Toro Voleka Vua na Kalou

“Nomu Matanitu, ena Vakataudeitaki”

2 SAMUELA 7:​1-16

E LEVU ena gauna makawa era kau tani mai na nodra itutu ni veiliutaki. Eso vei ira qori era digia na lewenivanua mera cegu, ia eso tale era vakacegui vakasaurara. Vakacava o Jisu Karisito na Tui ni Matanitu vakalomalagi ni Kalou? E dua beka na ka e rawa ni tarova nona veiliutaki me Tui lumuti ni Kalou? Ena kilai na kena isau ena vosa i Jiova vei Tui Tevita e Isireli makawa e volai ena 2 Samuela wase 7.

Eda wilika ena itekivu ni wase qori na madua i Tevita ni dua ga na tui e vuravura, e vakaitikotiko ena dua na vale totoka ni tui, ia a biu toka ga ena dua na valelaca na kato ni Kalou.a E vinakata gona o Tevita me tara e dua na vale rakorako, se dua na valenisoro me nei Jiova. (Tikina e 2) Ia o Tevita ena sega ni tara na vale ya. A gusui Jiova vei Tevita o Necani, qai tukuna vua ni na tara na valenisoro e dua na luvenatagane.​—Tikina e 4, 5, 12, 13.

A marautaka o Jiova na gagadre i Tevita. Ni vakalougatataka nona yalodina, qai salavata kei na parofisai, a yalataka kina na Kalou ni na basika ena nona yatukawa vakatui o koya me veiliutaki tawamudu. Qo na yalayala ni Kalou a tukuna vei Tevita o Necani: “Nomu mataqali, kei na nomu matanitu, ena vakataudeitaki e matamu, ka sega ni oti: ena vakataudeitaki ka tawa mudu na nomui tikotiko vakaturaga.” (Tikina e 16) Ena vakayacori vei cei na veiyalayalati ni veiliutaki tawamudu?​—Same 89:​20, 29, 34-36.

E kawa i Tevita o Jisu na kai Nasareci. A tukuna na agilosi a kacivaka na sucu i Jisu: “Ena solia vua na Kalou o Jiova na idabedabe vakatui i Tevita na tamana, ena lewa na vuvale i Jekope me tawamudu, ena sega ni mudu na nona matanitu.” (Luke 1:​32, 33) E vakayacori gona vei Jisu Karisito na veika a yalataki vei Tevita. E sega ni digitaki vakatamata me veiliutaki, ia e dodonu ga me veiliutaki tawamudu ni sa yalataka tu na Kalou. Meda nanuma tiko ni dau yaco dina na yalayala ni Kalou.​—Aisea 55:​10, 11.

Eda vulica e rua na lesoni bibi ena 2 Samuela wase 7. Kena imatai, eda nuidei ni na veiliutaki dina o Jisu Karisito, ena sega ni tarovi rawa. Eda vakadeitaka tale ga ni na vakayacori na inaki ni nona veiliutaki, ya me vakayacora kece na loma ni Kalou e vuravura me vaka sa caka tiko mai lomalagi.​—Maciu 6:​9, 10.

Kena ikarua, e veiuqeti dina na ka eda vulica ena veiyalayalati qo me baleti Jiova. Nanuma tiko ni a raica o Jiova qai marautaka na inaki ni lomai Tevita. Meda nuidei tale ga ni raica o Jiova qai marautaka noda yalodina ni qaravi koya. Eda sega ni cakava rawa e dua na ka ena so na ituvaki eda dau sotava, me vaka na tauvimate se bula vaqase. Qori e rawa ni vakalatilati ena noda cakava na ka kece eda vinakata me baleta noda qarava na Kalou. Ia meda nuidei ni raica o Jiova na inaki ni lomana e dua e yalodina ena nona sokalou.

[iVakamacala e ra]