Na Cava O Vulica Vei Jisu

Ena ka Era Cakava Tiko Nikua na Agilosi

A bula vata kei Tamana mai lomalagi o Jisu “ni bera o vuravura.” (Joni 17:5) E veiganiti gona me vakamacalataka na isaunitaro eda na vakarau dikeva qo.

Era kauaitaki keda na agilosi?

▪ E vakavulica o Jisu nira kauaitaki keda dina na agilosi. A tukuna: “Era na marau na agilosi ni Kalou ena nona veivutuni e dua na ivalavala ca.”​—Luke 15:10.

A vakavotuya o Jisu ena tikina qo na nodra itavi na agilosi mera vukei ira na dauveiqaravi ni Kalou me dei tiko ga na nodra veiwekani kei Jiova. Koya gona, ni vakasalataki ira na nona imuri mera kua ni veivakatarabetaki, a kaya: “Dou kua gona ni beca e dua vei ira na lalai qo; au tukuna vei kemudou ni nodra agilosi mai lomalagi era dau tu ga ena mata i Tamaqu mai lomalagi.” (Maciu 18:10) A sega ni tukuna tiko o Jisu ni o ira kece na nona imuri e tiko na nodra agilosi vakatawa me taqomaki ira. Ia e tukuna ga ni o ira na agilosi era cakacaka voleka kei na Kalou era kauaitaka na nodra bula na lotu vaKarisito ena nona ivavakoso.

Ena vakacalai keda vakacava na Tevoro?

▪ A vakadreti ira na nona imuri o Jisu ni na saga o Setani me tarova na nodra vuli o ira era via kila na ka dina me baleta na Kalou. E kaya: “Ni dua e rogoca na vosa ni matanitu qai sega ni via kila na kena ibalebale, e lako mai na Vunica qai kauta tani na ka e sa bau kaburaki e lomana; qo na kena e kaburaki ena batinisala.”​—Maciu 13:19.

A vakaraitaka o Jisu e dua tale na sala e veivakacalai kina o Setani, ni tukuna na vosa vakatautauvata me baleta na turaga a lai kaburaki witi ena were. Na turaga o Jisu, na witi e vakatakarakarataki ira na lotu vaKarisito dina era na veiliutaki kei Jisu mai lomalagi. E tomana o Jisu ni dua na meca a mai “kaburaka na itei ni co ca ena loganiwiti.” Na co ca e vakaibalebaletaki ira na lotu vaKarisito lasu. “Na meca e kakaburaki, na Tevoro.” (Maciu 13:​25, 39) Ni via tautauvata ga na irairai ni co ca kei na witi, era na rairai nanuma o ira era kaya voli nira lotu vaKarisito nira dausokalou dina. Ia na nodra ivakavuvuli lasu e vakacalai ira tiko ga na tamata mera talaidredre vua na Kalou. Io, e vakayagataki lotu lasu o Setani me veivakacalai kina meda kua ni veitokani kei na Kalou.

Eda na vorati Setani vakacava?

▪ E vakatokai Setani o Jisu me “turaga ni vuravura qo.” (Joni 14:30) A vakaraitaka o Jisu ena nona masu vua na Kalou na sala meda taqomaki kina mai na veitemaki i Setani. Ni kauaitaki ira na nona tisaipeli, a masuti Tamana vakalomalagi: “Moni vakatawai iratou tiko ena vuku i koya na Vunica. Eratou sega ni vakavuravura me vaka ga na noqu sega ni vakavuravura. Ni vakasavasavataki iratou ena ka dina, e dina na nomuni vosa.” (Joni 17:​15-17) Na noda vulica gona na Vosa ni Kalou ena taqomaki keda mai na vuravura ca i Setani .

Na cava era cakava tiko nikua na agilosi?

▪ A kaya o Jisu: “Ena ivakataotioti ni veika vakavuravura: era na lako mai na agilosi ra qai wasei ira tani na tamata ca mai vei ira na tamata yalododonu.” (Maciu 13:49) Eda bula tu qo ena “ivakataotioti ni veika vakavuravura,” era sa ciqoma tale tiko ga na le milioni na itukutuku vinaka ni Matanitu ni Kalou.​—Maciu 24:​3, 14.

Na Kalou ena sega ni vakadonui ira kece era vulica na nona Vosa. Era dusimaka tiko na agilosi na nodra cakacaka na dauveiqaravi ni Kalou nikua. O ira gona na lomana dina na Kalou era tawasei mai vei ira na sega ni via bulataka na ka era vulica. Ena nona tukuni ira tiko na vakadonui vua na Kalou, a kaya o Jisu: “Qo o ira era rogoca na vosa ena loma e vinaka, era taura dei ra qai vosota nira vua tiko.”​—Luke 8:15.

Ke o via kila eso tale na ivakamacala raica na wase 10 ni ivola qo, Na Cava Sara Mada E Kaya na iVolatabu?, tabaka na iVakadinadina i Jiova.

[iYaloyalo ena tabana e 16]

Era veivuke na agilosi ena nodra vagolei mai na yalomalumalumu ina ivavakoso vaKarisito