofisaitaka o Mosese? Na leqa ena vakavu rarawa. Na cava a vinakata o Mosese? Mera biuti Ijipita e vica na milioni na bobula i Fero! A vinakati beka me yalodoudou o Mosese? E vaka kina!​—Tiko 12:3; Iper. 11:27.

7, 8. (a) Na ituvaki leqataki cava era sotava na dauveiqaravi yalodina ni Kalou ena gauna makawa? (b) Na cava era yalodoudou kina o ira na bula ni bera na gauna vaKarisito mera tutaka qai tokona na sokalou savasava?

⁷ Me tekivu mai na gauna oya, a vinakati vei ira na parofita kei ira na dauveiqaravi yalodina ni Kalou mera yaloqaqa na tutaka na sokalou savasava. A sega ni lomani ira na vuravura i Setani. E kaya o Paula: “Era sa lauviri e na vatu, era sa varomusuki rua, era sa dauveretaki, era sa vakamatei e nai seleiwau: era sa veilakoyaki voli ka sa vakaisulu e na kuli ni sipi kei na kuli ni me; era sa dravudravua sara, era sa vakararawataki, era sa vakacacani.” (Iper. 11:37) Na cava a vakayaloqaqataki ira na dauveiqaravi yalodina qori ni Kalou mera dei tiko ga? Ni bera ni cavuta na vosa qo o Paula, a tukuna o koya na ka a vakayaloqaqataki Epeli, Eparama, Sera kei na so tale mera vosota tiko ga kina. E kaya: “Ka sa sega ni nodra dina na veika ka yalataki, [ena vakabauta] era sa raica vakayawa, ka ciqoma.” (Iper. 11:13) Sega ni vakabekataki, nira a vakayaloqaqataki na parofita me vakataki Ilaija, Jeremaia, kei na so tale na dauveiqaravi yalodina ni bera na gauna vaKarisito, era raica dei toka ga na vosa ni iyalayala i Jiova, era doudou kina na tutaka na sokalou dina.—Taito 1:2.

⁸ Era a rai vakanamata na dauveiqaravi yalodina ni Kalou ni bera na gauna vaKarisito ena veigauna vinaka se bera mai. Ena gauna ra vakaturi kina, era na yaco mera bula uasivi qai ‘sereki mai na veivakabobulataki’ ena veituberi vakabete i Karisito Jisu kei ira na 144,000. (Roma 8:21) Kena ikuri, a yalodoudou o Jeremaia kei na so tale na dauveiqaravi ni Kalou ena gauna makawa ena vuku ni veivakadeitaki i Jiova, e laurai ena vosa ni iyalayala vei Jeremaia: “Era na veivala kei iko; ka ra na sega ni gumatua vei iko; ni’u sa tiko vata kei iko, sa kaya ko Jiova, me’u vakabulai iko.” (Jere. 1:19) Eda vakayaloqaqataki tale ga ena gauna qo nida vakasamataka nona vosa ni iyalayala na Kalou me baleta na veisiga e se bera mai kei na nona veitaqomaki vakayalo.​—Vkai. 2:7; wilika 2 Korinica 4:17, 18.

Uqeti Jisu na Loloma me Vunau ena Yalodoudou

9, 10. A vakaraitaka vakacava o Jisu nona yalodoudou vei (a) ira na iliuliu ni lotu, (b) ira na ilala sotia, (c) koya na bete levu, (d) Pailato?

⁹ E yalodoudou ena vica na sala o Jisu, na noda iVakaraitaki. Kena ivakaraitaki, dina nira cati koya o ira na vakaitutu kei na vakavatu, a sega ni vakamamadataka na ka a vinakata na Kalou mera kila na tamata. A sega ni rere me vakaraitaka nodra viavia yalododonu na iliuliu ni lotu kaukaua kei na nodra ivakavuvuli lasu. Era na lewai qai vakamatatataka na tikina qo o Jisu vei ira ena ka e tukuna. A kaya ena dua na gauna: “E ca vei kemudou na vu-ni-vola kei na Farisi, na dauveivakaisini! ni dou sa vaka na veivale ni bulubulu sa boro vulavula, ka sa rairai vinaka etaudaku, ia eloma sa sinai e na sui ni mate, kei na ka kecega sa velavela. Sa vaka talega kina koi kemudou, dou sa rairai etaudaku vei ira na tamata me tamata dodonu, ia eloma dou sa sinai e na dauveivakaisini kei na ka e sega ni dodonu.”​—Maciu 23:27, 28.

