Ra iTabagone​—Oni na Vakayagataka Vakacava na Nomuni Bula?

“Niu vacu tale ga au sega ni vacu meu vacuka wale tu na cagi.”—1 KOR. 9:26.

1, 2. Na cava e rua na ka bibi e gadrevi me vakainaki kina na nomu bula ni o tubu cake tiko mo uabula?

NI O muria tiko e dua na gaunisala e vou vei iko, ena vinakati mo kauta tiko e dua na mape kei na kabasi. O na kila ena mape na vanua o sa tiko kina, o qai vakatulewataka na ka mo cakava. Na kabasi e nomu idusidusi mo kila kina na sala mo muria. Ia ena sega ni yaga na mape kei na kabasi ke o sega mada ga ni kila na vanua o gole tiko kina. Ena vinakati gona me matata tiko vei iko na vanua o via gole kina mo kua ni veilecayaki.

² E va tale ga qori na ka o sotava ni o tubu tiko mo uabula. E tiko na nomu mape kei na kabasi o rawa ni nuitaka. Na iVolatabu e vaka na mape ni dusimaki iko ena sala vinaka duadua mo muria. (Vkai. 3:5, 6) Na lewaeloma e vaka tiko na kabasi. Ena yaga sara vakalevu ke vakavulici vinaka ni na vakadodonutaka tiko ga na nomu ilakolako. (Roma 2:15) Ia me vakainaki na nomu bula, e bibi mo kila na vanua o gole tiko kina. Ena bibi gona me tiko na nomu isausau.

3. Me vaka e tukuna o Paula ena 1 Korinica 9:26, na cava e yaga kina na isausau?

³ A vakabibitaka na yapositolo o Paula na yaga ni isausau kei na sasaga e gadrevi me rawati kina. A vola: “Ena noqu ivakarau ni cici, au sega ni cici tu vakaveitalia; niu vacu tale ga au sega ni vacu meu vacuka wale tu na cagi.” (1 Kor. 9:26) Ke tiko na nomu isausau, o na sega ni veilecayaki. Ni toso na gauna, ena vinakati mo vakatulewataka eso na ka bibi me vaka na sokalou, cakacaka, vakawati, kei na vuvale. Ena so na gauna, o na nanuma ni rui vakavu veilecayaki na levu ni ka mo digidigi kina. Ia o na sega ni lako sese ke o vakasamataka vakailiu na ka mo cakava ena veigauna se bera mai, o qai yavutaka tale ga na nomu vakatulewa ena ka dina kei na ivakavuvuli ena Vosa ni Kalou.—2 Tim. 4:4, 5.

4, 5. (a) Na cava ena yaco ke o sega ni tekia rawa qo na nomu isausau? (b) Na cava me yavutaki kina na nomu vakatulewa ena nomu via vakamarautaka na Kalou?

⁴ Ke o sega ni tekia rawa qo na nomu isausau, era na uqeti iko na nomu icaba kei na nomu qasenivuli mo tekia na isausau era nanuma ni na vinaka vei iko. Ia ke tiko mada ga na nomu isausau, eso era na rairai tukuna ga na nodra nanuma. Ni o rogoca na ka era tukuna, taroga: ‘Na isausau era tukuna oya ena uqeti au meu nanumi koya na Dauveibuli niu se itabagone, se na vakadredretaka meu cakava qori?’—Wilika Dauvunau 12:1.

⁵ Na cava me yavutaki kina na nomu vakatulewa ena nomu via vakamarautaka na Kalou? Dua na vuna oya, ni o Jiova e solia vei keda na ka vinaka kece. (Jeme. 1:17) O koya gona e dodonu meda vakavinavinakataki Jiova kece. (Vkta. 4:11) Na sala vinaka duadua o rawa ni vakaraitaka kina na nomu vakavinavinakataki koya, oya na nomu nanumi koya ni o tekia na nomu isausau. Meda dikeva mada eso na isausau yaga kei na ka mo cakava mo rawata kina.

iSausau o Rawa ni Tekia

6. Na isausau vinaka duadua cava o rawa ni tekia, na cava e bibi kina qori?

⁶ Me vaka e vakamacalataki ena ulutaga sa oti, na isausau vinaka duadua o rawa ni tekia, oya mo vakadeitaka sara ga ni dina na ka e tukuna na iVolatabu. (Roma 12:2; 2 Kor. 13:5) O ira na nomu icaba era na rairai vakabauta na bula vakaidewadewa se ra vakabauta na ivakavuvuli tale eso ni lotu lasu baleta ni tukuni vei ira mera vakabauta. Ia e sega ni tukuni mo vakabauta na ka era vinakata eso tale mo vakabauta. Nanuma tiko, e vinakata o Jiova mo qaravi koya ena nomu vakasama taucoko. (Wilika Maciu 22:36, 37.) E vinakata na Tamada vakalomalagi me tiko na ivakadinadina ni ka o vakabauta.—Iper. 11:1.

