Taro na Dauwiliwili

E cata o Jiova na qaravi matakau, ia na cava a sega ni totogitaki Eroni kina ni bulia e dua na luve ni bulumakau koula?

Ena gauna a bulia kina o Eroni na luve ni bulumakau koula, a beca na lawa ni Kalou e vauca na qaravi matakau e volai ena Lako Yani wase 32. (Lako 20:3-5) A “cudruvi Eroni vakalevu . . . ko Jiova me via vakamatei koya: ia ka’u [Mosese] a masulaki Eroni . . . e na gauna ko ya.” (Vkru. 9:19, 20) A “yaga vakalevu” beka na nona masulaki Eroni na turaga yalododonu o Mosese? (Jeme. 5:16) Io. Ena nona vakamamasu qori kei na rua tale na vuna, a rairai rogoca kina o Jiova na masu i Mosese qai sega ni totogitaki Eroni.

Kena imatai, a kilai o Eroni me dua na turaga yalodina. Na gauna a talai Mosese kina o Jiova vei Fero me sereki ira na Isireli mai Ijipita, a lesi Eroni me salavata kei Mosese, me vosa tale ga ena vukuna. (Lako 4:10-16) Erau talairawarawa ena gauna kece a vinakati merau lai vosa vaka vica vata vei Fero na tui yalokaukaua kei Ijipita. A laurai vei Eroni ena nona tiko voli mai Ijipita ni yalodina qai dei ena nona qaravi Jiova.—Lako 4:21.

Meda raica e dua na vuna a bulia kina na luve ni bulumakau. A tiko ena ulunivanua o Saineai o Mosese me 40 na siga. Era “raica na tamata sa berabera ni lako sobu mai na ulu-ni-vanua ko Mosese,” era mani cikevi Eroni me bulia e dua na matakau. A qai vakamalumalumu o Eroni ena nona bulia e dua na luve ni bulumakau koula. (Lako 32:1-6) Ena ka e cakava tarava o Eroni, e vakadinadinataki kina ni sega ni tokona na qaravi matakau. A rairai vakamalumalumu ga ena nodra veivakamuai na Isireli. Me kena ivakaraitaki ena gauna a tukuna kina o Mosese na itinitini ni qaravi matakau, era totaki Jiova kece na Livai wili kina o Eroni. Era mate ena siga ya e le tolunaudolu, nira uqeta na buli ni matakau.—Lako 32:25-29.

A tukuna tarava vei ira o Mosese: “Dou sa kitaka e dua na ca levu.” (Lako 32:30) A sega gona ni bale duadua ga vei Eroni na cala ya. A vakila o koya kei ira tale ga na lewenivanua na yalololoma i Jiova.

Ni oti qori, a vakarota o Jiova me lumuti o Eroni me bete levu. A tukuna vei Mosese o Jiova: “Mo qai vakaisulutaki Eroni e nai sulu tabu, ka lumuti koya, ka buli koya, me bete vei au ko koya.” (Lako 40:12, 13) E vakaraitaka qo ni o Jiova a vosota na malumalumu i Eroni. A dau tutaka o Eroni na sokalou dina, sega ni qaravi matakau.