O Vakavinavinakataka Dina Qai Mareqeta na Veika o Vakalougatataki Kina?

NIRA se qai vakabulai vakacakamana na luvei Isireli ena nodra vakabobulataki tu mai Ijipita, dua na ka na nodra marau nira kila era sa rawa ni qaravi Jiova vinaka. (Lako 14:29–15:1, 20, 21) Ia a veisau na nodra rai ni toso na gauna. Era sa kudruvaka na veika era sotava. Na cava na vuna? Era sa kauaitaka ga vakalevu na leqa era sotava ena vanualiwa, era sa guilecava na veika e cakava o Jiova ena vukudra. Era tukuna vei Mosese: “A cava drau sa kauti keimami cake kina mai Ijipita, me mate e na vanua liwa? ni sa sega na kakana, ka sa sega na wai; a sa vakavure lua e na loma i keimami na kakana vakasisila oqo [mana].”—Tiko 21:5.

Ni oti e vica na senitiuri, a lagata o Tui Tevita e Isireli makawa: “Ia koi au, ka’u sa vakararavi ga e na nomuni loloma; Ena reki na yaloqu ni kemuni sa ia na veivakabulai. Au na sere vei Jiova, ni sa caka vinaka vei au ko koya.” (Same 13:5, 6) A sega ni guilecava o Tevita na nona dau yalololoma vua o Jiova. E dau tiko ga na gauna me vakananuma kina. (Same 103:2) E dau vakalougatataki keda tale ga o Jiova, e ka vakayalomatua gona meda kua ni vakawalena na veika e cakava ena vukuda. Meda veivosakitaka mada eso na ka e vakalougatataki keda kina na Kalou nikua.

‘Veivolekati kei Jiova’

A lagata na daunisame: “A vosa vuni nei Jiova sa tu [“voleka sara,” NW] vei ira era rerevaki koya.” (Same 25:14) E ka dokai meda veiwekani voleka kei Jiova na tamata ivalavala ca! Ia vakacava ke da sa sega ni masu vakalevu nida sa rui ogaoga ena ka ni bula e veisiga? Vakasamataka na ka ena yaco ena noda veiwekani vinaka kei Jiova. E noda itokani o Jiova, e vinakata meda nuitaki koya da qai talaucaka vua na lomada ena masu, meda tukuna vua na ka eda leqataka, gadreva, kei na ka eda nuiqawaqawataka. (Vkai. 3:5, 6; Fpai. 4:6, 7) E bibi meda dau dikeva na ivakarau ni noda masu.

Ni vakasamataka na nona ivakarau ni masu o Paula e dua na itabagone iVakadinadina, a liaca ni gadrevi me vakavinakataka eso na ka.a A tukuna: “Sa matau me dua tu ga na noqu qaqanimasu vei Jiova.” Ni vakekeli o Paula ena Watch Tower Publications Index, a raica kina e rauta ni 180 na masu e volatukutukutaki ena iVolatabu. Era talaucaka ena masu qori na ka e tu e lomadra na dauveiqaravi i Jiova ena gauna makawa. A tukuna o Paula: “Niu vakananuma vakatitobu na nodra ivakaraitaki, au vulica kina meu cavuta sara ga na ka au via masuta. E uqeti au qori meu talaucaka na lomaqu vei Jiova. Qo au sa marautaka na noqu toro voleka vua ena masu.”

‘Kakana ena Kena Gauna Donu’

E dua tale na ka e vakalougatataki keda kina o Jiova, oya na ka dina eda vulica ena iVolatabu. Nida vakayagataka na levu ni kakana vakayalo e vakarautaki ena vukuda, eda na ‘sere ni marau na lomada.’ (Aisea 65:13, 14) Ia meda qarauna na veika e rawa ni veivakaleqai, e rawa ni vakavuna me seavu na noda taleitaka na ka dina. Kena ivakaraitaki, na noda kauai ena nodra itukutuku veivakacalai na vukitani ena rawa ni vakabuawataka na noda rai, ena vakamatabokotaki keda tale ga meda kua ni raica na talei ni ‘kakana vakayalo ena kena gauna donu’ e vakarautaka o Jiova ni vakayagataka “na dauveiqaravi e yalodina e vuku.”—Maciu 24:45-47.

E rarawataki ni a rawai ena nodra rai na vukitani o André sa vakayabaki na nona qaravi Jiova voli mai. A nanuma ni na sega ni vakaleqai koya na nona raica ga vakalekaleka e dua na nodra Web site na vukitani. E nanuma lesu: “Au a via raica ga na ka era tukuna tiko na vukitani ni ka dina. Na levu ga ni noqu raica na ka era tukuna, na levu tale ga ni noqu qai vakadeitaka meu biuta na isoqosoqo i Jiova. Ia niu vakekeli ena ka era beitaki ira tiko kina na iVakadinadina i Jiova na vukitani, au sa qai raica rawa na nodra lawaki qaseqase na qasenivuli lasu. Na ka era vakatoka me ‘ivakadinadina matata’ e dau laurai nira vakaikuritaka ga. Au mani vakawilika tale na noda ivola vakaivolatabu, au gole tale ga ena soqoni. Au qai liaca ni levu sara na ka au sa calata.” E marautaki ni a qai lesu ena ivavakoso o André.

