Eda na Yalodina Tiko Ga!

“Ia koi au, ka’u na muria lako na noqu yalododonu [“yalodina,” NW].”​—SAME 26:11.

1, 2. Na cava a tukuna o Jope me baleta na nona yalodina, na cava e kilai me baleti koya ena Jope wase 31?

E DAU vakayagataki ena gauna makawa na ivakarau bibi e caka mai na rua ga na kau, dua e vakababa, dua e duri vakadodonu. Ena vakoti vata na kedrau veimama me tauri rau toka. Ena lili na disi ena mua ruarua ni kau e vakababa. E biu ena dua na disi na iyaya e vakarautaki na kena bi, qai biu na kena ivakabi ena disi kadua. A vinakati gona vei ira na tamata ni Kalou ena gauna oya mera vakayagataka na ivakarau e donu kei na kena ivakabi.—Vkai. 11:1.

² Ni vakatovolei Jope o Setani, a tukuna na turaga qori e dau cakava na loma ni Kalou: “Me’u vakatovolei mada e nai vakarau dodonu, me kila kina na Kalou ni’u sa sega ni cala.” (Jope 31:6) A tukuna sara o Jope eso na ituvaki ena rawa ni vakatovolei kina na nona yalodina e dua. Ia e kilai ena ka e tukuna ena Jope wase 31, ni a yalodina tiko ga ena veivakatovolei kece a sotava. Na nona ivakaraitaki vinaka ena rawa ni uqeti keda meda vakatotomuri koya, da qai tukuna ena nuidei na vosa a cavuta na daunisame o Tevita: “Ia koi au, ka’u na muria lako na noqu yalododonu [yalodina].”—Same 26:11.

3. Na cava meda daudina kina vua na Kalou ena ka lelevu kei na ka lalai?

³ A mosimosi dina na ka e sotava o Jope, ia a yalodina tiko ga vua na Kalou. Ni vakasamataki na dredre ni veivakatovolei a sotava, era na rairai tukuna kina eso ni vakasakiti dina na nona yalodina. Eda sega sara ni sotava na ka e sotava o Jope. Ia meda daudina vua na Kalou ena ka lelevu kei na ka lalai, meda vakaraitaka kina nida yalodina da qai tokona na nona veiliutaki cecere.—Wilika Luke 16:10.

Bibi Meda Yalodina ni Muria na iTovo Savasava

4, 5. Na ivalavala cava a cata na turaga yalodina o Jope?

⁴ Me vakataki Jope ga, meda muria dei na ivakatagedegede i Jiova me baleta na itovo savasava meda yalodina tiko ga kina vua. A tukuna o Jope: “Au sa ia oti na veiyalayalati kei na mataqu; Me’u qai via nanuma vakacava e dua na goneyalewa? . . . Kevaka sa gole vakatani na lomaqu vua e dua na yalewa; Se’u lawa koto mai na nona katuba na kai noqu; Me qai qaqi sila na watiqu vua e dua tani, me ra koto vata kaya ko ira na tani.”—Jope 31:1, 9, 10.

⁵ A nakita dei o Jope me yalodina tiko ga vua na Kalou, a cata gona me vakaraica tiko ga e dua na yalewa me lai tini gaganotaki koya sara. Ni tagane vakawati, a sega kina ni wedeva e dua e sega ni vakawati se domona e dua na yalewa vakawati. E veiganiti kina na ka e tukuna o Jisu ena nona iVunau ena Ulunivanua me baleta na ivakatagedegede savasava ni veiyacovi. Meda nanuma tiko qori ke da via yalodina tiko ga.—Wilika Maciu 5:27, 28.

Kua ni Veivakaisini

6, 7. (a) Me vaka ga a cakava vei Jope, na cava ena vakayagataka na Kalou me raica kina eda yalodina tiko se sega? (b) Na cava meda kua kina ni lawaki se veivakaisini?

