“Ni Dou Masu, Dou Kaya, ‘Tamai Keimami’”
“Tamai keimami.” Na cava o vakasamataka ni o rogoca qori? Dua na tama e dauloloma, dau yalovinaka ena nona kauaitaki ratou vakalevu nona vuvale? Se dua e dau vakawelewele qai voravora? E vakatau vakalevu qori ena itovo e kilai kina o tamamu.
“TAMAI KEIMAMI” e dua na icavuti e vakayagataka o Jisu me vosa kina vua na Kalou se me vakamacalataki koya.a Ni vakavulici ira nona imuri mera masu, e tukuna: “Ni dou masu, dou kaya, ‘Tamai keimami.’” (Luke 11:2) Ia e tama vakacava o Jiova? E bibi dina na kena isau. Na vuna? Na noda kila vinaka se tama vakacava o Jiova, eda na toro voleka vua da qai lomani koya vakalevu.
E sega tale ni dua e veiganiti me tukuna vei keda na veika e baleta na Tamada vakalomalagi me vakataki Jisu, ni rau veivolekati sara ga kei Tamana. E tukuna o koya: “E sega ni dua e kila vinaka na Luvena, na Tamana ga, e sega tale ga ni dua e kila vinaka na Tamana, na Luvena ga, kei koya ena vinakata na Luvena me vakatakilai Tamana vua.” (Maciu 11:27) Koya gona, na sala vinaka duadua meda kilai Tamana kina oya ena noda kilai Luvena.
Na cava eda rawa ni vulica vei Jisu me baleta na Tamada vakalomalagi? Vakasamataka mada na ka e tukuna qo o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) Na vosa i Jisu qori e kilai kina na nona itovo talei duadua na Tamada vakalomalagi—na loloma. (1 Joni 4:8) E kilai na loloma i Jiova ena levu na sala, me vaka nona veivakadonui, yalololoma, veitaqomaki kei na veivakasalataki, vakakina nona vakarautaka na veika eda gadreva.
Vakadeitaka na Veivakadonui i Tamana
Era dau vakaukauataki qai vakayaloqaqataki na gone ni vakadonuya na nodra itubutubu na ka era cakava. Vakasamataka mada na kena vakayaloqaqataki Jisu ni rogoci Tamana ni tukuna: “Qo na Luvequ lomani, au vakadonuya.” (Maciu 3:17) E qai vakadeitaka vei keda o Jisu na nona loloma kei nona veivakadonui o Tamana ena nona kaya: “O koya e lomani au ena lomani koya o Tamaqu.” (Joni 14:21) E veivakacegui dina qori! Ia e tiko e dua e sega ni vinakata meda vakila na vakacegu qori.
O Setani e saga meda vakatitiqataka na nona vakadonui keda na Tamada vakalomalagi. E saga meda nanuma ni sega ni yaga nona vakadonui keda o Jiova. E dau vakayacora qori ena gauna eda malumalumu kina—tauvimate, yalolailai, bula vaqase, gauna eda rarawataka kina ni guce noda sasaga se ni vakacudrui keda e dua. Raica mada na ivakaraitaki ni dua na cauravou o Lucas, a nanuma ni sega ni ganiti koya na veivakadonui ni Kalou. E tukuna o Lucas ni gauna e se itabagone kina e raica ni rau sega ni dei na nona itubutubu ena ka vakayalo rau a vakavulici koya kina ni se gone. De dua qori na vuna e sega ni bucina rawa kina e dua na veiwekani kei na Tamana vakalomalagi. E dau totolo calacala tale ga, e sotava kina e levu na leqa, vakabibi nona veimaliwai kei ira eso tale. Ia ni toso na gauna na nona dau vosovoso kei na nona dau veivakauqeti o watina e vukei koya me lewai koya vinaka. E tukuna o Lucas ni o watina e “dua na ka e vakalougatataki kina, e isolisoli talei mai vua na Kalou.” E qai kila o Lucas ni “lako mai vuravura o Karisito Jisu me vakabulai ira na ivalavala ca.” (1 Timoci 1:15) E kaya o Lucas nona dau vakananuma na loloma ni Kalou kei na nona veivakadonui e vakila kina na marau kei na lomavakacegu.
