Na Cava a Sega ni Vakaitavi Kina o Jisu ena Politiki?

RAITAYALOYALOTAKA mada na ka a yaco ena dua na yakavi ena 32 S.K. Sa kilai levu tu ni dau vakabulai ira na tauvimate o Jisu na Mesaia yalataki, e vakaturi ira tale ga na mate. Ena yakavi e tukuni tiko e cake, e vakadrukai ira e le udolu vakacaca ena levu ni nona cakamana kei na nona veivakavulici me baleta na Kalou. E wasewasei ira vakalalai na ilala levu era viakana tu. E masu vei Jiova qai vakani ira kece vakacakamana. Oti, sa qai soqona na kakana e vo me kua ni maumau. Na cava na nodra rai na lewenivanua?​—Joni 6:​1-13.

Nira raica na cakamana i Jisu, na maqosa ni nona veiliutaki ena nodra qaravi kei na vakarautaki ni ka era gadreva, era nanuma kina ni o Jisu ena dua na tui uasivi. (Joni 6:14) E sega ni kurabuitaki ni va qori nodra rai. Nanuma tiko era vakalolomataki tu na lewenivanua ena veiliutaki vakasaurara ni dua tale na matanitu, era vinakata gona me dua na nodra iliuliu vinaka qai maqosa nona veiliutaki. Era saga kina mera vakaukauataki Jisu me vakaitavi ena politiki. Ni o vakasamataka tiko qori, raica mada na ka a cakava o Jisu.

E kaya na Joni 6:15: “Ni kila o Jisu nira vakarau lako yani mera vesuki koya ra qai buli koya me tui, e lako duadua tale yani ina ulunivanua.” Sa vakamatatataka sara ga qori na rai i Jisu. A nakita dei me kua ni vakaitavi ena politiki ni nona vanua qai sega ni bau veisau vakadua nona vakatulewa. A tukuna mera vakatotomuria tale ga nona imuri na nona rai. (Joni 17:16) Na cava a vakatulewataka kina o Jisu me kua ni vakaitavi ena politiki?

Vuna a Tawaveitovaki Kina o Jisu

A yavutaki ena iVolatabu na vakatulewa i Jisu me baleta na politiki ni vuravura qo. Meda raica mada ga e rua na kena yavu.

“Sa lewa kina na tamata vua na tamata tani ka sa mani ca kina.” (Dauvunau 8:9) Qori na ka e tukuna na iVolatabu me baleta na veiliutaki ni tamata. Nanuma tiko ni o Jisu a dua na kabula vakayalo qai bula dede tu mai lomalagi ni bera ni mai bula vakatamata e vuravura. (Joni 17:5) A kila gona se mani vakacava na vinaka ni nona inaki na tamata, ena sega ni rawa ni qarava vinaka na ka era gadreva na le bilioni vakacaca; a sega tale ga ni bulia na tamata na Kalou me cakava qori. (Jeremaia 10:23) A kila o Jisu ni na wali na leqa ni kawatamata, ia ena sega ni cakava qori na veiliutaki vakatamata.

“E lewa tiko na Vunica na vuravura taucoko.” (1 Joni 5:19) O kurabuitaka na ka e tukuni ya? E levu era kurabuitaka qori baleta era vakasamataki ira tiko e vinaka na inaki ni nodra tokona na matanitu, era vinakata me vinaka na bula e vuravura, me kua na bula rerere. Ia se mani vinaka vakacava nodra inaki na iliuliu, era na sega ni muduka rawa na nona veivakamuai o koya a vakatoka o Jisu me “turaga ni vuravura qo.” (Joni 12:31; 14:30) Qori na vuna a tukuna kina o Jisu vua e dua na daunipolitiki e vuravura: “E sega ni vakavuravura na noqu matanitu.” (Joni 18:36) O Jisu na Tui ni matanitu vakalomalagi ni Kalou. Ke vakaitavi ena politiki, e sa na tawayalodina ina matanitu i Tamana.

A vakavuvulitaka o Jisu ni o ira na nona imuri e sega na nodra itavi ina matanitu vakatamata? A sega ni cakava qori o Jisu, a vakavuvulitaka ga na rai donu me tiko vei ira me baleta na nodra itavi vua na Kalou kei na nodra itavi ina matanitu vakatamata.

