Taro na Dauwiliwili
Me vaka ni dau tu vakarau o Jiova me vosota na ivalavala ca ena yavu ni isoro ni veivoli, na cava ga mera lai vakatutusa tale kina na lotu Vakarisito vei ira na qase ni ivavakoso?
E laurai ena kisi nei Tevita kei Pacisepa ni a vosota o Jiova na ivalavala ca levu i Tevita ni sa veivutuni dina. Ni sa lai tarogi koya na parofita o Necani, sa vakatusa sara ga na nona cala o Tevita: “Au sa cala vei Jiova.”—2 Samuela 12:13.
E sega ni veivosoti wale ga o Jiova ni sa vakatusa ena yalodina e dua na tamata na nona ivalavala ca, ia e veivuke tale ga vakayalololoma me vinaka tale na nona bula vakayalo o koya na tamata cala. Ena kisi nei Tevita, e vagolei mai vua na parofita o Necani na veivuke. Ena ivavakoso vakarisito edaidai, era tu na tacida matua vakayalo, o ira na qase ni ivavakoso. E vakamatatataka na tisaipeli o Jemesa: “Kevaka e dua vei kemudou sa tauvi-mate [vakayalo], me kacivi ira na qase ni soqosoqo lewe ni lotu; ia me ra masulaki koya, ka walia e na waiwai e na yaca ni Turaga: ia na masu ni vakabauta ena vakabulai koya sa tauvi-mate, ka na vakabulai koya na Turaga, ia kevaka ka kitaka nai valavala ca, ena sega ni cudruvi kina.”—Jemesa 5:14, 15.
E levu sara na veivuke e rawa nira cakava na qase era maqosataka na nodra saga mera vakaseavutaka na mosi ni yalo i koya na tamata e veivutunitaka dina na nona ivalavala ca. Era tovolea mera vakatotomuri Jiova ena nodra sasaga ni vukei koya. Ena sega ni tau kaukaua na nodra vosa, kevaka sara mada ga e gadrevi kina na veivunauci kaukaua. Era na raici koya tale ga vakayalololoma ena veika me vukei kina o koya e cala. Era na saga ena yalo e vosota mera vakadodonutaka na ivakarau ni nona rai nira vakayagataka na Vosa ni Kalou. (Kalatia 6:1) Ke sega mada ga ni tusanaki koya vakarawarawa o koya e ivalavala ca, ena rawa nira uqeti koya na qase me veivutuni, me vaka a vakayacora vei Tevita o Necani. Na nodra veivuke na qase ena rawa ni vukei koya na tamata cala me kua ni ivalavala ca tale, me taqomaki tale ga mai na leqa levu e rawa ni yacovi koya ke nakita me ivalavala ca tiko ga.—Iperiu 10:26-31, VV.
Eda dau madualaka na tusanaka vei ira na tani na noda ivalavala ca, e dau dredre tale ga meda kere veivosoti vei ira. E ka dina ni bolebole. Ke da sega ni vakayacora oya, na cava ena rawa ni yaco vei keda? E kaya e dua na tagane a sega ni tusanaka na nona cala bibi vei iratou na qase ni ivavakoso: “Au vakila ni sega ni takali rawa na mosi ni yaloqu. Au vakalevutaka na noqu cakacaka vakavunau, ia e sega ga ni vakaotia na mosi ni yaloqu.” E nanuma ni sa na rauta ga na nona vakatusai koya ena masu vua na Kalou, ia e sega ga ni lako tani rawa, ni sotava o koya na yalobibivoro me vakataki Tui Tevita. (Same 51:8, 11) E vinaka cake meda ciqoma na veivuke vakayalololoma i Jiova mai vei ira na qase ni ivavakoso!