Taro Na Dauwiliwili . . .

Na Kalou a bulia na Tevoro?

▪ E tukuna na iVolatabu ni “bulia na ka kece” na Kalou, era lai nanuma kina eso ni o koya tale ga a bulia na Tevoro. (Efeso 3:9; Vakatakila 4:11) Ia na ka e tukuna na iVolatabu e matata vinaka, na Kalou a sega ni bulia na Tevoro.

A bulia o Jiova na kabula vakayalo ia a qai veisautaki koya me Tevoro. Na nona mai bula na kabula vakayalo oya e meca nabadua ni Kalou e sega ni salavata kei na ka e vakatakila na iVolatabu me baleti Jiova na Dauveibuli. E kaya: “Sa sega ni cala na nona cakacaka: Ni sa dodonu na nonai valavala kecega: A Kalou vosa dina, ka sega ni ca, sa yalododonu ka daucaka dodonu ko koya.” (Vakarua 32:3-5) Na vosa qo eda kila kina ni o Setani a dua na luve ni Kalou uasivi qai caka dodonu ena gauna se qai bula kina. E kaya o Jisu ena Joni 8:44, ni a “sega ni dei ena dina” na Tevoro, e dusia qori ni se qai tekivu bula o Setani a dauvosa dina qai tawacala.

Ia me vakataki ira ga na vo ni kabula vakayalo a bulia o Jiova, a solia vei ira na galala mera vakatulewataka na ka vinaka kei na ka ca wili kina na agilosi a veisautaki koya me o Setani. Nona vakatulewataka me saqata na Kalou qai vecei rau na imatai ni veiwatini me rau tomani koya, e sa veisautaki koya kina me Setani, kena ibalebale “Dauveivorati.”—Vakatekivu 3:1-5.

Na ka e cakava qo e vakatokai tale ga kina me Tevoro, e kena ibalebale “Dauvosavakacaca.” O Setani a vakayagataka na gata me nona waqawaqa me vosa vaqaseqase vei Ivi ena nona lasutaki koya me talaidredre ina lawa matata a vakarota na Dauveibuli. Qori na vuna a vakatokai Setani kina o Jisu me “tama ni lasu kece.”—Joni 8:44.

A yaco vakacava me vakacalai e dua na kabula vakayalo e uasivi, sega nona malumalumu qai sega ni bula ena ituvaki e levu kina na veivakamuai cala? A vinakata me caka vua na sokalou e dodonu me caka duadua ga vua na Kalou. E nanuma tale ga ni rawa vua me vakamua na kawatamata mera vakarorogo ena nona lewa, sega ena lewa i Jiova. Na nona vakasamataka tiko ga ni rawa vua me veiliutaki qai sega ni kauta laivi, e lai tini cakava sara kina na ka e vakasamataka tiko. E vakamacalataki qo ena ivola i Jemesa: “E vakatovolei na tamata yadua ni bacani koya qai siwati koya na nona gagadre ca. Ni sa matua na nona gagadre ca, sa qai vakasucuma na nona ivalavala ca.”—Jemesa 1:14, 15; 1 Timoci 3:6.

Me kena ivakaraitaki: Kaya mada e dua na daunifika e raica rawa na sala me lawakitaka kina na itukutuku ni ilavo ni kabani me butakoca. Ni vakasamataka tiko ga qai sega ni kauta laivi, ena kadre e lomana sa na rawarawa sara me cakava. Ia ke cakava qori sa na veisautaki koya me daubutako. Ke cakitaka na ka e cakava, sa yaco tale ga o koya me daulasulasu. Ena vakasama vata qori, na bucini ni gagadre cala kei na kena vakayacori, na agilosi a bulia na Kalou a vakayagataka nona galala ni vakatulewa me lawaki qai saqata na Tamana vakalomalagi, e veisautaki koya kina me o Setani na Tevoro.

Sa dua dina na ka vinaka ni na vakarusai o Setani na Tevoro ena gauna lokuci ni Kalou. (Roma 16:20) Ena gauna qo era vakasalataki na dau sokaloutaki Jiova ena ilawaki i Setani mera kua ni coriti ena nona ivadi. (2 Korinica 2:11; Efeso 6:11) O koya gona, ni saga vagumatua “moni vorata na Tevoro, ena qai dro tani vei kemuni.”—Jemesa 4:7.

[Tikina bibi ena tabana e 21]

Ni vakatulewataka e dua na kabula vakayalo uasivi me vorata na Kalou, a veisautaki koya kina me o Setani