Vakalougatataki na Soqo Sigatolu ena Vulaikatakata Mai Rusia

ENA vulaikatakata era dau biuta na nodra itikotiko ena siti na lewe i Rusia mera lai tiko ena nodra vale ni gade e veikau e vakatokai na dachas. Qo na gauna era lako tani kina mai na bula osooso ni siti. Ena vica na vulaikatakata sa sivi era tabili yani i veikau e dua na iwiliwili levu ni iVakadinadina i Jiova e Rusia—ia ena dua tale na inaki.

Ni vakadredretaki na nodra vunau ena so na siti, ia se rawa ga nira soqoni mera sokalou vata na iVakadinadina i Jiova, mera vakaraitaka na dodonu vakalawa ni nodra sokalou. Ia ena so na ituvaki, e dredre mera kunea e dua na vanua veiganiti me caka kina na soqo sigatolu e veiyabaki ena vulaikatakata ena vuku ni veitusaqati se na tukuni ni itukutuku lasu vei ira na vakailesilesi se o ira na italatala ni lotu Orthodox e Rusia. Era mani tuvanaka kina me caka na nodra soqo sigatolu e tautuba. Ena yabaki 2007 ina 2009, a vakayacori rauta ni vaka40 na soqo va qo ena 25 na vanua e Rusia.

E kaya e dua na iVakadinadina sa vica vata na yabaki nona dau tiko ena soqo sigatolu: “Ena veiyabaki sa sivi nida redetaka na rara levu ni qito kei na vale lelevu ena siti era raica sara ga na yalomalumalumu kei ira na vakailesilesi ni noda isoqosoqo e savasava qai tuvanaki vakamatau. Ia qo eda sa vakasaurarataki meda soqovata e veikau era sa sega ni raici keda kina na lewenivanua. E ka ni rarawa nira sega ni raica na totoka ni soqo qo, eda tiko kina e duidui na ivakarau ni noda bula, matatamata, kei na lotu.”

E dau marautaki dina na soqo qo, e tukuna kina e dua na iVakadinadina: “E taleitaki dina nida raica na nodra lomasoli kei na nodra yalodina na tacida iVakadinadina nira rawa ni qaravi Jiova ena ituvaki dredre sara mada ga. Au rawa gona ni kaya, ni nodra vakadredretaka na soqo sigatolu na veiliutaki e veivakaocai dina. E yalana tale ga na neimami dodonu me keimami sokaloutaki Jiova ena sala dokai.” Na cava era cakava na iVakadinadina i Jiova mai Rusia ena ituvaki qori?

Caka e Veikau na Soqo Sigatolu

Na kena dau vakadaroi na redetaki ni vale ni veivakaicilitaki ni vo ga e vica na siga mera yaco mai na vulagi, era na tuvanaka e dua tale na vanua na komiti ni soqo mera vakaicili kina na vica na udolu na vulagi. Me kena ivakaraitaki, ena 2008, o ira na iVakadinadina mai Cheboksary, e Chuvash Republic, a caka na nodra soqo sigatolu ena dua na vanua ni keba e tubu wavokita na vunikau lelevu qai tadrava yani na uciwai na Volga River. E dua na cakacaka vakaitamera sa tu mera na cakava. O ira na le 1,930 na vulagi, e 1,700 era na vakaicili ena vanua ni keba. Ena vinakati na valelailai, na livaliva, na waikatakata kei na waibatabata ena valenisili kei na siqi. Era na vakani tale ga na vulagi.

Me rawa qori era cakacaka sara vakaukaua na mataveitacini. Era lako mai na matai, daunilivaliva, kei ira e nodra cakacaka na palama. Era le 350 na iVakadinadina era bolecakacaka, qai 14 vei ira era tiko ena vanua ena caka kina na soqo sigatolu me tini na siga. Era varo kau, kumuni co madu, biri valelaca, tara valenisili kei na valelailai. E dua tale na ilala mataveitacini era lako vakavica i taoni mera volia na veika e gadrevi. Ni sega na kato ni waililiwa ra mani tuvanaka kina na mataveitacini tagane me na saqa na kakana ena tolu na siga ni soqo. Eratou mani sauma eso na tamata cakacaka na cicivaka tiko na vanua ni keba mera vakasaqara na kedra na vulagi. Ia e laurai ni 500 na vulagi era dui kauta mai na nodra valelaca, 150 era saumi rumu ena vale era voleka ga ena keba, 15 era moce ena co madu ena vale era maroroi kina na manumanu, ra qai vakaicili na kena vo ena valelaca era vakarautaka na mataveitacini.

