“Era na Ramase na iValavala Dodonu me Vaka na Matanisiga”

“Ena gauna ya era na ramase na ivalavala dodonu me vaka na matanisiga ena matanitu nei Tamadra.”​—MACIU 13:43.

1. Ena nona vakayagataka o Jisu na vosa vakatautauvata, na cava a tukuna me baleta na Matanitu ni Kalou?

E VAKAYAGATAKA o Jisu e levu na vosa vakatautauvata me vakamacalataka kina e levu na ka me baleta na Matanitu ni Kalou. E ‘tukuna vei ira na ka kece qori ena vosa vakatautauvata. E vosa ga vei ira ena vosa vakatautauvata.’ (Maciu 13:34) Na vosa vakatautauvata me baleta na kaburaki ni itei ni Matanitu ni Kalou, a vakabibitaka kina o Jisu na ivakarau ni lomadra o ira na rogoca na itukutuku vinaka. A tukuna na ka ena cakava o Jiova ena nona tubu vakayalo e dua. (Mari. 4:​3-9, 26-29) E tukuna tale ga na tubu vakasakiti ena vakilai e vuravura ni ciqomi na itukutuku vinaka ni Matanitu ni Kalou, ke sega mada ga ni laurai ena imatai ni gauna na tubu qori. (Maciu 13:​31-33) Kuria, o ira kece na ciqoma na itukutuku ni Matanitu ni Kalou era na sega ni vakarurugi ena Matanitu qori.​—Maciu 13:​47-50.a

2. Ena vosa vakatautauvata i Jisu me baleta na witi kei na co ca, na cava e vakaibalebaletaka na itei vinaka?

² Ia ena dua na vosa vakatautauvata i Jisu, e tukuna kina nodra kumuni o ira na lai veiliutaki kei koya ena nona Matanitu. Qori na vosa vakatautauvata ni witi kei na co ca, e volatukutukutaki ena Maciu wase 13. Ena dua tale na vosa vakatautauvata, e tukuna o Jisu ni itei e kaburaki e dusia tiko na “vosa ni matanitu ni Kalou.” Ia ena vosa vakatautauvata qo a tukuna kina o koya ni itei vinaka e dusia tiko e duatani na ka​—qo “o ira na luve ni matanitu.” (Maciu 13: 19, 38) O ira qo era sega ni vakarurugi ena Matanitu ni Kalou, ia, era “luve” ni Matanitu ni Kalou se itaukei ni Matanitu qori.​—Roma 8:​14-17; wilika Kalatia 4:​6, 7.

Vosa Vakatautauvata ni Witi kei na Co Ca

3. Na leqa cava e sotava na dauteitei ena ivakatautauvata, cava a qai cakava?

³ Qo na vosa vakatautauvata: “Na matanitu vakalomalagi e vaka na dauteitei e kaburaka na itei vinaka ena nona were. Nira moce tiko nona tamata, e lako mai na kena meca qai kaburaka na itei ni co ca ena loganiwiti, oti a lesu. E kadre na witi, lai vua sara, e kadre tale ga na co ca. Eratou qai lako vua na itaukeiniwiti na nona dauveiqaravi ratou kaya, ‘Turaga, oni a sega li ni kaburaka ga na itei vinaka ena nomuni were? E tubu vata tu mai vakacava kei na co ca?’ E kaya vei iratou, ‘E cakacaka ni meca.’ Eratou kaya vua, ‘Oni vinakata me keitou lai cavuraka?’ E kaya vei iratou, ‘Kua mada. De dou cavuraka tale ga na witi. Laiva me rau tubu vata tiko me yacova na gauna ni tatamusuki. Ena gauna ya au na qai kaya vei ira na dautatamusuki, ni cavuraka mada e liu na co ca, ni vesuka vata me vakamai, oti ya me qai kumuni na witi ina noqu lololo.’”​—Maciu 13:​24-30.

4. (a) O cei sara mada na dauteitei ena vosa vakatautauvata? (b) Gauna cava e tekivu kaburaka kina o Jisu na itei vinaka, a cakava vakacava?

⁴ O cei na dauteitei e kaburaka na itei vinaka ena nona were? E sauma o Jisu ena nona tukuna vei ira na tisaipeli: “O koya e kaburaka na sorenikau vinaka, na Luve ni tamata.” (Maciu 13:37) O Jisu na “Luve ni tamata,” a vakarautaka na qele me teivaki ena nona cakacaka vakaitalatala voli me tolu veimama na yabaki e vuravura. (Maciu 8:20; 25:31; 26:64) Ena Penitiko 33 S.K., a tekivu kaburaka kina o Jisu na itei vinaka​—o ira na “luve ni matanitu.” Qo na gauna a sovaraka kina o Jisu, nona mata o Jiova na yalo tabu vei ira na tisaipeli, a lumuti ira kina mera luve ni Kalou.b (Caka. 2:33) A yaco sara na itei vinaka qori me witi matua. Koya gona, na inaki ni kena kaburaki na itei vinaka mera kumuni kece kina o ira na taukena kei Jisu na Matanitu ra qai veiliutaki vata kei koya.