¹⁰ Nira gole yani ena were o Kecisemani e dua na ilala sotia, a sega ni rere o Jisu me tukuni koya vei ira. (Joni 18:3-8) Ni oti oya, a kau vei ira na lewe ni Sanadrini qai vakatarogi koya na bete levu. A kila vinaka tu o Jisu ni a vaqara na bete levu e dua na vuna me vakamatei koya kina, a tukuna ga ena doudou ni o koya e Karisito, e Luve ni Kalou. A kaya tale ga nira na raici koya ni “[“dabe,” NW] tiko e na liga i matau i Koya sa kaukauwa, ni sa lako talega mai e na veio ni lomalagi.” (Mari.14:53, 57-65) Ni oti vakalekaleka qori, a lai duri o Jisu ena mata i Pailato, a rawa sara ga ni sereki koya. Ia, a sega ni tukuna e dua na ka o Jisu ena vuku ni veika a beitaki kina. (Mari. 15:1-5) A vinakati dina vua me yaloqaqa.

11. E veisemati vakacava na yalodoudou kei na loloma?

¹¹ A tukuna o Jisu vei Pailato: “Na ka oqo ka’u sa lako mai kina ki vuravura oqo, me’u dautukuna na ka dina.” (Joni 18:37) A vakaroti Jisu o Jiova me vunautaka na itukutuku vinaka, a qai marautaka na cakava qori o Jisu baleta ni lomani Tamana. (Luke 4:18, 19) E dau lomani ira tale ga na tamata o Jisu. E kila nira sotava tu na ituvaki dredre. E vaka kina o keda, eda doudou qai sega ni rere na vunau baleta nida lomana na Kalou kei ira na tamata.​—Maciu 22:36-40.

Uqeti Keda na Yalo Tabu Meda Vunau ena Doudou

12. Na cava era marautaka na tisaipeli taumada?

¹² Ni oti e vica na macawa nona mate o Jisu, era marau na tisaipeli ni a vakalevutaka o Jiova na kedra iwiliwili na tisaipeli vou. Ena dua ga na siga, era a papitaiso e rauta ni 3,000 na Jiu kei na kai matanitu tani mai na veivanua! Era a gole yani i Jerusalemi mera solevutaka na Lakosivia. Sega ni vakabekataki ni usutu ni veitalanoa i Jerusalemi na ka a yaco qo! E kaya na iVolatabu: “Sa kani ira kecega na rere; a sa levu na ka e veivakurabuitaki kei nai vakatakilakila era sa kitaka ko ira nai apositolo.”​—Caka. 2:41, 43.

13. Na cava era masuta kina na mataveitacini mera doudou, na cava a qai yaco?

¹³ Ena levu ni nodra katakata na iliuliu ni lotu, era vesuki Pita kei Joni, biuti rau e valeniveivesu me dua na bogi, ra qai vakarota me rau kua ni vunautaka na itukutuku i Jisu. Ni rau sereki, rau tukuna vei ira na mataveitacini na ka a yaco, ra qai masulaka vata na veitusaqati era sotava tiko, era kaya: “Kemuni na Turaga, . . . solia kivei ira na nomuni talatala, me ra doudou vakalevu ni ra tukuna na nomuni vosa.” Na cava a yaco? “Ra sa dui vakasinaiti kecega e na Yalo Tabu, a ra sa doudou kina ni ra sa tukuna na vosa ni Kalou.”​—Caka. 4:24-31.

14. E tokoni keda vakacava na yalo tabu ena cakacaka vakavunau?

¹⁴ Dikeva ni a vakayaloqaqataki ira na tisaipeli na yalo tabu kaukaua i Jiova mera tukuna kina ena doudou na Vosa ni Kalou. E sega ni vu ga mai ena noda kaukaua meda tukuna na ka dina vei ira eso tale, okati kina o ira na dau saqata na noda itukutuku. Ena tu vakarau o Jiova me solia nona yalo tabu ke da kerea vua. Ena veitokoni i Jiova, eda rawa tale ga ni yalodoudou meda vosota kina na veitusaqati kece.​—Wilika Same 138:3.

Era Doudou na Vunau na Lotu vaKarisito ena Gauna Qo

15. E tawasei ira vakacava na tamata ena gauna qo na itukutuku vinaka?

¹⁵ Ena noda gauna qo, me vaka ga ena veigauna sa oti, na ka dina e tawasea na tamata. Eso era ciqoma, eso tale era sega ni kila se doka na ivakarau ni noda sokalou. Eso era vakalewai keda, vakalialiai keda, se cati keda sara ga, me vaka ga a tukuna o Jisu. (Maciu 10:22) Ena so na gauna, e dau veivakacalai qai veivakacacani na itukutuku e tukuni me baleti keda. (Same 109:1-3) Ia, era vunautaka ena doudou na itukutuku vinaka na dauveiqaravi i Jiova e veiyasai vuravura.

