Vosota Nona Sega ni Dina o Watimu

O MARGARITA kei na watina o Raúl erau a veiqaravi vakatabakidua tu vei Jiova me vica vata na yabaki.a Ia ni sucu na imatai ni luvedrau, sa tekivu yawaki Jiova o Raúl. A lai vakasisila sara nona ivakarau ni bula mani vakasivoi mai na ivavakoso vaKarisito. E tukuna o Margarita: “Ena gauna e yaco kina qo, au nanuma ga niu sa na mate. E vusolo sara ga na lomaqu, au sega tale ga ni kila na ka meu cakava.”

Ni vakamau oti ga o Jane, a duatani na iwalewale a dabui koya kina o watina. Me isau ni nona loloma kei na nona nuitaki watina o Jane, a dau mokuti koya o tagane. “Na imatai ni gauna e vacuki au kina,” e tukuna o Jane, “Au kidacalataka, au madua tale ga. E vaka me sa kena ivakarau me dau kere veivosoti ni oti ga nona mokuti au. Au nanuma ni noqu itavi ga vaKarisito meu dau veivosoti qai guilecava na ka tawadodonu a caka vei au. Au nanuma tale ga niu na sega ni yalodina keu talaucaka noqu leqa vua e dua​—wili kina o ira na qase ni ivavakoso. Qo e ivakarau tu ni bula me vica vata na yabaki. Ena gauna kece qo au nanuma meu cakava e dua na ka me lomani au tale kina o watiqu. Ia ni biuti au kei luvei keirau yalewa, au nanuma ni guce noqu sasaga, ni dodonu meu a cakava se tukuna e levu na ka me dei tiko ga kina neirau vakawati.”

Me vakataki Margarita ga kei Jane, o rairai rarawa tiko, o vakaleqai vakailavo, vakayalo tale ga ena nona tawayalodina o watimu. De o dua na tagane vakawati o vakila tiko na rarawa kei na dredre ena nona sega ni yalodina o watimu. Me vaka ga a parofisaitaki ena iVolatabu, eda sa bula tu qo ena gauna “ena vakilai kina e levu na ka dredre.” E vakaraitaka na parofisai qo ni donuya na “iotioti ni veisiga,” ena vakaleqai na vuvale, eso na gauna e sa na sega sara ga na veikauaitaki. Eso era na lasutaka nira qarava na Kalou. (2 Tim. 3:​1-5) Era sega ni galala na lotu vaKarisito dina mai na leqa qo, ia na cava o rawa ni cakava mo vosota kina?

Vakatotomuri Jiova

Ni se qai tekivu, o na rairai sega ni vakabauta ni vakararawataki iko e dua o lomana. O na rairai beitaki iko ni o vakavuna na ka a yaco.

Ia mo nanuma tiko, ni dua sara ga a nuitaka qai lomana na turaga uasivi o Jisu, a sega ni qai dina vua. Ni vakasamataka oti qai masulaka, a qai digi ratou na yapositolo o Jisu, eratou nona itokani voleka. O ratou kece na le 12 ya ratou dauveiqaravi nuitaki i Jiova. Koya gona, a rarawataka dina o Jisu na nona ‘veretaki’ koya o Jutasa. (Luke 6:​12-16) Ia o Jiova a sega ni beitaki Jisu ena ka a yaco ya.

E sega ni dua na isa ni vakawati ena gauna qo e uasivi. Erau na dau cala ruarua na veiwatini. A uqeti na daunisame me vola na ka dina qo: “Kevaka ko ni sa nanuma, Jiova, nai valavala ca o cei kemuni na Turaga, me na bula rawa?” (Same 130:3) Ena nodrau vakatotomuri Jiova, e dodonu merau dau raibaleta na nodrau dui malumalumu.​—1 Pita 4:8.

‘Eda na dui saumitaro vua na Kalou.’ (Roma 14:12) Ke dua gona vei rau na veiwatini e dau vosa vakaukaua se voravora nona itovo, ena qai saumitaro ga vei Jiova. E cata o Jiova na ivalavala voravora kei na vosa vakaukaua, me kua gona ni vakaiulubale e dua na isa ni vakawati ni sega ni rawa me dau loloma qai veidokai. (Same 11:5; Efeso 5:33; Kolo. 3:​6-8) Ke dua mada ga na lotu vaKarisito e dau cudrucudru qai sega ni veisau, ena vakasivoi mai na ivavakoso vaKarisito. (Kala. 5:​19-21; 2 Joni 9, 10) Me kua ni nanuma e dua na isa ni vakawati ni cala nona lai tukuna vei ratou na qase ni ivavakoso na itovo sega ni vaKarisito va qori e caka tiko. O Jiova e lomani ira dina era dau vakalolomataki.