“Mataveitacini Kece”

Na noda veilomani kei na noda duavata vakamataveitacini e veivakalougatataki tale ga i Jiova. (Same 133:1) Sa rauta me vola na yapositolo o Pita: “Lomani ira na mataveitacini kece.” (1 Pita 2:17) Nida mataveitacini kece, eda marautaka kina na nodra veitokoni o ira era vaka na tamada vakayalo, tinada, tacida, kei na ganeda eda vakabauta vata.—Mari. 10:29, 30.

Ia eso na ituvaki e rawa ni vakaleqa na noda veimaliwai vakamataveitacini. Kena ivakaraitaki, e rawarawa sara ni vakacudrui keda na nona malumalumu e dua da qai vakalewai koya. Ke yaco qori, e vinaka meda nanuma tiko ni lomani keda o Jiova, ia e kila tu nida ivalavala ca. Meda nanuma tale ga, “ke da kaya: ‘E sega noda ivalavala ca,’ eda sa vakacalai keda tiko ga, e sega vei keda na dina.” (1 Joni 1:8) E sega beka ni dodonu meda saga ‘meda dau yalorawarawa, da veivosoti tale ga vakarawarawa’?—Kolo. 3:13.

Ni sotava na leqa o Ann e dua na itabagone, sa qai kila na talei ni veimaliwai vaKarisito. Me vaka ga na gone cidroi ena vosa vakatautauvata i Jisu, a biuta na ivavakoso vaKarisito o Ann. Ia a kilai yalona qai suka tale ina ivavakoso. (Luke 15:11-24) Na cava a vulica o Ann ena ka e sotava? E kaya: “Niu sa lesu tale qo ina isoqosoqo i Jiova, au kila ni tu na nodra malumalumu na mataveitacini, ia era sa talei ga vei au. A dau totolo na noqu vakalewai ira e liu. Ia qo au sa vakadeitaka me kua ni dua na ka e tarova na noqu vakalougatataki ena noqu veimaliwai kei ira na taciqu vakayalo. E sega ni dua na ka vinaka e tu e vuravura meda biuta kina na noda parataisi vakayalo.”

Vakavinavinakataka Tiko ga na Veika o Vakalougatataki Kina

E sega ni tukuni rawa na talei ni noda nuitaka na Matanitu ni Kalou me iwali ni noda leqa. Dua na ka na noda marau ena imatai ni gauna eda kila kina na inuinui qori! Eda vakataki koya sara ga na dauveivoli ena vosa vakatautauvata i Jisu, a “volitaka kece na ka e tu vua” me volia kina na “mataniciva talei.” (Maciu 13:45, 46) A sega ni tukuna o Jisu ni a seavu na nona vakamareqeta na mataniciva oya na dauveivoli. Me kua tale ga ni seavu na noda vakamareqeta na noda inuinui totoka.—1 Ces. 5:8; Iper. 6:19.

Vakasamataka mada na ivakaraitaki i Jean, sa sivia na 60 na yabaki na nona qaravi Jiova voli mai. E kaya: “E yaga ena noqu vakasamataka tiko ga na Matanitu ni Kalou na noqu dau tukuna vei ira tale na so. E tarai au dina na noqu raica e matadra na nodra marau nira sa qai kila na itukutuku ni Matanitu ni Kalou. Niu raica na veisau e cakava e dua na vuli iVolatabu ena vuku ni ka dina me baleta na Matanitu ni Kalou, au dau vakasamataka kina, ‘E rui talei na ka dina meu lai tukuna vei ira tale na so!’ ”

E tiko na vuna vinaka meda vakavinavinakataka kina na levu ni ka eda vakalougatataki kina vakayalo. Eda sotava na leqa me vaka na veitusaqati, tauvimate, bula vaqase, lomabibi, lolosi, kei na dredre ni bula vakailavo, ia eda kila ni lekaleka ga qori. E levu tale na ka eda na qai vakalougatataki kina ni sa veiliutaki e vuravura na Matanitu ni Kalou. Na leqa cava ga eda sotava tiko ena gauna qo sa na oti ena vuravura vou.—Vkta. 21:4.

Ena gauna mada ga qo, meda vakavinavinakataka tiko ga na veika vakayalo eda vakalougatataki kina, me vaka ga a cakava na daunisame a lagata: “I Jiova na noqu Kalou, sa ka levu na nomuni cakacaka e veivakurabuitaki ko ni sa cakava, kei na nomuni nanuma vei keimami: E dredre me wiliki vakadodonu vei kemuni: Kevaka ka’u via vakatusa ka tukuna, e dredre ni wili.”—Same 40:5.

[iVakamacala e ra]

[iYaloyalo ena tabana e 18]

Eda vakalougatataki ena veitokoni vakayalo nida sotava na leqa