16. Na ivakaraitaki cava e dusia ni rawa ni veisautaka na rai ni tamata noda doudou ena vunau?

¹⁶ Ena vuku ni noda yalodoudou, e rawa ni veisau nodra rai eso me baleta na itukutuku ni Matanitu ni Kalou. E kaya e dua na tacida yalewa mai Kyrgyzstan: “Niu cakacaka vakavunau tiko ena dua na gauna a kaya vei au e dua na itaukeinivale: ‘Au vakabauta na Kalou, ia au sega ga ni vakabauta nodra Kalou na lotu vaKarisito. Ke o curu tale mai na matamata qo, au na sereka noqu koli me kati iko!’ A toka mai dakuna e dua na koli levu e vesu tu. Ia, ena gauna a veisoliyaki kina na iTukutuku ni Matanitu Naba 37, e kena ulutaga, ‘Sa Voleka na iTinitini ni Lotu Lasu!,’ au nanuma meu lesu ina vale oya. Au a namaka meu na vosa vua e dua tale na lewenivale. Ia, a dolava mai na katuba na turaga ya. Au masu ga vakatotolo vei Jiova qai kaya: ‘Ni bula vinaka, au se nanuma vinaka tiko nodaru veivosaki ena tolu na siga sa oti, au sega tale ga ni guilecava nomuni koli. Au via solia vei kemuni na tikidua qo, au vakabauta tale ga na Kalou dina me vakataki kemuni. Ena vakarau vakarusa na Kalou na lotu e sega ni dokai koya. Oni rawa ni kila e levu tale na ka ni oni wilika qo.’ Au kurabuitaka nona taura na tikidua. Au mani gole sara ina vale tarava. Ni oti ga e vica na miniti, a cici mai na turaga qo kei na nona tikidua. E kaya, ‘Au sa wilika. Na cava meu cakava me kua ni cudruvi au kina na Kalou?’” A tekivu sara na vuli kei na turaga ya qai tekivu tiko tale ga ena soqoni vaKarisito.

17. Na nona yalodoudou e dua na tacida yalewa a uqeta vakacava e dua na vuli iVolatabu?

¹⁷ Na noda yalodoudou ena uqeti ira tale ga eso mera doudou. E Rusia, a vodo toka ena loma ni basi e dua na tacida yalewa qai solia na mekesini vua e dua na pasidia. Ni raica qo e dua na turaga, e tu cake mai na nona idabedabe qai kovea na mekesini mai na ligana na tacida, nukia qai kolotaka ena fuloa. A vosacataki koya vakadomoilevu, e vakarota vua na tacida me tukuna vua na vanua e vakaitikotiko kina, me kua tale ga ni vunau ena koro. A masuta na veivuke i Jiova na tacida qo qai nanuma lesu na vosa i Jisu: “Kakua ni rerevaki ira era sa vakamatea na yago.” (Maciu 10:28) E tu cake vakamalua qai tukuna vua na turaga ya, “Au na sega ni tukuna vei iko na vanua au vakaitikotiko kina, au na vunau tiko ga ena koro.” Oti, sa qai sobu. A sega ni kila ni a vodo tale tiko ga ena basi e dua nona vuli iVolatabu. Na marama vuli iVolatabu qo a dau rerevaki ira tale eso qai vakavuna me sega ni lakova na soqoni vaKarisito. Ni raica nona yalodoudou na tacida oya, a vakatulewataka sara ga me sa dau tiko ena soqoni.

18. Na cava ena uqeti keda meda vunau ena doudou, me vaka a cakava o Jisu?

¹⁸ Me vakataki Jisu, e bibi meda yalodoudou na vunau vei ira na tamata era yawaka na Kalou. Na cava meda cakava meda yalodoudou kina? Raica na veigauna se bera mai. Mo vaqaqacotaka tiko ga nomu lomana na Kalou kei na kainomu. Masuti Jiova me solia vei iko na yaloqaqa. Kua ni guilecava ni o Jisu ena sega ni biuti iko. (Maciu 28:20) Ena vakayaloqaqataki iko na yalo tabu. Ena vakalougatataki iko o Jiova, ena tokoni iko tale ga. O koya gona, meda yalodoudou qai kaya: “A noqui vukevuke ko Jiova, ia ka’u sa sega ni rere a cava na ka ena kitaka vei au na tamata?”​—Iper. 13:6.

O na Sauma Vakacava?

• Na cava e vinakati kina mera yalodoudou na dauveiqaravi ni Kalou?

• Na cava eda vulica me baleta na yalodoudou nida dikeva . . .

nodra ivakaraitaki na dauveiqaravi yalodina ni Kalou ni bera na gauna vaKarisito?

nona ivakaraitaki o Jisu Karisito?

nodra ivakaraitaki na lotu vaKarisito taumada?

nodra ivakaraitaki na tacida lotu vaKarisito ena gauna qo?

[iYaloyalo ena tabana e 21]

A vakatakila ena yalodoudou o Jisu nodra cala na iliuliu ni lotu

[iYaloyalo ena tabana e 23]

E solia vei keda o Jiova na yaloqaqa meda vunau