iWali ni Veibeitaki

E TUKUNA na iVolatabu ni na sega ni rawarawa tu ga na bula vakawati. A uqeti vakalou na yapositolo o Paula me vola ni o ira na vakawati ena tarai ira na “leqa e veisiga.” (1 Korinica 7:​28, Today’s English Version) Ia e gadrevi me rau cakava eso na ka na veiwatini me vakamamadataka na leqa e yaco ena nodrau bula vakawati, me toroya cake tale ga na nodrau marau. Wilika mada e ono na vuna era veibeitaki kina na veiwatini, kei na yaga ni kena muri na ivakavuvuli ena iVolatabu.

1

VEIBEITAKI:

“O yau kei watiqu keirau dui cakava ga na ka keirau vinakata.”

IVAKAVUVULI ENA IVOLATABU:

“Vakadeitaka . . . na veika era bibi sara.”​—FILIPAI 1:​10.

E dua na ka me bibi vei iko na nomu vakawati. E dodonu tale ga mo vakaliuca. Mo vakalewa mada de vu tiko ni leqa na nomu ituvatuva. Me kua ni vu ni nomudrau sega ni dau cakacaka vata vakaveiwatini na nomu dau oga ena veika ni bula ni veisiga. Ena so na gauna na nomu cakacaka se so na ituvaki e sega ni caka rawa kina e dua na ka ena vakavuna mo drau dui tutu kina vakaveiwatini ena dua na gauna lekaleka. Ia o rawa ni yalana eso na ka e tiko ga e ligamu na kena lewa​—me vaka na levu ni gauna o vakayagataka ena cakacaka o taleitaka se nomu dau gadivi ira na nomu itokani.

Eso na tagane se yalewa vakawati era na cakava eso tale na cakacaka, se na ka era taleitaka me kua ga nira vakayagataka vei watidra na nodra gauna. Nodra cakava qori e sega nira yawaki watidra, era sa drotaka tiko ga na leqa. Ke yaco tiko qo vei iko se vei watimu, ena gadrevi mo drau kila na vu dina ni leqa drau qai cakava kina e dua na ka. Ke o dau vakayagataka vakalevu nomu gauna vei watimu, drau na veiwekani voleka sara drau qai “lewe dua ga” se dua ga na yago.​—Vakatekivu 2:​24.

Sala era muria kina eso na ivakasala qo: E dua na veiwatini ni Ositerelia o Andrewa kei Tanji, sa tini na yabaki na nodrau vakamau. E kaya o Andrew: “Au kila na levu ni cakacaka kei na lakovi ni levu na soqo ena vakaleqa na vakawati. Keirau mani lalawataka vakaveiwatini na gauna me keirau dau veivosaki kina, me keirau dui talaucaka tale ga na lomai keirau.”

Sa 22 na yabaki nodrau veiwatini voli o Dave kei Jane erau vakaitikotiko mai Merika, ia ena veiyakavi erau dau vakayagataka e veimama na aua me rau veivosakitaka kina na nodrau nanuma kei na ka e yaco ena siga oya. E tukuna o Jane: “Qo e gauna bibi, keirau na sega gona ni vakayagataka ena dua tale na ka.”

2

VEIBEITAKI:

“Sa sega ni yaco na ka au vinakata.”

IVAKAVUVULI ENA IVOLATABU:

”Me kua ni dua e qara na ka e yaga ga vua, me qara tale ga na ka e yaga vei ira tale eso.”​—1 KORINICA 10:24.

Ke dua e kauaitaka vakalevu na ka e yaga ga vua, ena sega ni marautaka na nona bula vakawati, kevaka sara mada ga e lai vakawati tale vakavica. Ena vinaka na bula vakawati ke rau sega ni dui nanumi rau ga na veiwatini. A tukuna o Jisu na vuna: “E marau vakalevu o koya e solia na ka, vakalailai o koya e taura na ka.”​—Cakacaka 20:35.

Sala era muria kina eso na ivakasala qo: O Maria kei Martin erau vakaitikotiko mai Mexico, sa 39 na yabaki nodrau vakawati. Ia a sega ni marau tu ga na nodrau vakawati. Erau vakasamataka tale e dua na leqa a yaco. “Ena katakata ni neirau veiba,” e kaya o Maria, “au cavuta kina vei Martin e dua na vosa veibeci. Sa dua na ka nona cudru. Au saga meu vakamacalataka vua niu sega ni nakita, au tukuna ga ena levu ni noqu rarawa. A sega ni via rogoci au.” E kaya o Martin, “E votu ena noqu vakasama ena neirau veiba ena siga oya me keirau sa kua ni bula vata, meu kua tale ga ni saga me vinaka neirau bula vakawati.”

