Na Vuna mo Marau Kina

E TUVANAKI vakamaqosa na ibulibuli kece i Jiova, mai na sela somidi ina isoso kalokalo vakaitamera era umani vata kina na isoso lalai ena dua na isoso levu se cluster ra qai wasewasei tale na isoso kalokalo lelevu ena iwasewase lelevu sara e vakatokai na supercluster. E sega ni kurabuitaki qo baleta e “dau maqosa na nona ituvatuva” na Dauveibuli. (1 Kor. 14:33) E vakasakiti tale ga na ituvatuva ni Kalou me baleta na sokalou. Vakasamataka mada na ka sa cakava o Jiova. E tauyavutaka e dua na isoqosoqo era lewena e drau vakacaca na milioni na ibulibuli vuku e lomalagi kei vuravura—na kawatamata kei na agilosi e tu vei ira na galala ni vakatulewa ra qai duavata ena sokalou savasava. E vakatubuqoroqoro dina qori!

E Isireli makawa, o Jerusalemi e vakatakarakarataka na isoqosoqo ni Kalou e vuravura, ni tiko kina na valenisoro i Jiova kei na tui e lumuta. Qo na nona rai me baleta na koro tabu e dua na Isireli a tu vakavesu mai Papiloni: “Kevaka ka’u sa sega ni nanumi iko, me qai kabita sara na loma ni gusuqu e cake na yamequ; kevaka ka’u sa sega ni rekitaki Jerusalemi vakalevu ka vakalailai na ka kecega ka’u sa daurekitaka.”—Same 137:6.

E va tale ga qori na nomu rai me baleta na isoqosoqo ni Kalou nikua? Qori beka na ka e vakamarautaki iko vakalevu duadua? Eratou kila na luvemu na itukutuku makawa ni isoqosoqo ni Kalou e vuravura kei na kena ituvatuva? Eratou kila ratou qai marautaka ni ratou lewe ni dua na mataveitacini e vuravura ni iVakadinadina i Jiova? (1 Pita 2:17) Dou rawa ni muria na vakatutu ena ulutaga qo ena yakavi ni nomudou Sokalou Vakavuvale me vakalevutaki kina na nomudou kilaka kei na nomudou vakavinavinakataka na isoqosoqo i Jiova.

Tukuna “na Gauna sa oti Makawa”

Era dau soqoni e veiyabaki na vuvale e Isireli mera solevutaka na Lakosivia. Ena gauna a tekivu kina na solevu qori, a vakaroti ira na Isireli o Mosese: “Ni sa tarogi iko na luvemu e na gauna maimuri, ka kaya, A cava oqo? mo qai kaya vua, sa kauti keda tani e na ligana kaukauwa ko Jiova mai Ijipita, mai na vale ni veivakabobulataki.” (Lako 13:14) Na ka e cakava o Jiova ena vukudra na Isireli me kua ni guilecavi. Era muria dina e levu na tama e Isireli na ivakaro i Mosese. A masulaka e dua na Isireli ni oti e vica na itabatamata: “Kemuni na Kalou, keimami a rogoca e na daliga i keimami, a ra sa tukuna vei keimami na neimami qase, na cakacaka ko ni a cakava e na nodra gauna, e na gauna sa oti makawa.”—Same 44:1.

Ena nona rai e dua na itabagone nikua, ena rairai vaka ga ‘na gauna makawa’ na keda itukutuku na iVakadinadina i Jiova ena 100 na yabaki sa oti se sivia. O rawa ni vakadeitaka vakacava vei luvemu ni ka kece oya a yaco dina? Eso na itubutubu era vakayagataka na ivola Jehovah’s Witnesses—Proclaimers of God’s Kingdom, kei na Yearbook, na nodra italanoa na tacida e tabaki ena noda mekesini, kei na so tale na itukutuku makawa ni noda cakacaka, wili kina na noda DVD vou me baleti ira na dauveiqaravi ni Kalou nikua. Na vidio me baleta na nodra vakacacani na tacida ena matanitu makawa na Soviet Union kei na matanitu nei Itala e Jamani, era vuli kina na vuvale mera nuitaki Jiova nira vakatovolei. Qori na ka e rawa ni okati ena nomudou yakavi ni sokalou vakavuvale. Ena vakaukauataka na nodratou vakabauta na luvemu ke vakatovolei na nodratou yalodina.