⁶ Eda sega ni rawa ni tukuna nida yalodina ke da dau lawaki. (Wilika Vosa Vakaibalebale 3:31-33.) A kaya o Jope: “Kevaka ka’u a muria na ka lasu, se kusarawa na yavaqu me’u ia na veivakaisini; Me’u vakatovolei mada e nai vakarau dodonu, me kila kina na Kalou ni’u sa sega ni cala.” (Jope 31:5, 6) Ena lewai keda kece o Jiova ena “[i]vakarau dodonu.” Me vaka ga a cakava vei Jope, ena vakayagataka tale ga na Kalou na nona ivakatagedegede dodonu qai uasivi me raica kina eda yalodina tiko se sega.

⁷ Meda kua ni lawaki se veivakaisini ke da via yalodina tiko ga vua na Kalou. O ira na yalodina era sa “biuta na veidabui kece e dodonu me madualaki,” ra qai sega “ni lawaki.” (2 Kor. 4:1, 2) Ia vakacava ke da lawakitaka e dua na tacida ena ka eda tukuna se cakava, qai kere veivuke na tacida qori vua na Kalou? Eda na sotava ga na ca ke yaco qori! A lagata na daunisame: “Ena noqu rarawa ka’u a tagi vei Jiova, ka sa vakarorogo vei au ko koya. Kemuni Jiova ni vakabula na yaloqu, mai na tebenigusu daulasu, mai na yamena na dauveivakaisini.” (Same 120:1, 2) E vinaka meda nanuma tiko ni kila na lomada na Kalou, e dau “vakatovolea na yalo kei na ivi” me raica kina ke vu dina mai lomada na noda yalodina.—Same 7:8, 9.

Me Vinaka na Noda iValavala

8. Na cava e kilai me baleta na nona ivalavala o Jope vei ira tale na so?

⁸ Meda yalodina tiko ga, e bibi meda vakatotomuria na nona dau caka dodonu o Jope, na nona yalomalumalumu, kei na nona dau veinanumi. A kaya: “Kevaka kau a beca na noqu tamata se na noqu vada, ni rau sa veileti kei au; Ka’u na qai vakaevei ni sa tu cake na Kalou? Ia ni sa cudru ko koya, a cava me’u kaya vua? Ko koya sa buli au e na kete, sa sega beka ni buli koya talega? Sa sega beka ni dua bau ga sa cakavi keirau e na kete?”—Jope 31:13-15.

9. Na cava e kilai me baleta na ivalavala i Jope vei ira na nona tamata cakacaka, meda vakatotomuria vakacava qori?

⁹ Kena irairai ni sega ni vereverea na ituvatuva e vauca na rogoci ni kisi ni veilewai ena gauna i Jope, a dau caka vakamatau, qai rawa ni rogoci mada ga ena mataveilewai na nodra kudru na bobula. E dau cakacaka vakadodonu o Jope vei ira na nona tamata cakacaka, e dau lomani ira tale ga. E bibi meda vakatotomuria na ivalavala i Jope me rawa nida yalodina tiko ga, vakabibi o ira na qase ni ivavakoso.

Dau Lomasoli, Kua ni Kocokoco

10, 11. (a) Eda kila vakacava ni daulomasoli qai dauveivuke o Jope? (b) Na ivakasala vakaivolatabu cava tale eda nanuma nida wilika na Jope 31:16-25?

¹⁰ A dau lomasoli o Jope qai dau veivuke, a sega ni nanumi koya ga se kocokoco. A kaya: “Kevaka ka’u . . . vakaocataka na matana na yada; Se’u kania duadua na qau tiki ni kakana, me sega ni kana kina na luveniyali; . . . Kevaka ka’u sa kunea e dua sa mate ni sa sega na nonai sulu . . . Kevaka ka’u sa dodoka cake vakaca na ligaqu vei ira na luveniyali, ni’u sa kila sa tiko na noqu kaukauwa mai na matamata-ni-koro: Me qai lutu tani na ligaqu mai na civaciva ni tabaqu, ka me ramusu na ligaqu mai na suina.” Ena sega tale ga ni rawa ni yalodina tiko ga o Jope ke tukuna ina koula: “Ka’u sa vakadinati [“nuitaki,” NW] iko!”—Jope 31:16-25.