5. O cei na meca kei na co ca ena vakatautauvata?

⁵ O cei na meca kei na co ca? E tukuna o Jisu na meca “na Tevoro,” kei na co ca e dusi ira “na luve ni vunica.” (Maciu 13:​25, 38, 39) Eso na co ca e gaga, qai tautauvata na kena irairai kei na ibulibuli ni witi ni bera ni matua. E dusi ira vinaka qo o ira era kaya nira luve ni Matanitu ni Kalou, ia era sega ni vuataka na vua vinaka! O ira na lotu vaKarisito veivakaisini qo era kaya nira imuri dina i Karisito, era “kawa” dina ga i Setani na Tevoro.​—Vkte. 3:15.

6. E tekivu basika ena gauna cava na co ca, era “moce” vakacava na lotu vaKarisito ena gauna ya?

⁶ Era basika ena gauna cava na lotu vaKarisito era vaka na co ca? E tukuna o Jisu ena gauna ‘era moce tiko kina nona tamata.’ (Maciu 13:25) Gauna cava ya? Eda kila na isaunitaro qori ena vosa i Paula vei ira na qase ni ivavakoso mai Efeso: “Au kila niu sa na lako era na basika ena kemuni maliwa eso na olifa dau veivakasaurarataki era na sega ni lomana na qelenisipi. Eso sara mada ga vei kemuni era na vakatanitaka na ivakavuvuli dina mera vakacalai ira kina na tisaipeli mera muri ira.” (Caka. 20:​29, 30) A vakaroti ira sara ga na qase ni ivavakoso e Efeso o Paula mera yadra tiko vakayalo. Nira sa mate na yapositolo era ‘tarova tiko’ na vukitani, tekivu sara ga e kea nodra moce vakayalo na lotu vaKarisito. (Wilika 2 Cesalonaika 2:​3, 6-8.) Qori tale ga na gauna e tekivu tete kina na vukitani.

7. Era veisau beka eso na witi mera co ca? Vakamacalataka.

⁷ E sega ni tukuna tiko o Jisu ni na yaco na witi me co ca, ia e tukuna ga ni na tubu vata na co ca kei na witi. Na ivakatautauvata qo e sega ni vakaibalebaletaka tiko nodra gole tani mai na dina na lotu vaKarisito dina. Ia e dusia ga na sasaga i Setani me talaraka na ivavakoso vaKarisito ena nona biuti ira kina eso na tamata ca. E donuya na gauna sa qase kina na iotioti ni yapositolo o Joni, sa takalevu sara na vukitani.​—2 Pita 2:​1-3; 1 Joni 2:18.

“Laiva me Rau Tubu Vata Tiko me Yacova na Gauna ni Tatamusuki”

8, 9. (a) Na cava ena vakaibalebale kina vei ira na tisaipeli i Jisu na ivakatautauvata me baleta na Turaga kei na nona dauveiqaravi? (b) Erau tubu vata vakacava na witi kei na co ca?

⁸ Era tukuna na leqa vua nodra Turaga na dauveiqaravi, ra qai taroga: “Oni vinakata me keitou lai cavuraka [na co ca]?” (Maciu 13:​27, 28) E rairai kurabuitaki na ka e qai kaya na Turaga. A tukuna me rau tubu vata ga na witi kei na co ca me yacova na gauna ni tatamusuki. Ena vakaibalebale dina vei ira na tisaipeli i Jisu na ivakaro qori. Nira na qai kila e muri ni sega ni ka rawarawa me vakaduiduitaki na witi kei na co ca. O ira sara mada ga era bau kila toka na teitei, era kila ni dau veiqaliqali na waka ni co ca kei na witi.c Ya na vuna e vakarota kina na nodra Turaga mera waraka ga na gauna ni tatamusuki!

⁹ Ena veisenitiuri tale ga qo e vuataka o lotu ni veivanua vaKarisito e levu na co ca​—liu duadua ena lotu Katolika vakaRoma kei na lotu Orthodox, qai muri na vica vata na iwasewase ni lotu Tawase. Ena gauna vata qori, a kaburaki kina eso na itei ni witi e vuravura. Na Turaga ena vosa vakatautauvata a waraka na gauna me matua kina na were me qai tamusuki.

Gauna Namaki ni Tatamusuki

10, 11. (a) E tekivu ena gauna cava na tatamusuki? (b) E kumuni vakacava na witi vakaivakatakarakara ena lololo i Jiova?

