O Cei e Bibi Duadua ena Nomu Bula?
“[Oni] sa Cecere sara duaduaga e vuravura taucoko.”—SAME 83:18.
1, 2. Meda vakabulai, na cava e sega ni vinakati wale ga kina meda kila na yaca i Jiova?
DE DUA na imatai ni gauna o raica kina na yaca i Jiova na gauna a vakaraitaki kina vei iko na Same 83:18. O na rairai kurabui sara ga ni o wilika na vosa qo: “Me ra kila ko ira na tamata ni sai kemuni na yacamuni ga ko Jiova, sa Cecere sara duaduaga e vuravura taucoko.” E macala ga ni o sa vakayagataka tiko na tikinivolatabu oya mo uqeta kina eso tale mera mai kila na noda Kalou dau loloma o Jiova.—Roma 10:12, 13.
2 E bibi sara mera mai kila na tamata na yaca i Jiova, ia e sega ni vinakati me kilai wale ga na yacana, eso tale na ka e okati kina. Raica mada e dua tale na ka dina e tukuna na daunisame e bibi duadua meda vakabulai kina: “[Oni] sa Cecere sara duaduaga e vuravura taucoko.” Io, e cecere duadua ga o Jiova e lomalagi kei vuravura. Ni Dauveibuli, e tu vua na dodonu me namaka vei keda kece na nona ibulibuli meda talairawarawa vua mai na lomada taucoko. (Vkta. 4:11) E vinaka meda taroga, ‘O cei e bibi duadua ena noqu bula?’ E vinaka meda vakasamataka vakabibi na noda sauma na taro qori!
Na iLe ena Were o Iteni
3, 4. A vakacalai Ivi vakacava o Setani, na cava a yaco kina?
3 Na bibi ni taro qori e laurai ena ka a yaco ena were o Iteni. A talaidredre e dua na agilosi a qai kilai e muri me o Setani na Tevoro, a temaki Ivi na imatai ni yalewa me vakaliuci koya ga qai beca na ivakaro i Jiova me kua ni kania na vuanikau. (Vkte. 2:17; 2 Kor. 11:3) A rawai o Ivi ena veitemaki qo qai vakaraitaka ni sega ni doka na veiliutaki cecere i Jiova. E sega ni raica o Ivi me bibi duadua ena nona bula o Jiova. Ia a vakacalai Ivi vakacava o Setani?
4 E vakayagataka o Setani e vica na ilawaki qaseqase ena nona vosa tiko vei Ivi. (Wilika Vakatekivu 3:1-5.) Na kena imatai, a sega ni vakayagataka o Setani na yaca i Jiova. E cavuta ga na vosa “Kalou.” Ia o koya e vola na Vakatekivu e vakayagataka sara ga na yaca i Jiova ena imatai ni tikina ena wase oya. Na kena ikarua, a cavuta ga o Setani na vosa “kaya” na Kalou, sega ni cavuta na vosa “vakarota” na Kalou. (Vkte. 2:16) Na nona cakava qo o Setani, a rairai saga tiko me raici kina vakamamada na ivakaro ni Kalou. Na kena ikatolu, a vosa duadua tiko ga vei Ivi, ia e cavuta tiko ga na vosa “drau.” Na nona cakava qo o Setani a saga tiko me dokadoka o Ivi, me nanuma tale ga ni bibi me vakaliuci koya ga. Qo e vaka ga e sa matataki koya tiko kei watina o Ivi. Na cava e yaco kina? Na nona siosio o Ivi a nanuma kina me vosa ena vukudrau, mani kaya kina vua na gata: “Sa tara me keirau kania na vua ni veikau e na were.”
5. (a) E rawai Ivi vakacava o Setani? (b) Na cava e vakaraitaka o Ivi ena nona kania na vuanikau vakatabui?