Ni dua vei rau na veiwatini e veibutakoci, e sa valavala ca vei kena isa vei Jiova tale ga. (Maciu 19:​4-9; Iper. 13:4) Ke a yalodina tiko e dua vei rau na veiwatini ena nona saga me bulataka na ivakavuvuli vakaivolatabu, e sega ni dodonu me ora na lomana ena nona sega ni dina o kena isa.

Nanuma tiko ni o Jiova e kila na lomamu. E tukuni koya me wati Isireli, qai laurai votu ena levu na tikinivolatabu nona rarawataka na veibutakoci vakayalo ni matanitu ya. (Aisea 54:​5, 6; Jere. 3:​1, 6-10) Mo kila tiko ni o Jiova e kila vinaka nomu tagi ni tawayalodina o watimu. (Mala. 2:​13, 14) E kila o koya ni o gadreva na veivakacegui kei na veiuqeti.

Sala e Veivakacegui Kina O Jiova

Dua na sala e dau veivakacegui kina o Jiova, na ivavakoso vaKarisito. A vakadinadinataka qori o Jane. E vakasamataka lesu, “Ena gauna sara ga a vusolo tu kina na lomaqu, a veisiko sara mai na ivakatawa ni tabacakacaka. E kila vinaka o koya na noqu rarawa ena nona via veisere o watiqu. E vakayagataka nona gauna me vukei au ena so na tikinivolatabu me vaka na 1 Korinica 7:15. Na veitikinivolatabu kei na nona ivakasala vinaka e yaga sara ga ena ora ni lomaqu qai vakacegui au.”b

O Margarita sa cavuti oti mai, a vulica ni o Jiova e dau veivuke ena nona vakayagataka na ivavakoso vaKarisito. “Ni u kila ni sa sega ni veivutuni o watiqu,” e tukuna o Margarita, “Keitou mani toki kei rau na luvequ ena dua tale na siti. Keitou kunea rawa e rua na rumu me keitou rede kina. Niu se rarawa tiko ga ena siga tarava au qai talaucaka tiko na neitou isulu, a rogo sara na tukituki e katuba. Au namaka me marama keitou saumi rumu tiko kina. Au kidacala niu raica na yalewa a vakavulici tinaqu ena iVolatabu, a veivuke tale ga ena neitou kila vakavuvale na dina. A sega ni namaka me raici au baleta a lako tiko mai merau mai vuli iVolatabu kei koya na marama au saumi rumu tiko kina. Au vakila sara ga na vakacegu​—au luluvu sara ga. Au vakamacalataka vua na kequ ituvaki, keirau veitagici sara. A tuvanaka totolo sara me keitou lai soqoni ena siga ga ya. Era kidavaki keitou na lewe ni ivavakoso, era tuvanaka tale ga na qase ni ivavakoso me keitou vukei vakayalo.”

Era Rawa ni Veivuke Eso Tale

Io, e rawa nira veivuke na lewe ni ivavakoso vaKarisito ena levu na sala. Me kena ivakaraitaki, e vinakati vei Margarita me vaqara e dua na cakacaka saumi. A bole e dua na vuvale ena ivavakoso me ratou qaravi rau na luvena ni suka na vuli ke gadrevi.

E tukuna o Margarita “Na ka au dau marautaka sara vakalevu, oya nodra dau bole na mataveitacini mera tomani keitou vakavuvale ena cakacaka vakavunau.” Nira cakava qo, era sa ‘veivuketaka tiko na icolacola bibi’ na lewe ni ivavakoso, era sa vakayacora tiko kina “na lawa i Karisito.”​—Kala. 6:2.

O ira era rarawa ena vuku ni nodra valavala ca tale eso, era dau marautaka dina na veivuke va qo. A biuti Monique o watina qai binia tu mai e dua na dinau levu e $15,000 na ilavo ni Merika kei na va na gone me qarava, e tukuna: “O ira na taciqu vakayalo era sa dau loloma dina. Ke ra sega ni veivuke, au sega ni kila au na vosota rawa vakacava na ituvaki au sotava. Au vakabauta ni o Jiova a soli ira mai na taciqu totoka qo, era dau tu vakarau mera vukei ratou na luvequ. Au marau niu raica niratou matua vakayalo na luvequ ena veivuke va qo. Keu gadreva na ivakasala, era dau vukei au kina na qase ni ivavakoso. Keu gadreva e dua me keirau veivosaki, era dau vakarorogo.”​—Marika 10:​29, 30.

