Toro Voleka Vua na Kalou

E Solia Vei Keda na Galala ni Vakatulewa

2 TUI 18:​1-7

E BIBI mera ivakaraitaki vinaka vei ira na luvedra na itubutubu. Na nodra ivakaraitaki vinaka era na bucina kina na gone na itovo vinaka, mera vakatulewa vakayalomatua tale ga ena nodra bula. Ka ni rarawa ni levu na itubutubu era sega ni ivakaraitaki vinaka vei ira na luvedra. E kena ibalebale qo nira na ca na gone mai muri? Eda na kila na kena isau ena ka dina veivakacegui qo​—e solia vei keda yadua o Jiova na galala ni vakatulewa. Vakasamataka mada na ivakaraitaki i Esekaia e volai ena 2 Tui 18:​1-7.

O Esekaia e luvei “Easi na tui Juta.” (Tikina e 1) O Easi a vagolei ira tani na lewenivanua mai na sokalou savasava vei Jiova. Na tui ca qo a sokaloutaki Peali, e dua na kena ivalavala mera cabori na tamata. A vakamatea e dua se vica na taci Esekaia. E sogota tale ga na katuba ni valenisoro qai “cakava na nonai cabocabo-ni-soro e na tutuna kecega e Jerusalemi.” A “vakacudrui Jiova” o Easi. (2 Veigauna 28:​3, 24, 25) E macala vakasigalevu ni sa rui ca na ka e cakava na tamai Esekaia. Ia sa lewai oti tu ni na cakava tale ga o Esekaia na cala nei tamana?

Na gauna e sosomitaki tui Easi kina o Esekaia me tui, a sega ni muria na nona ivakaraitaki ca. “A sa daucaka dodonu e na mata i Jiova.” (Tikina e 3) E nuitaki Jiova o Esekaia, qai “sega e dua e muri koya e tautauvata kaya vei ira kecega na tui Juta.” (Tikina e 5) Ena imatai ni yabaki ni nona veiliutaki, a veisautaka na tui gone qo na ituvaki vakayalo ni vanua, oya ena nona vakawabokotaka na veitikina cecere e sokaloutaki kina na nodra matakau na lotu butobuto. E dolava tale na valenisoro qai tekivutaki tale na sokalou savasava. (Tikina e 4; 2 Veigauna 29:​1-3, 27-31) O Esekaia a “kabiti Jiova . . . , a sa tiko kaya ko Jiova.”​—Tikina e 6, 7.

Na cava a sega ni muria kina o Esekaia na ivakaraitaki ca i tamana? E sega ni levu na ka e kilai me baleti tinana o Apaija, ia de dua a tuberi koya sara vakavinaka. Vakacava o Aisea a dua tu na parofita ni bera ni sucu o Esekaia, a uqeti koya na ravouvou gone qo na nona ivakaraitaki vinaka?a E sega ni tukuna na iVolatabu. Se mani cava na vuna, eda kila ga ni duatani sara na ivakarau ni bula a digia o Esekaia ni vakatauvatani kei tamana.

E veiuqeti na ivakaraitaki i Esekaia vei ira na gone e sega ni vinaka na nodra isususu nira ivakaraitaki ca na nodra itubutubu. Eda na sega ni rawa ni veisautaka se vakaseavutaka na veika mosimosi a yaco ena gauna sa oti. Ia e sega ni kena ibalebale qori nida na sega ni caka vinaka. Eda rawa ni vakatulewataka ena gauna qo meda cakava na ka eda na marau kina ena veigauna mai muri. Me vakataki Esekaia, eda rawa ni vakatulewataka meda lomana na Kalou dina o Jiova, meda sokaloutaki koya tale ga. Qori ena rawati kina na bula vakacegu ena gauna qo kei na bula tawamudu ena vuravura vou ni Kalou. (2 Pita 3:13; Vakatakila 21:​3, 4) Meda vakavinavinakataka mada ga na nona isolisoli talei duadua na Kalou​—na galala ni vakatulewa!

[iVakamacala e ra]