Me “Vakarau” Tu—Na Vuvale Lotu Vakarisito

“Mo dou vakarau tale ga o kemudou, ni na lako mai na Luve ni tamata ena aua dou sega ni namaka.”—LUKE 12:40.

1, 2. Na cava meda raica kina vakabibi na vosa i Jisu meda “vakarau”?

“NI YACO mai na Luve ni tamata ena nona iukuuku,” me tawasei ira na “lewenivanua,” na cava ena yaco vei iko kei ratou na nomu vuvale? (Maciu 25:31, 32) Ena yaco qo ena aua eda sega ni namaka, meda raica gona vakabibi na veiuqeti i Jisu meda “vakarau” tu!—Luke 12:40.

² Ena ulutaga sa oti a veivosakitaki kina na sala mera yadra tiko ga kina vakayalo na lewenivuvale, oya na nodra raica vakabibi na nodra itavi. Meda veivosakitaka mada eso tale na sala me bulabula vinaka kina vakayalo na noda vuvale.

Me “Vinaka” na Matamu

3, 4. (a) Na cava me qarauna na vuvale vaKarisito? (b) Ni tukuni me “vinaka” tiko ga na matada, na cava e kena ibalebale?

³ Nira vakavakarau tiko na vuvale ena nona lako mai o Karisito, mera qarauna mera kua ni vakaweleweletaka na ka e vauca na sokalou dina. Mera qarauna me kua ni vakamuai ira eso na ka e rawa ni vakaleqa na nodra sokalou vei Jiova. Na domodomoiyau e ivadi e sa corita e levu na vuvale. Ia dikeva mada na ka e tukuna o Jisu me baleta na kena vinakati me “vinaka” tiko ga na matada. (Wilika Maciu 6:22, 23.) Na matada e vaka e dua na cina e vakararamataka na noda sala meda kua kina ni tidara. O koya gona, e rawa ni vakararamataki keda na matada vakaivakatakarakara oya ‘na lomada.’ Qo e rawa ni vukei keda meda kua kina ni tidara.—Efeso 1:18.

⁴ Meda raica vinaka na ka, e dodonu me vinaka tiko na matada qai dei ena ka eda raica tiko. E va tale ga qori na lomada. Me vinaka na matada vakaivakatakarakara, ena vinakati me dei tiko ga na ka eda vakaliuca. Eda na sega ni vakaliuca na veika vakayago, eda na sega ni lomaocaocataka vakasivia na ka me qaravi kina na vuvale, ia eda na vakaliuca ga na veika vakayalo. (Maciu 6:33) E kena ibalebale ga nida lomavakacegu ena ka e sa tu vei keda da qai vakaliuca na noda qaravi Kalou.—Iper. 13:5.

5. E vakaraitaka vakacava e dua na goneyalewa ni dei na ‘matana’ ena nona qarava na Kalou?

⁵ Ena yaga ke ra vakavulici na gone me dau vinaka na matadra! Raica mada e dua na ivakaraitaki ni dua na goneyalewa e Iciopea. Ni dau qacoya na nona vuli, a rawata vinaka kina na nona vuli ena sekeneri, a mani soli vua e dua na sikolasivi ni vuli torocake. Ni raica vakabibi tiko ga na nona qaravi Jiova, a vakasuka na sikolasivi. Sega ni dede, a soli vua e dua na cakacaka e kena isau ena dua na vula e tautauvata kei na $4,200 na ilavo ni Merika—e ilavo levu dina qori ni laurai vata kei na isau ni tamata cakacaka ena nona vanua. Ia e dei tiko ga na ‘matana’ me painia. A sega ni tarogi rau tale na nona itubutubu me vakasuka na cakacaka. Na gauna erau kila kina na nona itubutubu na ka e cakava, na cava na nodrau rai? Erau marautaka vakalevu, erau qai tukuna vua ni rau duavata ena ka e cakava!

6, 7. Na leqa cava meda ‘yadrava tiko’?

⁶ E vakabibitaki tiko ena ivakamacala i Jisu ena Maciu 6:22, 23 na ivakasala me baleta na kocokoco. A vakayagataka o Jisu na vosa “ca.” Ni ‘ca na matamu’ e kena ibalebale ni ‘o kocokoco.’ (Maciu 6:23) E raica vakacava o Jiova na kocokoco? E tukuna na iVolatabu: “Me kua mada ga ni cavuti ena kemuni maliwa na veidauci, na ka tawasavasava ena kena veimataqali, se kocokoco.”—Efeso 5:3.