7, 8. (a) Me rawa ni dei na nomu vakabauta, na isausau lalai cava o rawa ni tekia? (b) Na cava ena yaco ni o sa rawata eso na isausau lalai qori?

⁷ Me rawa ni dei na nomu vakabauta, vakacava mo tekia mada eso na isausau lalai? Dua vei ira qori na nomu masu e veisiga. O rawa ni vakasamataka lesu se vola na ka o sotava e veisiga mo okata ena nomu masu. Ni o cakava qori, ena sega ni dua tu ga na ivakarau ni nomu masu, o qai cavuta sara ga na ka o gadreva. Nanuma tiko, mo kua ni tukuna ga na dredre o sotava, cavuta tale ga na ka o marautaka tiko. (Fpai. 4:6) E dua tale na isausau, mo wilika e veisiga na iVolatabu. Ke o wilika e va na drauniveva ni iVolatabu e veisiga, o na wilika tasevu na iVolatabu ena dua ga na yabaki.a E tukuna na Same 1:1, 2: “Sa kalougata na tamata . . . sa marau tiko e na vunau i Jiova; a sa vakananuma tiko na nona vunau e na siga kei na bogi.”

⁸ Na ikatolu ni isausau o rawa ni tekia, oya na nomu vakavakarau mo vakamacala ena soqoni kece. O rawa ni tekivu mada ga ena nomu wilika na isaunitaro se na iVolatabu. Ni toso na gauna, o rawa ni qai saga mo vakamacala ena nomu vosa ga. Na gauna kece o saumitaro kina, o sa solika sara tiko ga vei Jiova. (Iper. 13:15) Ni o sa rawata eso vei ira na isausau qori, o sa na qai nuidei ga vakalevu, o na lomani Jiova tale ga vakalevu, o na qai rawa tale ga ni tekia na isausau lelevu.

9. Ke o se bera ni dua na dautukutuku ni Matanitu ni Kalou, na isausau lelevu cava o rawa ni tekia?

⁹ Na isausau lelevu cava o rawa ni tekia? Ke o se bera ni vunautaka e matanalevu na itukutuku vinaka, saga mo dua na dautukutuku ni Matanitu ni Kalou. Ni o sa rawata na isausau vinaka qori, saga sara mo dautukutuku wasoma, me laulau na nomu vunau, o qai vunau tale ga e veivula. Saga tale ga mo vakayagataka vinaka na iVolatabu ena cakacaka vakaitalatala. Ni o cakava qori, o na marautaka kina vakalevu na vunau. O rawa ni vakalevutaka na gauna o vakayagataka ena vunau e veivale se o saga me dua na nomu vuli iVolatabu. Ni o sa dua na dautukutuku bera ni papitaiso, na isausau vinaka duadua mo tekia oya mo papitaiso mo dua na iVakadinadina yalayala ni Kalou o Jiova.

10, 11. Na isausau lelevu cava e rawa nira tekia na itabagone era sa papitaiso?

¹⁰ Ke o sa dua na dauveiqaravi yalayala i Jiova, qo eso na isausau lelevu o rawa ni tekia. De dua o na via veivuke vagauna ena ivavakoso ena kena cakacakataki na yalava e sega ni tarai wasoma. O na rawa ni painia veivuke se painia tudei ni o se kaukaua qai bulabula vinaka. Era na tukuna vei iko na vica vata na udolu na painia, ni veiqaravi vakatabakidua e sala vinaka duadua mo nanumi koya kina na Dauveibuli ni o se itabagone. Qo na isausau o na rawa ni tekia ni o se tiko e vale, ena yaga tale ga ena ivavakoso na nomu sauva na isausau qori.

¹¹ E tiko eso tale na isausau lelevu o rawa ni tekia ena lai yaga ena so tale na ivavakoso. Me kena ivakaraitaki, o rawa ni lai veiqaravi ena dua tale na vanua se vanuatani e gadrevi vakalevu kina na veivuke. De dua o rawa ni veivuke ena kena tara na Kingdom Hall se valenitabana e vanuatani, o rawa ni veiqaravi e Peceli se o daukaulotu. Ia ni bera ni o sauva na isausau lelevu, na isausau bibi duadua mo sauva oya mo papitaiso. Ke o se bera ni papitaiso, vakasamataka na ka e vinakati mo rawa ni sauva kina na isausau bibi duadua qo.

