E Veisautaka na Bula na iVolatabu

A MUDUKA vakacava e dua na itubutubu le dua mai Rusia na nona bobula ena wainimate gaga qai vakavinakataka na nona veimaliwai kei rau na luvena? Na cava a vakaukauataka e dua na turaga mai Kyoto, Japani me valuta na malumalumu a vakadravudravuataki koya? A tinia vakacava e dua na kauboe mai Ositerelia na nona dau gunu sivia? Wilika mada na ka eratou tukuna.

“Au vulica ni noqu itavi meu qaravi au ga.”

​—NELLY BAYMATOVA

YABAKI: 45

VANUA: RUSIA

KA E KILAI KINA: BOBULA ENA WAINIMATE GAGA

NOQU BULA E LIU: Au susu mai Vladikavkaz, na koroturaga ena Ripabuliki kei North Ossetia (sa o Alania nikua). Au lako mai ena dua na vuvale e vutuniyau toka, ia e levu na ituvaki rarawataki au sotava. A leqa vakarua noqu bula vakawati niu sa yabaki 34. E tini na yabaki na noqu vakayagataka voli na wainimate gaga, au qaravi vakarua ena vanua era vukei kina na bobula ena wainimate gaga. E rua na luvequ ia au sega ni lomani rau, e sega ni vinaka tale ga na noqu veimaliwai kei ira na noqu itokani se noqu vuvale.

E iVakadinadina i Jiova o tinaqu. Au dau rogoca ni tagicaki au, qai kerei Jiova me vukei au. Au mani vakasamataka: ‘Sa rui yalowai o tinaqu! Ena vukei au vakacava o Jiova?’ Au saga vakavica meu muduka na vakayagataki ni wainimate gaga, ia au sega ni rawata ena noqu kaukaua ga. E rua na siga noqu sega ni vakayagataka tu na wainimate gaga. Au vakasamataka meu sa na biubiu mai vale, au mani rika mai na katubaleka ni neitou vale taba rua, e ramusu kina na ligaqu kei na yavaqu. Au mani davo tu kina me sivia e dua na vula.

A qaravi au voli o tinaqu ena gauna kece qori, ia a sega ni cudruvi au ni kila ni dredre meu lewai au vinaka kei na noqu vakasama. Ia a biuta toka ena yasa ni noqu loga eso na Yadra!a Niu wilika veitaravi na mekesini qori au raica kina e levu na itukutuku veiuqeti qai yaga. Au mani vakatulewataka meu vulica na iVolatabu kei ira na iVakadinadina i Jiova.

VEISAUTAKI AU NA IVOLATABU: E vakavulici au na iVolatabu me baleta na itavi. Au vulica ni noqu itavi meu qaravi au ga kei na neitou bula vakailavo vakaveitinani, meu kua ni bula vakararavi vei tinaqu. Ia na noqu dau lewai au ga e liu e vakadredretaka na noqu dei ena dua na cakacaka.

E uqeti au na ivakasala ena Vakarua 6:​5-7, e tukuni kina mera vakavulici luvedra na itubutubu me baleta na Kalou. Au liaca niu na saumitaro vua na Kalou ena ivakarau ni noqu susugi rau na luvequ. Na noqu kila qori e uqeti au meu kauaitaki rau na luvequ qai lomani rau vinaka.

Sa dua na ka na noqu vakavinavinakataki Jiova niu vulica na ka dina me baleti koya. Au mani yalataki au vua, qai papitaiso meu dua na iVakadinadina i Jiova.

KENA YAGA: Au sa sega ni dauyalokatakata, sa vinaka tale ga na noqu veimaliwai kei tinaqu vaka kina o rau na luvequ.

Sa oti na leqa e vu mai na noqu ivakarau ni bula e liu niu sa cata na veika e sega ni vakalou. Au marautaka ena gauna qo noqu vakavulici ira tale eso mera kila na ka dina me baleta na Kalou dauloloma o Jiova.

“E vaka ga au vakabulai.”​—MINORU TAKEDA

YABAKI: 54

VANUA: JAPANI

KA E KILAI KINA: BULA ENA SALATU

NOQU BULA E LIU: Au susu ena siti o Yamaguchi, erau veisusu o tamaqu kei tubuqu, au sega ni kilai tinaqu. A takali o tubuqu niu se qai yabaki 19, au mani tiko ga kei tamaqu. Au a kuka tiko ena dua na valenikana, na cakacaka vata ga e cakava o tamaqu. Ia keirau sega ni dau sota ni duidui na gauna ni neirau cakacaka, au sa dau cakacaka tu ga, qai gunu kei ira na noqu ilala.