E vinakata o Martin me rokovi. O Maria e vinakata me kauaitaki se rogoci na nona nanuma. E sega ni yaco na ka erau dui vinakata.

Rau walia vakacava na nodrau leqa? E kaya o Martin, “Au waraka me ruru noqu cudru, keirau qai lewa vata vakaveiwatini me keirau muria na ivakasala vuku ena iVolatabu me keirau veirokovi qai veilomani. Sa oti qo e vica na yabaki, keirau vulica kina ni leqa cava ga e basika ena rawa ni wali ke keirau masuta na veivuke ni Kalou, qai muria na ivakasala ena iVolatabu.”​—Aisea 48:​17, 18; Efeso 4:​31, 32.

3

VEIBEITAKI:

“E sega ni cakava vinaka tiko o watiqu na nona itavi.”

IVAKAVUVULI ENA IVOLATABU:

“Eda na dui saumitaro . . . vua na Kalou.”​—ROMA 14:12.

Ena sega ni cici vinaka na bula vakawati ke dua ga e cakava tiko na nona itavi. Ia ena ca sara ke rau sega ni cakava ruarua.

Ke o dau vakasamataka tiko ga na ka e dodonu me cakava o watimu, o na sega ni marau. Eso era sega ni cakava nodra itavi nira ulubaletaka ni o watidra e sega ni cakava tiko na nodra itavi. Ena yasana adua, ke o saga mo dua na ulunivale se radinivale vinaka ena rawa ni vinaka cake na nomu bula vakawati. (1 Pita 3:​1-3) Koya e bibi sara, o sa vakaraitaka kina vua na Kalou ni o doka na nona ituvatuva me baleta na vakawati, ena vakamarautaki koya tale ga na nomu ivalavala.​—1 Pita 2:​19.

Sala era muria kina eso na ivakasala qo: Erau vakaitikotiko mai Korea o Kim kei watina, sa 38 na yabaki nodrau vakawati. E kaya o Kim: “Ena so na gauna e cudruvi au o watiqu qai galuvi au, ia au sega mada ga ni kila na vuna. Au nanuma ni sa seavu nona lomani au. Ena so na gauna au dau vakasamataka, ‘Na cava e vinakata kina meu kauaitaka na nona nanuma ni sega ni via kauaitaka na noqu nanuma?’”

E rawa sara ga vei Kim me raica tiko ga na yasana ca me baleta na ituvaki oya kei na ka e sega ni cakava tiko o watina. Ia a veibasai sara na ka e cakava. “Au a sega ni cudru tiko ga,” e kaya o Kim, “Au vulica ni vinaka meu vakaliuliu me keirau veiyaloni. Ni sa ruru na neirau cudru, keirau sa qai veivosaki.”​—Jemesa 3:​18.

4

VEIBEITAKI:

“E sega ni dau vakamalumalumu o watiqu.”

IVAKAVUVULI ENA IVOLATABU:

“[Na] ulu ni tagane yadua o Karisito.”​—1 KORINICA 11:3.

Na tagane vakawati e nanuma ni sega ni vakamalumalumu o watina, me dikevi koya mada se sa vakamalumalumu tiko vua na uluna o Jisu Karisito. Ena vakaraitaka nona vakamalumalumu ke muria na ivakaraitaki i Jisu.

“Kemuni na tagane,” e vola na yapositolo o Paula, “ni lomani ira tiko ga na watimuni me vaka ga nona lomana na ivavakoso na Karisito qai solia kina nona bula.” (Efeso 5:​25) A sega ni “vakacolasau” o Jisu vei ira na nona tisaipeli. (Marika 10:​42-​44) E dusimaki ira vakamatata na nona imuri qai vakadodonutaki ira ena gauna e gadrevi kina. Ia a sega ni voravora. A lomani ira qai kila ni vakaiyalayala ga na ka era rawa ni cakava. (Maciu 11:​29, 30; Marika 6:​30, 31; 14:​37, 38) E dau kauaitaka e liu na veika me baleti ira qai muri na veika me baleti koya.​—Maciu 20:​25-​28.

