Taro na Dauwiliwili

Eda wilika ena Vakatekivu 6:3 [NW]: “Ena sega ni yalovosovoso tiko ga na yaloqu vua na tamata ni sa ka vakayago ga o koya. O koya gona, na nona veisiga sa na yacova ga e 120 na yabaki.” Kena ibalebale beka qori ni inaki i Jiova me yacova ga na tamata na yabaki 120? Qori tale beka ga na balavu ni gauna a vunautaka tiko kina o Noa ni na yaco na waluvu?

Na isau ruarua ni taro qori na sega.

Ni bera na waluvu, era bula tu na tamata me vica vata na senitiuri. Sa yabaki 600 o Noa ena gauna a yaco kina na waluvu, qai bula tale tiko me yacova ni sa yabaki 950. (Vkte. 7:6; 9:​29) Eso tale era qai sucu ni oti na waluvu ra bula sivia na yabaki 120. A mate o Aripakisati ni sa yabaki 438, o Sela ni yabaki 433. (Vkte. 11:​10-​15) Ia donuya na gauna i Mosese, sa rawa ni yacova ga e dua na yabaki 70 se 80. (Same 90:10) E sega gona ni tukuni tiko ena Vakatekivu 6:3 ni sa na kena ivakarau me yacova ga na yabaki 120 e dua.

Ia vakacava a tukuna tiko vei Noa na Kalou ena tikinivolatabu oya ni na veivakasalataki tiko me 120 na yabaki ena veivakarusai ena yaco? Sega. A vosa vei Noa na Kalou ena so tale na gauna. Eda wilika ena tini na tikina e tarava: “E kaya na Kalou vei Noa: ‘Au raica ni sa kena gauna qo me vakarusai kina na tamata kece ga, ni sa sinai o vuravura ena itovo kaukaua.’ ” Ena veiyabaki tarava, a vakacavara kina o Noa na cakacaka vakaitamera ni kena ta na waqa, ena gauna vata oya “A sa kaya vei Noa ko Jiova, mo vodo ki na waqa, ko iko kei na nomu lewe-ni-vale kecega.” (Vkte. 6:​13, NW; 7:1) A vosa vei Noa o Jiova ena so tale na gauna ena veika e vinakata me kila.​—Vkte. 8:​15; 9:​1, 8, 17.

Ia e duidui na ka eda wilika ena Vakatekivu 6:3; e sega ni tukuni Noa tiko, se ni vosa tiko vua na Kalou. E rawa ni tukuni ga ni vakaraitaka tiko kina na Kalou na nona inaki se na ka ena cakava. (Vakatauvatana Vakatekivu 8:​21.) E bibi meda nanuma tiko ni ivolatukutuku ni veika a vakayacori ni se bera sara na gauna i Atama, eda wilika kina eso na malanivosa me vaka: “A sa kaya na Kalou.” (Vkte. 1:​6, 9, 14, 20, 24) E macala e keri ni sega ni vosa tiko o Jiova vua e dua e vuravura, ni a se bera ni buli na tamata ena gauna oya.

E veiganiti kina me tukuni ni Vakatekivu 6:3 e vakaibalebaletaki ena lewa ni Kalou me vakarusa na ituvaki ca e vuravura. A sa lokuca tu o Jiova me caka qori ena loma ni 120 na yabaki, ia a sega ni kila qori o Noa. Ia na cava a lokuca rawa kina e dua na gauna? Na cava a vakabera kina na nona veivakarusai?

E sauma na yapositolo o Pita: “Era a talaidredre ena gauna a wawa voli kina ena vosota na Kalou ena siga i Noa, ni ta tiko na waqa era vakabulai kina ena waluvu e le vica ga, eratou le walu.” (1 Pita 3:​20) Io, a lokuca gona o Jiova na 120 na yabaki, ni se vo tu na ka me caka. Ni oti e 20 na yabaki, rau sa qai vakaluveni o Noa kei watina. (Vkte. 5:​32; 7:6) Eratou tubucake na luvedrau, ratou vakawati sara, mani vakalevutaki na vuvale i Noa ‘me ratou le walu.’ A vinakati tale ga me ratou ta waqa, ia ni vakasamataki na vakaitamera ni waqa kei na vuvale i Noa, ena taura toka e dua na gauna me qai vakaoti na cakacaka qori. Io, ena nona vosovoso na Kalou ena loma ni 120 na yabaki, a vakayacori rawa kina na ka kece a gadrevi me caka, ratou “vakabulai kina ena waluvu” e le walu na tamata yalodina.

E sega ni vakamatatataka na iVolatabu na yabaki a tukuna vei Noa o Jiova ni na yaco kina na waluvu. Eda kila ga ni ratou sa sucu oti na luvena, ratou sa lelevu qai ratou sa dui vakawati, qori kena irairai ni se vo e 40 se 50 na yabaki ni bera na Waluvu. E qai kaya vei Noa o Jiova: “Au raica ni sa kena gauna qo me vakarusai kina na tamata kece ga.” A kaya tale me ta o Noa e dua na waqa vakaitamera, me ratou qai curu vakavuvale i loma. (Vkte. 6:​13, NW, 14-18) Ena vicasagavulu na yabaki ni bera na waluvu, a sega wale ga ni ivakaraitaki ni yalododonu o Noa. Ia a “dauvunautaka na ka dodonu,” a tukuna tale ga vakadodonu ni Kalou ena vakarusai ira era sega ni dokai koya ena gauna oya. A sega ni kila rawa tu o Noa na yabaki ena yaco kina qori, a kila ga ni na yaco dina. O kila tale ga ni a yaco dina oya.​—2 Pita 2:5.