Au sa vucesa na cakacaka, veiba kei na noqu boso qai gunu vakasivia. Niu sa yabaki 20 vakacaca au nanuma meu sa biubiu mai vale. Ni sa oti na noqu ilavo, au lai cakacaka sara ena dua na vanua ni pachinko (dua na mataqali veimauilavo). Au sotava e kea e dua na yalewa au qai vakamautaki koya. Ia keirau veisere ni oti e rua veimama na yabaki.

Au lomabibi, vakamumuri tu ga, qai sivia na noqu dinau vei ira na manileda. Au drotaki ira na dau kumuni dinau au lai tiko vakalailai kei tamaqu ena taoni au susu kina, ia au a lasutaki koya qai vakaleqa na neirau veiwekani. Au taura eso na ilavo ena vale nei tamaqu, au bula tu ga ena veimauilavo. Qori e vakavuna noqu dravudravua, au mani bula voli ena siteseni ni sitimanivanua. Au toki i Hakata, i Himeji, oti au lako sara ina siti o Kyoto. E vica na yabaki noqu bula tu ena salatu.

VEISAUTAKI AU NA IVOLATABU: Ena 1999, au sotava e rua na marama ena rara ni gade mai Kyoto volekata na Uciwai na Kamogawa. A tarogi au sara e dua vei rau, “O taleitaka mo vulica na iVolatabu?” Au ciqoma na nodrau veisureti. Era vakavulici au ena iVolatabu na lotu vaKarisito matua ena dua na ivavakoso ni iVakadinadina i Jiova ena vanua oya, ra vukei au meu raica na bibi ni kena bulataki na ivakavuvuli vakaivolatabu. Era vakatututaka meu qara e dua na cakacaka, me dua tale ga na noqu itikotiko. Na noqu via vakamarautaki ira au lai intaviu (interview) kina ena so na vanua ni cakacaka, ia au sega ni makututaka. E muri au masulaka qai saga vagumatua me dua na noqu cakacaka, au mani kunea sara e dua.

Au vosota rawa tale ga e dua na ituvaki dredre ena noqu daumasu. Era kunei au na manileda au dinau tu vei ira ra qai vakasaurarataki au meu sauma na nodra ilavo. Au nuiqawaqawa vakalevu. Ia ena noqu wili iVolatabu e veisiga, au raica ena Aisea 41:10 na yalayala ni Kalou vei ira na nona dauveiqaravi yalodina: ‘Au na vukei kemuni.’ E veivakaukauataki dina na vosa oya, au yaloqaqa tale ga kina. Niu cakacaka vakaukaua au walia kina na leqa ni noqu bula vakailavo. Ena yabaki 2000 au rawata na ivakatagedegede meu papitaiso meu iVakadinadina i Jiova.

KENA YAGA: E uqeti au na ka au vulica ena iVolatabu meu saga me keirau veiyaloni tale kei tamaqu, a vosoti au tale ga ena ka au cakava vua e liu. A marau vakalevu ni raica na noqu bulataka na ivakavuvuli vakaivolatabu. E vaka ga au vakabulai niu muria na ivakavuvuli vakaivolatabu.

Kena ikuri, au kunea e dua na cakacaka meu rawa ni bula kina. (Efeso 4:28; 2 Cesalonaika 3:12) Au kunei ira na itokani dina ena ivavakoso vaKarisito. (Marika 10:​29, 30) Au vakavinavinakataki Jiova mai vu ni lomaqu ni vakavulici au.

“A sega ni rawarawa noqu veisau.”​—DAVID HUDSON

YABAKI: 72

VANUA: OSITERELIA

KA E KILAI KINA: GUNU SIVIA

NOQU BULA E LIU: O au na ikatinikadua ni luvedrau o Willie kei Lucy. Keitou tiko vakavuvale e Aurukun e noca Kuinisiladi, na nodra itikotiko na Aborigine. E toka na itikotiko qo ena batiniuciwai totoka na Archer qai voleka e matasawa. Erau vakavulici keitou na neitou itubutubu ena vakasasa kei na qoli me keitou bula kina. Ena gauna qori a lewa na matanitu na ivakavakayagataki ni neimami ilavo kei na neimami itikotiko.