Nira yaco mai na vulagi era raica na tuvai vakamaqosa ni idabedabe palasitika karakarawa e vaka na roka ni waitui. E toka e liu na buturara ni vosa e ukutaki tu ena senikau, e dua na buturara ena rogoci kina na vosa vakaRusia kei na kena ikarua na vosa vakaChuvash. Era marautaka kece na tiko kina na porokaramu ni veivakavulici ena iVolatabu kei na nodra cakacaka vagumatua na bolecakacaka. E kaya e dua a veivuke tiko ena tabana ni vakasaqa, “Keu sega ni raica sara ga, au na sega ni vakabauta ni tiko e dua na isoqosoqo era daucakacaka ra qai vakavulici vinaka me vakataki kemuni!” Eso era vakatauvatana na ituvatuva ni soqo sigatolu ina Solevu ni Valetabanikau e dau cakava na matanitu o Isireli ena gauna vakaivolatabu.

Ena so tale na siti mai Rusia, o ira na iVakadinadina era na qara ra qai vakarautaka e dua tale na vanua ni soqo ena loma ni dua ga na siga. A yaco qo mai Nizhniy Novgorod, a veiveisau na gauna mera cakacaka kina na bolecakacaka ena kena vakarautaki e dua na tikiniqele. Era musu kau, koti co, ra qai samaka vinaka sara me kua ni vakabure tu kina na qasivi kei na manumanu lalai tale eso. Nira qai tokatu na vulagi ena mataka ni Vakaraubuka sa tuvani tu e 2,000 na idabedabe palasitika, tini na valelailai, siqi kei na wai, na buturara, idini ni livaliva, misini ni kakaburaki kei na gusunivosa. E tukuna e dua na iVakadinadina i Jiova tagane: “Dua na ka e veivakadrukai ni o ira era ogaoga ena vakarautaki ni vanua ni soqo era sega ni nanuma nira sa dua na ka. Ia ena yalomalumalumu era qaravi ira na mataveitacini era tiko ena soqo sigatolu. Era cakacaka vagumatua me rawa nira dabe vinaka na mataveitacini mera vakarorogo ra qai marautaka na veidusimaki vakayalo.”

E vola e dua tale na tacida: “E vakilai sara ga na cakacaka vata. Se qai matai ni gauna mera tuvanaka kina na mataveitacini e dua na soqo sigatolu e caka e tuba ena dua na gauna lekaleka, era tuvanaka vinaka me kua soti ni vakaleqa na neimami vakarorogo. Ena cakacaka kece oya keimami sega ni bau wawale. Keimami vakila ni solia o Jiova na vakasama kei na igu me totolo na cakacaka keimami dui cakava!”

Cakacaka na Yalo Tabu ni Kalou

Na kena sagai me wali na leqa me baleta na soqo sigatolu, e vakavolekati ira na iVakadinadina i Jiova e kea, e ivakaraitaki tale ga ni cakacaka tiko na yalo tabu ni Kalou. Mai Smolensk, ni vo e dua na siga me caka kina na soqo a vakadaroi e levu na icili a veivosakitaki tu. E kaya e dua na qase ni ivavakoso: “Ni qai kele mai na nodra basi na vulagi ena dua na kaloko ena mataka e sega tu na nodra icili. Au tagi niu sega ni kila na ka meu cakava. Au mani masuti Jiova qai kerea na nona veivuke. Sa dua na ka noqu marau, ni a kune na nodra icili kece ni oti ga e dua na aua! E vakadinadinataka ni o Jiova ena sega ni biuti ira na nona tamata yalododonu!” Ena dua tale na soqo sigatolu a caka e veikau, era lai kere icili na mataveitacini ena dua na koro voleka e kea, era lomasoli na lewenikoro mera vakaicilitaki ira era le 2,000 ena nodra dui vale ena vinaka ni kedra irogorogo.

E tukuna e dua na iVakadinadina, “na kena rawa ni caka na soqo sigatolu e ivakadinadina ni bibi meda nuitaki Jiova ena ituvaki kece ga e yaco.” E dua na kena ivakaraitaki na nodra lako mai eso era sega ni sureti mera vakacacana na soqo. Ena soqo sigatolu mai Novoshakhtinsk, e lako yani na italatala ni lotu Orthodox e Rusia kei ira na nona ilala era lagata ra qai cavuqaqataka na sere ni lotu ena gusunivosa me kua ni rogoci o koya e vunau tiko ena soqo sigatolu. Ia a tarovi ira na ovisa ena nodra via vakacacana na porokaramu. Ni matabuto ena levu ni katakata e dua na marama lotu Orthodox e lewe ni lawalawa oya, era kauti koya na iVakadinadina ina tabana ni Veivuke Taumada ena vanua ni nodra soqo me qaravi kina vakavuniwai. A kurabuitaka na marama qo na ka era cakava vua.