5 A vakacala tale ga o Setani na itukutuku dina. E tukuna ni a sega ni donu na nona vakaroti Atama kei Ivi na Kalou me rau “kakua ni kania na vua ni kau kecega e na were.” A mani vakavuna o Setani me nanumi koya ga o Ivi me nanuma tale ga ni rawa ni vakavinakataka na kena ituvaki me “vaka na Kalou.” E qai rawai koya sara me vakasamataka tiko ga na kau kei na vuana, sega ni nona veiwekani kei koya a solia vua na ka kece. (Wilika Vakatekivu 3:6.) E ka ni rarawa na nona kania na vuanikau qori o Ivi, e vakaraitaka ni sega ni bibi duadua ena nona bula o Jiova.
Na iLe ena Gauna i Jope
6. A vakalewa vakacava o Setani na yalodina i Jope, na cava a soli kina vua na gauna?
6 Ena vica na senitiuri e muri, a rawa vua na turaga yalodina o Jope me vakaraitaka se o cei e bibi duadua ena nona bula. Na gauna e tukuna kina o Jiova vei Setani na itukutuku ni nona yalodina o Jope, a tukuna o Setani: “Sa sega li ni yaga vei Jope na nona rerevaka na Kalou?” (Wilika Jope 1:7-10.) E kila vinaka tu o Setani ni dau talairawarawa vua na Kalou o Jope, ia e vakalewa tiko ga na naki ni nona veiqaravi. A qaseqase sara na nona beitaki Jope ni qaravi Jiova tiko ga ena yalokocokoco, sega ena nona lomani Jiova. O Jope duadua ga ena vakadinadinataka na dina se lasu ni veibeitaki qori, mani soli kina vua na gauna.
7, 8. Na veivakatovolei cava a vinakati me vosota o Jope, na cava e vakaraitaka na nona yalodina?
7 E vakatara o Jiova me yaco veitaravi vei Jope na rarawa e vakavuna o Setani. (Jope 1:12-19) Na cava e cakava o Jope ni sotava na ituvaki qori? E tukuni ni “sa sega ni cala kina ko Jope, se kaya ko koya ni sa cala na Kalou.” (Jope 1:22) Ia e sega ni vagalui Setani qori. A kudruvaka tiko ga: “Nai sau ni kulina na kulina, ia na nona ka kecega ena solia na tamata me bula kina.”a (Jope 2:4) E kaya o Setani ke vakararawataki sara ga na yagoi Jope, ena vakatulewataka ni sega ni bibi duadua ena nona bula o Jiova.
8 A vakavuna me bulicaki vakatani na yago i Jope e dua na mate vakasisila a tauvi koya, qai togoraka o watina me vosavakacacataka na Kalou me mate kina. E muri eratou beitaki koya e tolu na nona itokani lasu. (Jope 2:11-13; 8:2-6; 22:2, 3) Ia ena veika rarawa kece a sotava o Jope a yalodina tiko ga. (Wilika Jope 2:9, 10.) Ena nona yalodina e vakaraitaka ni bibi duadua ena nona bula o Jiova. E vakaraitaka tale ga o Jope ni rawa vua na tamata ivalavala ca me vakalasuya na veibeitaki i Setani, ena veika lalai mada ga eda cakava.—Vakatauvatana Vosa Vakaibalebale 27:11.
E Uasivi na Nona Vorata o Jisu na Veivakatovolei
9. (a) E temaki Jisu vakacava o Setani ena nona walokai? (b) Na cava a cakava o Jisu ena veitemaki qo?
9 Ni oti ga na papitaiso i Jisu a vakatovolei koya o Setani me vakaliuca na nona gagadre, me kua kina ni bibi duadua ena nona bula o Jiova. A vakatovolei Jisu vakatolu na Tevoro. Na kena imatai, a via vakayagataka na nona walokai tu o Jisu me temaki koya kina me vukica na vatu me madrai. (Maciu 4:2, 3) E walokai tu o Jisu ni se qai oti ga e 40 na siga na nona lolo. E mani uqeti koya na tevoro me vakayagataka vakatani na nona kaukaua me kua kina ni walokai. Na cava a qai cakava o Jisu? E sega ni vakataki Ivi o Jisu, ni dei ena Vosa i Jiova qai vorata na veitemaki ena gauna vata ga oya.—Wilika Maciu 4:4.