Erau saga vakaukaua na noqu itubutubu me rau vakavulici au ena itovo vinaka rau vakavulici keitou kece me keitou dokai ira na qase ena itikotiko, me keitou veinanumi tale ga se mani lailai sara vakacava na ka e tu vei keitou. Qori na vuna keitou dau okati ira kece kina na itabaqase mera tinai keitou, tamai keitou, neitou momo se nei.

A takali o tamaqu niu se yabaki vitu, keitou mani toki i Mapoon na nodra itikotiko ni lotu na Aborigine, e rauta ni 150 na kilomita ena noca kei Aurukun. Au vulica na vakatawa bulumakau kei na ose niu se yabaki 12, au kauboe ena levu na itikotiko ni susu bulumakau me yacova niu sa yabaki 40 vakacaca. E dredre na bula ena gauna qori. Au daugunu wasoma. Qori e vakavuna ga na rarawa kei na levu na leqa.

Ena dua na gauna niu gunu sivia, au taceba mai na dua na otela qai donuya e dua na motoka e siviti tu mai. Au mani qaravi me rua na yabaki ena vanua era vukei kina na daugunu sivia kei na vanua e qaravi kina na ramusu ni sui kei na mavoa ni nave (physiotherapy)​—sa mai cava kina na noqu cakacaka vakauboe.

VEISAUTAKI AU NA IVOLATABU: Ena gauna au qaravi tu kina ena vanua era vukei kina na gunu sivia, e dau kauta yani eso Na Vale ni Vakatawa kei na Yadra! e dua na noqu itokani yalewa meu wilika. Ia e dredre noqu wiliwili niu sega ni vuli vinaka. Ena dua na siga katakata, a mai sikovi yau e dua na turaga yabaki 83, au mani vakacurumi koya i vale meu solia vua e dua na bilo wai batabata. E solia vei au eso na ivola vakaivolatabu qai taroga ke rawa ni lesu tale mai me keirau na veitalanoa kina. Keirau mani vuli iVolatabu wasoma. Au raica ni gadrevi meu veisautaka na noqu itovo kei na ivakarau ni noqu bula keu via vakamarautaka na Kalou.

A sega ni rawarawa noqu veisau. Ia na veivakavulici i tinaqu e uqeti au meu doka na turaga oya kei na ka vakayalo a vakavulici au kina. Au lomalomaruataka meu yalataki au vua na Kalou. Au nanuma ni vinakati meu kila na ka kece e volai ena iVolatabu.

A vakadodonutaka noqu rai e dua tale na noqu itokani iVakadinadina i Jiova ni dusimaki au ena vosa veivakauqeti ena Kolosa 1:​9, 10. E tukuni kina ni gadrevi meda ‘vakatitobutaka tiko ga na noda kila na ka dina me baleta na Kalou.’ A vukei au na noqu itokani meu kila ni na levu tiko ga na ka au vulica, me kua ni latia na noqu toso na lailai ni ka au kila.

Au kurabui ena imatai ni gauna au veimaliwai kina kei ira na iVakadinadina i Jiova. Au raica na nodra duavata na dui matatamata mera qaravi Jiova. Na duavata qori e vakadeitaka vei au ni qo sara ga na lotu dina, au mani papitaiso meu dua na iVakadinadina i Jiova ena 1985.

KENA YAGA: Sa taladrodro vinaka noqu wilivola, au tuberi ira tale tiko ga eso ena wiliki kei na vulici ni iVolatabu me vica vata na aua e veimacawa. Na noqu itokani yalewa a solia vei au Na Vale ni Vakatawa kei na Yadra! ena imatai ni gauna, a vulica tale ga na iVolatabu kei ira na iVakadinadina qai papitaiso, sa watiqu tiko nikua. Keirau marautaka dina na neirau veivuke ena itikotiko ni Aborigine mera kila na Kalou o Jiova.

[iVakamacala e ra]

[Tikina bibi ena tabana e 21]

Keirau marautaka dina vakaveiwatini na veivuke ena itikotiko ni Aborigine mera kila na Kalou