O Jisu a Dokai Ira na Veiliutaki ena Matanitu

Ni veivakavulici tiko ena valenisoro o Jisu, era saga na dauveitusaqati mera lawakitaki koya ena nodra taroga me saumi na ivakacavacava se sega. Ke a vakasega o Jisu, ena rairai okati qori me veivorati, ena rairai vakavuna tale ga na nodra vakaduduile na vakalolomataki tu ena nodra veiliutaki vakasaurara na kai Roma. Ia ke vakaio, era na rairai nanuma e levu ni tokona o Jisu na veika tawadodonu e caka tiko vei ira. E veiraurau vinaka na isaunitaro i Jisu ena nona kaya: “Solia sara vei Sisa na ka e nei Sisa, vua na Kalou na ka e nona na Kalou.” (Luke 20:​21-25) Kena ibalebale, e tiko na nodra itavi na imuri i Jisu vua na Kalou, e tiko tale ga nodra itavi vei Sisa​—se na matanitu vakatamata.

Era sasagataka tiko na matanitu na tiko vinaka. E veiganiti kina nodra lavaka mera daudina na lewenivanua, mera saumi vakacavacava, ra muria tale ga na lawa. E ivakaraitaki vakacava o Jisu ena nona solia “vei Sisa na ka e nei Sisa”? E rau susugi Jisu na itubutubu e rau dau muria na lawa, ke dredre mada ga ena so na gauna. Kena ivakaraitaki, a bukete tu o Meri ena gauna a lavaki kina mai Roma me caka na wili lewenivanua, ia rau gole ga kei Josefa i Peceliema me rauta na 150 na kilomita. (Luke 2:​1-5) A dau muria na lawa o Jisu me vakataki rau ga nona itubutubu, bau sauma mada ga na ivakacavacava a sega ni dodonu me sauma. (Maciu 17:​24-27) A qaqarauni tale ga me kua ni lakosivia na iyalayala ni lewa e tu vua. (Luke 12:​13, 14) E rawa gona ni tukuni ni sega ni via veiliutaki ena matanitu o Jisu, ia e doka na lawa ni matanitu. Ia na cava na ibalebale ni nona tukuna me soli “vua na Kalou na ka e nona na Kalou”?

A Solia o Jisu “Vua na Kalou na Ka e Nona na Kalou”

Ni tarogi ena dua na gauna o Jisu me baleta na ivakaro levu duadua ni Kalou vei keda, a kaya: “‘Mo lomani Jiova na nomu Kalou ena lomamu taucoko, ena nomu bula taucoko, kei na nomu vakasama taucoko.’ Qo na ivunau levu duadua, na kena imatai tale ga. E vaka kina na kena ikarua, ‘Mo lomana na kainomu me vaka nomu lomani iko.’” (Maciu 22:​37-39) A vakavuvulitaka o Jisu nida solia “vua na Kalou na ka e nona na Kalou,” e liu duadua noda lomani koya​—qori e okati kina noda yalodina vakatabakidua vua qai vu tale ga mai lomada.

E rawa ni wase rua na loloma qori? Meda yalodina vua na Kalou o Jiova kei na nona matanitu vakalomalagi, da qai yalodina tale ga ina matanitu vakatamata? A vakamatatataka o Jisu na kena ivakavuvuli: “E sega ni dua e rawa ni qarava e rua na turaga; ni na cata e dua qai lomana e dua, ena doka e dua qai beca e dua. Oni sega ni rawa ni qarava na Kalou kei na iYau.” (Maciu 6:24) A vakamacalataka tiko e keri o Jisu na nona yalodina e dua vua na Kalou kei na iyau, ia a vakabauta ni ivakavuvuli qori e vauca tale ga na nona vakaitavi e dua ena politiki. A va tale ga qori nodra rai na nona imuri ena imatai ni senitiuri.

Na volaitukutuku makawa duadua e tiko nikua e vakaraitaka nira sega ni vakaitavi ena politiki na imuri i Jisu ena gauna makawa. Era qarava vakatabakidua na Kalou a sokaloutaka o Jisu, era sega kina ni yalodina ina matanitu o Roma kei na kena empara, ra sega ni via curu ina mataivalu, se vakaitutu ena matanitu. Qori e vakavuna nodra vakararawataki vakalevu. Era veibeitaki ena so na gauna na meca ni o ira na imuri i Jisu era cati ira na vo ni kawatamata. E dina na veibeitaki ya?

Era Dauveikauaitaki na Lotu vaKarisito Dina

Nanuma na ka a cavuta o Jisu me ikarua ni ivakaro bibi duadua ni Kalou​—“Mo lomana na kainomu me vaka nomu lomani iko.” E sega gona ni dodonu vua e dua na imuri dina i Karisito me cata e dua tale. A dauloloma o Jisu, a cakacaka vakaukaua ena vukudra na lewenivanua, a vukei ira sara mada ga ena nodra leqa lalai ena veisiga.​—Marika 5:​25-34; Joni 2:​1-10.