10. Na cava e vinakata kina o Setani me rika sobu mai na dela ni bai ni valenisoro o Jisu?
10 A temaki Jisu tale o Setani me nanumi koya ga. A vinakata me rika sobu o Jisu mai na dela ni bai ni valenisoro. (Maciu 4:5, 6) Na cava na inaki i Setani? E tukuna o Setani ke sega ni mavoa o Jisu ena nona lutu, e vakaraitaka qori ni “luve ni Kalou.” Ia e vinakata ga na Tevoro me kauaitaka vakalevu o Jisu na kena irogorogo, ke mani cakava sara ga qori e matanalevu. E kila o Setani ni dua e dokadoka e rawa ni bolea me lai cakava e dua na ka rerevaki, ia me kua ga ni vakamadualaki e matanalevu. E vakayagataka cala e dua na tikinivolatabu o Setani, ia e vakaraitaka o Jisu ni kila vinaka na Vosa i Jiova. (Wilika Maciu 4:7.) Na nona sega ni muria o Jisu na ka e vinakata o Setani, e vakadinadinataka tale kina ni bibi duadua ena nona bula o Jiova.
11. Na cava e cata kina o Jisu na nona via solia vua na Tevoro na matanitu kece e vuravura?
11 Ena iotioti ni nona sasaga o Setani, a via solia vei Jisu na matanitu kece e vuravura. (Maciu 4:8, 9) A totolo ga na nona cata o Jisu na ka a via solia vua o Setani. E kila o koya ke mani vakadonuya, ena tautauvata ga na nona cata na dodonu ni nona veiliutaki o Jiova—qori na nona dodonu na Kalou me Cecere Duadua. (Wilika Maciu 4:10.) Ena gauna kece qori a vakayagataka tiko ga o Jisu na tikinivolatabu e cavuti kina na yaca i Jiova.
12. Na vakatulewa dredre cava me cakava o Jisu ni vakarau cava na nona bula e vuravura, na cava eda vulica ena vakatulewa qori?
12 Ni voleka ni cava na bula i Jisu e vuravura, e vinakati me vakatulewataka e dua na ka bibi. Ena gauna kece ni nona cakacaka vakaitalatala a tu vakarau me solia na nona bula me isoro. (Maciu 20:17-19, 28; Luke 12:50; Joni 16:28) Ia e kila tale ga o Jisu ni na beitaki vakailasu, ena lewai tale ga ena nodra mataveilewai na Jiu, qai vakamatei ni beitaki ni vosavakacacataka na Kalou. E rarawataka dina na ivakarau ni nona mate. A masuta: “I Tamaqu, ke rawa, ni kauta tani na bilo qo.” E tomana: “Ia me yaco ga na lomamuni, me kua ni yaco na lomaqu.” (Maciu 26:39) Na nona yalodina o Jisu me yacova sara na mate, e vakadinadinataka kina o cei e bibi duadua ena nona bula!
Na ka Meda Cakava Nida Vakatovolei
13. Na cava eda vulica ena ivakaraitaki i Ivi, Jope kei Jisu Karisito?
13 Na cava eda sa vulica mai? Ena ka a sotava o Ivi, eda vulica kina ni o ira era nanumi ira ga se o ira na dokadoka, era vakavotuya ni o Jiova e sega ni bibi duadua ena nodra bula. E duidui sara na yalodina i Jope, eda vulica ni rawa vei keda na tamata ivalavala ca meda vakaliuci Jiova ena noda yalodina nida vosota na leqa—ke da sega mada ga ni kila vinaka na vu ni leqa. (Jeme. 5:11) Eda vulica ena ivakaraitaki tale ga i Jisu meda tu vakarau meda kua ni madua nida vakararawataki, meda kua ni kauaitaka vakasivia na keda irogorogo. (Iper. 12:2) Ia eda na vakayagataka vakacava na ka eda vulica qo?
