E Dua ga na Lotu Vakarisito Dina

A TAUYAVUTAKA o Jisu Karisito e dua ga na lotu, se ivavakoso. Na ivavakoso oya e dua na isoqosoqo vakayalo, e dua na vuvale vakayalo. Oqo e vakaibalebaletaka na nodra kumuni vata na tamata e digitaki ira na yalo tabu ni Kalou​—e vakatokai ira kece na Kalou mera ‘luvena.’​—Roma 8:​16, 17; Kalatia 3:​26.

A vakavulica o Jisu ni dua ga na sala e vakayagataka na Kalou me dusimaki ira kina nona tamata ina ka dina kei na bula. Me vakaraitaka na bibi ni ka dina oqo, a vakatauvatana o Jisu na rawati ni bula tawamudu kei na gaunisala. A kaya: “Dou curu ki na matamata-ni-koro qiqo: ni sa lalaga na matamata-ni-koro, ka rabailevu na sala, sa basika ki na rusa, a ra sa lewe vuqa sa curu kina; ni sa qiqo na matamata-ni-koro, ka rabailailai na sala, sa basika ki na bula, a ra sa lewe lailai sa kunea.”​—Maciu 7:​13, 14; Joni 14:6; Cakacaka 4:​11, 12.

iVavakoso Duavata

E sega ni dodonu meda nanuma ni ivavakoso ena imatai ni senitiuri “e dua na isoqosoqo e tuvanaki e vuravura raraba me vaka eda dau vakaibalebaletaka ina lotu Katolika,” e kaya na New Dictionary of Theology. Cava na vuna? E tomana: “Na vuna ga ni sega ni dua na isoqosoqo e vuravura nikua e tuvanaki vaka oya.”

E sega ni dua e rawa ni vakacala na vakasama ni rau sega ni tautauvata na ituvaki ni lotu eda raica ena gauna oqo kei na ivavakoso ni lotu Vakarisito ena imatai ni senitiuri. Ni a tuvanaki vakamatau na nodra ivavakoso. O ira na ivavakoso yadua oqo era sega ni dui caka nodra ga. Era ciqoma kece na nodratou veiliutaki na ilawalawa dauvakatulewa mai Jerusalemi. Na ilawalawa oqori​—e wili kina o ira na yapositolo kei ira na qase mai na ivavakoso e Jerusalemi​—e vukea na kena taqomaki na duavata ena ivavakoso ni “duabau ga na yago” i Karisito.​—Efeso 4:​4, 11-​16, VV; Cakacaka 15:​22-​31; 16:​4, 5.

Sa e vei na ivavakoso dina oya? O koya beka na lotu Katolika? A yaco beka me tatawasewase me vaka eda raica ena lotu Tawase ena gauna oqo? Se dua tale beka na ka a yaco kina?

“Sila Vinaka” kei na “Sila Ca”

Me saumi na veitaro oqori, ena vinaka meda dikeva matua sara mada na ka a kaya o Jisu Karisito ni na yaco. O na rairai kurabuitaka beka na nomu mai kila ni a namaka o Jisu na kena sega tu mada ni kilai nona ivavakoso ena dua na gauna, qai vakatara tiko me yaco na ituvaki rarawataki oqo me vica vata na senitiuri.

Nona semata tiko o Jisu na nona ivavakoso kei “na matanitu vakalomalagi,” a kaya: “Sa vakatautauvatataki na matanitu vakalomalagi kei na dua na tamata sa kaburaka na sila vinaka e na nona were; ia ni ra sa moce ko ira na tamata, sa lako mai na nona meca ka kaburaka vata na sila ca e loma ni witi, a sa qai lako yani. Ia ni sa tubu mai na sila ka vua, sa qai rairai talega na sila ca. Sa qai lako mai vua na kenai taukei ko ira na nona tamata, ka kaya vua, O a sega saka li ni kaburaka na sila vinaka e na nomu were? sa qai kau maivei na sila ca? Sa qai kaya vei ira ko koya, A ka oqo sa kitaka e dua na meca. A ra sa kaya vua ko ira na tamata, O sa vinakata beka me keitou laki kumuna vata oqori? A sa kaya ko koya, Tei kakua mada, de dou cavuraka talega na witi ni dou kumuna vata na sila ca: laiva ga me rau tubu vata ruarua me tei cava mada na yabaki: ia ni sa cava na yabaki ka’u na kaya vei ira na dautamusuka, Dou kumuna vata mada na sila ca, ka vauca e na veivau me visa: ia dou kumuna vata na witi ki na noqu lololo.”​—Maciu 13:​24-​30.