Ke o dau vakatitiqataka ena so na gauna na nona lomani iko kei na nona vakadonui iko o Jiova, ena rawa ni uqeti iko na nomu wilika qai vakananuma na Roma 8:31-39. Na yapositolo o Paula e vakadeitaka vakayaloloma vei keda ni sega ni dua na ka e rawa ni “tawasei keda mai na loloma ni Kalou e mai vakaraitaka o Karisito Jisu na noda Turaga.”b
Tama Dauloloma
E kila vinaka tu na Tamada vakalomalagi na noda rarawa. E Kalou dau “loloma.” (Luke 1:78) O Jisu e vakaraitaka vei keda na kawatamata ivalavala ca na nona dauloloma o Tamana. (Marika 1:40-42; 6:30-34) Era dau saga tale ga na lotu vaKarisito dina mera vakatotomuria na nona dauloloma na Tamadra vakalomalagi. Era muria na ivakasala ena iVolatabu mera dau “veilomani [qai] veinanumi.”—Efeso 4:32.
Raica mada na ivakaraitaki ni dua na turaga o Felipe. Ni gole e cakacaka ena dua na siga, e mosi vakasauri na yagona, e vaka ga e dua e suaka na dakuna. A cicivaki sara e valenibula. Eratou mani tukuna na vuniwai ni oti e walu na aua nodratou dikevi koya ni kalamu na nona uto. Eratou tukuna ni sa vo ga e 25 na miniti nona bula, e sega kina ni yaga me sele.
Era tu ekea eso era vakabauta vata kei Felipe, na nodra loloma e uqeti ira mera yavala totolo. Era tuvanaka sara me vakau ina dua tale na valenibula, qori na vanua ena caka totolo kina na veisele, era tiko ga ekea me yacova ni oti na veisele. E marautaki dina ni a qai bula o Felipe. Ni nanuma lesu o Felipe na ka a yaco, e vakavinavinakataka na nodra dauloloma o ira era vakabauta vata. Ia e vakadeitaka o Felipe ni vakauqeti ira na Tamana vakalomalagi mera dauloloma. E tukuna o Felipe: “E vaka sara ga e duri tu e yasaqu na Kalou dauloloma me vakaukauataki au.” Io, e dau vakaraitaka o Jiova na nona dauloloma ena nona uqeti ira na nona dauveiqaravi e vuravura mera dauloloma tale ga.
Dau Veitaqomaki na Tamada
Ni rere e dua na gonelailai, ena rairai cicivi tamana me taqomaki koya. Ena vakila e dua na gone ni taqomaki ena gauna e mokoti koya kina o tamana. E nuitaka vakaoti o Jisu na veitaqomaki i Jiova. (Maciu 26:53; Joni 17:15) Eda rawa tale ga ni nuitaka na nona veitaqomaki na Tamada vakalomalagi. Na veitaqomaki e vakarautaka nikua o Jiova e vakalevu ga ena veitaqomaki vakayalo. Kena ibalebale ni taqomaki keda mai na veivakaleqai vakayalo ena nona vakarautaka na veika eda gadreva meda kua ni vakaleqai kina, meda taqomaka tale ga noda veitokani kei koya. Dua na sala e taqomaki keda kina oya nona vakayagataka na ivakasala e yavutaki ena iVolatabu. Nida ciqoma na ivakasala oya, e vaka ga e tiko mai dakuda o Jiova qai tukuna tiko: “Oqo na sala, dou mai lako tu ga kina.”—Aisea 30:21.
