Ena Oti na Veika Ca!

E VAKARAUTAKA na Kalou na nona Vosa uqeti meda kila na vuna e dau caka kina na veika ca. E solia na galala meda vakatulewa qai vukei keda meda lewa vinaka, rawa gona meda digia meda kua ni caka ca. (Vakarua 30:​15, 16, 19) Nida kila oya, eda na siqema rawa kina ke sa tiko na gagadre ca da qai cakava na ka e gadrevi meda vorata kina. Eda na kalougata, ra marau tale ga na tiko voliti keda nida sega ni caka ca.​—Same 1:1.

Se mani vakacava na noda sasaga meda kua ni caka ca, e sega ni taqei rawa na levu ni veika ca era cakava tu eso tale. E vakarota na iVolatabu: “Mo kila ni na duatani sara na iotioti ni veisiga, ena vakilai kina e levu na ka dredre.” Ni vakaraitaka na iVolatabu na vuna e “levu [kina] na ka dredre,” sa qai tomana: “Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau vosavakacaca, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakaucaca, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veinakicataki, era na domoqa, era na dokadoka, era na lomana ga na marau era sega ni lomana na Kalou, e vakarairai ga na nodra qarava na Kalou, e sega na kena dina; lako tani mai vei ira e va qo na nodra ivakarau.”​—2 Timoci 3:​1-5.

De dua o raica na matavosa “na iotioti ni veisiga” ena parofisai e toka e cake. Na cava mada na kena ibalebale vei iko? Era kila e levu ni “iotioti ni veisiga” e kena ibalebale na kena vakarau cava e dua na ka. Na cava oya? Raica mada na ka e yalataka na Kalou ena nona Vosa.

Era na kawaboko na tamata ca.

“Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”​—SAME 37:​10, 11.

“Sa maroroi ira kecega era lomani koya ko Jiova: Ia ena vakawabokotaki ira kecega nai valavala ca.”​—SAME 145:20.

Ena sega tale na veivakalolomataki.

“Ni na vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena vakabula na yalodra mai na lawaki [“veivakalolomataki,” NW] kei nai valavala kaukauwa.”​—SAME 72:​12, 14.

“Mera sereki na kabuli mai na nodra bobula tu ina ca, mera qai vakila na galala lagilagi era vakila tu na luve ni Kalou.”​—ROMA 8:21.

Vakarautaki na veika vakayago eda gadreva.

“[E]ra na dui tiko ga na tamata yadua e na ruku ni nona vaini, kei na ruku ni nona lolo; ka sega e dua me na vakarerei ira.”​—MAIKA 4:4.

“[E]ra na tara vale, ka tiko kina; era na tea eso na were-ni-vaini, ka kania na vuana, era na sega ni tara, ka tiko kina na tamata tani, era na sega ni tea, ka kania na tamata tani: ia me vaka na kena dede e dua na kau ena vakakina na nodra gauna na noqu tamata, ia era na rekitaka vakadede na cakacaka ni ligadra ko ira na tamata ka’u sa digitaka.”​—AISEA 65:​21, 22.

Tau na lewadodonu.

“Me na qai sega beka ni raica na Kalou me vakayacori na lewadodonu vei ira nona digitaki era tagi vua ena siga kei na bogi . . . ? Au tukuna vei kemuni, ena raica me tau vakatotolo vei ira na lewadodonu.”​—LUKE 18:​7, 8.

“Sa vinakata na ka dodonu ko Jiova, ka sa sega ni biuti ira na nona tamata era yalosavasava; era sa maroroi ka sega ni mudu.” ​—SAME 37:28.

Ena roboti vuravura na yalododonu.

“Era na qai vulica nai valavala dodonu na lewe i vuravura.”​—AISEA 26:9.

“Eda waraka na lomalagi vou kei na vuravura vou me vaka na nona yalayala, era na tiko kina na yalododonu.”​—2 PITA 3:13.

Vakadinadinataki na Veisau ​—ena Gauna Sara ga Qo

E sega ni vakabekataki nida marautaka kece na yalayala oya. Ia na cava na ivakadei nira na yaco? Eda sa raica sara tu ga nikua na ivakadinadina ni na yaco dina na yalayala ni Kalou. Na ivakadinadina cava qo? Nikua, era le vica na milioni e veiyasa i vuravura era marau nira sa biuta na kocokoco, ivalavala dukadukali, se na nodra itovo voravora ra qai vulica mera dau dina, veiyaloni, mera yalomalua tale ga. E sivia na vitu na milioni na iVakadinadina i Jiova nikua era lewe ni mataveitacini e vuravura raraba era ulabaleta na duidui vakamatatamata, vakayavusa, vakamatanitu, vakapolitiki, kei na duidui ni bula vakailavo, qo na ka e vakavuna vakalevu na veicati, itovo voravora, kei na vakadavedra ena veitabagauna sa oti.a Na veiveisau oya era sa yaco tiko nikua, e ivakadei tale ga ni na vakayacori na yalayala ni Kalou ena kena ivakatagedegede e cake sara.