A vakamacalataka o Jisu ni o koya ga na ‘daukakaburaki.’ “Na sila vinaka” e vakatakarakarataki iratou na nona tisaipeli dina. Nona “meca” o Setani na Tevoro. “Na sila ca” o ira na lotu Vakarisito lasu era lai lewena tu na ivavakoso lotu Vakarisito taumada. E kaya ni na laiva me rau tubu vata “na sila vinaka” kei “na sila ca” me yacova “na cava ni yabaki,” ena yaco oqo “[e] nai vakataotioti kei vuravura.” (Maciu 13:​37-​43) Na cava era vakaibalebaletaka oqo?

Vakacaraki na iVavakoso Lotu Vakarisito

Dede vakalailai ga nodratou mate na yapositolo, sa ra tekivu liutaka na ivavakoso o ira na ivakavuvuli vukitani. Era vosataka “na ka e veivakacalai, me mari ira kina era sa lotu me ra muri ira.” (Cakacaka 20:​29, 30) Yaco me levu na lotu Vakarisito era ‘vukitani mai na vakabauta.’ Era “lesu ki nai tukutuku wale.”​—1 Timoci 4:​1-3; 2 Timoci 4:​3, 4.

Ena ikava ni senitiuri S.K., a kaya na New Dictionary of Theology, “Sa vakadonui na lotu Katolika . . . me lotu ni Matanitu o Roma.” Erau mai “cokovata kina na lotu kei na matanitu”​—na ivakavuvuli e veisaqasaqa kei na nodra vakabauta na lotu Vakarisito taumada. (Joni 17:16; Jemesa 4:4) Na ivola vata ga oya e kaya ni yaco na gauna sa veisau vakalevu na veika kece e vauca na lotu kei na kena inaki, vaka kina e vuqa na yavu ni kena ivakavuvuli, “ena veivakamuai ni kena sa veisola na ivakavuvuli ni Veiyalayalati Makawa kei na ivakavuvuli na neoplatonic.” Me vaka ga sa tukuna tu mai o Jisu Karisito, nira na sega tu mada ni kilai na nona tisaipeli dina ena gauna e tete vakalevu kina na lotu Vakarisito lasu.

O ira na rogoci Jisu tiko era kila vinaka na dredre ni kena vakaduiduitaki na sila vinaka mai na kena e ca. Me vaka e dua na mataqali sila ca e yacana na darnel, ni tubu vata kei na sila vinaka e dau dredre ni kilai na kedrau duidui. O koya gona, e vakaibalebaletaka tiko e ke o Jisu ni dua na gauna ena dredre ni kilai na kedrau duidui na lotu Vakarisito dina mai na kena e lasu. E sega ni kena ibalebale oqo ni na yali vakadua na lotu Vakarisito, ni a yalataka o Jisu ni na dusimaki ira tiko ga na tacina vakayalo “e na veisiga kecega, ka yacova nai vakataotioti kei vuravura.” (Maciu 28:20) A tukuna o Jisu ni na tubu tiko ga na sila vinaka. Ena loma ni veigauna sa oti, sega ni vakabekataki nira a saga yadudua se vakailawalawa ena nodra igu taucoko na lotu Vakarisito dina, mera kabita dei na ivakavuvuli i Karisito. Ia a sega ga na nodra isoqosoqo rairai me rawarawa kina nodra kilai. Era duidui mai vei ira na lotu vukitani, baleta ena veitabagauna e kunei ni o ira na lotu vukitani era vakamaduataka qai vakarogorogocataka na yaca i Jisu Karisito.​—2 Pita 2:​1, 2.