Na itokani e dau veikauaitaki e kila ni vinaka me kua ni dau veivosakitaki na ka rarawa e sotava tiko e dua. (Dauv. 3:7) “Levu na gauna,” e tukuna o Margarita, “Au dau taleitaka na veitalanoa kei ira na taciqu yalewa ena ivavakoso vou au lewena, na veika me baleta na cakacaka vakavunau, neimami vuli iVolatabu, na luvei keimami​—me kua ga ni veitalanoataki na noqu leqa. Au taleitaka nira sega ni dau veivosakitaka e dua na ka me baleta na noqu bula makawa ra qai vinakata meu tekivu vou.”

Vorata na Yalo ni Via Veisausaumi

Eso na gauna o na sega ni beitaki iko ena nona valavala ca o kemu isa, ia o na rairai sega ni taleitaka na nomu mai rarawa tu vakalevu ena vuku ni nona cala. Ke o vakalaiva me buroro e lomamu qori, ena rawa ni vakaleqa nomu yalodina vei Jiova. Me kena ivakaraitaki, o rawa ni temaki mo sauma lesu na nona sega ni yalodina o kemu isa.

Ke o siqema ni sa buroro tiko vei iko na vakasama qo, e vinaka mo raica mada na ivakaraitaki i Josua kei Kelepi. Erau solia nodrau bula na turaga yalodina qo me rau lai yamata ena Vanua Yalataki. E lailai nodra vakabauta na vo ni yamata ra qai uqeti ira na tamata mera kua ni talairawarawa vei Jiova. Eso mada ga vei ira na Isireli era vinakata mera vakaviriki Josua kei Kelepi ena vatu ena gauna rau uqeta kina eso mera yalodina tiko ga. (Tiko 13:25–14:10) Na ka ra cakava qo na Isireli e vakavuna nodrau veilakoyaki voli ena vanualiwa o Josua kei Kelepi me 40 na yabaki, ia era cala na kena vo sega ni o rau.

Erau a rairai yalolailai o Josua kei Kelepi, ia rau sega ni vakalaiva na nodra valavala ca na tacidrau merau cudru kina. Ia rau vakadeitaka merau dei tiko ga ena veika vakayalo. Ni cava na 40 na yabaki ena vanualiwa, o rau kei ira na Livai era a vakalougatataki ena nodra bulata na itabatamata ya ra qai vakadonui mera curuma na Vanua Yalataki.​—Tiko 14:​28-30; Josua 14:​6-12.

Ena rairai vakararawataki iko ena dua na gauna balavu na nona sega ni dina vei iko o kemu isa. Ena rairai kasura kina nomudrau bula vakawati, ia o na rarawa qai sotava kina na dredre vakailavo. Ia kua ni vakasamataka na ka e sega ni veivakauqeti, mo nanuma tiko ga ni o Jiova e kila vinaka na ka me cakava vei ira era nakita nodra sega ni muria na nona ivakatagedegede, me vaka ga a cakava vei ira na Isireli era a sega ni yalodina ena vanualiwa.​—Iper. 10:​30, 31; 13:4.

O Rawa ni Vosota!

Vakatotomuria nona rai o Jiova, kua ni vakasamataka na veika ena vakayalolailaitaki iko. “Au vakila niu rawa ni vosota ena noqu dau rogoca na tepi katoni ni Vale ni Vakatawa kei na Yadra!” e tukuna o Jane. “E dau veivakaukauataki tale ga na soqoni. Niu dau vakaitavi ena soqoni, au sega ni dau vakasamataka kina noqu leqa. Na cakacaka vakavunau tale ga e yaga vei au. Noqu vukea tale eso mera vakaukauataka nodra vakabauta e vakaukauataka tale ga na noqu vakabauta. Niu dau kauaitaki ira na vuli iVolatabu, au dau vakasamataka kina na ka e bibi cake.”

E tukuna o Monique sa cavuti oti mai: “Noqu dau tiko vakawasoma ena soqoni kei na noqu vakaitavi ena kena levu ena cakacaka vakavunau, au vosota rawa kina. E vakavolekati keitou vakavuvale kei ira ena ivavakoso. Na noqu vakatovolei e vakavotuya noqu malumalumu. Au vakatovolei, ia ena veivuke i Jiova au vosota rawa kina.”

O rawa tale ga ni vosota na veivakatovolei va qo. E mosimosi nona sega ni dina o kemu isa, ia saga mo muria na ivakasala veiuqeti i Paula: “Meda kua mada ga ni soro ena caka vinaka, nida na tamusuka ena kena gauna ke da sega ni vakacauoca.”​—Kala. 6:9.

[iVakamacala e ra]

[iYaloyalo ena tabana e 31]

O ira na isa ni vakawati era yalodina era dau marautaka nodra veivuke eso tale ena cakacaka vakavunau