Vukei ira na Gone Mera Kila Vinaka na iSoqosoqo i Jiova

ERA dau via kila na ka na gone. Vakasamataka mada na nodra rairai vakataroga na gone ni Isireli ena bogi ni imatai ni Lakosivia e Ijipita: ‘Na cava me vakamatei kina na sipi tagane?’ ‘Na cava e biuta tiko kina o tata na dra e matanikatuba?’ ‘Eda sa lako tiko qo i vei?’ E laurai ena ka e vakarota o Jiova vei ira na tamanigone e Isireli ni a vakadonuya na taro va ya. A tukuna kina vei ira me baleta na Lakosivia ena dau vakayacori ena veigauna e muri: “Ni ra na tarogi kemuni na luvemuni, A cava nai balebale ni cakacaka oqo vei kemuni? dou na qai kaya, Oqo nai soro ni lako-sivia i Jiova, ko koya ka lako sivita na nodra veivale na Isireli mai Ijipita, ni sa yaviti Ijipita, ka vakabula na noda veivale.” (Lako 12:​24-27) E muri, a qai vakasalataki ira na itubutubu e Isireli o Jiova ni bibi mera dau sauma na nodra vakatataro na gone me baleta na nona ‘ilesilesi, kei na nona lewa.’​—Vkru. 6:​20-25.

E matata eke ni vinakata sara ga o Jiova mera sauma na itubutubu na nodra vakatataro na luvedra me baleta na sokalou dina​—na nodra isaunitaro na itubutubu me uqeti ira na gone mera lomani Jiova ni nodra Kalou qai nodra iVakabula. E se vinakata tiko ga qori o Jiova nikua. E dua na sala era rawa ni vakavulici luvedra kina na itubutubu mera lomana dina na Kalou kei ira na nona tamata, oya na nodra vukei ira mera kila vinaka na isoqosoqo i Jiova, mera kila tale ga na sala e yaga kina na kena ituvatuva. Koya gona, meda raica mada eso na sala e rawa nira vukei kina na gone mera vulica e levu tale na ka me baleta na isoqosoqo ni Kalou.

Na iVavakoso

E vinakati mera sa tekivu kila na gone nira se lalai na ivavakoso era lewena vakavuvale. Me rawati qori, ke o dua na itubutubu, ena vinakati mo dau kauti luvemu ena soqoni kece vaKarisito. Ke o cakava qori, o sa muria tiko na ivakarau a vakaroti ira kina na Isireli o Jiova: “Mo ni vakasoqoni ira na tamata, na tagane, kei na yalewa, kei na gone lalai . . . , me ra rogoca, ka me ra vuli kina, ka rerevaki Jiova na nomuni Kalou, ka vakabauta me ra cakava na vosa kecega ni vunau oqo: ka me ra rogoca ko ira na luvedra era sa sega ni kila eliu, ka me ra vuli me ra rerevaki Jiova na nomuni Kalou.”​—Vkru. 31:​12, 13.

Era rawa sara ga ni tekivu vulica na gone na Vosa i Jiova nira se gone dramidrami. E tukuna na yapositolo o Paula me baleti Timoci: “O se kila na iVolatabu ni o se gone dramidrami.” (2 Tim. 3:15) Ke ra se lalai mada ga na gone, sa rawa nira kila na ka e vunautaki tiko ena soqoni, era sa rawa tale ga ni kila na noda sere. Era na vulica ena soqoni na ivakavakayagataki ni iVolatabu kei na ivola vakaivolatabu, mera vakamareqeta tale ga. Kuria qori, era na raica tale ga ena soqoni na itovo eda kilai kina na imuri dina i Karisito​—na loloma dina. E tukuna o Jisu: “Au solia vei kemudou e dua na ivunau vou, mo dou veilomani; mo dou veilomani me vaka ga na noqu lomani kemudou. Na ka qo era na kila kece kina ni dou noqu tisaipeli, ke dou veilomani.” (Joni 13:​34, 35) Era na qoroya na gone na veilomani kei na vakacegu dina e laurai ena Kingdom Hall, era na raica tale ga me tiki ni nodra bula na soqoni vaKarisito.

