O Vakabauta Beka ni Tiko Dina na Tevoro?

NA IVOLATABU e vakamacalataka ni Tevoro e dua na kabula. Ia, e tawarairai ena vakasama vata ga e tawarairai kina na Kalou. Oya ni “Yalo na Kalou,” e kaya na iVolatabu. (Joni 4:24) Na Tevoro gona e dua tale ga na kabula vakayalo qai tiko na nona itekitekivu. Ena sala oya, erau duidui kina kei na Dauveibuli ni sega na nona itekitekivu.

Ni bera ni bulia na tamata na Kalou o Jiova, a bulia taumada e lewe vuqa na kabula vakayalo. (Jope 38:4, 7) Na iVolatabu e vakatokai ira mera agilosi. (Iperiu 1:13, 14) A buli ira kece na Kalou mera uasivi—⁠a sega ni bulia e dua vei ira me tevoro se me kune vua na itovo ca. Ke sa vaka oqori, a yaco vakacava e dua vei ira me Tevoro? Na vosa “tevoro” e kena ibalebale “daukakase,” oya e dua e dau vakatetea na itukutuku lasu me baleti ira na tani. Na vosa “Setani” e kena ibalebale “Dauveivorati,” se dauveitusaqati. Na ka a yaco e via tautauvata kei na nona veisau e dua na tamata vinaka me daubutako. Yaco oya ena nona laiva me kadre e lomana na gagadre ca mani uqeti koya me lai butako. E vaka tale ga oqori na ka a yaco vua e dua na luve vakayalo ni Kalou a buli me uasivi. A laiva me kadre e lomana na gagadre ca, a yaco na gauna me vakavotukana, mani vukici koya kina me Setani na Tevoro. Na iVolatabu e vakamacalataka ni rawa nida vakavuna ga na noda vakacaraki keda, e kaya: “Sa dau veretaki ga na tamata yadua ni sa vakauti koya vakatani ka bacani koya na nona gagadre ca. Ia ni sa kunekune na gagadre ca sa vakasucuma na i valavala ca; ia na i valavala ca, ni sa yacova na kena i yacoyaco, sa vakasucuma na mate.”​—Jemesa 1:14, 15, VV.

Oqori sara ga na ka a yaco vei Setani na Tevoro. Ni sa buli rau na imatai ni veiwatini, o Atama kei Ivi, na Kalou o Jiova, a kauai sara kina na agilosi oqo ni sa lomana tiko me vorata na Kalou. E kila vinaka tale tu ga ni a vakarota o Jiova vei Atama kei Ivi, me rau vakasinaita na vuravura ena tamata yalododonu era na qarava na Dauveibuli. (Vakatekivu 1:28) E raica rawa na agilosi oya ni rawa ni na dokai qai vakacerecerei tale ga. A kocova gona na ka e dodonu me caka ga vua na Dauveibuli—⁠oya mera sokaloutaki koya na tamata. Ia, na luve vakayalo ni Kalou oya a sega cavuraka tani na gagadre ca oqori. A bucina voli ga e lomana mani uqeti koya me lasu qai lai tini talaidredre sara kina. Dikeva na ka a qai cakava.

Na agilosi talaidredre oqo a taurivaka na gata lolovira me nona waqawaqa ena gauna e vosa kina vei Ivi, na imatai ni yalewa. “Oi, sa kaya bagi na Kalou mo drau kakua ni kania na vua ni kau kecega e na were?” a taroga vei Ivi na gata. Ni cavuta o Ivi na ivakaro ni Kalou kei na itotogi erau na sotava ke rau beca, sa qai kaya na gata: “Drau na sega dina ni mate: ni sa kila na Kalou e na siga drau na kana kina [mai na kau e bula tu ena lomadonu ni were] ena qai yadra dina na matamudrau; ia drau na vaka na Kalou, ni drau na kila na ka vinaka kei na ka ca.” (Vakatekivu 3:1-5) Na gata e beitaka na Kalou ni lasutaki Atama kei Ivi. Kevaka e kania o Ivi na kau vakatabui oya, ena vaka na Kalou qai rawa ni vakatulewataka ga na ka vinaka kei na ka ca. Oqo sara ga na imatai ni lasu. Yaco kina na agilosi oya me daukakase qai vorata na Kalou. Na iVolatabu e vakatoka na meca ni Kalou oqo me “gata makawa, a yacana na Tevoro, kei Setani.”—⁠Vakatakila 12:9.