14, 15. Ni temaki o Jisu, e duidui vakacava na ka a cakava ni vakatauvatani kei Ivi, eda na vakatotomuri Jisu vakacava? (Vakamacala ena iyaloyalo ena tabana e 18.)
14 Kua vakadua ni vakalaiva na veivakatovolei mo guilecavi Jiova kina. A vakalaiva o Ivi me vakamuai na nona vakasama ena veitemaki a sotava. A raica me “yaga na kau me kakana, a sa ka e via raica na matada, ka sa kau me da gadreva.” (Vkte. 3:6) E duidui sara na ka a cakava o Jisu ena tolu na veivakatovolei a sotava! Ena gauna kece e temaki kina, e sega ni vakalaiva qori me guilecava na ka e rawa ni yaco ke vakamalumalumu ena veitemaki. E vakararavi ena Vosa ni Kalou qai vakayagataka na yaca i Jiova.
15 Nida temaki ena ka e sega ni vakamarautaki Jiova, na cava eda dau vakasamataka ena gauna qori? Na levu ga ni noda vakasamataka vakabibi na ka eda temaki kina, na kena kaukaua tale ga na gagadre ca. (Jeme. 1:14, 15) E vinakati gona me totolo na noda cavuraka laivi na gagadre qori, me vaka ga eda kolotaka laivi e dua na tiki ni yagoda. (Maciu 5:29, 30) Me vakataki Jisu ga, e vinakati meda dau vakasamataka vakabibi na itinitini ni ka eda cakava—ena tara vakacava na noda veiwekani kei Jiova. E dodonu meda nanuma na ka e tukuni ena nona Vosa na iVolatabu. Qori duadua ga na sala eda rawa ni vakadinadinataka kina ni bibi duadua ena noda bula o Jiova.
16-18. (a) Na cava e rawa ni vakayalolailaitaki keda? (b) Eda na vosota vakacava na ituvaki rarawataki?
16 Kua vakadua ni cudruvi Jiova ke yaco vei iko na ituvaki rarawataki. (Vkai. 19:3) Ni sa voleka ni cava na ituvaki ca ni vuravura qo, e levu sara vei ira na dauveiqaravi i Jiova era sotava na ituvaki rarawataki kei na leqa tubukoso. Eda sega ni namaka meda taqomaki vakacakamana ena gauna qo. Ia me vakataki Jope ga, eda na rairai yalolailai ena gauna era takali kina na wekada lomani se nida sotava na ituvaki dredre.
17 A sega ni kila o Jope na vuna e vakatara kina o Jiova eso na ka me yaco vua, eso na gauna eda na rairai sega tale ga ni kila na vuna eda sotava kina na veika ca. De dua eda sa rogoca na kedra italanoa na tacida yalodina me vakataki ira mai Haiti era mate ena uneune, se ra vakaleqai ena so tale na leqa tubukoso. Se da rairai kila e dua na tacida yalodina a caka vua na ivalavala voravora se mate ena dua na vakacalaka. Se da sotava sara tiko ga eso na ituvaki rarawataki se caka vei keda eso na ka tawadodonu. Na noda rarawa e rawa ni vakavuna meda taroga kina: ‘Jiova, na cava e yaco kina vei au qo? Na cava au cakava?’ (Apak. 1:2, 3) Eda na vosota vakacava na ituvaki qori?