Ni o vakamatauna mo totolo yani ena Kingdom Hall o qai tiko tale vakalailai ni oti na soqoni, ena kunea o luvemu eso na nona itokani. Me kua ni veimaliwai tu ga o luvemu kei ira era tabavata, ia e vinaka mo veikilaitaki koya vei ira na mataveitacini kece se mani cava na nodra yabaki ni bula. Ke veikilai kei ira na itabaqase, ena vuli vakalevu o luvemu ena nodra kila kei na nodra vuku nira sa qaseta na bula. Me vakataki Sakaraia ga ena gauna makawa, e tukuni ni “vuku e na raivotu ni Kalou” qai ivakaraitaki vinaka vei Usaia na tui Juta ena gauna e se gone kina, o ira tale ga nikua sa vicavata na yabaki na nodra qaravi Jiova voli mai ena yalodina e dau veiuqeti na nodra ivakaraitaki vei ira na gone. (2 Vei. 26:​1, 4, 5) Ni o tiko ena Kingdom Hall, vakamacalataka vei luvemu na yaga ni laibri, na papa ni itukutuku, kei na so tale na ka.

Na iSoqosoqo e Vuravura Raraba

E dodonu mera kila na gone ni ivavakoso era lewena e wili tiko ena dua na isoqosoqo e vuravura raraba e sivia e 100,000 na kena ivavakoso. Vakamacalataka na veika e baleta na isoqosoqo, na kena cicivaki, kei na nodra itavi na gone ena kena tokoni na cakacaka. Vakaraitaka vei ira na vuna o dau nanamaki kina ena soqo ni tabacakacaka, na soqo ni tikina, kei na nona veisiko na ivakatawa ni tabacakacaka.​—Raica na kato, “Na ka me Veivosakitaki ena Sokalou Vakavuvale,” ena tabana e 28.

Ke rawa, sureta na ivakatawa ni tabacakacaka, o ira na daukaulotu, o ira na lewe ni vuvale e Peceli, kei na so tale era veiqaravi vakatabakidua mera mai kana e vale. Kua vakadua ni nanuma nira sa rui osooso mera sega ni rawa ni veimaliwai kina kei ira na gone. O ira na dauveiqaravi vakatabakidua qo era dau saga mera vakatotomuri Jisu tiko ga, na nona dau ciqomi ira na gone kei na nona dau vosa vei ira. (Mari. 10:​13-16) Nira rogoca na gone na nodra italanoa o ira era veiqaravi vakatabakidua, era na raica kina na nodra marautaka tiko na nodra veiqaravi tabu, ena rawa ni uqeti ira qori mera sauva tale ga na cakacaka vakatabakidua.

Na cava eso tale na ka dou rawa ni cakava vakavuvale me kila vinaka kina na isoqosoqo i Jiova o luvemu? Qo eso na vakatutu: Dou rawa ni raica vakavuvale na ivola Jehovah’s Witnesses​—Proclaimers of God’s Kingdom. Vakamacalataka na bibi ni sokalou, na nodra yalomalumalumu kei na nodra yalodina na dauveiqaravi i Jiova, kei na sala e vakayagataki ira kina o Jiova me vakatetei na itukutuku vinaka e vuravura raraba. Vakayagataka na vidio e dau vakarautaka na isoqosoqo i Jiova mo vakavulica kina na lesoni bibi ena veika a yaco ena gauna makawa kei na gauna qo. Ke rawa, dou lai sarasara e Peceli, ke dou gade e vanuatani dou rawa ni lai sarasara tale ga ena kena valenivolavola ni tabana. Ena qoroya o luvemu ena sarasara va qori na sala e veidusimaki tiko kina na dauveiqaravi yalodina ena isoqosoqo i Jiova e vuravura, me vakarautaka na kakana vakayalo, me dusimaki keda tale ga me vaka ga ena imatai ni senitiuri S.K.​—Maciu 24:​45-47; Caka. 15:​22-31.

