Karana—Na Koro e Dau Yaco Kina e Levu na ka Ena Gauna Makawa

NIRA rogoca na vosa Karana o ira na kila vinaka na iVolatabu, era na vakasamataki Eparama na peteriaki yalodina. Ena ilakolako mai Uri i Kenani, ratou a vakaitikotiko e Karana o Eparama, na watina o Sera, na tamana o Tira kei na vugona o Loti. A vutuniyau sara o Eparama ena vanua ya. Ni mate o Tira na tamana, e tomana nona ilakolako o Eparama ena vanua a yalataka vua na Kalou dina. (Vkte. 11:31, 32; 12:4, 5; Caka. 7:2-4) Emuri, a qai tala o Eparama nona dauveiqaravi qase duadua me gole i Karana se dua na vanua voleka me qara e dua na wati Aisake. A tiko tale ga e kea me vica na yabaki na makubui Eparama o Jekope.—Vkte. 24:1-4, 10; 27:42-45; 28:1, 2, 10.

Na Tui Asiria o Senakaripi a vakarerei Tui Esekaia e Juta ena nona tukuna ni o Karana e dua vei ira na “veivanua” e sa vakamalumalumutaka oti. Na yaca “Karana” e sega ni vakaibalebaletaki ga ena siti, nira wili tale ga kina na yasayasa voleka. (2 Tui 19:11, 12, NW) E cavuti ena parofisai i Isikeli ni dua vei ira na matanitu era dau veivoli vakalevu kei Taia o Karana. E macala gona ni dua vei ira na vanua rogo ena veivoli o Karana.—Isik. 27:1, 2, 23.

Ena gauna qo, e tiko o Karana ena dua na taoni volekati Şanlıurfa, ena tokalau kei Taki. Ena gauna makawa, e levu sara na ka e dau caka ena siti o Karana. O Karana e dua vei ira na vanua makawa e se vakayagataka tiko ga nikua na yaca a vakatokai kina ena iVolatabu. E cavuti ena vosa vakaSiria me Harranu, kena ibalebale “Gaunisala” se “Sala ni Karavani (Caravan),” qori e dusia ni tiko o Karana ena gaunisala era dau lakova na dauveivoli ena siti lelevu. A laurai ena so na itukutuku a keli e Karana, ni o tinai Nabonidus na Tui Papiloni a bete levu ena valenisoro i Sini, na kalou vula ni Karana. E tukuni ni vakavinakataka na valenisoro qo o Nabonidus. Oti qori, e vica na matanitu lelevu era basika, ra bale tale, ia o Karana e se tiko ga.

Sa veisau sara nikua o Karana ni vakatauvatani kei na gauna eliu. Ena gauna makawa, a vanua vakatorocaketaki qai siti rogo. O Karana ena gauna qo e duidui sara, e vica toka ga na kena vale, qai mokimokiti na kena delavuvu. E toka wavokita na koro qori na irusarusa ni kena ivakarau ni bula makawa. Ena vuravura vou ni Kalou, e levu vei ira era bula e Karana—me vakataki Eparama, Sera, kei Loti—era na vakaturi. De dua era na talanoataka vei keda e levu tale na ka me baleti Karana, na koro e dau yaco kina e levu na ka ena gauna makawa.

[iYaloyalo ena tabana e 20]

iRusarusa kei Karana

[iYaloyalo ena tabana e 20]

Na delavuvu ni vale mokimokiti

[iYaloyalo ena tabana e 20]

iRairai kei Karana nikua ni laurai yani vakayawa