Ia na cava a kilai levu duadua me baleti Jisu? A vakayacora e levu na ka veivakurabuitaki, ia a sega ni kilai ena nona dauveivakabulai, nona dau vakani ira vakacakamana e udolu vakacaca, se nona vakaturi ira na mate. A kilai ga ni Qasenivuli, qai donu vinaka qori. (Joni 1:38; 13:13) A tukuna o Jisu ni vuna levu a lako mai kina e vuravura me veivakavulici ena veika e baleta na Matanitu ni Kalou.​—Luke 4:43.

Qori na vuna era gugumatua kina na imuri dina i Jisu ena cakacaka vata ga a vakaogai koya kina na nodra Turaga ena nona bula voli e vuravura​—ya na kena vakavulici na itukutuku vinaka ni Matanitu ni Kalou. A lesi ira na lotu vaKarisito dina kece o Jisu Karisito mera vakavulica na itukutuku qori e veiyasai vuravura. (Maciu 24:14; 28:​19, 20) Ena liutaki ira vakayalololoma na ibulibuli kece ni Kalou na matanitu vakalomalagi ena sega ni vakarusai rawa. Ena vakayacora na loma ni Kalou, qai vakaotia na rarawa kei na mate. (Maciu 6:​9, 10; Vakatakila 21:​3, 4) Sa rauta me vakatokai ena iVolatabu na itukutuku i Jisu me “itukutuku vinaka”!​—Luke 8:1.

Ke o vaqarai ira tiko na imuri dina i Jisu Karisito e vuravura nikua, o na kilai ira vakacava? Era na vakaitavi tiko ena politiki ni vuravura qo? Se ra na vakaliuca tiko na cakacaka a vakaliuca tale ga o Jisu​—na vunautaki kei na vakavulici ni veika e baleta na Matanitu ni Kalou?

O via kila e levu tale na ka me baleta na Matanitu ni Kalou kei na kena yaga vei iko ena gauna qo? Kerea e dua na iVakadinadina i Jiova ena nomu yasayasa me vukei iko se raica na Web site, www.pr2711.com

[Kato/iYaloyalo ena tabana e 24]

Era Dau Veivuke ena Nodra iTikotiko na iVakadinadina i Jiova?

Era tawaveitovaki ena veika vakapolitiki na iVakadinadina i Jiova. Ia era ogaoga vakalevu ena nodra vukei na duidui matatamata ena nodra itikotiko e duidui nodra ivakarau ni bula. Vakasamataka mada qo:

◼ E sivia na vitu na milioni na iVakadinadina i Jiova era bole mera vakayagataka e veiyabaki e sivia na 1.5 na bilioni na aua ena nodra vakavulici eso tale ena iVolatabu, na sala mera muduka kina nodra ivakarau ca, me mamarau kina nodra vuvale, me vinaka kina nodra bula.

◼ Era tabaka ra qai veisoliyaka wale na ivola ena sivia na 500 na vosa, eso na vosa qori e se sega ni dua tale na ivola e tabaki kina.

◼ Era tuvanaka tale ga na vuli me baleta na vosa e matanalevu, era sa vukei kina e milioni vakacaca me maqosa qai matata nodra vosa.

◼ Era tuvanaka na porokaramu ni vuli wilivola kei na volavola, era sa vukei kina e tini vakacaca na udolu e veiyasai vuravura mera wilivola ra volavola tale ga.

◼ Era tuvanaka e veiyasai vuravura e sivia na 400 na Komiti ni Taravale ena Duidui Vanua, era vakavulici kina ena iwalewale maqosa ni cakacaka o ira era bolecakacaka, me rawa nira tara Kingdom Hall (na vanua e vakavulici kina na iVolatabu). Ena tini na yabaki sa oti, a tara kina e sivia na 20,000 na vanua ni sokalou se Kingdom Hall.

◼ Era vakaitavi ena nodra vakacokotaki o ira na vakaleqai e veiyasai vuravura ena leqa tubukoso, qori era wili kina na iVakadinadina i Jiova kei ira era sega ni iVakadinadina i Jiova. Ena loma ni rua na yabaki e ravuti Merika tiko kina na cagilaba, era tara tale na iVakadinadina i Jiova e sivia na 90 na Kingdom Hall kei na 5,500 na vale.

[iYaloyalo ena tabana e 23]

Nira vakaukauataki Jisu na lewenivanua me vakaitavi ena politiki, a lako ‘duadua ina ulunivanua’