¹¹ Nida wilika na vosa e tau vakaserekali qori, e lesu tale mai na noda vakasama na vosa a cavuta na tisaipeli o Jemesa: “E va qo na lotu e savasava qai sega ni dukadukali ena mata ni noda Kalou na Tamada: meda qaravi ira na luveniyali kei ira na yada era rarawa tu, meda qarauna tale ga me kua ni tauvi keda na duka ni vuravura.” (Jeme. 1:27) Eda nanuma tale ga kina na ivakasala i Jisu: “Ni yadra tiko, ni qarauni kemuni mai na ivakarau ni yalokocokoco kece, baleta na nona bula e dua ena sega ni vakatau ena levu ni ka e tu vua.” Ni cavuta oti qori, a qai tukuna e dua na vosa vakatautauvata me baleta na turaga vutuniyau kocokoco a “sega ni vutuniyau ena mata ni Kalou” me yacova na nona mate. (Luke 12:15-21) Me rawa nida yalodina tiko ga, e bibi meda kua ni rawai ena kocokoco e vu mai na noda ivalavala ca. E wili me qaravi matakau na kocokoco baleta na ka e kocova e dua e sa sega ni vakaliuci kina o Jiova, sa okati gona me matakau. (Kolo. 3:5) Erau sega ni veiriti na yalodina kei na kocokoco!

Dei Tiko ga ena Sokalou Dina

12, 13. E ivakaraitaki vakacava o Jope ena nona cata na qaravi matakau?

¹² O ira na yalodina era na dei tiko ga ena sokalou savasava. A cakava qori o Jope ni a kaya: “Kevaka ka’u a raica na mata-ni-siga ni sa cila mai, se na vula ni sa weweli lako; Ka sa dauveretaki lo na lomaqu, se sa reguca na ligaqu na gusuqu: Oqo talega nai valavala ca me ra cudruva ko ira na mataveilewai: Ni’u a qai cakitaki koya na Kalou maicake.”—Jope 31:26-28.

¹³ A sega ni sokaloutaka na kamate o Jope. Ke veretaki lo ena ibulibuli vakalomalagi e raica me vaka na vula qai via qarava sara, ke ‘reguca tale ga na ligana’ qai okata qori me dua na ivalavala ni sokalou, e sa na okati me dau qaravi matakau o Jope qai cakitaka na Kalou. (Vkru. 4:15, 19) E bibi meda cata na ivalavala kece ni qaravi matakau meda yalodina tiko ga kina vua na Kalou.—Wilika 1 Joni 5:21.

Kua ni Yaloca se Veivakaisini

14. Eda kila vakacava ni sega ni dau yaloca o Jope?

¹⁴ A sega ni dau yaloca se tawaloloma o Jope. E kila ni sega ni ivakaraitaki ni yalodina na itovo va qori, a kaya kina: “Kevaka ka’u a reki ni sa rusa ko koya sa cati au, se vakalevulevui au ni sa kune ka ca ko koya: Ia ka’u a sega ni laiva na gusuqu me vosa cala, ni’u a vatonaka na yalona.”—Jope 31:29, 30.

15. Na cava meda kua ni marau kina ni sotava na ca e dua e dau cati keda?

¹⁵ Ni dau caka dodonu o Jope, a sega ni dau marau kina ke sotava na ca e dua e cati koya tiko. A qai tukuni e muri ena Vosa Vakaibalebale: “Ni sa bale na nomu meca kakua ni ko reki kina, ia ni sa tidara me kakua ni marau na yalomu; De sa kunea ko Jiova, ka sa ca vua, ka sa vakasuka tani vua na nona cudru.” (Vkai. 24:17, 18) Ni kila na lomada o Jiova, e kila gona ke da dau marau lo ni sotava na ca e dua. E sega sara ga ni taleitaka na ivalavala va qori. (Vkai. 17:5) Na Kalou ena qai sauma na ka e caka vei keda, ni kaya: ‘Me noqu na veicudruvi, kei na veisausaumi.’—Vkru. 32:35.