⁷ E rawarawa na noda kidava na nodra vakaitovotaka eso tale na kocokoco, ia e dredre meda kidava nida sa vakaitovotaka tiko. E ka vakavuku gona meda muria na ivakasala i Jisu: “Ni yadra tiko, ni qarauni kemuni mai na ivakarau ni yalokocokoco kece.” (Luke 12:15) E okati eke na noda dikeva sara tiko ga na inaki ni lomada. E dodonu meda vakasamataka vakabibi na vuvale vaKarisito na levu ni ilavo kei na gauna eda vakayagataka nida gade, ena ka ni veivakamarautaki kei na voli ni so na iyaya.

8. Na cava meda ‘yadrava tiko’ ni bera ni voli e dua na iyaya?

⁸ Ni bera ni voli e dua na iyaya, mo vakasamataka vinaka eso tale na ka e okati kina, sega ni kena isau wale ga. E vinaka meda taroga: ‘Keu volia na iyaya qo, vakacava au na vakayagataka wasoma au qai maroroya vinaka? Vakacava na levu ni gauna meu vulica kina na kena ivakavakayagataki dodonu?’ Ra itabagone, kua ni vakabauta na itukutuku ni veivoli e veirawai, ni kena inaki mo volia kina na isulu se iyaya isaulevu. Vulica mo lewai iko vinaka. Mo vakasamataka tale ga, ena yaga vakacava qori ena nomu vuvale mo dou vakarau tu ena nona lako mai na Luve ni tamata. Mo vakabauta na vosa ni yalayala i Jiova: “Au na sega sara ni biuti iko se vakanadakui iko.”—Iper. 13:5.

Saga mo Sauva na iSausau Vakayalo

9. Ena yaga vakacava ena vuvale na nodra saga na isausau vakayalo?

⁹ E dua tale na sala mera vakaukauataka kina na vuvale na nodra vakabauta, mera bulabula vinaka tale ga vakayalo, oya na nodra tekia eso na isausau vakayalo ra qai saga mera sauva sara. Na nodra cakava qori na vuvale era na kila kina na ivakarau ni nodra toso ena nodra vakamarautaki Jiova, ra qai raica tale ga kina na ka e bibi duadua vei ira.—Wilika Filipai 1:10.

10, 11. Na isausau vakayalo cava dou sa sauva tiko vakavuvale, kei na isausau cava dou via tekia?

¹⁰ Ena yaga sara vakalevu na nodra tekia na vuvale na isausau lalai e veiganiti qai rawa nira sauva kece na lewenivuvale. Me kena ivakaraitaki, na kena veivosakitaki na tikinivolatabu e veisiga. Nira vakamacala na lewenivuvale e rawa ni kila o ulunivuvale na nodra ivakatagedegede vakayalo na nona vuvale. E dua tale na isausau oya mera dau wilika vata vakavuvale na iVolatabu, qo e dua na sala e rawa ni vakavinakataki kina na nodra wiliwili na gone kei na nodra kila na itukutuku ena iVolatabu. (Same 1:1, 2) Me noda isausau tale ga meda vakavinakataka na ivakarau ni noda masu. E dua tale ga na isausau vinaka meda tekia, oya na noda bucina na itovo e umani ena vua ni yalo tabu. (Kala. 5:22, 23) Vakacava meda qara na sala meda kauaitaki ira eda sotava ena cakacaka vakavunau? Nida cakava qori vakavuvale, ena rawa kina vei ira na gone mera dau loloma, ra qai taleitaka mera veiqaravi vakapainia tudei se daukaulotu.

¹¹ Vakacava mo dou tekia eso na isausau vakavuvale? Dou rawa ni vakalevutaka na gauna ni nomudou cakacaka vakavunau? Vakacava mo dou tovolea na vunau ena talevoni, vunau ena salatu, se vanua ni cakacaka? Vakacava mo dou lai veiqaravi ena vanua e vinakati kina vakalevu na dautukutuku? De na rawa ni vulica e dua na lewenivuvale e dua na vosa vou me vunautaka na itukutuku vinaka vei ira na vosataka na vosa oya?