“Sa Vakaraitaki ko Koya na Daucaka Ca”

E dua tale na ka a tukuna tu mai na yapositolo o Paula me vakatakilakilataka na ivakarau ni sokalou lasu oqo. A kaya: “Me kakua ni dua e vakacalai kemuni e na dua na ka. E na sega mada ni yaco na Siga koya [Siga i Jiova] me yacova ni sa yaco oti na vuki tani vua na Kalou ka sa vakaraitaki ko koya na Daucaka Ca.” (2 Cesalonaika 2:​2-4, VV) Na ‘daucaka ca’ sa ira na ilawalawa italatala era dau vakatuturagani ira ena loma ni ivavakoso “lotu Vakarisito.”

A tekivu na vukitani ena gauna a bula voli kina na yapositolo o Paula. A tete totolo sara na vukitani ena gauna eratou mate kina na yapositolo, ni sa sega ni tarovi rawa. Ena vakaraitaki oqo, e kaya o Paula, ena “kaukauwa i Setani ka cakava na veimataqali i vakatakilakila lelevu kece ga kei na veika veivakurabuitaki vakailasu kece ga; kei na veivakacalai ca kece ga.” (2 Cesalonaika 2:​6-​12, VV) E vakamacalataka vakamatata sara ga na veika era cakava voli e vuqa na iliuliu ni lotu ena veitabagauna sa oti!

Me tokona na nodra ile nira lotu dina duadua ga, era kaya kina na iliuliu ni lotu Katolika ni nodra bisovi “a lesi sara ga mai vei ira na yapositolo taumada me tekivu sara mai na gauna a tauyavutaki kina na lotu Vakarisito.” Na kena dina, e sega ni bau dua na itukutuku makawa se dua na yavu vakaivolatabu e tokona na nodra ile oqo. E sega tale ga ni tu e dua na ivakadinadina me vakaraitaka ni a veidusimaki na yalo tabu ni Kalou ina kena tauyavutaki na ituvatuva ni lotu ena gauna ratou sa mate kina na yapositolo i Jisu.​—Roma 8:9; Kalatia 5:​19-​21.

Ia, vakacava na veimatalotu tale e so era basika ni oti na kena yaco na tatawasewase levu ni lotu? Era muria beka na nodra ivakaraitaki na ivavakoso ni lotu Vakarisito taumada? Era a lesu tale beka ina sokalou savasava a muria na imatai ni ivavakoso lotu Vakarisito? E dina nira wilika rawa e vuqa na lewenivanua na iVolatabu ena nodra vosa ga ni oti na kena yaco na tatawasewase levu ni lotu, ia e laurai ena itukutuku makawa nira a vakavuvulitaka tiko ga na veimatalotu oqo na veivakavuvuli lasu.​—Maciu 15:​7-9.

Dikeva, ni a tukuna tu mai o Jisu Karisito ni na vakavotui tale na nona ivavakoso dina ena gauna e vakatoka o koya me ivakataotioti kei vuravura. (Maciu 13:​30, 39) Na kena vakayacori na veiparofisai vakaivolatabu e vakaraitaka nida sa bula donuya tu oqo na gauna oya. (Maciu 24:​3-​35) O koya gona, ena vinaka meda dui tarogi keda, ‘Sa e vei na lotu dina duadua ga oya?’ Sa dodonu me rawarawa sara na kena kilai.

De dua o nanuma ni o sa kunea na lotu, se ivavakoso oya. E vinaka mo vakadeitaka sara ga. Cava na vuna? Baleta ena imatai ni senitiuri, a dua ga na lotu dina. O taura beka na gauna mo vakadeitaka kina ni nomu lotu e muria vinaka tiko na ivakaraitaki ni ivavakoso lotu Vakarisito ena imatai ni senitiuri, qai muria tale tiko ga ena yalodina na ivakavuvuli i Jisu Karisito? Vakacava mo vakadeitaka sara mada ga oqori? Era na marau na iVakadinadina i Jiova mera vukei iko kina.​—Cakacaka 17:11.

[iYaloyalo ena tabana e 5]

Na cava eda vulica ena vosa vakatautauvata i Jisu ni sila vinaka kei na sila ca me baleta na ivavakoso dina?

[iYaloyalo ena tabana e 7]

E laurai tale beka ga ena nomu lotu ni muria tiko na ivakaraitaki ni nodra vunau kei na nodra vuli na lotu Vakarisito ena imatai ni senitiuri?