16. Eda rawa ni vakaraitaka vakacava na noda veikauaitaki ke da sega mada ga ni vutuniyau?

¹⁶ A dau veikauaitaki o Jope. (Jope 31:31, 32) Eda rairai sega ni vutuniyau, ia eda se rawa ga ni “dau veikauaitaki.” (Roma 12:13) Eda rawa ni vakarautaka e dua na kakana lailai da qai sureti ira eso, nida kila e “vinaka me da kana rourou ka veilomani ga, ka ca me da kana pulumokau uro ka veicati tiko.” (Vkai. 15:17) Ke da vakarautaka mada ga e dua na kakana lailai, ia eda veilomani tiko da qai kania vata kei na dua na tacida yalodina, ena marautaki na noda veimaliwai da qai veivakayaloqaqataki.

17. Na cava meda kua ni vunitaka kina na cala bibi?

¹⁷ A rairai veiuqeti dina vakayalo na nona dau veikauaitaki o Jope ni sega ni dauveivakaisini. A sega ni vakataki ira na sega ni doka na Kalou era curu lo ina ivavakoso ena imatai ni senitiuri ra qai “veicavilaki mera rawaka kina.” (Juta 3, 4, 16) A sega ni ubia o Jope na nona cala se ‘vunia e lomaserena’ ni leqataka de ra kila eso tale na ka e cakava ra qai cati koya. Ia a yalorawarawa me dikevi koya na Kalou, ni o Jiova ga ena vakatusa kina na nona cala ke gadrevi. (Jope 31:33-37) Ke da cala bibi, meda kua mada ga ni vunitaka nida leqataka na keda irogorogo. Eda na vakaraitaka vakacava nida saga meda yalodina tiko ga? Meda vakadinata nida cala, da veivutuni, da kerea meda vukei vakayalo, da qai cakava na ka kece eda rawata me vakavinakataki kina na keda ituvaki.—Vkai. 28:13; Jeme. 5:13-15.

Vakatovolei na Yalodina i Jope

18, 19. (a) Eda kila vakacava ni sega ni lawakitaka e dua o Jope? (b) Na cava e sa tu vakarau me sotava ke vakadinadinataki ni cala?

¹⁸ A daudina o Jope qai dau dodonu na nona ivalavala, a rawa gona me tukuna: “Kevaka sa beitaki au na noqu were, se tagi vata kei na kena dreke; Kevaka ka’u sa kania na vuana ni sa sega ni voli, se vakavuna na nodra mate na kenai taukei; Me qai tubu na kau votavotoa mei sosomi ni witi, kei na borosou mei sosomi ni parile.” (Jope 31:38-40) A sega vakadua ni kovea o Jope na nodra qele eso tale, a sega tale ga ni lawakitaki ira na tamata cakacaka. E bibi meda vakatotomuri koya ena noda yalodina tiko ga vei Jiova ena ka lelevu kei na ka lalai.

¹⁹ A talaucaka o Jope na nona ivakarau ni bula vei ratou na nona itokani oka kina na cauravou o Ilaiu. A qai tukuna me dikeva e dua na kena ivolatukutuku ke tiko e dua na ka me beitaki Jope kina. Na ivolatukutuku oya e vaka sara ga e sa ‘sainitaka’ tu o Jope me ivakadinadina ni ka e tukuna se cakava. Ke vakadinadinataki ni cala, sa tu vakarau o Jope me totogitaki. A vakaraitaka sara vua na Kalou na ka me dikevi koya kina qai waraka toka na kena macala. A ‘mai oti e keri na vosa i Jope.’—Jope 31:35, 40.

O Rawa ni Yalodina Tiko Ga

20, 21. (a) A rawa vakacava ni yalodina tiko ga o Jope? (b) Eda rawa vakacava ni lomana na Kalou?