Era Druka ena Ka Era Raica

Ni kauaitaki vakalevu na nodra vakacaca na batikadi, era dau kauai kina ena soqo lelevu e caka e Rusia na vakailesilesi ni tabana ni tataqomaki kei ira na lewenivanua. Me kena ivakaraitaki, e dua na soqo sigatolu a caka e veikau mai Volzhskiy era lai yadrava na vakailesilesi ena tabana ni ovisa era dau tarovi ira era vakavuna na tiko yavavala. E dua vei ira a yali na nona mobail ena vanua ni soqo, e qai lai kune mai ena tabana e qarava na iyaya e yali (Lost and Found Department). Oti oya a qiri mai na nona iliuliu na ovisa e yadra tiko ena vanua ni soqo, e via kila se bau yaco na vakacaca se na tiko yavavala. E tukuna na ovisa: “Era le 5,000 era tiko qo, e sega ni dua na ka va qori e yaco. Na vakacaca cava? Vakasamataka mada qo, a yali na noqu mobail, ra qai solia tale vei au nira sa kunea!”

E dua a yadra tiko e kea e tarai koya na savasava ni vanua ni soqo, qai kurabui ni sega ni bau raica e dua na iolo ni loli e lutu tu, dina nira levu kina na gone. E dua na itaukei ni vanua ni keba e caka kina e dua na soqo sigatolu, a veivosaki kei na lefetenadi (lieutenant) ni ovisa a vakasalataki me baleta e dua na soqo levu vakalotu. A kauti koya ina varada ni dua na vale tabatolu e qarava yani na vanua ni keba qai kaya: “Raici ira mada! O rawa ni raica sara ga ni tuvanaki vakamatau na ka kece!” E druka na kena itaukei nira sega ni gunu alakaolo se vakatavako na iVakadinadina i Jiova, e vaka ni sega ni dua a tiko e kea ena gauna era biubiu kina, era kauta sara mada ga na nodra benu. E kaya: “E vaka ga na parataisi!”

Era Duavata na Tamata ni Kalou

Ni oti e dua na soqo sigatolu a caka e veikau, na ka e raica na iliuliu ni dua na koro voleka e kea a uqeti koya me tukuna: “Au kila ni oni yalomalua, ia oni kaukaua dina. Keimami veikauaitaki ga vakataki keimami, ia o kemuni oni rawa ni vakaduavatataka na tamata!” Mai na yasayasa o Kaliningrad me yaco i Kamchatka, e tarai ira na lewenivanua vakaitamera qo na nodra duavata na tamata ni Kalou ena nodra soqo lelevu mera vakavulici ena iVolatabu. Se mani vakacava na totolo kei vakasauri ni kena veisau na nodra nakinaki, e dua na ka e sega ni veisau—era rokovi ira tiko ga na veiliutaki kei ira na kainodra.

Na ituvaki cava ga ena yaco, era marautaka tiko ga na iVakadinadina i Jiova mai Rusia na nodra soqovata mera vakavulici ena iVolatabu. Era masu ‘ena vukudra na tui kei ira kece na vakaitutu; me rawa nira bula galala tiko ga, mera vakacegu nira qarava na Kalou, ra qai yalodina kina.’—1 Timoci 2:2.

[Tikina bibi ena tabana e 27]

Dua na iVakadinadina e veivuke tiko ena kena vakarautaki na soqo sigatolu e tautuba

[Tikina bibi ena tabana e 29]

O ira na iVakadinadina i Jiova mai Rusia era “bula galala tiko ga mera vakacegu nira qarava na Kalou, ra qai yalodina kina”

[iYaloyalo ena tabana e 28]

Era duavata na bolecakacaka ena samaki ni vanua me caka kina na soqo sigatolu ra qai vakarautaka tale ga na kedra kakana e vica na udolu na vulagi

[iYaloyalo ena tabana e 29]

Era marautaka kece na kakana vakayalo e vakarautaki ena porokaramu ra qai vakavinavinakataka tale ga na nodra cakacaka vagumatua na bolecakacaka