“Yadra Tiko!”

Me vaka ga a lalawataka na Tevoro, a cakayaco dina na nona lasutaki Ivi. E kaya na iVolatabu: “Ia ni sa kunea na yalewa sa yaga na kau me kakana, a sa ka e via raica na matada, ka sa kau me da gadreva me da vuku kina, sa qai tauca na vuana, ka kania; ka solia talega vua na watina erau tiko kaya, a sa kania talega ko koya.” (Vakatekivu 3:⁠6) Mani talaidredre o Ivi vua na Kalou ni a vakabauti Setani. A rawati Atama tale ga o Ivi me beca na lawa ni Kalou. A rawai rau gona na imatai ni veiwatini na Tevoro me rau muria na sala ni talaidredre vua na Kalou. Tekivu mai na gauna oya, e dina ni tawarairai o Setani, ia e lewa tu na veika e vauca na bula ni tamata. Na cava e nona inaki? E vinakata mera sokaloutaki koya na tamata, mera kua ni sokaloutaka na Kalou dina. (Maciu 4:8, 9) Sa rauta me vakarota na iVolatabu: “Dou yalomatua, dou vakatawa [“yadra tiko!,” VV]: sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.”​—1 Pita 5:8.

E vakamacalataka vakamatata na iVolatabu ni kabula vakayalo na Tevoro—⁠e dua na agilosi a vukici koya me ca qai rerevaki! Me rawa nida yadra tiko, ena gadrevi taumada meda vakabauta ni bula dina tiko. Ia e so tale na ka e okati e ke, me rawa nida yalomatua da qai yadra tiko ga. E bibi tale ga meda kua ni vakalecalecava na ‘ilawaki’ i Setani kei na iwalewale e dau taurivaka me rawai ira kina na tamata. (2 Korinica 2:11) Na cava soti na nona ilawaki? Eda na vorata rawa vakacava?

Qaseqase na Tevoro ni Vakayagataka na Gagadre ni Tamata

Na Tevoro e sa tekivu dikeva voli mai na tamata ena gauna sara ga eda se qai buli kina. E kila vinaka tu gona na keda ibulicaki—⁠na veika eda vinakata, taleitaka, kei na veika eda gadreva. O Setani e kila vinaka tale tu ga ni a buli na tamata me gadreva na veika vakayalo, sa qai vakayagataka vaqaseqase na Tevoro na gagadre oqori me veivakacalai kina. Ena sala cava? Nona bololaki keda na kawatamata ena ivakavuvuli lasu vakalotu. (Joni 8:44) Levu na ivakavuvuli vakalotu me baleta na Kalou e veisaqasaqa qai veivakacalai. Na inaki i cei e tokoni kina? E sega ni rawa ni dina kece na ivakavuvuli e veisaqasaqa. O koya gona, sega li ni vakaraitaka oqo ni levu na ivakavuvuli vakalotu e vakarautaka sara ga o Setani qai taurivaka tale ga me vakacalai ira kina na tamata? Sa rauta me vakatokai koya na iVolatabu me “kalou ni vuravura oqo,” e vakamatabokotaka na lomadra na tamata.⁠—2 Korinica 4:4.

Na nona ivakavuvuli dina na Kalou e rawa ni taqomaki keda mai na veivakacalai ni ivakavuvuli vakalotu. Na iVolatabu e vakatauvatana na ka dina ena Vosa ni Kalou ina ivau e dau vauca na sotia ni gauna makawa me taqomaka kina na tolona. (Efeso 6:14) Ke o sa kila na ka dina ena iVolatabu qai o saga vagumatua mo bulataka sara me vaka ga ni o vauca e tolomu, na Vosa ni Kalou ena vukei iko mo kua ni vakacalai ena ivakavuvuli lasu vakalotu.