Ena vinaka me taroga o tagane, ‘E vakamua na noqu rai me baleta na ulunivale kei na noqu rai me baleti ira na yalewa na ivakarau ni noqu vanua se na ivakasala kei na ivakaraitaki ena iVolatabu?’ Me kena ivakaraitaki, na cava mada nomu nanuma me baleta e dua na yalewa e sega ni duavata ena ka e tukuna o watina, ia e qai vakaraitaka ena veidokai na nona nanuma? Ena iVolatabu, e kilai o Sera na wati Eparama ena nona dau vakamalumalumu. (1 Pita 3:​1, 6) Ena tukuna na lomana ke gadrevi, me vaka na gauna a sega ni raica rawa kina o Eparama na leqa ena tara na nona vuvale.​—Vakatekivu 16:5; 21:​9-​12.

A sega gona ni vakarerei Sera o Eparama me vagalui koya kina. Se me voravora. Ena vaka kina na tagane e muria na ivakasala ena iVolatabu ena sega ni vakarerei watina, se usuraka me muria na ka kece e tukuna. Ia ena rokovi koya o watina ni cakava ena yalololoma na nona itavi vakaulunivale.

Sala era muria kina eso na ivakasala qo: O James, sa walu na yabaki na nona vakawati e vakaitikotiko mai Igiladi, e kaya: “Niu se bera ni vakatulewataka e dua na ka bibi, au vulica meu na tukuna mada vei watiqu. Au saga meu kua ni nanumi au ga. Ia au tovolea meu vakaliuca na veika e gadreva, sega ni veika ga me baleti au.”

O George e vakaitikotiko mai Merika sa 59 na yabaki nona vakawati. E tukuna: “Au sega ni dau beci watiqu, ia au raici koya me dua na itokani yalomatua qai maqosa.”​—Vosa Vakaibalebale 31:10.

5

VEIBEITAKI:

“Sega ni liutaka na vuvale o watiqu tagane.”

IVAKAVUVULI ENA IVOLATABU:

“O ira na yalewa vuku era sa dui tara cake na nona vale: Ia ko koya na lialia sa basuka sobu ga e na ligana.” ​—VOSA VAKAIBALEBALE 14:1.

Ke lomalomarua o watimu me vakatulewa se me liutaka na vuvale e tolu na ka o rawa ni cakava. (1) Rairai o na weroka na ka e sega ni cakava se (2) suguta nona itavi vakaulunivale se (3) vakacaucautaki koya ena nona sasaga. Ke o cakava na kena imatai kei na kena ikarua, o na basuka sobu ena ligamu na nomu vale. Ia ni o cakava na kena ikatolu o sa tara cake na nomu bula vakawati me dei.

E levu na tagane era taleitaka cake mera rokovi mai na nodra lomani. Ke o cakava gona na ka me kila kina o watimu ni rokovi​—e yaga na nona saga me liutaka na vuvale qai taleitaki​—rairai ena cakava tiko ga vakavinaka na nona itavi. E macala ni so na gauna o na sega ni duavata kei na ka e tukuna o watimu. Ena vinaka gona mo drau veivosakitaka. (Vosa Vakaibalebale 18:13) Ia na vosa o tauca kei na kena irogorogo ena tara cake se basuraka na nomudrau bula vakawati. (Vosa Vakaibalebale 21:9; 27:15) Ke o tukuna na lomamu ena veidokai, ena yaco na ka o vinakata​—oya me cakava o watimu na nona itavi.

Sala era muria kina eso na ivakasala qo: E kaya o Michele e vakaitikotiko mai Merika sa 30 na yabaki nona vakawati: “A susugi au kei taciqu o tinaqu qai sega na veitokoni nei tamaqu. O tinaqu e dua na marama kaukaua qai sega ni vakararavi vua e dua tale, au mani muria tale ga na nona ivakarau. Au dau sasaga vagumatua meu vakamalumalumu. Me kena ivakaraitaki, au vulica ni bera niu vakatulewataka e dua na ka, meu veivosakitaka mada kei watiqu.”

O Rachel sa 21 na yabaki nodrau vakamau kei Mark e vakaitikotiko mai Ositerelia, e vakamuai koya vakalevu tale ga na nona isususu. E kaya, “O tinaqu e sega ni dau vakamalumalumu vei tamaqu, sa ivakarau dei na veiba qai sega na veidokai. Niu se qai vakawati ga, au sa vakatotomuria na ivalavala nei tinaqu. Ia ena veiyabaki sa sivi au vulica kina na bibi ni kena bulataki na ivakasala ena iVolatabu me baleta na veirokovi. Ena gauna qo e vakilai tiko ga na marau ena neirau bula vakawati kei Mark.”

6

VEIBEITAKI:

“Au sega ni vosota rawa na itovo votivoti nei watiqu.”

IVAKAVUVULI ENA IVOLATABU:

“Moni dau yalorawarawa, ni dau veivosoti tale ga vakarawarawa ke dua e cudruvaka e dua na ka vua e dua tale.”​—KOLOSA 3:​13.

