Sokalou Vakavuvale Bibi ni Rawati Kina na Bula!

VAKASAMATAKA mada na rerevaki ni “valu ni siga dina ko ya ni Kalou Kaukauwa”! (Vkta. 16:14) E vola na vosa vakaivakatakarakara na parofita o Maika: “Ena waicala talega na veiulu-ni-vanua . . . , na veibuca ena wase rua, me vaka na drega ni vola e na mata ni buka waqa, ka vaka na savu ni wai mai na ulu ni vanua.” (Maika 1:4) Na ka rerevaki cava sa waraki ira tu na sega ni qaravi Jiova? E kaya na Vosa ni Kalou: “Na vuetaki kei Jiova era na davo tu yani e na siga ko ya mai nai yalayala kei vuravura e dua ki nai yalayala kei vuravura kadua.”​—Jere. 25:33.

Nira vakasamataka tiko na ivakasala qo na iliuliu ni vuvale—e levu era itubutubu le dua—e vinaka mera vakasamataki luvedra era sa bau yalomatua toka, ‘Era na bula sivita beka na Amaketoni?’ E yalataka na iVolatabu nira na vakabulai ga ke ra kaukaua tiko vakayalo qai qaqaco vinaka tu nodra veiwekani kei Jiova me veiganiti kei na nodra yabaki ni bula.​—Maciu 24:21.

Bibi na Sokalou Vakavuvale

Ni o itubutubu, mo gumatua na tuberi ira na luvemu mera “vakavulici . . . e na vunau kei nai vakavuvuli ni Turaga [o Jiova].” (Efeso 6:4) E bibi duadua nomu vakavulici luvemu ena iVolatabu. Eda vinakati ira na luveda mera vakataki ira na lotu vaKarisito e Filipai, a vakacaucautaki ira o Paula ena nodra yalorawarawa ni talairawarawa vei Jiova. E vola: “Kemudou, ka’u sa daulomana, me vaka na nomudou talairawarawa e na veigauna sa oti, dou sa sega ni ia walega ni’u sa tiko vei kemudou, dou sa uasivi cake kina ni’u sa takali, dou kitaka vakakina na cakacaka dou sa bula sara kina e na rere kei na sautaninini.”​—Fpai. 2:12.

Era dau muria beka na lawa i Jiova na luvemu ni o sega ni tiko kei ira? Vakacava nira tiko e koronivuli? O na tuberi ira vakacava na luvemu mera vakabauta ni ka vakavuku mera muria na lawa i Jiova ena gauna mada ga o sega ni tiko kina kei ira?

Ena veivuke sara vakalevu na sokalou vakavuvale me vaqaqacotaki kina na vakabauta i luvemu. Koya gona, meda veivosakitaka mada qo e tolu na tikina bibi ena yaga ina vuli iVolatabu vakavuvale.

Me Wasoma

E tukuna na iVolatabu ni tiko na gauna lokuci era dau sureti kina na luve ni Kalou, o ira na agilosi, mera lako yani vei Jiova. (Jope 1:6) Cakava tale ga qo vei ratou na luvemu. Lokuca e dua na siga kei na gauna ena yakavi mo dou Sokalou Vakavuvale kina, mo dei tale ga ena ituvatuva qori. Ena vuku ni veika tawanamaki e dau yaco, de vinaka me dau loku eso tale na gauna mai na kena dou sa dei tu kina.

Ni sa sivi e vica na vula, me kua ni lutu wasoma na vuli. Nanuma tiko ni o ira na luvemu era nomu vuli iVolatabu bibi duadua. Ena vinakata o Setani me rawai ira. (1 Pita 5:8) Ke dou vakayagataka na gauna ni Sokalou Vakavuvale mo dou sara tivi se cakava kina eso tale na ka e sega ni bibi, sa na qaqa kina o Setani.​—Efeso 5:15, 16; 6:12; Fpai. 1:10.