Dikeva mada na ivakaraitaki i Tiago kei rau na tacina o Fernando kei Rafael. Eratou lewena na veitacini qo e dua na mataqiriqiri karakaravisa. Dua na ka nodratou marau ni ratou digitaki me ratou lai vakaitavi ena dua na olo kilai levu ni ivakatagi e São Paulo, Brazil. De dua eratou na rogo sara ga kina. Ia a mani vakasalataki ratou e dua eratou vakabauta vata me baleta na rerevaki ni veitokani kei ira na sega ni bulataka na ivakatagedegede e vinakata na Kalou. (Vosa Vakaibalebale 13:20) E vakabibitaka na ivakasala vakaivolatabu qori ena nona tukuna sara ga na ka a sotava. E dua na tuakana e sa vakayacora tu na ivalavala dukadukali ena vuku ga ni nona vakailala ca. E nanuma kina o Tiago kei rau na tacina me ratou kua ni qai vakaitavi ena buturara ni vakatagi. Ena gauna qo sa nodratou cakacaka vakatabakidua na vunau. Eratou vakabauta ni kena muri na ivakasala vakaivolatabu e taqomaki ratou mai na leqa vakayalo.
Vakadodonutaki Keda na Tamada Vakalomalagi
Na tama dauloloma ena vakadodonutaki ira na luvena ni kauaitaka nodra bula ena gauna se bera mai. (Efeso 6:4) Na tama qori ena dei, ia ena sega ni vakadodonutaki ratou vakaukaua na gone. E va tale ga qori na Tamada vakalomalagi, ena rairai gadrevi me vakadodonutaki keda ena so na gauna. Ia na nona veivakadodonutaki na Kalou e dau yavutaki ena loloma, sega ena veibeci. Me vakataki tamana ga, e sega vakadua ni dau voravora o Jisu, ena gauna mada ga e berabera kina ni ratou cakava na veiveisau e vinakati me ratou cakava na nona tisaipeli.—Maciu 20:20-28; Luke 22:24-30.
Dikeva mada na nona vakavinavinakataka e dua na turaga o Ricardo nona vakadodonutaki koya vakayalololoma o Jiova. A biuti Ricardo o tamana ni se qai vula vitu. Ni sa tabagone, a vakila o Ricardo na dredre ni sega ni vakatamani. E levu sara na itovo ca e cakava, mani ca tu kina nona lewaeloma. A liaca ni sega ni salavata kei na ivakatagedegede vaKarisito na ivakarau ni bula e muria tiko, e vakatulewataka kina me tukuna vei ratou na qase ni ivavakoso e lewena. E dei na veivakasalataki eratou solia vua na qase ni ivavakoso, ia e yavutaki vakayalololoma mai na iVolatabu. E ciqoma qai marautaka o Ricardo na veivakadodonutaki, ia e vakararawataki koya ga vakalevu na veika a cakava—e sega ni moce vinaka, e tagi qai lomabibi. Oti sa qai liaca ni veivakadodonutaki oya e vakaraitaka ni se lomani koya tiko ga o Jiova. E nanuma lesu o Ricardo na ka e tukuna na Iperiu 12:6: “O koya e lomana o Jiova e dau vakadodonutaka.”
E ka vakayalomatua meda nanuma tiko ni sega wale ga ni inaki ni veivakadodonutaki me veivunauci se me veivutunitaka e dua nona cala. Na iVolatabu e okata na veivakadodonutaki me salavata kei na veivakarautaki. Ena vakadodonutaki keda gona na Tamada vakalomalagi ena nona vakalaiva meda sotava na ca ni ka eda cakava. Ia e tukuna na iVolatabu nida vakavulici ena gauna eda vakadodonutaki kina, ena vukei keda meda muria tiko ga na sala dodonu. (Iperiu 12:7, 11) Io, e vinakata dina na Tamada meda marau, e veivakadodonutaki baleta nida na vakila na kena yaga.
