Kauaitaki Ira na “Luveniyali”
1 O Jiova e “tamadra na luveniyali.” (Same 68:5) E laurai ena ivakaro oqo vei ira na Isireli makawa nona dau kauaitaki ira: “Dou kakua ni vakararawataka e dua na yada, se dua sa sega ni vakatamani. Kevaka dou sa vakararawataka vakalailai, a ra sa tagi vakalailai ga vei au, ka’u na rogoca vakaidina na nodra tagi.” (Lako 22:22, 23) E dusia tale ga na Lawa ni Kalou me dau biu vakatikitiki na veika mera na bula rawa kina vakayago. (Vkru. 24:19-21) Ena ivavakoso vakarisito, era vakadreti na sokalou dina mera “dauraici ira na luveniyali kei ira na yada, ni ra sa rarawa.” (Jeme. 1:27) Eda na vakatotomuri Jiova vakacava ena noda kauaitaki ira era susugi ena vuvale itubutubu ledua se vuvale duilotulotu?
2 Veituberi Vakayalo: E ka ni bolebole toka beka mo vuli iVolatabu e veigauna kei ira na luvemu ke o itubutubu ledua se sega ni vakabauta na kemu isa. Ia na vuli iVolatabu wasoma vakavuvale e caka me ganiti ira na lewe ni nomu vuvale ena yaga ena nodra tubucake na gone mera tamata yalomatua qai nuitaki mai muri. (Vkai. 22:6) Rui bibi tale ga na veivosakitaki ni veika vakayalo kei ira e veisiga. (Vkru. 6:6-9) So na gauna o na yalolailai beka, ia kua ni datuvu kina. Masuti Jiova me solia vei iko na igu kei na yalomatua mo na ‘vakavulica tiko ga na luvemu e na ivunau kei na ivakavuvuli i Jiova.’—Efeso 6:4.
3 Ke o gadreva na veivuke mo rawa ni colata vinaka kina na nomu itavi vakaivolatabu, torovi iratou na qase. De ratou na vakasalataki iko ena so na ka o rawa sara ga ni cakava se ratou vukei iko mo navuca na ituvatuva yaga vakayalo me baleta na nomu vuvale.
4 Nodra Veivuke e So Tale: E dina ni tubu cake o Timoci ena vuvale duilotulotu, e sega ni tarovi koya oya me dua kina na dauveiqaravi gugumatua i Jiova ena imatai ni senitiuri. Sega ni vakatitiqataki ni vukei koya vakalevu na nodrau sasaga o tinana kei buna me rau tuberi koya ena iVolatabu ni se gone. (Caka. 16:1, 2; 2 Tim. 1:5; 3:15) Ia e yaga tale ga vua na nona dau veimaliwai kei na so tale na lotu Vakarisito, me vakataki Paula na yapositolo ni a kaya ni o Timoci e ‘nona gone ni toko qai dau yalodina vua na Turaga.’—1 Kor. 4:17.
5 Nikua tale ga, e yaga dina ke ra dau kauaitaki ira na goneyalewa kei na gonetagane luveniyali ena ivavakoso o ira na matua vakayalo! O kila beka na yacadra? O dau vosa vei ira ena gauna ni soqoni vakarisito kei na so tale na gauna? Sureta e dua mo drau veitomani ena cakacaka vakavunau. De dua, sa rawa ni o sureti koya kei na nona itubutubu ledua, se nona itubutubu e vakabauta me tomani kemudou ena nomudou vuli iVolatabu vakavuvale se ni dou navuca vakavuvale mo dou lakova na ka ni veivakamarautaki e kilikili. Ke ra sa okati iko na gone oqori mo nodra itokani, ena totolo sara nira vakatotomuria mai vu ni lomadra na nomu ivakaraitaki, ra qai ciqoma nomu vosa ni veivakauqeti.—Fpai. 2:4.
6 E kauaitaki ira vakabibi na luveniyali o Jiova, qai vakalougatataka noda sasaga vinaka meda vukei ira mera bulataka na ka dina. E levu era susugi ena vuvale itubutubu ledua se vuvale duilotulotu era a vakayaloqaqataki ena sala oya, ia ena gauna oqo, era sa veiqaravi tiko ena yalodina ena cakacaka vakapainia, era dauveiqaravi vakaitalatala, qase ni ivavakoso, daukaulotu, se ra lewe ni vuvale e Peceli. Meda dau vakasaqara mada ga na sala meda vakarabailevutaka kina na noda loloma vei ira na gone luveniyali, meda vakatotomuri koya kina na Tamada vakalomalagi.—2 Kor. 6:11-13.