Me Vakatovotovotaki na Ka e Dau Yaco

Me bulabula na Sokalou Vakavuvale. Me vakatovotovotaki na ka e dau yaco dina. Ena caka vakacava qo? Ena so na gauna ni vuli, me digitaki na ulutaga me baleta na ituvaki ena rairai sotava o luvemu ena veisiga. Kena ivakaraitaki, vakacava mo okata tale ga ena ka dou vakatovotovotaka qori na nomudou vakavakarau ina soqoni? Era dau taleitaka na lalai mera cakava na ka era matai kina. Na kena vakatovotovotaki qai vakasamataki na sala me wali kina eso na ile, era na doudou kina ni vakaitavi ena cakacaka vakaitalatala.​—2 Tim. 2:15.

E rawa tale ga ni vakatovotovotaki eso na ka me cakava o luvemu ke ra uqeti koya na nona itokani e koronivuli. Rawa sara ga ni veivosakitaki vakavuvale na wase 15 ni ivola Questions Young People Ask—Answers That Work, Volume 2. Na “Peer-Pressure Planner” (Vakarautaki Iko ni o Temaki ena iDre ni Veimurimuri) ena tabana e 132 kei na 133, e toka kina eso na vakatutu, era uqeti tale ga na gone mera vola na nodra nanuma. Ena iotioti ni yatuvosa ena tabana e 133, era uqeti kina na itabagone: “Ni o temaki, vakatovotovotaka kei na dua vei rau nomu itubutubu se dua nomu itokani matua na ka o na cakava.” Vakacava me caka sara ga ena so na gauna na vakatovotovo va qori ena nomudou Sokalou Vakavuvale?

Na Sokalou Vakavuvale e dua na gauna vinaka vei ira na itubutubu mera vakabibitaka kina na yaga ni isausau vakayalo. E veidusimaki vinaka kina na wase 38 ni Young People Ask, Volume 2, e kena ulutaga “What Will I Do With My Life?” (“Na Cava Au na Cakava ena Noqu Bula?”) Ni veivosakitaki na wase qo, uqeti luvemu me raica ni yaga qai bibi duadua na nona sokaloutaki Jiova. Uqeti koya me veiqaravi vakapainia, veiqaravi e Peceli, vuli ena Koronivuli ni Vuli Veiqaravi Vakaitalatala, se so tale na basoga ni cakacaka vakaitalatala vakatabakidua.

Qo e dua na ivakasala: Eso na itubutubu era sa kauaitaka ga na ka era vinakata vei luvedra mera vinaka kina, sa ra guilecava mera bau vakavinavinakataki luvedra ena veika vinaka era sa cakava rawa tiko. E vinaka ni o uqeti luvemu me nona isausau na veiqaravi e Peceli, kei na cakacaka vakaulotu. Ia qarauna ga mo kua ni vakacudrui luvemu ena ka o namaka vua, de qai yalolailai tale kina. (Kolo. 3:21) Nanuma tiko ni dodonu me lomani Jiova mai vu ni lomana o luvemu—me kua ni cakava ga ena vukumu. (Maciu 22:37) Saga mo vakacaucautaki luvemu ena veika vinaka sa cakava tiko, kua ni vakalewa na veika e sega ni cakava. Mo uqeti luvemu me raica vakabibi na veika sa vakayacora o Jiova. Me qai sauma ga mai vu ni lomana o luvemu na vinaka i Jiova.

Me Marautaki

Na ikatolu ni sala me vuavuaivinaka kina na Sokalou Vakavuvale oya me marautaki. Ena rawati vakacava qori? De dua dou rawa ni rogoca na drama vakaivolatabu se dou sarava qai veivosakitaka na vidio e vakarautaka na iVakadinadina i Jiova. Se dou wili iVolatabu vata, mera lesi yadua na lewe ni vuvale ena tikinivolatabu mera wilika.

