Toro Voleka Vua na Kalou
Vakacegui Ira e Ramusu na Yalodra
‘ENA sega ni lomani au o Jiova.’ Qori na ka e tukuna e dua na marama lotu vaKarisito e dau lomabibi. E vakadeitaka sara ga ni sa yawaki koya o Jiova. E rawa dina vei Jiova me yawaki ira na nona tamata era lomabibi? Ena laurai na kena isau veivakacegui ena vosa uqeti a vola na daunisame o Tevita ena Same 34:18.
E kila vinaka o Tevita na ka era vakila na tamata yalodina i Jiova nira sotava na leqa. Ni se gone, a veidroyaki voli ni sega ni cegu na nona vakasasataki koya na tui vuvu o Saula me vakamatei koya. A dro o Tevita ina vanua a nanuma ni na sega ni vaqarai koya kina o Saula—na siti ni meca o Kaca, ena nodra vanua na kai Filisitia. Na gauna e kilai kina ni tiko e kea, a dro bula rawa ga o Tevita ni veisautaka na nona ivukivuki me vaka e dua e leqa na nona vakasama. A vakacaucautaka na Kalou ni vakabulai koya qai yavutaka mai keri na ka e vola ena Same 34.
A vakabauta beka o Tevita ni o Jiova ena yawaki ira e vakalomabibitaki ira na rarawa era sotava se ra nanuma ni sega na kedra yaga? E vola: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.” (Tikina e 18) Meda raica mada na sala e veivakacegui kina na vosa qori qai vakanuideitaki ira era rarawa.
“Sa voleka ko Jiova.” E kaya e dua na ivola ni malanivosa qori e “vakaraitaka ni veikauaitaki na Turaga qai vakaraici keda, e dau tu vakarau me veivuke, me vakabulai ira na nona tamata.” Eda nuidei nida kila ni o Jiova e vakaraici ira tiko na nona tamata. E raica na kena tarai ira tu “e levu na ka dredre,” e kila tale ga na ka e tu e lomadra.—2 Timoci 3:1; Cakacaka 17:27.
“Ira sa ramusu na yalodra.” Ena so na vanua na ‘ramusu ni yalo se kavoro ni uto’ e dau vakaibalebaletaki vua e dua e sega ni domoni. Ia e kaya e dua na vuku ni nona vosa na daunisame e vakaibalebaletaki “ena rarawa kei na lolosi e dau vakilai ena duidui ituvaki.” Io, o ira mada ga na tamata yalodina ni Kalou era na rawa ni vakila na veika dredre ena ramusu sara ga kina na yalodra.
“Ira sa dasila na lomadra.” Na levu ni nodra beci ira ga o ira na yalolailai e rawa sara ga ni seavu kina vakalekaleka na ka kece era vakanuinui kina. E tukuni ena dua na nodra ivoladusidusi na dauvakadewa iVolatabu ni malanivosa e cake e rawa ni vakadewataki me “o ira e sega na ka vinaka mera vakanuinui kina.”
Na cava na rai i Jiova me baleti ira e “ramusu na yalodra” qai “dasila na lomadra”? E yawaki ira beka ni nanuma ni sega ni veiganiti mera lomani se kauaitaki? Sega! Me vaka ga e dua na itubutubu dauloloma e roqota na luvena qai vakacegui koya ena gauna e rarawa kina, o Jiova tale ga e volekati ira na nona tamata era kere veivuke vua. E vinakata sara ga me vakaceguya qai vakamalumutaka na ramusu ni yalodra kei na dasila ni lomadra. E rawa ni vakavukui ira, vakaukauataki ira tale ga mera vosota na ituvaki dredre era sotava.—2 Korinica 4:7; Jemesa 1:5.
E vinaka mo kila na sala mo toro voleka kina vei Jiova. E yalataka na Kalou dauloloma qo: “Au sa tiko . . . kei koya talega sa ramusu ka malumalumu na yalona, me vakabula na yalo i koya sa yalomalumalumu, ka vakabula na lomadra sa bibivoro.”—Aisea 57:15.
Wili iVolatabu e Vakatututaki ena June: