E Vinakata na Kalou me Vakatusai na Cala?

Na vakatusai ni cala vua na bete se italatala e se ivakarau tiko ga ni levu na lotu kei na sokalou nikua. Ia se veiganiti tiko ga ena gauna qo na vakatutusa nida bula tu ena vuravura e tara kina na ivalavala kece ga?

E DUIDUI na rai me baleta na vakasama qo. Me kena ivakaraitaki, a ripotetaka na National Post mai Kenada na nona tukuna e dua ni na rairai dredre me vakatusai na cala e caka, “ia e veivakacegui dina ke dua e kila, drau masu vata qai tukuna na ka mo cakava.” E veibasai sara na ka e tukuna e dua na turaga, e volai na nona vosa ena ivola Bless Me, Father, for I Have Sinned: “Na vakatutusa e dua na ivakarau ni lotu e dau orataka vakalevu e dua. E dau vakavuna na lomaleqa kei na nuiqawaqawa.” Na cava e kaya na iVolatabu me baleta na vakatusai ni cala?

Na Ka e Kaya na iVolatabu

E volai ena lawa a solia vei ira na Isireli na Kalou na idusidusi matata ni ka me caka ke dua e cala. Me kena ivakaraitaki, ke dua e cala vua na wekana se beca na lawa ni Kalou, e dodonu me vakatusa vua na bete ena yavusa Livai, ena cabora na bete na isoro vua na Kalou ena vukui koya e cala me vosoti kina.​—Vunau ni Soro 5:​1-6.

Ni vunauci Tui Tevita o Necani ni oti tale e vica na senitiuri ena vuku ni nona ivalavala ca, na cava a cakava o Tevita? A tusanaka sara: “Au sa cala vei Jiova.” (2 Samuela 12:13) E kerea tale ga me lomani koya na Kalou. Na cava e yaco? A vola e muri o Tevita: “Au a vakatusa vei kemuni na noqu caka cala, ia ka’u sa sega ni vunia na noqui valavala ca; au a kaya, ka’u na vakatusa vei Jiova na noqui valavala ca: Ia ko ni sa qai kauta tani na kena ca ni noqui valavala ca.”​—Same 32:5; 51:​1-4.

Ena imatai ni senitiuri S.K., se vinakata tiko ga na Kalou vei ira na lotu vaKarisito mera vakatusa na nodra ivalavala ca. O Jemesa na taci Jisu vakacabecabe e ivakatawa tale ga ena ivavakoso mai Jerusalemi, a uqeti ira na nona itokani lotu vaKarisito: “Ni dui vakatusa na nomuni ivalavala ca, ni veimasulaki, ni oni na vakabulai kina.” (Jemesa 5:16) Na cava gona me vakatusa na lotu vaKarisito? Me vakatusa tale ga vei cei?

Na Cava Meda Vakatusa?

Nida sega ni uasivi, e rawarawa sara na noda cala vua e dua ni malewa na ka eda cakava se tukuna. (Roma 3:23) E kena ibalebale qo meda tusanaka na cala va qori vua e dua na iliuliu vakatamata se dua e tu vua na lewa?

Na cala kece e ca ena mata ni Kalou, ia e nanumi keda ni kila nida dau cala baleta nida sucukaya mai na ivalavala ca. E vola kina na daunisame: “Kevaka ko ni sa nanuma, Jiova, nai valavala ca o cei kemuni na Turaga, me na bula rawa? Ia sa tiko vei kemuni na loloma, mo ni vakarokorokotaki kina.” (Same 130:3, 4) De dua eda sega ni nakita, na cava gona meda cakava ke da cala vua e dua? Nanuma na masu a vakavulici ira kina na nona imuri o Jisu, e okati kina na kerekere qo: “Ni vosota na neimami cala, ni keimami sa vosoti ira kece era cala vei keimami.” (Luke 11:4) Io, ena vosoti keda na Kalou ke da kere veivosoti vua ena yaca i Jisu.​—Joni 14:​13, 14.

Meda nanuma tiko ni tukuna tale ga o Jisu na noda vosoti ena vakatau ena noda ‘vosoti ira na cala vei keda.’ A vakadreti ira na nona itokani ena vakabauta na yapositolo o Paula: “Moni veilomani, ni veinanumi, ni yalorawarawa moni veivosoti me vaka na nodrau yalorawarawa na Karisito kei na Kalou me rau vosoti kemuni.” (Efeso 4:32) E yavu vinaka gona ni nona vosoti keda na Kalou na noda vosoti ira tale eso era cala.

Ia vakacava na cala bibi me vaka na butako, lasu e nakiti, ivalavala dukadukali, mateni kei na so tale, e rawa ni vosota na Kalou? Ke dua e cakava na cala qori sa valavala ca sara tiko ga vua na Kalou ni beca na nona lawa. Na cava me cakava?

Me Vakatusai Vei Cei na Cala?

E sega ni lesia na tamata na Kalou me vosota na ivalavala ca e caka vua; o koya ga e rawa ni vosota na cala qori. E tukuna vakamatata na iVolatabu: “Ke da vakatusa noda ivalavala ca, ena vosota na [Kalou] noda ivalavala ca, ena vakasavasavataki keda tale ga mai na ka kece e sega ni dodonu baleta ni yalodina o koya, e yalododonu tale ga.” (1 Joni 1:9) Me vakatusai gona vei cei na ivalavala ca?

