E Rogoca o Jiova na Nodra Tagi na Vakaloloma
A TUKUNA o Tui Solomoni e Isireli makawa, ‘nida dau sotava kece na ka tawanamaki.’ (Dauv. 9:11) E rawa ni vakaleqai keda na ituvaki rarawataki se na dredre eda sotava. Me kena ivakaraitaki, e rawa ni vakayalolailaitaki keda na nona takali e dua na wekada voleka. Ni oti e vica na macawa kei na vula, e se rawa ni vakilai tiko ga na yalolailai kei na rarawa. Ena veilecayaki vakalevu o koya e rarawa qai nanuma ni sega na betena me torovi Jiova ena masu.
Ena ituvaki va qo, ena gadrevi vakalevu na veivakayaloqaqataki, veikauaitaki kei na loloma. A vakadeitaka na daunisame o Tevita na dina ni tikina qori ena nona lagata: “Sa tokoni ira kecega era sa bale ko Jiova, ka sa vakatudonutaki ira kecega era sa vakalairoro.” (Same 145:14) E tukuna na iVolatabu ni “veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” (2 Vei. 16:9) Ena tiko kei ira “sa ramusu ka malumalumu na yalona, me vakabula na yalo i koya sa yalomalumalumu [“vakaloloma,” NW], ka vakabula na lomadra sa bibivoro.” (Aisea 57:15) E veitokoni qai veivakacegui vakacava o Jiova vei ira na bibivoro kei na vakaloloma?
‘Vosa ena Kena Gauna Donu’
E dua na sala e vakarautaka kina o Jiova na veivuke ena kena gauna donu, oya na nona vakayagataki ira na mataveitacini. Era uqeti na lotu vaKarisito mera dau “vosa vakayalovinaka vei ira na yalolailai.” (1 Ces. 5:14) Na nodra veikauaitaki kei na nodra loloma ena vakayaloqaqataki koya e vusolo na lomana. Ke lekaleka mada ga na veivosaki, ena vakayaloqaqataki koya e yalolailai na vosa ni veivakacegui e rogoca. E rawa ni tauca na vosa ni veivakacegui e dua a vosota rawa tale ga na ituvaki dredre va oya, se dua na itokani e kila vinaka na ituvaki e sotavi tiko. Ena vakayagataka o Jiova na italanoa veiuqeti va qori me vakayaloqaqataki koya e vakaloloma ena vuku ni ituvaki e sotava.
Vakasamataka mada na ka e sotava o Alex e dua na qase ni ivavakoso e se qai vakawati ga. A mate na watina ni tauvi koya e dua na mate e sega na kena iwali. A veivakacegui dina na ka e tukuna vua e dua na ivakatawa dauveilakoyaki dauloloma, a takali tale ga na watina, ia e sa vakawati tale. A tukuna vei Alex ni vakayalolailaitaki koya na nona rarawa. E dau vinaka sara vua ni veimaliwai kei ira na tacina vakayalo ena cakacaka vakaitalatala kei na soqoni. Ia ni sogota ga na katuba ni yaco i vale, e galili tale. E tukuna o Alex: “Au lomavakacegu niu kila ni ka au sotava qo, era sotava tale tiko eso.” Koya gona, na “vosa ena kena gauna donu” e rawa ni veivakacegui ena gauna ni rarawa.—Vkai. 15:23, NW.
E dua tale na qase ni ivavakoso a via vakayaloqaqataki Alex ena nona talanoataki ira e vica na lotu vaKarisito e kilai ira vinaka era sa mate na watidra. Ena nona veikauaitaki, a tukuna kina na tacida qo ni kila vinaka tu o Jiova na ka eda lomaleqataka kei na ka eda gadreva. A tomana: “Ke oti e vica na vula se vica na yabaki o qai vinakata me dua na nomu itokani, e ituvatuva vakayalololoma i Jiova mo vakawati tale.” Ia eso e sa takali na watidra ra qai via vakawati tale era na rairai sega ni rawa ni cakava qori. Ia ni vakasamataka o Alex na ka e tukuna na tacina oya, a tukuna: “Au nanuma tu ni noqu vakawati tale e ivakaraitaki ni noqu tawayalodina vei watiqu se na ituvatuva i Jiova me baleta na vakawati, ia na noqu kila ni oya e ituvatuva i Jiova e kauta tani sara ga vei au na rai cala.”—1 Kor. 7:8, 9, 39.