¹⁰ E tukuna vei keda o Jisu: “Na gauna ni tatamusuki, na ivakataotioti ni veika vakavuravura, o ira na dautatamusuki, na agilosi.” (Maciu 13:39) Ena iotioti ni veisiga ni ituvaki ca qo kei vuravura, ena yaco na veitawasei​—era na kumuni vata o ira na luve ni Matanitu ni Kalou, ra qai tawasei tani vei ira era vaka na co ca. E tukuna na yapositolo o Pita me baleta na veitawasei qo: “Ni sa kena gauna me tekivu kina na veilewai ena vale ni Kalou. Ia ke tekivu vei keda, na cava na kedra itinitini o ira era sega ni talairawarawa ina itukutuku vinaka ni Kalou?”​—1 Pita 4:17.

¹¹ Ni tekivu oti ga na iotioti ni veisiga se “ivakataotioti ni veika vakavuravura,” a tekivu sara na veilewai vei ira na tukuna nira lotu vaKarisito dina​—se ra “luve ni matanitu” se “luve ni vunica.” Ena bale “mada e liu” o Papiloni na Ka Levu, ra “qai” kumuni vata na luve ni Matanitu ena itekitekivu ni tatamusuki. (Maciu 13:30) Ia era kumuni vakacava ena lololo i Jiova na witi vakaivakatakarakara? Kena imatai, o ira na tamusuki qo era vulica na ka dina, era lewe ni ivavakoso ra qai lumuti mera Luve ni Matanitu. Kena ikarua, ni cava nodra bula e vuravura e soli vei ira na icovi ni bula e lomalagi.

12. Ena vakacava na dede ni tatamusuki?

¹² Ena vakacava na dede ni veilewai? E cavuta o Jisu me “gauna” ni tatamusuki, kena ibalebale ena caka tiko ena loma ni dua na gauna. (Vkta. 14:​15, 16) Nodra lewai yadua na lumuti ena caka tiko ena gauna ni ivakataotioti. Ena qai vakacavari nira sa dregati kece.​—Vkta. 7:​1-4.

13. Ena sala cava era veivakatarabetaki kina na co ca, ra qai beca vakacava na lawa?

¹³ O cei era na cavuraki tani mai na Matanitu ni Kalou? Era veivakatarabetaki vakacava na co ca, era beca vakacava na lawa? (Maciu 13:41) O ira na iliuliu ni lotu lasu era vaka na co ca baleta nira vakacalai ira e levu ena veisenitiuri sa oti. Qo nodra vakavuvulitaka eso na ivakavuvuli e beci kina na Kalou, ‘na ka e veivakatarabetaki,’ me vaka na ivakavuvuli ni veivakararawataki ni Kalou ena kama tawamudu e eli kei na ivakavuvuli veivakacalai ni letoluvakalou. Levu na iliuliu ni lotu era ivakaraitaki ca vei ira na lewenilotu ena nodra veibutakoci nira tokona na ka vakavuravura kei na vakasisila ni nodra ivalavala. (Jeme. 4:4) Kuria qori nodra vakatara na ivalavala vakasisila vei ira na lewenilotu. (Wilika Juta 4.) E vakatarai tu qori ena lotu, ia o ira na kena iliuliu era via vakaraitaka ga nira daulotu ra qai cakava na ka era nanuma ni vinaka vua na Kalou. Ia era marau na luve ni Matanitu nira sega ni rawai ena nodra veivakamuai o ira era vaka na co ca kei na ivakavuvuli veivakacalai e veivakatarabetaki!

14. Era tagi ra qai katibati vakacava o ira e vaka na co ca?

¹⁴ Era tagi ra qai katibati vakacava o ira era vaka na co ca? (Maciu 13:42) Era vakararawataki na “luve ni vunica” era vaka na co ca nira vakatakila na “luve ni matanitu” na veivagagai vakayalo era cakava voli. Era rarawataka tale ga nodra sega ni veitokoni na lewenilotu, kei na nodra sega ni vakamalumalumu ena nodra lewa.​—Wilika Aisea 65:​13, 14.

15. Ena vakasama cava era vakamai kina o ira era vaka na co ca?

¹⁵ Ena vakasama cava era kumuni ra qai vakamai kina na co ca? (Maciu 13:40) Qo e dusia na kedra itinitini na co ca. Nodra vakamai vakaivakatakarakara ena bukawaqa e vakaraitaka nira na vakarusai tawamudu. (Vkta. 20:14; 21:8) Era na kau laivi ena “veivakararawataki levu” o ira na lotu vaKarisito dauveidabui era vaka na co ca.​—Maciu 24:21.