Ni o Jiova ga ena vosota na noda cala, e dodonu me vakatusai ga vua na cala. Qori na ka a cakava o Tevita me vaka sa vakamacalataki oti mai. Na yavu cava eda na vosoti kina? E kaya na iVolatabu: “O koya gona, ni veivutuni, ni saumaki me bokoci kina nomuni ivalavala ca, me rawa ni kauta mai o Jiova na gauna ni veivakabulabulataki.” (Cakacaka 3:19) Io, na nona vosoti e dua e sega ni vakatau ga ena nona kila ni cala na ka e cakava kei na nona vakatusa, e okati tale ga kina na nona vakanadakuya sara ga na sala ca qori. E dau dredre na nona vakanadakuya e dua na nona sala ca. Ia e tiko na ivukevuke me cakava kina qori.

Vakasamataka tale mada na ka e tukuna na tisaipeli o Jemesa eda sa wilika oti mai: “Ni dui vakatusa na nomuni ivalavala ca, ni veimasulaki, ni oni na vakabulai kina.” E tomana: “Me kua ni beci na vakamamasu ni tamata yalododonu ni na yaga vakalevu.” (Jemesa 5:16) Na “tamata yalododonu” e rawa ni dua vei ira na “qase ni ivavakoso” a vakamacalataka o Jemesa ena tikina e 14. Era tiko ena ivavakoso vaKarisito na “qase ni ivavakoso” matua vakayalo, e okati ena nodra itavi mera vukei ira era gadreva na veivosoti ni Kalou. E sega ni rawa mera bokoca na nona cala e dua o ira na “qase ni ivavakoso” ni sega ni lesi e dua na tamata me vosota na cala e caka vua na Kalou.a Ia era rawata na ivakatagedegede vakayalo mera vakadodonutaka se vunauci koya e cala bibi ena nodra vukei koya me liaca na bibi ni nona cala, ena gadrevi tale ga me veivutuni.​—Kalatia 6:1.

Na Cava me Vakatusai Kina na Cala?

Ke mani bibi na cala e caka se sega, sa vakaleqa o koya e cala na nona veiwekani kei na dua tale kei na nona veiwekani kei na Kalou. Ena rairai lomaleqa kina qai nuiqawaqawa. Qori na cakacaka ni lewaeloma e solia vei keda na Dauveibuli. (Roma 2:​14, 15) Na cava me caka?

Nida taleva tale na ivola i Jemesa, eda na raica kina na vosa veivakacegui qo: “E dua vei kemuni e tauvimate tiko [vakayalo]? Me kacivi ira na qase ni ivavakoso, mera masulaki koya, ra qai lumuti koya ena waiwai ena yaca i Jiova. Na masu ni vakabauta ena vakabulai koya e tauvimate, ena vakaukauataki koya o Jiova. Ke valavala ca ena vosoti.”​—Jemesa 5:​14, 15.

E laurai tale ena tikina qo nira kacivi na qase mera vukei ira na qelenisipi ena ka era gadreva. Ena sala cava? Era sega ni rogoca wale ga na vakatusai ni cala. Ni okati tiko eke na tauvimate vakayalo, e gadrevi me caka e dua na ka me “vakabulai koya e tauvimate.” E tukuna o Jemesa e rua na ka e rawa ni caka.

Ena vinakati taumada me ‘lumuti ena waiwai.’ Qo e vakaibalebaletaka na kaukaua ni Vosa ni Kalou, e veivakabulai. A vakamacalataka na yapositolo o Paula ni “bula na vosa ni Kalou qai kaukaua . . . [e] vakavotuya na nanuma kei na inaki ni lomada,” e uqeta na lomada kei na noda vakasama. (Iperiu 4:12) Nira vakayagataka vakamaqosa na qase ni ivavakoso na iVolatabu, ena vukei koya e tauvimate vakayalo me raica na cala e cakava, me vakavinakataka tale ga na nona veiwekani kei na Kalou.

E dua tale na ka e vinakati, “na masu ni vakabauta.” Na nodra masu na qase ni ivavakoso ena sega ni veisautaka na nona tauca na lewadodonu na Kalou, ia e bibi na masu qori vua na Kalou, e tu vakarau me vosota na cala ena vuku ni soro ni veivoli i Karisito. (1 Joni 2:2) E tu vakarau na Kalou me vukei ira na veivutuni dina ra qai cakava “na ka e vakaraitaka nira sa veivutuni.”​—Cakacaka 26:20.

Na vuna bibi duadua me vakatusai kina na cala eda cakava vua e dua se vua na Kalou​—me vakadonui keda kina na Kalou. A vakaraitaka o Jisu ke da veileqaleqati kei na dua na tacida e dodonu meda saga na veiyaloni me rawa nida qarava kina na Kalou ena lewaeloma vinaka. (Maciu 5:​23, 24) E tukuna na Vosa Vakaibalebale 28:13: “O koya sa ubia na nonai valavala ca ena sega ni tamata yaco: Ia ko koya sa vakatusa ka biuta ena lomani.” Nida vakamalumalumutaki keda vua na Kalou o Jiova qai kere veivosoti vua, ena vakadonui keda, ena vakacerecerei keda tale ga ena gauna lokuci.​—1 Pita 5:6.

[iVakamacala e ra]

[Tikina bibi ena tabana e 23]

Ena vosoti keda na Kalou qai raibaleta na noda cala kei na noda malumalumu ke da torovi koya da kere veivosoti vua ena yaca i Jisu

[iYaloyalo ena tabana e 24]

Na vuna bibi duadua me vakatusai kina na cala, me vakadonui keda kina na Kalou