Nodra Bula kei na Nodra Gauna na Lotu Vakarisito ena iMatai ni Senitiuri

“Na Matai”

“E sega ni luve ni matai o koya?”​—MACIU 13:55.

A SEGA ni kilai wale ga “ni luve ni matai” o Jisu, ia a kilai tale ga me “matai.” (Marika 6:3) Kena irairai ni a vakavulici koya ena cakacaka qo o Josefa na tamana vakacabecabe.

Me dua e kenadau ena cakacaka vakamatai, na cava me vulica o Jisu, na iyaya cava me kila vinaka na vakayagataka? Na iyaya cava a rairai taya me yaga vei ira na lewe i Nasareci? Nona vakavulici taudonu me kenadau ena ta iyaya e yaga vakacava vua ni sa uabula?

Bisinisi Vakavuvale Ena iyaloyalo e ra e vakavulici luvena ulumatua tiko e dua na tama ena ivakavakayagataki dodonu ni drili dakaititi. E vakarorogo qai vakararai matua toka o luvena gone.

Era tekivu vuli cakacaka na gonetagane ena yabaki 12 ina 15. E dau vakavulici ira sara ga o tamadra. Na veivakavulici qo ena taura e vica vata na yabaki, ra qai sasaga vagumatua na gonetagane ke vinakati mera kila eso tale na ka mera dua kina na matai maqosa. Vakasamataka na levu ni gauna marautaki erau cakacaka vata kina o Josefa kei Jisu, nodrau veitalanoa, kei na nona vakavulici Jisu me kenadau ena cakacaka vakamatai. Sa wacava na nona qoroqoro lo o Josefa ni raica na maqosa nei Jisu ena ta iyaya!

Vinakati na Kila, Kaukaua, kei na Maqosa Ena vinakati me kila na matai na duidui ni kau e vakayagataka. E rawa ni digidigi ga ena kau era tubu tu ena nona vanua, me vaka na paini, na oki, na sitari, na lolo, kei na olive. Ia e sega na ivaronikau ena imatai ni senitiuri se na sitoa mera lai volia kina na kauvaro ra sa musumusu tu ena kedra balavu e vinakati. Koya gona ena lako i veikau na matai, digia na kau me vakayagataka, musuka, qai colata ina nona volau.

Na kau oya ena vakayagataki ena cava? Ena rairai vica vata na aua nona tiko voli e tuba na matai me veivuke ena taravale. Ena sivita na icoka ni vale, na ikabakaba ni lomanivale, na katuba, katubaleka, kei na kau ni lalaga.

E dau ta iyaya tale ga ni vale. Eso na iyaya qo e laurai ena iyaloyalo​—na kovate vakadroa, vakavata, se vakaisogo (1); idabedabe rewa i ra (2), idabedabe (3), kei na teveli (4) e duidui na kedra levu kei na kena itata; kei na imocemoce ni gone. Na iukuuku ni so na iyaya ni vale ena vonoti ena so na kau e vereverea na kena isivisivi. Ena boro ena wekesi e caka mai na denioni, vanisi, se waiwai me taqomaka qai vakarairaivinakataka.

Ena sivita tale ga na matai na iyaya ni iteitei​—na ivua (5) e caka ena kau bi, na mataiva, na reki, kei na isivi (6). Na kutari (7) ena caka me kaukaua vinaka ni na cukita na qele vatuvatu na yamena kaukamea. E ta qiqi kau (8) kei na kareti qai cakava me dei se kaukaua vinaka na qiqi. E rairai wili tale ga kina na ripeataki ni iyaya ni vale, iyaya ni cakacaka, na qiqi kei na kareti a cakava.

Vakasamataka mada na irairai kei Jisu donuya na gauna a cakacaka vakamatai voli kina. Na braun ni roka ni kuliniyagona ena kati ni siga ena Tokalau e Loma, na wabibiri ni nona masela ena nona cakacaka kaukaua, qai wakakau na ligana ni dau qumia na kau varovaroa, wiricaka na imatau, ituki, kei na ivaro.

Yavu ni iVakatautauvata E maqosa ni vakayagataka na iyaya kilai levu qori o Jisu me vakavulica kina na ivakavuvuli titobu vakayalo. A vakayagataka ena nona vakatautauvata eso na ka me baleta na nona cakacaka vakamatai? A rairai cakava qori ena so na gauna, meda raica mada e vica. Na matai e kila na vakaitamera ni dua na tolonikau. E tukuna kina o Jisu vei ira e dua na ilala levu: “Na cava o lai kauaitaka kina na co lailai ena matai tacimu, ia o sega ni kauaitaka na tolonikau levu e matamu?” (Maciu 7:3) A rairai caka siviyara vakalevu ena nona gauna o Jisu. Mani tukuna vei ira e dua tale na ilala: “O koya e taura na isiviyara qai rai tale i muri e sega ni ganiti koya na matanitu ni Kalou.” (Luke 9:62) E dua na veisureti i Jisu e okati kina e dua na iyaya e sivita na matai. “Ni mai cola na noqu ivua moni vuli vei au,” e kaya o Jisu. “E veivakacegui na noqu ivua, e mamada tale ga na noqu icolacola.” (Maciu 11:​29, 30) Kena irairai ni kila vinaka o Jisu na itata ni ivua e sega ni tarabi, ia e veiganiti.

De dua o ira na dauveitusaqati era beci Jisu ni vakatokai me “luve ni matai.” Ia e duatani na nodra rai na lotu vaKarisito ena imatai ni senitiuri kei na gauna qo, era vakatotomuria na nona ivakaraitaki na turaga yalomalumalumu a cakacaka tu vakamatai e liu.

[Kato/​iYaloyalo ena tabana e 26]

Na Kato ni Matai

O ira na matai ena imatai ni senitiuri me vakataki Jisu e vinakati mera kila na ivakavakayagataki ni iyaya vakamatai era tabaki toka qo. Na nona ivaro (1) e dia kau, e coba na yamena kaukamea me varota na kau. Ena vakayagataka na sukuea (2) me sukueataka kina na ka e cakava kei na palamu (3) me kilai kina na dodonu ni ka e duri. E tiko tale ga ena nona kato e dua na levolo (4), dua na rula (5), na itoci gata yame kaukamea e rawa ni veiveisau me vakayagoyago vinaka kina na kau (6), kei na dua na matau (7) ni musu kau.

Na nona bow lathe e sivi kina na narikoso (spindle) (8) kei na icalo (9) e musu kina na kau. E toka ena isogo ni kato e dua na mola kau (10) e dau tuki kina na tikinikau me isema se na dia ni jisili. E laurai tale toka ga e dua na ivaro lailai (11), e dua na isele yame varovaroa (12) ni sivisivi, kei na so na ivako (13). E toka ena mata ni kato e dua na ituki kaukamea (14) kei na dua na matau ni sivisivi (15) me sivi vakacaca kina na kau. E toka ena dela ni isogo ni kato e dua na isele (16) kei na vica na jisili (17) e duidui na raba ni yamena. Na drili dakaititi (18) e ravi toka ena kato.