Na nona kauaitaka na tamata na veika vakayalo e vakavuna me via lai vakilakila kina na ivurevure ni kaukaua tani. Nodra cakava oqori na tamata, era sa vakarawarawataka sara tu ga na nodra coriti ena dua tale na ilawaki qaseqase i Setani. Me vakaceguya na nodra via lai vakilakila na tamata na veika e duatani qai veivakurabuitaki, e sa qai vakayagataka gona o Setani na veika vakatevoro me lewai ira tu kina e levu. Me vaka ga nona vakayagataka na baca na dauvakasasa manumanu me corita kina na manumanu e vakasasa, e vakayagataka tale ga o Setani na baca me vaka na daurairai, dau rai mata ni lomalagi, dau vakamoce vakasama, vakadraunikau, dau raica na qeteqete ni liga, kei na cakaiba me dreta na vakasama qai coriti ira tale ga na tamata e veiyasa i vuravura.—⁠Vunau ni Soro 19:31; Same 119:110.

Na cava o na cakava mo kua kina ni coriti ena veika vakatevoro? E kaya na Vakarua 18:10-12: “Me kakua ni kune vei kemuni e dua me vakacabora na luvenatagane se na luvenayalewa e loma ni bukawaqa, se dua na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau, se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate. Ni ra sa tamata vakasisila vei Jiova ko ira kecega era sa kitaka na veika oqo: e na vuku talega ni veika vakasisila oqo sa vakasevi ira tani e matamuni ko Jiova na nomuni Kalou.”

E matata vinaka na ivakaro vakaivolatabu: Mo kua ni vakaitavi ena veika vakatevoro. Vakacava ke o vakaitavi tiko ena so na ka e okati me vakatevoro, ia o sa vinakata mo muduka? O rawa ni muria na nodra ivakaraitaki na lotu Vakarisito taumada ena koro o Efeso. Nira sa vakabauta “na vosa ni Turaga [“o Jiova,” NW],” e kaya na iVolatabu, “a sa lewe vuqa . . . vei ira era daukitaka eliu nai lawaki vakatevoro eso, era sa kumuna vata na nodrai vola, ka visa e na matadra kecega.” E saulevu na veivola oya ni kena isau taucoko e 50,000 na ilavo siliva. (Cakacaka 19:19, 20) Ia, era a sega ni bau tu vakasuka na lotu Vakarisito mai Efeso mera vakarusa.

E Dau Vakayagataka o Setani na Noda Malumalumu

A yaco e dua na agilosi uasivi me o Setani na Tevoro baleta a rawai koya na nona gadreva me dokai. O koya tale ga a vakauqeta vei Ivi na dokadoka kei na gagadre me via vaka na Kalou. Ena gauna oqo, o Setani e sa lewai ira tu e levu ena nona vakauqeta vei ira na dokadoka. Me kena ivakaraitaki, so era nanuma ni uasivi cake na nodra matanitu, matatamata, se yavusa ni vakatauvatani kei ira na tani. E veibasai sara ga oqori kei na ka e vakavulica na iVolatabu! (Cakacaka 10:34, 35, VV) Na iVolatabu e tukuna vakamatata: “A bulia ko koya [na Kalou] na veimatatamata kece ga mai na dua ga na tamata.”​—Cakacaka 17:26, VV.

Na sala vinaka me vorati kina o Setani ena nona dau saga me vakauqeta vei keda na dokadoka, oya meda dau yalomalumalumu. E vakaroti keda gona na iVolatabu ‘me kua ni dua vei keda me sivia na nona nanuma me baleti koya vaka i koya.’ (Roma 12:3, VV) Na iVolatabu e kaya tale ga: “Sa dau vorati ira na viavialevu na Kalou, ia sa dau lomani ira na yalo malumalumu.” (Jemesa 4:6, VV) Na sala vinaka e rawa nida vorata kina na nona sasaga o Setani, oya na noda saga meda vakaitovotaka sara ga na yalomalumalumu kei na veitovo tale e so e vakadonuya na Kalou.