Ia e rawa nira vucesa totolo na gone ni caka e dua na ivunau me baleta na itukutuku makawa. Me ratou vakaitavi gona na luvemu. Me kena ivakaraitaki, o rawa ni kerei luvemu me digia e dua na vanua e taleitaka, me vakekeli ena ivolatukutuku ni cakacaka vakalou ekea, me qai vakaraitaka vei ratou na vuvale na ka e vulica kina. Era tu ena ivavakoso na tacida era sa veiqaravi dede voli mai ena yalodina, o rawa ni sureti ira ena nomudou yakavi ni Sokalou Vakavuvale. De rawa ni vakatarogi ira o luvemu mera tukuna na ka era kila tu kei na ka era sotava. Se o rawa ni tukuna vei luvemu me droinitaka eso na ka vakasakiti a yaco, me vaka na kena tara e dua na valenivolavola ni tabana, na soqo siga tolu era soqo vata kina na sureti mai vanuatani, se na vakayagataki ni qaramavoni ena cakacaka vakavunau e veivale.

Vulica na Sala ‘Era Dui Cakava Kina na Nodra iTavi’

E vakatauvatana na yapositolo o Paula na ivavakoso vaKarisito ina “yago kece e sema qai tauri vata ena kena isema yadua, nira cakava vinaka na veitikiniyago na nodra dui itavi, e tubucake na yago taucoko qai tarai cake ena loloma.” (Efeso 4:16, New International Version) Na noda vulica na cakacaka ni yago e vakalevutaka na noda vakavinavinaka kei na noda doka na Dauveibuli. Nida vulica tale ga na cicivaki ni ivavakoso e vuravura, eda qoroya kina “na veibasoga ni nona vuku” na Kalou.—Efeso 3:10.

E vakamacalataka o Jiova na kena cicivaki na nona isoqosoqo e vuravura, wili kina na kena mai lomalagi. Me kena ivakaraitaki, e tukuna vei keda ni a vakaraitaka e liu vei Jisu Karisito ena raivotu, a qai “tala nona agilosi me vakaraitaka na ka qo ena ivakatakilakila vua na nona dauveiqaravi o Joni, me tukuna.” (Vkta. 1:1, 2) Ke vakaraitaka na Kalou na kena cicivaki na nona isoqosoqo tawarairai, ena vinakata tale ga meda kila ‘na nodra cakava vinaka na nodra itavi yadua’ na duidui tabana ena nona isoqosoqo e vuravura.

Me kena ivakaraitaki, ke vakarau veisiko yani na ivakatawa ni tabacakacaka ena ivavakoso o lewena, e vinaka mo dou veivosakitaka vakavuvale na nona itavi kei na veika e vakalougatataki kina. E dau vukei keda yadua vakacava? Eso tale na taro dou rawa ni veivosakitaka: Na cava e bibi kina me ripotetaki na cakacaka vakavunau? E vakailavotaki vakacava na isoqosoqo i Jiova? E tuvanaki vakacava na iLawalawa Dauvakatulewa, e vakarautaka vakacava na kakana vakayalo?

Na noda kila na sala era tuvanaki matau kina na dauveiqaravi i Jiova ena yaga vei keda ena tolu mada ga na sala qo: Eda na dokai ira vakalevu era cakacaka tiko vakaukaua ena vukuda. (1 Ces. 5:12, 13) Ena uqeti keda meda tokona na ituvatuva vakalou. (Caka. 16:4, 5) Ena dei tale ga na noda nuitaki ira na liutaki keda nida kila e yavutaki vakaivolatabu na nodra vakatulewa kei na veika e tuvanaki.—Iper. 13:7.

‘Vakaraica Vinaka na Kena Vale Cere’

“Dou lako voli mai Saioni, ka vakavolivolita: Wilika na kena veivale-cecere. Vakaraica vinaka na kena bai, vakananuma na kena veivale vakaturaga; Mo dou tukuna ki nai tabatamata ena muri mai.” (Same 48:12, 13) Na daunisame e uqeti ira tiko e keri na Isireli mera raici Jerusalemi vakavoleka sara. O rawa ni raitayaloyalotaka na kena guiguilecavi dredre vei ira na vuvale e Isireli na nodra dau gole ena koro tabu mera lai tiko ena solevu e dau caka e veiyabaki ra qai raica na kena valenisoro vakatubuqoroqoro? A rairai uqeti ira sara ga qori mera “tukuna ki nai tabatamata ena muri mai.”