E rawati vakacava na veisau qori? Ena saumi qo ena dua tale na yalayala ena iVolatabu a vola na parofita o Aisea. E tukuna:

“Ena tiko vata na wolifa kei na lami, ka na davo vata na lepate kei na luve ni me; ena tiko vata talega na luvedratou na pulumokau kei na laioni kei na manumanu uro; ia ena tuberi iratou e dua na gone lailai. . . . Ia na laioni ena kania na co ni sila me vaka na pulumokau. Ena qito mai na qara ni gata na gone dramidrami, ia ena tabaka e na ligana na qara ni gata daukata na gone sa qai kali. Era na sega ni ia na veivakacaca se na veivakamatei e na noqu ulu-ni-vanua tabu kecega: ni na roboti ko vuravura e na veikilai kei Jiova, me vaka sa ubia na wasa titobu na wai.”​—Aisea 11:​6-9.

Na parofisai qo e baleta ga na gauna era sa na bula veiyaloni kina na manumanu kei na tamata? E sega, e vauci kina eso tale na ka. Ena iotioti ni tikina e vakaraitaka na ka e vakavuna na veisau: “Ni na roboti ko vuravura e na veikilai kei Jiova.” Na kilai ni ka dina me baleta na Kalou e veisautaka na ivakarau ni manumanu? E sega. Ia e veisautaka ga na tamata! Na parofisai qo e tukuna ni o ira e vaka na manumanu na nodra itovo era na bucina na itovo i Karisito nira vulica ra qai bulataka na ka e vakavulica na iVolatabu.

Me kena ivakaraitaki o Petero.b A curu ena dua na isoqosoqo ni batikadi ena nona nanuma ni valataka tiko na lewadodonu. Ni vuli oti ena isoqosoqo oya, a vakaroti me lai bomutaka e dua na bareki ni ovisa. A mani vesu ni vakavakarau tiko me cakava qori. Ena 18 na vula e tiko kina e valeniveivesu o Petero, a tomana tiko ga na nona veivorati. Ena loma ni gauna qori a tekivu vuli iVolatabu o watina kei ira na iVakadinadina i Jiova. A vuli iVolatabu tale ga o Petero ni suka mai valeniveivesu. Na veika e vulica me baleta na Kalou o Jiova e uqeti koya me veisautaka na nona itovo kei na ivakarau ni nona rai me baleta na bula. E tukuna: “Au vakavinavinakataki Jiova niu sega ni vakamatea e dua ena gauna au a dua tu kina na batikadi. Au sa vakayagataka tiko ena gauna qo na seleiwau ni yalo tabu na iVolatabu, meu tukuna kina na itukutuku ni sautu dina kei na lewadodonu​—na itukutuku vinaka ni Matanitu ni Kalou.” A lai wasea tale ga ena bareki a vakaroti me vakarusa na itukutuku ni sautu kei na vuravura ena sega kina na ivalavala kaukaua.

Ni veisautaka na bula ni tamata na kaukaua ni Vosa ni Kalou, e vakavuna tale ga meda vakabauta na nona yalayala ni na oti na veika ca kece. Io, ena yaco na gauna me sega ni dua tale na ca e caka baleta sa na veisau na tamata me vinaka. O Jiova sa na vakarau vakarusai koya na vu ni caka ca, o Setani na Tevoro e lewa tu vakatawarairai na vuravura. E tukuna na iVolatabu: “E lewa tiko na Vunica na vuravura taucoko.” (1 Joni 5:19) Ia sa voleka me yali vakadua na Vunica kei ira na yalokaukaua era sega ni via biuta na nodra itovo ca. Sa na totoka dina na bula ena gauna oya!

Me dua e bula kina, na cava me cakava? Vakasamataka tale mada, na “veikilai kei Jiova” sa veisautaka tiko na tamata nikua, ena vakavuna tale ga na veisau e vuravura raraba ena gauna sa tu qo e matada. Me vakataki Petero ga, ni o vulica tiko ga na veika me baleti Jiova ena iVolatabu o qai bulataka​—o na rawa ni vakanamata tale ga mo bula ena vuravura era na “tiko kina na yalododonu.” (2 Pita 3:13) Ni se vo tiko na gauna o uqeti mo vulica na veika me baleta na Kalou kei Jisu Karisito, o na rawata kina na bula tawamudu.​—Joni 17:3.

[iVakamacala e ra]

[Tikina bibi ena tabana e 9]

O na rawa tale ga ni vakanamata mo bula ena vuravura era na “tiko kina na yalododonu.”​—2 PITA 3:13