Taro na Dauwiliwili . . .

Meu lewena beka e dua na isoqosoqo lotu?

▪ O lomalomaruataka mo lewena e dua na isoqosoqo lotu ni o kurabuitaka na levu ni veivakaisini, kei na veisei e laurai vei ira na lewenilotu vaka kina o ira na italatala? Ke va qori, na ivosavosa vakaVaranise qo e tukuna sara ga na nomu nanuma, “O koya e voleka e valenilotu e dau yawaka na Kalou.”

De dua o doka na iVolatabu, o rairai nanuma tale ga ni dui vakatau vei keda na lotu meda lewena, e sega ni vakatau ena matanitu se na nodra nanuma eso tale. Ia o na rairai taroga, ‘E kaya dina na Kalou mera lewena e dua isoqosoqo lotu o ira na via sokaloutaki koya ena sala e vakadonuya?’

Na kena isau rawarawa ga na io. Eda na vakadeitaka vakacava qori? E kena ibalebale beka qo mo lewena e dua na isoqosoqo lotu cava ga?

Meda raica mada na ivakaraitaki i Jisu. A lewena beka e dua na isoqosoqo lotu? Ni se gone e dau nona ivakarau me salavata kei ratou na nona vuvale Jiu kei ira tale eso ena dua na solevu ena valenisoro mai Jerusalemi. (Luke 2:​41-43) Ia ni sa uabula e dau lakovata kei ira na nona itokani Jiu mera qarava na Kalou ena valenilotu. (Luke 4:​14-16) Ni vakamacala tiko o Jisu vua e dua na marama e duidui na lotu e susu mai kina, e kaya: “Keimami qaravi koya keimami kila.” (Joni 4:22) Na ka e tukuna qo e vakaraitaka ni lewena na lotu vakaJiu.

Ia nira cakitaki Jisu na Jiu, a mani tukuna ena dua na gauna e muri ni na sega ni vakadonuya na Kalou na nodra sokalou veivakaisini. (Maciu 23:33–24:2) A vakaraitaka tale ga o Jisu ni dodonu mera lewena e dua na isoqosoqo lotu o ira na via qarava na Kalou ena sala e vakadonuya. A tukuna vei ira na nona imuri: “Na ka qo era na kila kece kina ni dou noqu tisaipeli, ke dou veilomani.” (Joni 13:35) Ke dua na tisaipeli i Karisito e sega ni veimaliwai kei ira era vakabauta vata ena sega ni rawa ni lomani ira. E rua ga na sala a vakamacalataka o Jisu. E tukuna ni dua e “rabalevu” e “basika ina rusa.” Ia e veibasai sara na kena ikarua, e kaya: “Na sala e basika ina bula e rabalailai, e qiqo na kena matamata, qai vica wale sara era kunea.”​—Maciu 7:​13, 14.

E laurai gona ena ka e tukuna qo o Jisu ni sega ni dodonu meda lewena ga e dua na isoqosoqo lotu sa rawa. Na iVolatabu e vakarota meda qarauni ira ena “vakarairai ga na nodra lotu ka sega ni ka mai na yalodra dina.” E tomana na Vosa ni Kalou meda “kakua ni dau veitokani kei ira na tamata vaka ko ya.” (2 Timoci 3:​5, VV) Ia ena yaga ke da kilai ira, da maliwai ira tale ga era muria tiko na sala e basika ina bula. Ena gauna qo eda na vakayaloqaqataki, tokoni, e makaresese tale ga na noda inuinui ena veigauna se bera mai.​—Iperiu 10:​24, 25.

O na kila vakacava na lotu e muria tiko na sala qiqo? Ke o via kila na kena isau, ena vinaka mo dikeva na wase 15 ni ivola Na Cava Sara Mada e Kaya Na iVolatabu?a Ena dusimaki iko na wase qori ena ka e kaya na iVolatabu me baleta na isoqosoqo ni lotu cava mo lewena.

[iVakamacala e ra]