Na Ka Meda Cakava Meda Rawata Kina Noda iSausau Vakayalo
1. Na isausau levu cava e rawa nira tekia na itabagone lotu Vakarisito?
1 Ni o dua na itabagone lotu Vakarisito, e sega ni vakabekataki ni o na yavutaka nomu isausau levu ena nomu lomani Jiova, kei na nomu via muria na ivakasala i Jisu vei ira na lotu Vakarisito mera ‘vakasaqara taumada na Matanitu ni Kalou.’ (Maciu 6:33) De dua sa nomu isausau mo vakarabailevutaka na nomu cakacaka vakavunau ena nomu painia se o lai veiqaravi ena vanua e gadrevi tu kina vakalevu na cakacaka. O na rairai via veiqaravi ena valenitabana, se daukaulotu e vanua tani. Oqo na isausau e yaga qai vinaka dina!
2. Na cava meda cakava meda rawata kina na noda isausau vakayalo?
2 Dua na ivukevuke yaga meda rawata kina noda isausau vakayalo oya meda biuta vakaivola. E kaya Na Vale ni Vakatawa, 15 Julai, 2004: ‘Ena rawa ga ni matata e dua na ka eda lalawataka kevaka eda sega wale ga ni vakasamataka, ia meda veivosakitaka se da vakavola. Koya gona ena vinaka sara kevaka eda vola na noda isausau kei na sala meda na covia kina.’ Me rawa nida qai rawata na isausau levu eda tekia, e vinaka meda sauva mada e so na isausau lalai me rawa nida qai lai rawata kina na isausau levu oqori.
3. Tukuna e so na isausau lalai e rawa ni vukea e dua me qai papitaiso.
3 iSausau Lalai: Kevaka o se sega ni papitaiso, dikeva mada e so na isausau lalai mo tekia mo rawata kina na isausau levu oqori. Ena gadrevi mo kila vinaka mada na ivakavuvuli ni iVolatabu. O koya gona me nomu isausau mo vulica vakavinaka na ivola Kaya na iVolatabu, mo dikeva tale ga na tikinivolatabu kece era volai tu kina. (1 Tim. 4:15) Tekia tale ga na isausau mo wilika tasevu na iVolatabu mai na iVakatekivu ina Vakatakila, me vaka e dau namaki mera cakava na lewe i Peceli vaka kina o ira na gonevuli e Kiliati. Ni o sa cakava rawa oqo, tuvanaka sara e dua na ituvatuva ni wili iVolatabu e veisiga. (Same 1:2, 3) Ena vukei iko oqo mo tubu vakayalo. Dolava ena masu nomu vuli vakataki iko kei na wili iVolatabu, qai tinia tale ga ena masu. Saga mo bulataka sara na ka o vulica.—Jeme. 1:25.
4. Na isausau lalai cava e rawa ni tekia e dua na lotu Vakarisito me rawata kina na isausau levu me vaka na veiqaravi e Peceli se na cakacaka vakaulotu?
4 Ia vakacava ke o sa papitaiso, na isausau lalai cava o rawa ni tekia mo rawata kina e dua na isausau levu? E rawa beka ni o vakavinakataka na iwalewale ni nomu cakacaka vakavunau? Kena ivakaraitaki, rawa beka ni nomu isausau mo kenadau na vakayagataka na iVolatabu ena cakacaka vakavunau? (2 Tim. 2:15) Na cava e so tale na ka o rawa ni vakarabailevutaka ena nomu cakacaka vakavunau? Tekia e so na isausau lalai e ganiti iko kei na nomu yabaki ni bula me vukei iko mo rawata kina na nomu isausau levu.
5. E yaga vakacakava vua e dua na cauravou na isausau lalai e tekia me rawata kina na isausau levu ni veiqaravi e Peceli?
5 E Rawata Nona iSausau: A vinakata sara ga o Tony e dua na cauravou yabaki 19 me lai veiqaravi e Peceli ena gauna a lai sarasara kina ena kena valenivolavola. Ia ena gauna oya e se dau murilomana tu ga o Tony, e se sega tale ga ni yalataki koya vua na Kalou. Sa qai lomana me veisautaka nona bula me salavata kei na ivakatagedegede i Jiova, qai nona isausau me papitaiso. Ni sa rawata na isausau oqori, sa qai tekia e rua tale na isausau—me painia veivuke, oti me painia tudei sara. E toqa sara ena nona ivolanivula na rua na tikinisiga me rawati rau kina na isausau oqori. Ia ni oti tale e vica na yabaki nona painia tiko, dua na ka nona marau ni sa sureti me lai veiqaravi e Peceli!
6. Eda na rawata vakacava noda isausau vakayalo?
6 Nida vakasaqara taumada na Matanitu ni Kalou, eda na rawata tale ga na noda isausau vakayalo. Meda vakararavitaka mada ga vei Jiova ena masu na ‘noda cakacaka’ da qai saga vagumatua meda rawata.—Vkai. 16:3; 21:5.