12. Na cava me cakava o ulunivuvale me kaukaua kina vakayalo na nona vuvale?

¹² Ke o dua na ulunivuvale, raica na ka mo dou cakacaka kina me kaukaua kina vakayalo na nomudou vuvale. Oti mo tekia sara eso na isausau me rawati kina qori. Na isausau o sa tekia vei ratou na nomu vuvale e dodonu me ganita na kemudou ituvaki kei na ka dou rawata. (Vkai. 13:12) E macala ga ni taura na gauna me rawati kina na isausau e yaga. Mo volia gona na gauna ni sara tivi mo vakayagataka ena sauvi ni veika vakayalo. (Efeso 5:15, 16) Gumatua sara mo rawata na isausau o sa tekia vei ira na nomu vuvale. (Kala. 6:9) Na vuvale e tekia tiko na isausau vakayalo era ‘na raica na tamata kece’ na nodratou toso.—1 Tim. 4:15.

Me Wasoma na Sokalou Vakavuvale

13. Na veisau cava a caka ena soqoni ena lomanimacawa, na taro cava meda vakasamataka tiko?

¹³ E dua tale na ivukevuke vei ira na vuvale mera “vakarau” tu ni lako mai na luve ni tamata, oya na veisau levu a caka ena noda ituvatuva ni soqoni ena lomanimacawa a tekivu ena 1 Janueri, 2009. Sa sega ni qai lokuci e dua tale na siga ena lomanimacawa me caka kina na Vulivola ni iVavakoso, sa vakayacori qo ena siga e caka kina na Koronivuli ni Vuli Vunau kei na Soqoni ni Cakacaka. Na inaki ni veisau qo, mera vakavinakataka na vuvale vaKarisito na nodra veika vakayalo nira tuvanaka e dua na yakavi ena lomanimacawa mera sokalou kina vakavuvale. Sa oti toka qo e dua na gauna na kena caka na veisau qori, meda dui taroga: ‘Au vakayagataka tiko na gauna qori me keitou Sokalou Vakavuvale kina se meu vuli kina vakataki au? E sa yaga tiko na noqu muria na inaki ni ituvatuva qo?’

14. (a) Me wasoma na Sokalou Vakavuvale se vuli vakataki keda, na cava na kena inaki levu? (b) Na cava e bibi kina me tiko na gauna ni noda vuli?

¹⁴ Na inaki levu ni Sokalou Vakavuvale se na noda vuli vakataki keda, oya meda toro voleka kina vua na Kalou. (Jeme. 4:8) Nida vakayagataka na gauna meda vulica wasoma kina na iVolatabu, da qai vakalevutaka na noda kilai koya na Dauveibuli, eda na veiwekani voleka kina kei koya. Nida toro voleka tiko ga vei Jiova eda na uqeti meda lomani koya ‘ena lomada taucoko, noda bula taucoko, noda vakasama taucoko, kei na noda kaukaua taucoko.’ (Mari. 12:30) E macala ga ni na gu na lomada meda talairawarawa da qai vakatotomuria na Kalou. (Efeso 5:1) E bibi gona me wasoma na Sokalou Vakavuvale mera “vakarau” tu kina vakayalo na lewenivuvale nira waraka tiko na “veivakararawataki levu” a parofisaitaki tu. (Maciu 24:21) Qo e bibi dina ena noda vakabulai.

15. Ena yaga vakacava na Sokalou Vakavuvale ena nodra veimaliwai na lewenivuvale?

¹⁵ E tiko e dua tale na inaki ni Sokalou Vakavuvale—oya mera veivolekati vakavuvale. Na nodra vakayagataka na gauna mera veitalanoataka na veika vakayalo e veimacawa ena yaga ena nodra veimaliwai na lewenivuvale. Erau na veivolekati vakalevu e dua na veiwatini ni rau marautaka na nodrau veitalanoataka na ka rau vulica vata ena iVolatabu! (Wilika Dauvunau 4:12.) Nira qaravi Jiova na itubutubu kei ira na gone, era na duavata ena loloma, qo “na ivau vinaka duadua ni duavata.”—Kolo. 3:14.

