iVakarau ni Bula e Dodonu mo Muria

1, 2. Na cava meda cakava me vakadonui keda kina na Kalou?

E DAU kena ivakarau ga meda dau kauaitaka na ka era nanuma eso me baleti keda. Ia nida lotu vaKarisito, e dodonu meda kauaitaka vakabibi na rai i Jiova me baleti keda, baleta ni cecere duadua e lomalagi kei vuravura qai “waivure ni bula.”​—Same 36:9.

² Me vakadonui keda o Jiova, e vakamacalataka na yapositolo o Pita ni bibi meda ‘yalosavasava, meda qarava tale ga na Kalou.’ (Wilika 2 Pita 3:11.) Eda na rawa wale ga ni “yalosavasava,” ke savasava noda itovo, noda vakasama, kei na noda sokalou. E bibi meda “qarava tale ga na Kalou” ena veidokai da qai yalodina vua. Me vakadonui keda gona na Kalou, me kua wale ga ni savasava na noda itovo, me savasava tale ga na lomada. Ni “dauvakatovolea na yalo” o Jiova, ena kila o koya ke savasava tiko na noda itovo da qai qaravi koya vakatabakidua.​—1 Vei. 29:17.

3. Na taro cava meda kauaitaka me baleta na noda veiwekani kei na Kalou?

³ E vinakata o Setani na Tevoro me kua ni vakadonui keda na Kalou. E dau saga ena nona kaukaua kece me tagutuva noda veiwekani kei Jiova. E dau vakayagataka o Setani na lasu kei na ilawaki me veibacani kina, me rawa nida yawaka na Kalou eda sokaloutaka. (Joni 8:44; 2 Kor. 11:​13-15) E ka vakayalomatua gona meda taroga: ‘E dau lawakitaki ira vakacava na tamata o Setani? Na cava meu cakava meu taqomaka kina noqu veiwekani kei Jiova?’

SALA E VEIBACANI KINA O SETANI

4. Ni saga o Setani me vakaleqa noda veiwekani kei na Kalou, na cava e dau taketetaka, na vuna?

⁴ E vola na tisaipeli o Jemesa: “E vakatovolei na tamata yadua ni bacani koya qai siwati koya na nona gagadre ca. Ni sa matua na nona gagadre ca, sa qai vakasucuma na nona ivalavala ca; ni sa votu na nona ivalavala ca, qo ena vakavuna nona mate.” (Jeme. 1:​14, 15) Ena nona saga o Setani me tagutuva noda veiwekani kei na Kalou, e taketetaka kina na lomada​—ni vu mai kina na noda gagadre.

5, 6. (a) E dau taketetaki keda vakacava o Setani? (b) E dau bacani keda ina cava o Setani me vakaleqa kina na lomada, e kenadau vakacava ena iwalewale qori?

⁵ E taketetaka vakacava na lomada o Setani? E tukuna na iVolatabu: “E lewa tiko na Vunica na vuravura taucoko.” (1 Joni 5:19) Era wili “na ka e tu e vuravura” me iyaragi i Setani. (Wilika 1 Joni 2:​15, 16.) Sa vica vata na udolu na yabaki nona moica voli mai na Tevoro na veika era wavoliti keda me lawakitaki keda kina vaqaseqase. Nida bula tiko ena vuravura qo, e bibi meda taqomaki keda mai na nona ilawaki qaseqase.​—Joni 17:15.

⁶ E vakayagataka eso na iwalewale qaseqase o Setani me vakaleqa na gagadre ni lomada. E tukuna na yapositolo o Joni e tolu na ka e dauveibacani kina o Setani: (1) “na gagadre ni yago,” (2) “na gagadre ni mata,” kei na (3) “nona dokadokataka e dua na ka e taukena.” E vakayagataka qori o Setani me temaki Jisu kina ena vanua talasiga. Sa dede voli mai na nona vakayagataka na dai qori o Setani, e sa kenadau sara ena kena ivakavakayagataki, e kila kina na kena e ganiti keda yadudua. Ni bera nida vakasamataka na ka meda cakava meda taqomaki keda kina, meda raica mada na sala e veibacani kina na Tevoro ena nona vakayagataka eso na dai vei Ivi me rawai koya kina, ia a sega ni rawai koya na Luve ni Kalou.

“NA GAGADRE NI YAGO”

7. E vakayagataka vakacava o Setani “na gagadre ni yago” me temaki Ivi?

⁷ E bibi na kakana me rawa kina na bula. E bulia na vuravura na Dauveibuli me vuataka vakalevu na kakana. De dua ena vakayagataka o Setani na gagadre ni via kana me temaki keda meda kua kina ni cakava na loma ni Kalou. Raica mada nona cakava qori vei Ivi. (Wilika Vakatekivu 3:​1-6.) E tukuna o Setani vei Ivi ni na sega ni mate ke kania na vuata mai na “kau sa kilai kina na ka vinaka kei na ka ca,” e tukuna vua ni na vaka sara ga na Kalou ena siga ga e kana kina. (Vkte. 2:9) A uqeti Ivi gona na Tevoro me nanuma ni sega ni gadrevi vua me talairawarawa vua na Kalou me bula kina. Sa dua na lasu levu! Na gauna ga e vakavurea kina na Tevoro na vakasama qori, a rawa vei Ivi me vakatulewataka e rua na ka: Me kua ni vakasamataka, se vakasamataka tiko ga me yacova sara ni sa vinakata na vuata. A rawa vei Ivi me kana mai na so tale na vuanikau ena were, ia a via vakasamataka tiko ga na vuanikau ena lomadonu ni were, a mani “tauca na vuana, ka kania.” A uqeta gona na gagadre i Ivi o Setani me cakava na ka e vakatabuya na Dauveibuli.