A sotava tale ga na dredre kei na veivakatovolei na daunisame o Tevita, a tukuna: “Sa vakaraici ira na tamata yalododonu ko Jiova, ka sa qara tu na daligana ki na nodra masu.” (Same 34:15) O Jiova e rawa ni sauma ena kena gauna donu na nodra tagi na yalolailai ni vakayagataki ira na lotu vaKarisito matua mera veiuqeti ena loloma kei na vuku. Na ituvatuva vakayalololoma qo e talei qai yaga dina.
Dusimaki ena Soqoni vaKarisito
Ena rawarawa sara ni cala na nona rai o koya e yalolailai, qori ena rawa ni vakavuna me vakayawaki koya. Ia e veivakasalataki na Vosa Vakaibalebale 18:1: “Ni sa tawasei koya tani na tamata, sa qara na ka e domona, a sa veivorati kei na vuku kece.” E tukuna o Alex: “Ena gauna e yali kina o kemu isa, ena basika tale ga e levu na rai cala.” A nanuma lesu o Alex ni taroga ena dua na gauna: “‘Au a rawa ni cakava eso tale na ka ena gauna se bula tiko kina o watiqu? A rawa niu lomani koya qai kauaitaki koya tale vakalevu?’ Au sega ni vinakata meu tu duadua. Au sega ni vinakata meu dawai. E dredre meu valuta na rai qori baleta qori sara ga na ka au sotava tiko, au tu duadua e veisiga.”
Ena vinakati vakalevu vua e yalolailai me vakayaloqaqataki ena nona veimaliwai. Na veimaliwai va qori e kune ga ena soqoni vakaivavakoso. Eda rogoca ena gauna va qori na rai dodonu i Jiova kei na nona vosa ni veivakayaloqaqataki.
Eda dusimaki ena soqoni vaKarisito meda kua ni kauaitaka vakasivia na ituvaki eda sotava. Nida rogoca qai vakananuma vakatitobu na tikinivolatabu, eda na kauaitaka vakalevu na ka e bibi cake—na kena vakalagilagi na veiliutaki i Jiova kei na vakacerecerei ni yacana—eda na sega ni kauaitaka vakasivia na ka eda sotava tiko. Nida vakavulici meda kila na rai i Jiova nida tiko ena soqoni vaKarisito, eda na lomavakacegu ni kila vinaka o Jiova na ka dredre eda sotava tiko, ke ra sega mada ga ni kila se kauai kina eso tale. E kila qori o Jiova baleta “ni sa rarawa na lomana, sa ramusu kina na yalona.” (Vkai. 15:13) E via vukei keda na Kalou dina, me uqeti keda mada ga qori qai vakaukauataki keda meda vosota.—Same 27:14.
Nira vakatovolei koya vakaca na kena meca, e tagi vua na Kalou o Tui Tevita: “O koya sa luvu kina na yaloqu e lomaqu; sa vakaloloma e lomaqu na yaloqu.” (Same 143:4) Na leqa e sotava e dua e rawa ni vakamalumalumutaki koya, na levu tale ga ni nona rarawa e vaka ga e vakanunutaka na lomana me sega ni vakila kina e dua na ka. E rawa ni vakavu rarawa vua e dua na tauvimate se na kena vakaleqai tu na yagona me dua na gauna balavu. Ia eda nuidei ni na vukei keda o Jiova meda vosota. (Same 41:1-3) Nikua, e sega ni veivakabulai vakacakamana o Jiova, ia e veivakavukui qai veivakayaloqaqataki meda vosota kina na ituvaki dredre. Nanuma tiko ni a torovi Jiova o Tevita ena gauna e sotava kina na ituvaki dredre. A lagata: “Au sa nanuma na gauna makawa; au sa vakanananu ki na nomuni cakacaka kecega; au sa vakanananu vakalevu ki na cakacaka ni ligamuni.”—Same 143:5.