16. E yaga vakacava vei ratou na tolu na tacida yalewa na ituvatuva ni nodratou vulica vata na iVolatabu?

¹⁶ Vakasamataka mada na nodratou ivakaraitaki na tolu na tacida yalewa eratou vakila na yaga ni nodratou vagalalataka na gauna me ratou vulica kina na iVolatabu. Eratou sega ni veiwekani vakayago na yada eratou sa kena marama qo, ia eratou vakaitikotiko ga ena dua na siti qai vica vata na yabaki na nodratou veitokani dredre voli mai. Eratou vinakata me ratou dau soqoni vata, ia me yaga na gauna qori eratou dau veivosakitaka na ka vakayalo, qori e sega ga ni gauna me ratou dau veimaliwai kina. Eratou mani vakatulewataka me ratou dau sota ena dua na yakavi me vulici kina na iVolatabu. Eratou tekivutaka qori ena nodratou vulica na ivola “Bearing Thorough Witness” About God’s Kingdom. E tukuna e dua vei ratou: “Na levu ni neitou marautaka na neitou vuli, e dau sivia tale e dua na aua na gauna keitou vakayagataka kina. Keitou dau raitayaloyalotaka na ituvaki era sotava na tacida ena imatai ni senitiuri, qai veitalanoataka na ka keitou rawa ni cakava ke sotavi na ituvaki vata ga qori. Keitou qai vakayagataka ena cakacaka vakaitalatala na ka keitou vulica. E sa qai marautaki ga vakalevu, e vuavuaivinaka tale ga na neitou cakacaka vakavunau kei na neitou veivakatisaipelitaki.” E sega wale ga ni vakabulabulataki ratou vakayalo na ituvatuva qo, ia eratou veivolekati ga kina vakalevu. Eratou tukuna: “Keitou marautaka dina na ituvatuva qo.”

17. Na cava me caka me yaga kina na Sokalou Vakavuvale?

¹⁷ Vakacava o iko? E yaga tiko vakacava na gauna ni nomu sokalou vakavuvale se vuli vakataki iko? Ke sega ni wasoma, ena sega ni rawati kina na inaki ni ituvatuva qo. E dodonu me vakarau tu na lewenivuvale kece mera vuli ena gauna eratou lokuca vakavuvale. Me kua ni vakataotaka na vuli eso ga na ka lalai. Me digitaki na ulutaga ena yaga vakalevu ena vuvale. Na cava mo cakava me marautaki kina na vuli va qo? Vakayagataka eso na iwalewale ni veivakavulici e yaga, me dokai qai bulabula tale ga.—Jeme. 3:18.a

“Yadra Tiko” Qai “Vakarau” Tu

18, 19. Me uqeti iko vakacava kei na nomu vuvale na nomudou kila ni sa voleka mai na Luve ni tamata?

¹⁸ Me tekivu mai na 1914 sa qai torosobu ga na ivakarau ni bula ena vuravura nikua, qo e dusia ni sa vakarau mai cava na vuravura ca i Setani. E kena ibalebale qori ni sa voleka sara na Amaketoni. Sa voleka sara me mai vakayacora na Luve ni tamata na lewa i Jiova vei ira na tamata ca. (Same 37:10; Vkai. 2:21, 22) E dodonu me uqeti iko kei na nomu vuvale na itukutuku qori.

¹⁹ O muria tiko na ivakasala i Jisu me “vinaka” tiko ga na matamu? Nira saga na tamata ni vuravura qo mera vutuniyau, rogo, se qara itutu, eratou sauva tiko na isausau vakayalo na nomu vuvale? E yaga tiko na ituvatuva ni Sokalou Vakavuvale kei na gauna ni nomu vuli vakataki iko? O sa rawata vinaka tiko na inaki ni kena vakarautaki na ituvatuva qo? Me vaka e veivosakitaki ena ulutaga sa oti, vakacava o qarava tiko na nomu itavi lesi vakalou ni o dua na tagane vakawati, yalewa vakawati, se gone, o qai vukea me “yadra tiko” na vuvale? (1 Ces. 5:6) Ke o cakava qori, o na “vakarau” tu ena gauna e lako mai kina na Luve ni tamata.

[iVakamacala e ra]

Na Cava o Vulica?

• Vakamacalataka se rawa vakacava ni “vakarau” tu na vuvale vaKarisito . . .

ni “vinaka” na matadra.

nira tekia qai sauva na isausau vakayalo.

ni wasoma na Sokalou Vakavuvale.

[iYaloyalo ena tabana e 13]

Ni “vinaka” na matada eda na vorata na veivakamuai ni vuravura