Eso tale ga na ulutaga ena Vale ni Vakatawa kei na Yadra!, era yavu vinaka ni veivosaki vakavuvale. Kena ivakaraitaki, rawa ni o vakayagataka na ulutaga ena tabana e  31 ni Yadra! e kena iulutaga “O na Sauma Vakacava?” Ena ilavelave kece ni Vale ni Vakatawa e tabaki me baleti ira na lewenivanua e tiko kina na ulutaga “Ra iTabagone.” Ke sega na ulutaga qori, ena dau tabaki mai na ulutaga “Vakavulica na Luvemu,” e baleti ira tiko na se lalai sara.

Na ulutaga “Ra Taroga na iTabagone” e tiko ena Yadra! ena yaga sara vei ira na itubutubu era sa itabagone na luvedra, vaka kina na ivola Young People Ask, Volume 2. Ni o vakayagataka na ivola qori kua ni guilecava na kato “What Do You Think?” (“Na Cava o Nanuma?”) ni sa oti e dua na wase. E kato ni railesuvi. E rawa sara ga ni veivosakitaki vakavuvale na taro era tiko ena kato.

Meda qarauna me kua ni vaka na veivaqaqai na vuli vakavuvale. Kena ivakaraitaki, kua ni vakasaurarataka na luvemu me wilika vakadomoilevu na veika e vola tu o koya ena ulutaga “My Journal” (“Noqu Dairi”) se so tale na vanua e vola tu kina na nona nanuma. Ena ulutaga “A Note to Parents,” (“Vei Ira na iTubutubu”) e vakamacalataki ena tabana e 3: “Ni o uqeti ira na luvemu itabagone mera vola na nodra nanuma, kua ni siova. De na qai tukuna vei iko na veika a vola tu kina ena dua na gauna emuri.”

Ke wasoma tiko ga na ituvatuva ni nomudou sokalou vakavuvale, qai vakatovotovotaki na ka e dau yaco, me marautaki tale ga, ena vakalougatataka o Jiova na nomudou sasaga. Na gauna lavotaki vakavuvale qo e veiuqeti qai veivakabulabulataki vakayalo.

[Kato ena tabana e 31]

Veisau na iWalewale ni Veivakavulici

“Ni keirau vakavulica na luvei keirau yalewa, keirau dau veivosakitaka vakaveiwatini na veika me vakarautaki ena soqoni vakaivavakoso, ratou qai droinitaka na gone na veika me baleta na vakavakarau ya. Ena so na gauna keitou dau dramataka eso na tikina ena iVolatabu se vakatovotovo ena cakacaka vakavunau. Na vuli e vakarautaki me veiraurau ga kei na nodrau yabaki, me taleitaki, veiuqeti qai marautaki.”​—J.M., mai Mereke.

“A dua tiko na luvena tagane na noqu vuli iVolatabu. Me rawa ni kila o koya na kena vakayagataki na ivolavivigi ena gauna vakaivolatabu, keitou tabaka na ivola i Aisea, ia qai boko ga na wase kei na tikinivolatabu. Era vakabiri vata na tabana yadudua, qai viviraki me vaka e dua na ivolavivigi. Sa qai saga na gonetagane qori me cakava na ka sara ga a cakava o Jisu ena valenisoro e Nasareci. E tukuni ena Luke 4:16-21 ni a “tevuka nai vola [i Aisea]” o Jisu qai “kunea” kina na tikina a vaqara tiko. (Aisea 61:1, 2) E saga tale ga qori na gonetagane ya, e dredre nona kunea na Aisea 61 ni vakayagataka na ivolavivigi balavu qori e sega tu na kena wase kei na veitikina. E kurabuitaka na gonetagane qo na nona matai ni vakayagataka na ivolavivigi o Jisu, mani kaya kina: ‘Sa vuku dina ga o Jisu!’”​—Y.T., Japani.

[iYaloyalo ena tabana e 30]

Na vakatovotovo e rawa ni vukei luvemu me taqomaki koya mai na idre ni veimurimuri

[iYaloyalo ena tabana e 31]

Saga me marautaki na nomudou Sokalou Vakavuvale ena yakavi