Na kena volatukutukutaki ena Vosa ni Kalou na vosa veiuqeti oya, e dusia ni kila vinaka o Jiova na ka e tu lomada. E vakaraitaka qori ni dau rogoca o Jiova na noda kerekere. Ke da ciqoma na veivuke i Jiova, ‘ena tokoni keda o koya.’—Same 55:22.
“Kua ni Cegu ena Masu”
E tukuna na Jemesa 4:8: “Toro voleka yani vua na Kalou ena qai toro voleka mai vei kemuni.” Dua na sala o rawa ni toro voleka kina vei Jiova oya na nomu masu. E vakaroti keda na yapositolo o Paula meda “kua ni cegu ena masu.” (1 Ces. 5:17) Ke dredre mada ga meda tukuna na ka eda sotava tiko nida masu, ‘ena qai vakamamasu ena vukuda na yalo tabu ni vusolo tu na lomada.’ (Roma 8:26, 27) E kila vinaka tu o Jiova na ka eda sotava tiko.
E marautaka o Monika na nona veiwekani voleka kei Jiova, a tukuna: “Niu masu, wili iVolatabu, qai vuli vakataki au, au vakila ni noqu itokani voleka duadua o Jiova. Au vakadinadinataka ni vukei au dina. E veivakacegui meu kila ni gauna au sega ni vakamacalataka rawa kina na lomaqu, e kila vinaka na kequ ituvaki o Jiova. Au kila ni nona yalololoma kei na nona veivakalougatataki e sega ni oti rawa.”
Koya gona, meda ciqoma mada ga na nodra vosa ni veivakacegui kei na nodra loloma na tacida, meda muria na veidusimaki vakayalololoma kei na ivakasala veiuqeti e rogoci ena soqoni vaKarisito, da qai talaucaka na lomada vei Jiova ena masu. Qori na isolisoli kece i Jiova e vakaraitaka kina ni kauaitaki keda. E vakadinadinataka qori o Alex ni tukuna: “Ke da cakava noda itavi, oya meda vakayagataka na isolisoli kece e vakarautaka o Jiova meda kaukaua tiko ga kina vakayalo, eda na rawata ‘na kaukaua e uasivia na kaukaua ni tamata’ meda vosota kina na ituvaki dredre eda dau sotava.”—2 Kor. 4:7.
[Kato/iYaloyalo ena tabana e 18]
Na Nodra Vakacegui na Vakaloloma
E bini tu ena same na serekali e tara sara ga na lomada, e vakadeitaki kina ni dau rogoca o Jiova na nodra tagi na vakaloloma era bikai tu ena rarawa. Vakasamataka mada na serekali qo:
“E na noqu rarawa ka’u sa masu vei Jiova, Ka tagi vua na noqu Kalou: Sa rogoca na domoqu ko koya mai na nona vale tabu, Ka sa yaco sara vua na noqu tagi, io, ki na daligana.”—Same 18:6.
“Sa voleka ko Jiova vei ira sa ramusu na yalodra; Ka sa vakabulai ira sa dasila na lomadra.” —Same 34:18.
“Sa vakabulai ira sa ramusu na yalodra [o Jiova], ka sa vauca na nodra vue.”—Same 147:3.
[iYaloyalo ena tabana e 17]
Na ‘vosa e tau ena kena gauna donu’ e rawa ni veivakacegui ena gauna ni rarawa!