Me Ganiti Gone na Nomu Veivakavulici

Ni o vakavulici luvemu, nanuma tiko na sala e dau vakavulici ratou kina na nona yapositolo o Jisu. A tukuna ena dua na gauna vei ratou: “Se vo e levu na ka meu tukuna vei kemudou, ia dou na sega ni taura rawa ena gauna qo.” (Joni 16:12) A sega ni vakamacala vakalevu ena dua ga na gauna o Jisu vei ratou na nona tisaipeli. Ia e vakamacalataka vakalalai vei ratou na ka dina me ratou rawa ni kila na kena ibalebale. Mo va tale ga oya ke o itubutubu, kua ni vakamacala vakalevu vei luvemu ena dua ga na gauna. Ni wasoma na nona vakavulici vakalalai me baleta na isoqosoqo i Jiova, ena taleitaka tiko ga me vulica na veika me baleta na ivavakoso vaKarisito. Ni veisau na ka e gadreva o luvemu, o rawa ni tokaruataka se vakarabailevutaka na ka e sa vulica oti.

Eda vakaukauataki vakayalo ena ivavakoso vaKarisito me dei kina na noda veiwekani kei na Kalou. O ira tale ga na gone era dau gugumatua ena vakaitavi ena ka e tuvanaki ena ivavakoso era na vakaiyaragitaki vinaka mera vorata na veitemaki ni vuravura i Setani. (Roma 12:2) Mo marautaka mada ga na nomu vukei luvemu me kila vinaka na isoqosoqo i Jiova. Ena nona veivakalougatataki, me yalodina tiko mada ga o luvemu vua na Kalou dauloloma eda qarava, kabita dei tale ga na nona isoqosoqo.

[Kato/​iYaloyalo ena tabana e 28]

Na ka me Veivosakitaki ena Sokalou Vakavuvale

Qo eso na ka me baleta na isoqosoqo i Jiova e rawa ni veivosakitaki ena yakavi ni Sokalou Vakavuvale.

▪ Railesuva na itukutuku ni ivavakoso dou lewena. A tauyavu ena gauna cava, a tauyavutaki vakacava? E vica na Kingdom Hall a vakayagataka tu na ivavakoso? Ena gauna dou veivosakitaka kina qori, vakacava mo sureta mai vale e dua sa dede na nona lewena tu na ivavakoso qori me sauma eso na vakatataro i luvemu?

▪ Vakamacalataka na inaki ni soqoni kece vakaivavakoso kei na soqo lelevu e dau caka, kei na kena yaga vei ira na gone.

▪ Dou veivosakitaka na inaki ni kena tauyavu na koronivuli eso ena isoqosoqo i Jiova. Vakamacalataka eso na irogo ni veika vinaka era sa rawata o ira era vuli mai kina.

▪ Vukei ira na lalai mera raica ni bibi mera dua na dautukutuku e vunautaka wasoma na itukutuku vinaka. Vakaraitaka vei ira na sala e rawa nira veivuke kina ena ripote vakayabaki ni cakacaka e vuravura e dau tabaki ena Yearbook of Jehovah’s Witnesses.

▪ Dou veivosakitaka na duidui taba ni veiqaravi vakatabakidua era rawa ni sauva na gone ena isoqosoqo i Jiova. E vakamacalataki vinaka qori ena wase 10 ni ivola iSoqosoqo e Cakava na Loma i Jiova.

▪ Vukei ira na gone mera kila na vuna e dau muri kina eso na idusidusi ena ivavakoso. Vakamacalataka na vuna mera talairawarawa tiko ga kina ina isoqosoqo i Jiova, ena so mada ga na ka lalai e tuvanaki kina. Vukei ira ena sala era rawa ni tokona vinaka kina na ituvatuva ni ivavakoso nira muria na nodra veidusimaki na qase ni ivavakoso.

[iYaloyalo ena tabana e 26]

Me vakataki ira ga e Isireli makawa, mera saga tale ga na itubutubu nikua mera sauma na nodra vakatataro na luvedra me baleta na isoqosoqo i Jiova

[iYaloyalo ena tabana e 28]

Ena yaga sara vakalevu vei luvemu na nona kilai ira era sa qaravi Jiova voli mai vakadede