Dau Kauaitaki Ira na iTubutubu Le Dua

E LE lailai e rawa nira vosota ke gadrevi vakalevu na nodra gauna kei na nodra igu ena dua na itavi mera qarava, ni vakatauvatani kei ira na itubutubu le dua. E sega ni tukuni rawa na levu ni leqa e dau tarai ira na itubutubu le dua. Era qarava e levu na itavi ni vuvale. Me ikuri ni nodra cakacaka saumi, era na lai volivoli, vakasaqa, sasamaki, veisusu, ra qai cakava eso tale na ka e vauca na qaravi ni vuvale. Ena vinakati mera tuvanaka tale ga na veiqaravi vakavuniwai, ka ni veivakamarautaki, ra qai kauaitaka ni veika era gadreva na gone. Ke rawa, me tiko tale ga eso na gauna me yaga vua.

E rawa gona nira sega ni kauaitaki na vuvale itubutubu le dua baleta e sa tubu totolo tiko ga na kedra iwiliwili, e sa isaluaki tu ni bula nikua. A tokona qori na ka a kaya e dua na tina, “Niu sa mai dua na itubutubu le dua, au sa qai dau vakasamataki ira wasoma.” Na cava o na cakava mo dau kauaitaki ira kina na itubutubu le dua? E dodonu beka mo kauaitaki ira? Meda raica mada e tolu na vuna meda vukei ira kina.

Vuna Meda Kauaitaki Ira kina

E levu na itubutubu le dua era vinakata mera vukei. A tukuna e dua na yada yabaki 41 e rua na luvena, “So na gauna niu veinanuyaka na levu ni itavi e tu meu qarava, au sega wale ni kila na ka meu cakava.” Na bula vakayada, nodra sa biu taudua tu se ituvaki vakaloloma cava tale era sotava era duavata kina e levu na itubutubu le dua kei na ka a tukuna e dua na tina, e kaya, “Keimami dau gadreva vakalevu na veivuke!”

E vakamarautaki keda. O sa bau vukea e dua e colata taudua tiko e dua iyaya bibi? Ke vaka kina, o na rairai vakila na marau ni o a vukea e dua ena sala e yaga. E via va tale ga qori na nodra icolacola na itubutubu le dua, qai so na gauna e tarabi dina mera colata taudua. Ni o dodoliga mo vukei ira ena leqa e tarai ira voli, o na vakadinadinataka na ka e tukuna na Same 41:​1, NW: “Ena marau o koya e cakava na ka vei ira na dravudravua ena veikauaitaki.”

E vakamarautaka na Kalou. E tukuna na Jemesa 1:27: “E va qo na lotu e savasava qai sega ni dukadukali ena mata ni noda Kalou na Tamada: meda qaravi ira na luveniyali kei ira na yada era rarawa tu.” E vauci tale ga kina na nodra qaravi na itubutubu le dua.a E tukuna na Iperiu 13:16: “Moni kua tale ga ni guilecava na caka vinaka kei na nomuni wasea vei ira tale na so na ka e tu vei kemuni, ni taleitaka na Kalou na isoro va qori.”

Noda sa kila rawa toka e tolu na vuna meda kauaitaki ira kina na itubutubu le dua, meda raica sara mada na sala o na vukei ira kina, kei na nomu vakadeitaka ni na yaga na nomu veivuke.

Mo Kila na Veika Era Vinakata

E dau matau ga meda taroga vua e dua na itubutubu le dua, “Na cava o vinakata meu cakava?” Ni o taroga qori, sa macala tu ga ni na sega ni tukuna o koya vei iko na ka e vinakata dina. Me vaka sa tukuni oti, a vakatura na Same 41:1 meda “cakava na ka . . . ena veikauaitaki.” E dua na ivola e vakamacalataka ni vosa vakaIperiu e taurivaki eke e rawa ni vakaibalebaletaka “na vakalewai vinaka ni ka e vakasamataki ena tini caka kina na ka e yaga.”

O koya gona, mo kila na sala vinaka duadua mo veivuke kina, o na vakasamataka sara vakabibi na veika era sotava voli na itubutubu le dua. Saga mo kauaitaka sara ga na ka o raica se o rogoca me baleti ira. Tarogi iko mada, ‘Keu sotava na ituvaki qo, na veivuke cava au na vinakata?’ Dina ni levu na itubutubu le dua era na kaya ni o na qai kila dina na kedra ituvaki ke o dua tale ga na itubutubu le dua. Ia ni o saga ena nomu vinaka kece mo kauaitaka na kedra ituvaki ena vukei iko sara ga mo ‘cakava na ka ena veikauaitaki’ vei ira na itubutubu le dua.

Vakatotomuria na iVakaraitaki Uasivi ni Kalou

Na Kalou o Jiova duadua ga e dau kauaitaki ira na itubutubu le dua ena sala e yaga qai vakilai kina na loloma. E vakavotui ena levu na tikinivolatabu na nona vakaraitaka na Kalou o Jiova na veinanumi kei na veikauitaki vei ira na yada, luveniyali, wili kina o ira na itubutubu le dua. Nida dikeva na nona vukei ira na tu ena ituvaki va qo na Kalou, eda vulica kina na sala yaga meda veivuke kina. Meda raica mada qo e va na tikina bibi.