Na Papitaiso

12. Na cava na inaki ni nodra papitaiso eso, na cava e sega ni ka vakayalomatua kina qori?

¹² O na vakamacalataka vakacava na inaki ni papitaiso? Eso era na rairai nanuma ni papitaiso ena taqomaki ira mera kua ni caka ca. Eso era nanuma mera papitaiso baleta ga nira sa papitaiso oti na nodra icaba. Eso tale na itabagone era papitaiso nira via vakamarautaki ira ga na nodra itubutubu. Na papitaiso e sega ni konitaraki e tarova na nomu via cakava lo na ka o vinakata, e sega tale ga ni tukuni mo papitaiso nira tukuna vei iko eso tale mo cakava qori. E dodonu mo qai papitaiso ena gauna o sa kila vinaka kina na itavi ena cakava e dua na iVakadinadina i Jiova, o sa vakadeitaka tale ga ni o sa tu vakarau mo qarava na itavi qori, qai vu dina mai lomamu na nomu via cakava.—Dauv. 5:4, 5.

13. Na cava mo papitaiso kina?

¹³ E dua na vuna mo papitaiso kina, oya ni vakarota o Jisu vei ira na nona imuri ‘mera veivakavulici ra veipapitaisotaki.’ E kotora sara ga o Jisu na ivakaraitaki ena nona papitaiso. (Wilika Maciu 28:19, 20; Marika 1:9.) Na papitaiso e dua na ikalawa bibi me rawati kina na bula. Ni cavuta oti na yapositolo o Pita na nona ta na waqa o Noa eratou vakabulai kina vakavuvale ena gauna ni waluvu, e tukuna: “Na ka e yaco ya e tiko na kena ivakatakarakara ena vakabulai kemuni tale ga, ya na papitaiso . . . e rawati ga ena nona vakaturi o Jisu Karisito.” (1 Pita 3:20, 21) E sega ni kena ibalebale qori ni papitaiso e vaka na inisua o ciqoma ni yaco e dua na leqa tubukoso. Ia na nomu papitaiso e vakaraitaka ni o lomani Jiova o qai vinakata mo qaravi koya ena lomamu taucoko, nomu bula taucoko, vakasama taucoko kei na nomu kaukaua taucoko.—Mari. 12:29, 30.

14. Na cava era na rairai lomalomarua kina eso mera papitaiso, ia na cava mo vakadeitaka?

¹⁴ Eso era na rairai lomalomarua mera papitaiso nira leqataka de ra na vakasivoi ena dua na gauna e muri. E va tale ga qori na nomu rai? Ke vaka kina, e sega ni cala qori. E vakaraitaka ga qori ni o raica vakabibi na icolacola e salavata mai kei na nomu dua na iVakadinadina i Jiova. Ia vakacava e tiko e dua tale na vuna o lomalomarua tiko kina mo papitaiso? De dua o se bera ni vakadeitaka ni ivakarau ni bula vinaka duadua na nomu muria na ivakatagedegede ni Kalou. Ena ituvaki gona va qo, o na rawa ni vakatulewa vinaka ke o vakasamataka na ka era na sotava o ira era beca na ivakatagedegede vakaivolatabu. De dua o taleitaka na ivakatagedegede ni Kalou, ia o nanuma ni na dredre mo muria, qori e rairai vakavuna tale ga na nomu lomalomarua mo papitaiso. Ia e sega ni ca na vakanananu va qori, e vakaraitaka ga ni o yalomalumalumu. Na iVolatabu tale ga e tukuna ni dauveivakaisini na yalo ni tamata. (Jere. 17:9) Ia o rawa ni vakadeitaka ni o na valuta kece qori ke o ‘qaqarauni tiko ga me vaka e tukuna na vosa ni Kalou.’ (Wilika Same 119:9.) Se mani cava e vakavuna na nomu lomalomarua tiko mo papitaiso, e bibi mo vakadeitaka mo cakava e dua na ka ena ka o lomaleqataka tiko se nuiqawaqawataka.b

15, 16. O na kila vakacava ni o sa rawa ni papitaiso?

¹⁵ O na kila vakacava ni o sa rawa ni papitaiso? O na rawa ni kila qori ena nomu taroga eso na taro qo: ‘Au rawa ni vakamacalataka vei ira tale na so na yavu ivakavuvuli vakaivolatabu? Au dau vakaitavi ena cakacaka vakavunau, ke rau sega mada ga ni lako na noqu itubutubu? Au dau saga meu tiko ena soqoni kece vaKarisito? E bau dua na ituvaki au nanuma niu vorata kina na idre ni veimurimuri? Au na qaravi Jiova tiko ga ke rau sega mada ga ni cakava qori na noqu itubutubu kei ira na noqu itokani? Au sa vakaraitaka vua na Kalou ena masu na bibi ni noqu veiwekani kei koya? Au sa yalataki au vakatabakidua vei Jiova ena masu?’