Dau nona mesamesa sara tale ga na Tevoro me vakayagataka e dua tale na noda malumalumu ga vakatamata, oya na noda rawai ena gagadre ca ni yagoda. E nona inaki na Kalou o Jiova meda marautaka na bula. Ni vakacegui na noda gagadre ena sala e vakadonuya na Kalou, ena kunei kina na marau dina. Ia, o Setani e sa qai temaki ira na tamata mera lai vakaceguya na nodra gagadre ena sala e dukadukali. (1 Korinica 6:9, 10) Ena vinaka cake sara meda dau vakasamataka ga na veika e savasava kei na veika e vinaka. (Filipai 4:8) Oqori ena vukei keda meda lewa vinaka kina na noda vakasama kei na yaloda.

Vorata Tiko ga na Tevoro

Ena rawa beka ni o vorata na Tevoro? Io, e rawa. E vakadeitaka vei keda na iVolatabu: “Vorata na tevoro, ena dro tani kina vei kemudou ko koya.” (Jemesa 4:7) Ni o vulica na veika me baleta na Kalou qai o vorati Setani, ena sega sara ni soro totolo o koya se muduka na nona veivakasagai. Ena qara na Tevoro “e dua tale na kena gauna vinaka” me temaki iko kina. (Luke 4:13, VV) Ia, mo kua ni rerevaka na Tevoro. Ke o vorati koya tiko ga, ena sega vakadua ni vakamuai iko tani mai na Kalou dina.

Ia, mo rawa ni vorata na Tevoro ena gadrevi mo kila se o cei o koya, na sala cava e vakacalai ira tiko kina na tamata, kei na cava o na cakava mo vorata kina na nona ilawaki qaseqase. Na ivurevure nuitaki duadua ga e rawa nida kila mai kina na itukutuku kece oqori, oya na Vosa ni Kalou, na iVolatabu. O koya gona, saga vagumatua mo vulica na iVolatabu, qai o tovolea mo bulataka sara. O ira na iVakadinadina i Jiova ena nomuni yasayasa era dau marautaka mera vuli iVolatabu sega ni saumi kei kemuni ena nomuni gauna galala. Oni uqeti mo ni kua ni madua na veitaratara kei ira, se volavola yani ina vanua e tabaki kina na ivoladraudrau oqo.

Ni o vuli iVolatabu tiko, mo kila ni o Setani ena rairai uqeta na veivakacacani se veitusaqati me rawa ni tarova kina na nomu vulica na ka dina mai na Vosa ni Kalou. De ra na cudruvi keda sara mada ga e so na wekada lomani nida sa mai vuli iVolatabu. Ena rawa ni yaco oqo nira sega ni kila na veika vivinaka eda sa mai vulica tiko. So tale era na vakasewasewani keda. Ia kevaka eda soro koso ena vuku ni ituvaki vaka oqori, eda sa vakamarautaka tiko beka na Kalou? Na Tevoro e vinakata mo yalolailai me rawa ni o tarova kina na nomu vulica na veika me baleta na Kalou dina. O vinakata li me qaqa o Setani? (Maciu 10:34-39) Nanuma ni sega ni dua na ka o dinautaka tu vei Setani. Ia, o dinautaka tu vei Jiova na nomu bula. Oqori na vuna mo vakadeitaka kina mo vorata na Tevoro qai ‘vakamarautaka na loma i Jiova.’—Vosa Vakaibalebale 27:11.

[iYaloyalo ena tabana e 6]

O ira era tavuki mera lotu Vakarisito era a vakama na nodra ivola ni vakatevoro

[iYaloyalo ena tabana e 7]

Vakadeitaka mo vulica na iVolatabu