Taro Na Dauwiliwili . . .

O Jisu na Agilosi Turaga o Maikeli?

▪ Io e vakakina. E dau kena ivakarau ena levu na vanua me dua e kacivi ena vicavata na yaca. E vaka tale ga kina na yaca era tu ena iVolatabu. Kaya mada, na peteriaki o Jekope e vakatokai tale ga me o Isireli. (Vakatekivu 35:10) E vakatokai na yapositolo o Pita ena lima na yaca​—Simioni, Saimoni, Pita, Kifa, kei na Saimoni Pita. (Maciu 10:2; 16:16; Joni 1:42; Cakacaka 15:​7, 14) Eda kila vakacava ni yaca i Jisu tale ga o Maikeli? Raica mada na kena ivakadinadina vakaivolatabu qo.

E cavuti vakalima ena iVolatabu na yaca Maikeli. E volai vakatolu ena Taniela. Eda wilika ena Taniela 10:​13, 21 nona vukea e dua na agilosi a talai ena dua na itavi o Maikeli, e vakatokai tale ga me “turaga ka liu” kei na “nomudou Turaga.” Ia ena Taniela 12:​1, e tukuna ni gauna ni vakataotioti, “ena tu cake ko Maikeli, na turaga levu o koya sa totaki ira na luvedra na kai nomu.”

E cavuti tale o Maikeli ena Vakatakila 12:​7, e vakamacalataka nona kolotaki mai vuravura o Setani na tevoro kei ira nona agilosi ca ni oti nodra vala mai lomalagi kei “Maikeli kei ira na nona agilosi.”

Nida vakasamataka na ituvaki sa cavuti oti ya, e vakatayaloyalotaka ni o Maikeli na agilosi dauvala e vala tiko me taqomaki ira na tamata ni Kalou, e vorati Setani tale tiko ga na meca nabadua i Jiova.

E vakatokai o Maikeli ena Juta 9 me “agilosi turaga.” Na tikinivolatabu ga e cavuti tale kina na agilosi turaga na 1 Cesalonaika 4:​16, ya nona vakamacalataki Jisu sa vakaturi oti o Paula: “Ni na lako sobu mai lomalagi na Turaga qai veivakaroti ena domo ni agilosi turaga, ena taura tale tu ga na biukila ni Kalou.” E vakavotui eke o Jisu Karisito me agilosi turaga se na agilosi liu.

E bibi gona meda kila ni sega ni tekivu ga na bula i Jisu ena nona mai sucu e vuravura. Ni bera ni sucu o Jisu, a rairai vei Meri e dua na agilosi qai tukuna vua ni na kunekunetaka e dua na gone ena kaukaua ni yalo tabu me qai vakayacani koya o Jisu. (Luke 1:31) E dau tukuna tale ga o Jisu ena nona cakacaka vakaitalatala nona a bula tu mai lomalagi.​—Joni 3:13; 8:​23, 58.

Na cava eda rawa ni kaya ena tikina eda sa raica oti mai? O Jisu Karisito na agilosi turaga o Maikeli. Na yaca ruarua qo​—Maikeli (e kena ibalebale “O Cei e Tautauvata kei na Kalou?”) kei Jisu (kena ibalebale “Veivakabulai o Jiova”)​—e vakabibitaka na nona itavi ena kena tokoni na veiliutaki cecere i Jiova. E tukuna na Filipai 2:9: “E vakacerecerei koya kina na Kalou ena dua na itutu cecere qai solia vakayalololoma vua na yaca e uasivia na vo tale ni yaca.”

O Jisu na agilosi turaga o Maikeli ena gauna a bula tu kina mai lomalagi. Ni lesu i lomalagi ni vakaturi oti, a tomana tale o Jisu se o Maikeli na agilosi turaga na nona itavi, “me vakalagilagi kina na Kalou na Tamada.”​—Filipai 2:11.