¹⁶ Na papitaiso e rawa ni veisautaka na noda bula, me kua gona ni raici vakamamada. O sa yalomatua mo vakatulewataka na ikalawa bibi qori? Na nomu yalomatua e sega ni kena ibalebale na nomu maqosa ni vakaitavi ena buturara se na totoka ni nomu ivakamacala ena soqoni. E kena ibalebale ga na nomu yavutaka na nomu vakatulewa kece ena ivakavuvuli vakaivolatabu. (Wilika Iperiu 5:14.) Ke o sa cakava tiko qori, sa qai vo ga mo cakava na ka dokai duadua—oya mo qaravi Jiova mai vu ni lomamu o qai muria na ivakarau ni bula e vakaraitaka ni o sa yalataki iko dina vua.

17. O na vosota vakacava na ituvaki dredre o na sotava ni o papitaiso oti?

¹⁷ Ni oti ga na nomu papitaiso, o na rairai gugumatua sara ni qarava na Kalou. O na sotava eso na ituvaki dredre ena vakatovolei kina na nomu vakabauta kei na nomu yalodina. (2 Tim. 3:12) Kua ni nanuma mo vorata duadua na ituvaki dredre kece qori. Mo kere ivakasala vei rau na nomu itubutubu, kerei ira na tacimu matua ena ivavakoso mera vukei iko. Mo veitokani tiko ga kei ira era na tokoni iko. Mo kua ni guilecava ni kauaitaki iko o Jiova, ena vakaukauataki iko mo vosota na ituvaki dredre o dau sotava.—1 Pita 5:6, 7.

O na Sauva Vakacava na Nomu iSausau?

18, 19. Ena yaga vakacava na nomu dikeva tale na ka o vakaliuca?

¹⁸ Se mani vakacava na vinaka ni nomu inaki, o dau nanuma ni sega ni veirauti na gauna mo cakava kina na ka o vinakata kei na ka o kila ni dodonu mo cakava? Ke o sotava tiko qori, e vinaka mo dikeva tale mada na ka o vakaliuca. Me kena ivakatautauvata: Vakasinaita e dua na vokete ena vatu lelevu, oti qai sova kina na nuku. Sa na sinai ena vokete na vatu kei na nuku. Ia vakalala tale na vokete, maroroya tiko ga na levu ni vatu oya kei na nuku, qo mo sa sova e liu na nuku, oti qai sova na vatu. Vakacava e rawa ni tawa kece na vatu? Sega, baleta sa sova e liu na nuku.

¹⁹ E va tale ga qori na ka o sotava me baleta na vakayagataki ni gauna. Ke o dau vakaliuca na ka ni veivakamarautaki, ena sega na gauna mo cakava kina na ka e bibi cake—qori na ka e vauca na nomu qaravi Kalou. Ke o muria na ivakasala vakaivolatabu mo ‘vakadeitaka na veika e bibi sara,’ o na raica ni tiko na gauna mo vakayagataka ena cakacaka e vauca na Matanitu ni Kalou kei na so na ka ni veivakamarautaki.—Fpai. 1:10.

20. Na cava mo cakava ke o nuiqawaqawa o qai vakatitiqa ni o saga tiko mo sauva na nomu isausau?

²⁰ Ni o sasagataka tiko mo sauva na nomu isausau me vaka na papitaiso, o na rairai nuiqawaqawa ena so na gauna o qai vakatitiqa. Na gauna ga o vakila kina qori, “biuta vei Jiova na nomui colacola bibi, ena tokoni iko ko koya.” (Same 55:22) Ena gauna qo, o rawa sara ga ni vakaitavi ena cakacaka vakasakiti duadua ena bula ni kawatamata, qori na vunau kei na veivakavulici. (Caka. 1:8) O rawa ni digia mo sarasara, oya mo saravi ira na so tale nira cakava na cakacaka qori se o rawa sara ga ni vakaitavi kina. Mo kua tale ni lomalomarua ena nomu vakayagataka na nomu taledi ena kena tokoni na Matanitu ni Kalou. O na sega vakadua ni veivutunitaka na nomu qarava “na Dauveibuli ni o se itabagone.”—Dauv. 12:1, New International Version.

[iVakamacala e ra]

O na Sauma Vakacava?

• Na cava mo tekia kina na nomu isausau?

• Na cava eso na isausau yaga mo sauva?

• Na cava na ibalebale ni nomu papitaiso?

• Ena yaga vakacava na nomu dikeva tale na ka o vakaliuca?

[iYaloyalo ena tabana e 13]

E nomu isausau mo wilika e veisiga na iVolatabu?

[iYaloyalo ena tabana e 15]

O na sauva vakacava na isausau mo papitaiso?

[iYaloyalo ena tabana e 16]

Na cava o vulica ena ivakatautauvata qo?