²⁰ A rawa ni yalodina tiko ga o Jope baleta a lomana na Kalou, o Jiova tale ga a lomani koya qai dau vukei koya. A kaya o Jope: “Ko ni sa solia vei au [Jiova] na bula kei na loloma [“yalololoma,” NW] [se loloma e dei tu ga] ia na nomuni dauraici au sa maroroi kina na yaloqu.” (Jope 10:12) A dauloloma o Jope baleta ni kila e sega ni rerevaka na Kalou kaukaua duadua o koya e sega ni dauloloma. (Jope 6:14) Io, o ira na yalodina era lomana na Kalou kei na kainodra.—Maciu 22:37-40.

²¹ E rawa nida lomana na Kalou ke da wilika e veisiga na nona Vosa da qai vakasamataka vakatitobu na ka e tukuna me baleti koya. Nida masu mai vu ni lomada, eda rawa ni vakacaucautaki Jiova da vakavinavinakataka tale ga na nona vinaka vei keda. (Fpai. 4:6, 7) E rawa nida sere vua da qai marautaka na noda dau veimaliwai kei ira na nona tamata. (Iper. 10:23-25) Eda na lomana vakalevu tale ga na Kalou nida vakaitavi ena cakacaka vakaitalatala, meda vunautaka ‘na itukutuku vinaka ni nona veivakabulai.’ (Same 96:1-3) Qori eso na sala eda rawa ni yalodina tiko ga kina, me vaka ga a cakava na daunisame a lagata: “E yaga vei au me’u toro vua na Kalou: Au sa vakararavi oti vua na Turaga ko Jiova.”—Same 73:28.

22, 23. Nida tokona na veiliutaki cecere i Jiova, na itavi cava eda tautauvata kina kei ira na dauveiqaravi yalodina ena veisenitiuri sa oti?

²² E levu qai duidui na itavi e lesia o Jiova vei ira na tamata yalodina ena veisenitiuri sa oti. A ta na waqa o Noa qai “dauvunautaka na ka dodonu.” (2 Pita 2:5) O Josua a liutaki ira na Isireli ina Vanua Yalataki, ia a vakalougatataki ni dau wilika na “[i]vola ni vunau . . . e na siga kei na bogi” qai bulataka sara. (Josua 1:7, 8) O ira na lotu vaKarisito ena imatai ni senitiuri era vakavulici ira eso tale mera tisaipeli ra qai soqoni wasoma mera vulica na iVolatabu.—Maciu 28:19, 20.

²³ Nikua tale ga, eda tokona na veiliutaki cecere i Jiova da qai yalodina tiko ga nida vunautaka na ka dodonu, da vakavulici ira eso tale mera tisaipeli, da bulataka na ivakasala vakaivolatabu, da qai veimaliwai wasoma kei ira na tacida nida tiko ena soqoni, soqo siga dua, siga rua, kei na soqo siga tolu. Nida cakava qori, eda na yaloqaqa, da kaukaua vakayalo, da qai vakayacora vinaka na loma ni Kalou. E sega ni dredre meda cakava na loma ni Kalou da qai yalodina tiko ga, ni rau na tokoni keda na Tamada vakalomalagi kei na Luvena. (Vkru. 30:11-14; 1 Tui 8:57) Era na veitokoni tale ga “na mataveitacini kece,” era yalodina tiko ra qai rokovi Jiova me nodra Turaga Cecere.—1 Pita 2:17.

O na Sauma Vakacava?

• Meda raica vakacava na ivakatagedegede i Jiova me baleta na itovo savasava?

• Na itovo cava i Jope o taleitaka?

• Na cava eda kila me baleta na ivalavala i Jope me vaka e tukuni ena Jope 31:29-37?

• Na cava eda rawa ni yalodina tiko ga kina vua na Kalou?

[iYaloyalo ena tabana e 29]

Eda rawa ni yalodina tiko ga vei Jiova me vakataki Jope!

[iYaloyalo ena tabana e 32]

Eda rawa ni yalodina tiko ga!