Tu vakarau ni rogoci ira

A tukuna o Jiova ena Lawa a solia vei ira e Isireli makawa ni “na rogoca vakaidina na nodra tagi” o ira na tu ena ituvaki vakaloloma. (Lako Yani 22:​22, 23) O na vakatotomuria vakacava na ivakaraitaki totoka qo? Era na vakila wasoma na itubutubu le dua na galili, ni sega ni dua e uabula era dau veivosaki. “Ni ratou sa dau lai moce na gone, au sega ni tarova rawa noqu tagi,” e kaya e dua na itubutubu le dua. “So na gauna e dredre meu vosota na noqu galili.” Ke veiganiti, o na tu vakarau beka mo ‘rogoca na nona tagi’ e dua na itubutubu le dua ni via talauacaka na lomana? Ena nomu tu vakarau ni rogoca e dua ena ituvaki veiganiti, o sa vukei koya sara tiko ga me vosota na drakidrakita ni bula e vakila e dua na itubutubu le dua.

Mo veivakayaloqaqataki

A vakavuna o Jiova na volai ni sere, se same era dau lagata na Isireli ena gauna ni nodra sokalou. Vakasamataka mada na nodra vakayaloqaqataki na yada kei na luveniyali e Isireli nira sa lagata na sere e vu vakalou e tukuni kina ni o Jiova e “tamadra,” e “[turagani]lewa” ena vukudra, ena vakacegui ira tale ga. (Same 68:5; 146:9) Eda na tauca na vosa ni veivakayaloqaqataki me rawa ni voqa tiko ga vua na itubutubu le dua ena dua na gauna balavu. Sa sivi qo e 20 na yabaki ia se makare vinaka tu ga vei Ruth, e itubutubu le dua na ka e tukuna vua o tamana: “O sa vakavulici rau vinaka sara ga na luvemu tagane. Mo cakava tiko ga.” E kaya o Ruth: “E tarai au sara ga na vosa oya.” Io “e wainimate vinaka na vosa e tau ena yalovinaka,” dina ga o na sega ni kila na sala e uqeta kina nona bula e dua na itubutubu le dua. (Vosa Vakaibalebale 15:​4, Contemporary English Version) O vakasamataka na vosa veiuqeti cava o na tauca vua e dua na itubutubu le dua?

Veivuke vakayago ke gadrevi

Na Lawa i Jiova vei ira na Isireli makawa e okati kina na ituvatuva ni nodra vukei ena sala veidokai na yada kei na luveniyali ena veika e vauca na kedra kakana. A vukei ira na dravudravua na ituvatuva qo, “me ra kana . . . ka mamau.” (Vakarua 24:​19-21; 26:​12, 13) Eda na vukei ira tale ga ena veika vakayago na vuvale itubutubu le dua ena sala maqosa qai veidokai. O rawa ni kauta ina nodra vale eso na kakana se so na iyaya mai na sitoa? E tiko eso na isulu o kila ena vakayagataka e dua na itubutubu le dua se o ira na luvena? Se o soli ilavo me volia kina eso na ka e yaga ena nona vuvale?

Veimaliwai kei ira

A vakarota o Jiova mera okati tale ga na yada kei na luveniyali ena nodra soqo vakayabaki na Isireli me rawa nira veimaliwai kina. E tukuna tale ga mera “reki.” (Vakarua 16:​10-15) Eda uqeti tale ga na lotu vaKarisito nikua meda “dau veikauaitaki” ena noda veimaliwai ena soqo e veivakayaloqaqataki, e rekitaki tale ga. (1 Pita 4:9) Vakacava mo sureta e dua na vuvale itubutubu le dua mo dou kanavata ena nomu vale? E sega ni tukuni me dua sara na kakana levu. A kaya o Jisu ena gauna a veimaliwai voli kina kei ira na nona itokani ena nodra vale, “e vica ga na ka e gadrevi, se dua ga.”​—Luke 10:42.

E Marautaki na Nomu Dau Kauai

Na itubutubu le dua o Kathleen e susugi iratou e tolu na luvena, e kaya ni sega ni guilecava na ivakasala vuku qo, “kua ni namaka e dua na ka, ia vakavinavinakataka na ka kece.” Me vakataki Kathleen, e levu na itubutubu le dua era kila ni nodra itavi sara ga mera vakavulica na luvedra. Koya gona era na sega ni namaka me dua tale me cakava na nodra itavi, ni qo e nodra ga. Ia e sega ni vakabekataki ni marautaki na noda dau vukei ira. Na nomu dau kauaitaki ira na itubutubu le dua o sa vukea tiko me vinaka na nodra bula, o na marau, qai nuidei ni na “vakalougatataka na ka o cakava” na Kalou o Jiova.​—Vosa Vakaibalebale 19:​17, New Century Version.

[iVakamacala e ra]

[iYaloyalo ena tabana e 24]

Ena gauna cava sara o se sureta kina e dua na vuvale itubutubu le dua mo dou kanavata ena nomu vale? O rawa beka ni cakava sara ga qo?