E Vakarautaka na Tamada na Veika Eda Gadreva Vakayago
Na tama dauloloma ena qara na ka eratou gadreva vakayago na nona vuvale. E va tale ga qori o Jiova. E tukuna o Jisu: “E kila tu na Tamamuni vakalomalagi ni bibi [qori] vei kemuni.” (Maciu 6:25-34) E yalataka o Jiova: “Au na sega sara ni biuti iko se vakanadakui iko.”—Iperiu 13:5.
A vakadinadinataka na veivosa qori e dua na marama o Nice ena gauna e vakacegui kina ena nona cakacaka o watina. E se qai biuta ga na marama qori nona cakacaka vinaka me levu kina na gauna e vakayagataka vei rau na luvena yalewa kei na nona qarava na Kalou. Eratou na qai bula vakacava? E masuti Jiova. Ena siga tarava, e gole o watina ena vanua a cakacaka kina me lai kauta mai na nona iyaya. E kidacala ni tukuna vua nona boso ni sa galala tu e dua na itutu ni cakacaka, e vinakata sara ga me solia vua! A vakayalia o wati Nice nona cakacaka ena dua na siga, ia ena siga tarava a vakacakacakataki tale. Erau vakavinavinakataka na Tamadrau vakalomalagi o Nice kei watina ni saumi na nodrau masu. Eda vulica ena ka a yaco qori ni o Jiova e dau veikaroni yalololoma, ena sega vakadua ni guicelavi ira nona tamata yalodina.
Vakavinavinakataka Nona Lomani Keda na Tamada
E sega ni dua na vosa meda vakamacalataka na levu ni nona loloma na Tamada vakalomalagi! Ni da vakasamataka na sala e dau vakaraitaka kina na loloma vakatama—nona veivakadonui, yalololoma, dau veitaqomaki, dau veivakadodonutaki, kei na nona dau vakarautaka na ka meda bula kina—eda rawa ni kaya ni o koya e dua na Tamada vinaka duadua!
Eda na vakaraitaka vakacava nida vakavinavinakataka na levu ni nona lomani keda na Tamada vakalomalagi? Eda rawa ni saga meda vulica e levu na ka me baleti koya kei na nona inaki. (Joni 17:3) Eda rawa ni veisautaka noda ivakarau ni bula me salavata kei na lomana kei na nona sala. (1 Joni 5:3) Eda rawa ni vakaraitaka nona loloma nida veimaliwai kei ira na tani. (1 Joni 4:11) Ena sala kece qori, eda rawa ni vakaraitaka nida raici Jiova me vaka na Tamada, e ka dokai tale ga nida vakatokai me luvena.
[iVakamacala e ra]
a E dau vakamacalataki vakalevu ena iVolatabu me tamada o Jiova. Kena ivakaraitaki, eda wilika ni o Jisu e vakayagataka na icavuti “Tamai keimami” se “Tamaqu” rauta ni vaka65 ena imatai ni tolu na Kosipeli qai sivia na 100 ena Kosipeli i Joni. E cavuta tale ga qori o Paula vaka40 se sivia ena nona ivola me dusi koya na Kalou. O Jiova e Tamada baleta ni iVurevure ni bula.
b Raica na Wase 24 ni ivola Toro Voleka Vei Jiova, ena ulutaga “E Sega ni Dua na Ka e Rawa ni ‘Tawasei Keda Mai na Loloma ni Kalou,’” tabaka na iVakadinadina i Jiova.
[Tikina bibi ena tabana 19]
Na noda kila vinaka se tama vakacava o Jiova, eda na toro voleka vua da qai lomani koya vakalevu
[Tikina bibi ena tabana 22]
Eda rawa ni vakaraitaka nida raici Jiova me vaka na Tamada, e ka dokai tale ga nida vakatokai me luvena
[Kato/iYaloyalo ena tabana 21]
E LEVU NA SALA E VAKARAITAKA KINA O JIOVA NI TAMA DAULOLOMA
VEIVAKADONUI
YALOLOLOMA
VEITAQOMAKI
VEIVAKASALATAKI
VEITOKONI VAKAYAGO