Era na ‘Ramase me Vaka na Matanisiga’

16, 17. Na cava e parofisaitaka o Malakai me baleta na valenisoro ni Kalou, a tekivu ena gauna cava na vakayacori ni parofisai qo?

¹⁶ Ena gauna cava ‘era na ramase kina me vaka na matanisiga’ o ira na vaka na witi? (Maciu 13:43) Me baleta na vakasavasavataki ni valenisoro ni Kalou, a parofisaitaka kina o Malakai: “ ‘Ena lako vakidacala mai ki na nona vale tabu, io, ena lako mai nai talatala ni veiyalayalati, o koya dou sa rekitaka; sa kaya ko Jiova ni lewe vuqa. Ia ko cei me na yalo dei e na siga ni nona lako mai? Ia ko cei me na tu rawa ni sa rairai mai ko koya? ni sa vaka na nona bukawaqa na dausava koula ko koya, ka vaka na nodra sovu na dausavai sulu: ia ena tiko ko koya me vakawaicalataka ka vakasavasavataka na siliva: ia ena vakasavasavataki ira na Livai, ka savai ira me vaka na koula kei na siliva, me ra vakacabora vei Jiova nai madrali sa dodonu.’”​—Mala. 3:​1-3.

¹⁷ Ena noda gauna, a tekivu vakayacori na parofisai qo ena 1918, qo nodrau dikeva o Jiova kei “nai talatala ni veiyalayalati” o Jisu Karisito na valenisoro vakayalo. E tukuna o Malakai na ka e yaco ni oti na veivakasavasavataki qo: “Dou na qai kunea sara ni sa dua tani na yalododonu ka dua tani na tamata ca, ni sa dua tani ko koya sa qarava na Kalou ka dua tani ko koya sa sega ni qaravi koya.” (Mala. 3:18) Nodra gugumatua ena cakacaka na lotu vaKarisito dina e dusia ni tekivu sara ga ena gauna ya na tatamusuki.

18. Na cava e parofisaitaka o Taniela ni na yaco ena noda gauna?

¹⁸ Me baleta na noda gauna, e tukuna na parofita o Taniela: “Ko ira sa vuku era na serau mai, me vaka na rarama kei lomalagi; kei ira era sa saumaki ira na lewe vuqa me ra yalododonu, me vaka na kalokalo ka sega ni mudu.” (Tani. 12:3) O cei era ramase cake tiko ga? Qo o ira na lotu vaKarisito lumuti, o ira sara ga na witi dina e vakaibalebaletaka tiko o Jisu ena vosa vakatautauvata ni witi kei na co ca! Nira ‘kumuni laivi’ na lotu vaKarisito era vaka na co ca, e yaco kina na tubu vakasakiti vei ira na isoqosoqo levu era vaka na sipi. O ira na vakanuinui mera vakarurugi ena Matanitu ni Kalou era tokoni ira na ivovo ni lumuti ni Isireli vakayalo. Nira cakava qori era ramase tiko ga kina ena vuravura butobuto qo.​—Saka. 8:23; Maciu 5:​14-16; Fpai. 2:15.

19, 20. Na cava era waraka tu na “luve ni matanitu,” cava eda na veivosakitaka ena ulutaga e tarava?

¹⁹ Nikua, era waraka tu “na luve ni matanitu” nodra icovi ni bula e lomalagi. (Roma 8:​18, 19; 1 Kor. 15:53; Fpai. 1:​21-24) Me yacova na gauna qori, ena vinakati mera yalodina tiko, mera ramase tiko ga, mera duatani vei ira na “luve ni vunica.” (Maciu 13:38; Vkta. 2:10) Eda marautaka, e ka dokai tale ga nida vakadinadinataka nodra ‘kumuni laivi’ na co ca ena noda gauna!

²⁰ Ia vakacava na nodrau veiwekani na luve ni Matanitu kei na isoqosoqo levu e tubu tiko ga na kedra iwiliwili qai nodra inuinui mera bula tawamudu e vuravura mera vakarurugi ena Matanitu ni Kalou? Ena veivosakitaki qori ena ulutaga e tarava.

[iVakamacala e ra]

O se Nanuma Tiko?

Ena vosa vakatautauvata i Jisu me baleta na witi kei na co ca, na cava e vakaibalebaletaka?

• Na itei vinaka

• O koya e kaburaka na itei

• Na kaburaki ni itei

• Na meca

• Na co ca

• Na gauna ni tatamusuki

• Na lololo

• Na tagi kei na katibati

• Na bukawaqa

[iYaloyalo ena tabana e 20]

Ena Penitiko 33 S.K. a tekivu kaburaki kina na itei vinaka

[iYaloyalo ena tabana e 23]

E kumuni na witi vakaivakatakarakara ena lololo i Jiova

[Credit Line]

Pictorial Archive (Near Eastern History) Est.