Vakasamataka mada na Ranadi ni Sipa, a vakatitiqataka na itukutuku ni nona veiliutaki vinaka o Solomoni kei na levu ni nona vuku. A vakadeitaka vakacava ni dina na ka a rogoca? A kaya: “Ka’u a sega ga ni vakadinata na nodra vosa, ka’u a qai lako mai, ka sa raica na mataqu.” (2 Vei. 9:6) Io, e rawa ni uqeti keda vakalevu na ka eda raica sara ga e ‘matada.’

O rawa ni vukei luvemu vakacava me raica sara ga e ‘matana’ na vakatubuqoroqoro ni isoqosoqo i Jiova? Ke voleka e nomudou itikotiko na valenivolavola ni tabana ni iVakadinadina i Jiova, dou saga mo dou lai sarasara kina. Me kena ivakaraitaki, erau vakaitikotiko o Mandy kei Bethany rauta ni 1,500 na kilomita mai Peceli. Ia erau tuvanaka na nodrau itubutubu meratou dau lai sarasara kina, vakabibi nirau sa ka lelevu tiko na gone. Erau kaya: “Ni bera ni keirau lai sarasara e Peceli, keirau nanuma ni levu na kena vakatatabu qai baleti ira ga na sa qase. Ia keirau qai sotavi ira era se gone, era qaravi Jiova tiko vagumatua ra qai marautaka na nodra veiqaravi! Keirau raica ni isoqosoqo i Jiova e sega ni kovuti ga ena vanua lailai keitou vakaitikotiko kina. Na gauna kece keirau sikovi Peceli kina e vakavolekati keirau vei Jiova qai uqeti keirau ga vakalevu me keirau qaravi koya.” Na nodrau raica vakavoleka sara na isoqosoqo i Jiova o Mandy kei Bethany e uqeti rau me rau painia, rau bau sureti tale ga me rau lai veivuke vakalailai e Peceli.

E dua tale na sala eda rawa ni “raica” kina na isoqosoqo i Jiova, a sega qori ena nodra gauna na Isireli. Ena veiyabaki sa sivi, e vakarautaki na vidio kei na DVD e vakatakilai kina e levu na ka me baleta na isoqosoqo i Jiova, me vaka na: Jehovah’s Witnesses—Organized to Share the Good News, Our Whole Association of Brothers, To the Ends of the Earth, kei na United by Divine Teaching. Ni dou sarava vakavuvale na nodra cakacaka vagumatua na veiqaravi e Peceli, o ira na veivuke ena cakacaka ni vakacoko, kei ira era vakarautaka ra qai tuvanaka na soqo siga tolu, dou na vakamareqeti ira vakalevu na tacimudou kece e vuravura.

E dua na itavi bibi era qarava na ivavakoso kece ena kena vunautaki na itukutuku vinaka kei na noda tokoni na lewe ni ivavakoso. Ia me tiko na gauna mo dou nanumi ira kina vakavuvale “na tacimuni kece e vuravura.” Qori ena yaga ena nomudou “tudei” vakavuvale, ni dou kila ni tiko na vuna vinaka mo dou marau kina.—1 Pita 5:9.

[Kato/iYaloyalo ena tabana e 18]

iSoqosoqo i Jiova Ulutaga Veiganiti me Vulici

E bini kasauru na ivukevuke meda kila kina e levu tale na ka ena itukutuku makawa me baleta na isoqosoqo i Jiova kei na kena cicivaki. Qo e vica na taro o rawa ni tekivu kina:

☞ A tekivu vakacava na nodra cakacaka na ivakatawa dauveilakoyaki nikua?—Na Vale ni Vakatawa ni 15 Noveba, 1996, tabana e 10-15.

☞ Na cava e talei me baleta na “Nodra Siga na Gone” ena Theocratic Assembly ena 1941?—Na Vale ni Vakatawa ni 15 Julai, 2001, tabana e 8.

☞ E dau vakatulewa vakacava na iLawalawa Dauvakatulewa?—“Bearing Thorough Witness” About God’s Kingdom, tabana e 108-114.