Ni drau se veivosaki tiko, rairai o dau kauaitaka ga na itovo vinaka nei watimu o sega kina ni raica na nona cala. Mo cakava tale ga oya ena gauna qo. E dina ni na cakava o watimu e dua na ka ena vakavuna mo cudruvi koya kina. Ia mo taroga mada qo, ‘Na itovo cava nei watiqu au na kauaitaka vakalevu​—na nona itovo vinaka se itovo ca?’

E dua na vosa vakatautauvata totoka a vakayagataka o Jisu ena kena gadrevi meda raibaleta na nodra cala na so. A taroga: “Na cava o lai kauaitaka kina na co lailai ena matai tacimu, ia o sega ni kauaitaka na tolonikau levu e matamu?” (Maciu 7:3) E somidi dina na co ni vakatauvatani kei na tolonikau levu e rawa ni vakayagataki me isa ni dokanivale. Na cava e vakaibalebaletaka? “Saga mada e liu mo kauta tani na tolonikau levu mai matamu, o na qai raica vinaka na co lailai mo na kauta laivi mai na matai tacimu.”​—Maciu 7:​5.

A kauta cake mai na vosa vakatautauvata qori o Jisu ni cavuta e dua na vosa ni veivakaroti bibi. E tukuna: “Ni kua ni dau vakalelewa de oni lewai; na lewa oni tauca oni na lewai kina.” (Maciu 7:​1, 2) Ke o vinakata na Kalou me raibaleta na nomu cala​—na tolonikau levu e matamu​—e dodonu tale ga mo raibaleta na cala i watimu.​—Maciu 6:​14, 15.

Sala era muria kina eso na ivakasala qo: Sa oti qo e ciwa na yabaki na nodrau vakamau o Jenny kei Simon erau vakaitikotiko mai Igiladi, e kaya o Jenny: “E dua na ka e dau votivoti dina vei au na nona sega ni dau lalawa o watiqu, qai dau cakava ga na ka ni sa voleka na kena gauna. E lasa dina oya, ni gauna keirau se veivosaki tiko kina au dau taleitaka nona dau kauaitaka na gauna. Ia au kila niu dau cala, au via lewa tale ga na ka me cakava o watiqu. Keirau sa vulica tiko kei Simon me keirau raibaleta na neirau dui cala lalai.”

O Curt na wati Michele, sa cavuti oti mai, e kaya: “Ke o dau kauaitaka na ivalavala votivoti nei watimu, sa na qai vaka ga me dua na leqa levu sara. Au mani kauaitaka ga na itovo vinaka au a taleitaki Michele kina ena imatai ni gauna.”

Na iWali ni Leqa

Na vica na ivakaraitaki oya, e vakadinadinataka ni na vakilai na dredre ni bula ena vakawati, ia ena rawa ga ni wali. Ena wali vakacava? Mo saga mo lomana na Kalou qai muria na nona ivakasala ena iVolatabu.

O Alex kei Itohan, erau vakaitikotiko mai Nigeria, sa sivia e 20 na yabaki nodrau vakawati, erau vulica na kena iwali. E tukuna o Alex: “Au vakadinadinataka ke dua na veiwatini erau bulataka na ivakavuvuli ena iVolatabu ena rawa ni wali na leqa cava ga e basika.” E kaya o wati Alex: “Keirau vulica ni bibi na neirau dau masu vata kei na neirau muria na ivakasala ena iVolatabu me keirau veilomani qai veivosoti. Ena gauna qo sa lailai sara na neirau leqa mai na gauna keirau se qai vakamau kina.”

O via kila eso tale na sala ena yaga kina ena nomu vuvale na ivakasala ena iVolatabu? Ke vaka kina, kerea e dua na iVakadinadina i Jiova mo drau veivosakitaka vata na wase 14 ni ivola, Na Cava Sara Mada e Kaya na iVolatabu?b

[iVakamacala e ra]

[iYaloyalo ena tabana e 4]

E dau tiko beka na neirau gauna ga vakaveiwatini?

[iYaloyalo ena tabana e 5]

Au dau saga meu solia na ka mai na noqu taura na ka?

[iYaloyalo ena tabana e 6]

Au dau vakaliuliu meu veivakameautaki?

[iYaloyalo ena tabana e 7]

Au dau rogoca mada na nanuma nei watiqu ni bera niu vakatulewa?

[iYaloyalo ena tabana e 9]

Au dau kauaitaka ga na itovo vinaka nei watiqu?