18 Ni yaco na ituvaki qori, meda qarauna meda kua ni nanuma ni sega ni vakadonui keda o Jiova. E vakabibitaka na tikina qo o Jisu ena nona vakamacalataka tiko e rua na ituvaki vakaloloma a yaco ena nona gauna. (Wilika Luke 13:1-5.) E yaco e levu na leqa nikua ena vuku ni ‘ka tawanamaki.’ (Dauv. 9:11) Ia se mani cava na vu ni noda rarawa, eda na rawa ni vosota ke da vakasamataka vakabibi ni “Kalou e dau vakacegui keda ena ka kece ga.” Ena solia vei keda na kaukaua meda yalodina tiko ga kina.—2 Kor. 1:3-6.
19, 20. Na cava a vukei Jisu me vosota kina eso na ituvaki vakamadua, eda na cakava tale ga vakacava qori?
19 Kua vakadua ni laiva me lewai iko na dokadoka se mo leqataka na nomu vakamadualaki. Na nona yalomalumalumu o Jisu e rawa kina ni “vakadravudravuataki koya qai okati koya me vaka na bobula.” (Fpai. 2:5-8) Na nona nuitaki Jiova, a vosota rawa kina e levu na ituvaki veivakamadualaki. (1 Pita 2:23, 24) Na nona cakava qori, a vakaliuca kina na inaki i Jiova, mani vakacerecerei ena dua na itutu cecere. (Fpai. 2:9) E vinakata o Jisu mera cakava tale ga qori na nona tisaipeli.—Maciu 23:11, 12; Luke 9:26.
20 Ena so na gauna, eso na ka e vakatovolei kina na noda vakabauta ena rairai vakamadualaki keda. Ia e dodonu meda nuidei me vaka na yapositolo o Paula, ni kaya: “Qo sara ga na vuna au sotava tiko kina na veika rarawa, ia au sega ni maduataka. Au kilai koya au vakabauta, au nuidei tale ga ni na maroroya na ka kece au vakararavitaka vua me yacova na siga ya.”—2 Tim. 1:12.
21. E levu nikua era dau vakaliuci ira ga, ia na cava ga mo vakadeitaka?
21 E parofisaitaka na iVolatabu me baleta na noda gauna “nira na dau lomani ira ga” na tamata. (2 Tim. 3:2) Sa rauta meda maliwai ira na itabatamata e nodra ivalavala mera dau vakaliuci ira ga. Meda kua mada ga ni coriti ena ivalavala va qori! Ke da mani vakatovolei, sotava na ituvaki dredre se da vakamadualaki, meda vakadeitaka mada ga ni bibi duadua ena noda bula o Jiova!
[iVakamacala e ra]
a Era nanuma eso na dauvola iVolatabu, ni matavosa “nai sau ni kulina na kulina” e rairai baleta na nona nanumi koya ga o Jope ena nona vakatara me ratou mate na luvena kei na nona manumanu, ia me kua ga ni mate o koya. Eso tale era nanuma ni matavosa qori e vakabibitaka ni tu vakarau me vakayalia na kuliniyagona me bula ga kina o koya. Me kena ivakaraitaki, ena laveta na ligana me kua ni mavoa kina na uluna, ia ena mavoa ga na kuliniyagona me kua kina ni vakayalia na nona bula. Se mani cava e kena ibalebale, e dusia tiko ga na matavosa qo ni tu vakarau o Jope me vakuai koya ena veika kece me bula tiko ga kina.
Na Cava Eda Vulica ena . . .
• sala e vakacalai Ivi kina o Setani?
• ka e cakava o Jope ni sotava na ituvaki dredre?
• ka e bibi duadua vei Jisu?
[iYaloyalo ena tabana e 17]
A sega ni vakasamataka vakabibi o Ivi na nona veiwekani kei Jiova
[iYaloyalo ena tabana e 18]
A vorata o Jisu na veivakatovolei i Setani qai dei tiko ga me cakava na inaki i Jiova
[iYaloyalo ena tabana e 20]
Vunau vei ira na vakaleqai ena uneune e Haiti
[iYaloyalo ena tabana e 20]
Nida sotava na ituvaki rarawataki, meda nanumi koya “na Kalou e dau vakacegui keda ena ka kece ga”