8. E bacani Jisu vakacava o Setani ni vakayagataka “na gagadre ni yago,” cava e dreve kina na nona veitemaki?

⁸ A vakayagataka tale ga o Setani na iwalewale qori ena gauna a temaki Jisu kina ena vanua talasiga. Ni sa lolo oti o Jisu me 40 na siga kei na 40 na bogi, a vakayagataka o Setani na nona via kana me temaki koya kina. E tukuna vua o Setani: “Ke o luve ni Kalou, mo kaya ina vatu qo me vuki me ibuli madrai.” (Luke 4:​1-3) E rawa ni cakava o Jisu e rua na ka: E rawa ni vakatulewataka me vakayagataka na isolisoli kaukaua ni cakamana me vakaceguya kina na nona gagadre ni via kana, se me kua ni cakava. E kila o Jisu ni sega ni dodonu me vakayagataka na kaukaua ya me baleti koya ga. Dua na ka na via kana i Jisu, ia a bibi cake vua me dei na nona veiwekani kei Jiova. Mani kaya vei Setani o Jisu: “Sa volai ‘Ena sega ni bula na tamata e na madrai duaduaga, sa bula ga e na vosa kecega ni Kalou.’”​—Luke 4:​4, VM.

“NA GAGADRE NI MATA”

9. Na cava na ibalebale ni matavosa “na gagadre ni mata,” e vakayagataka vakacava o Setani na gagadre qori me temaki Ivi kina?

⁹ E cavuta tale ga o Joni “na gagadre ni mata” me dauveibacani. E kilai mai na matavosa qori ni rawa vua e dua me tekivu gadreva e dua na ka mai na nona vakaraica tiko ga. A vakayagataka na gagadre qori o Setani vei Ivi ena nona kaya vua: ‘Ena qai yadra dina na matamu.’ Na levu ga ni nona vakaraica o Ivi na vuanikau vakatabui, na levu tale ga ni nona vinakata. E raica o Ivi ni ‘taleitaka na matana’ na vuanikau oya.

10. E vakayagataka vakacava o Setani “na gagadre ni mata” me temaki Jisu kina, cava e qai cakava o Jisu?

¹⁰ Ia vakacava o Jisu? O Setani e “vakaraitaka [vei Jisu] ena dua vata ga na gauna na matanitu kece e vuravura. E kaya vua na Tevoro: ‘Au na solia mo lewai ira kece qo, me nomu tale ga na kedra lagilagi.’” (Luke 4:​5, 6) A sega ni raica dina o Jisu na matanitu kece ya, ia a raica ga na kedra lagilagi ena dua na raivotu. De dua a nanuma o Setani ni na temaki Jisu na ka e raica. A tukuna kina o Setani vei Jisu: “Ke o sokalou vakalekaleka ga vei au, ena nomu na ka kece qori.” (Luke 4:7) E sega sara ga ni vinakata o Jisu me cakava na ka e tukuna vua o Setani. Sega ni bera e tukuna vua o Jisu: “E volai, ‘E dodonu mo sokalou vei Jiova na nomu Kalou, mo qaravi koya duadua ga.’”​—Luke 4:8.

“NONA DOKADOKATAKA E DUA NA KA E TAUKENA”

11. E temaki Ivi vakacava o Setani?

¹¹ Ni tukuna tiko o Joni na veika me baleta na vuravura, a cavuta na “nona dokadokataka e dua na ka e taukena.” Ni rau se bula taurua voli ga e vuravura o Atama kei Ivi, macala ga ni rau na sega ni ‘dokadokataka rawa na ka erau taukena’ vei ira eso tale. Ia e laurai vei rau na dokadoka. Ena gauna a temaki Ivi kina o Setani, e tukuna vua ni bureitaka na Kalou e dua na ka totoka. E tukuna vei Ivi na Tevoro ni siga ga e kania kina “na kau sa kilai kina na ka vinaka kei na ka ca,” ena ‘vaka na Kalou, ni na kila na ka vinaka kei na ka ca.’ (Vkte. 2:17; 3:5) E tukuna gona o Setani me lewai koya ga, ni sega ni gadrevi me lewai koya o Jiova. De dua na nona dokadoka o Ivi a vakavuna me vakabauta na lasu ya. A kania sara na vuata a vakatabui ena nona vakabauta ni na sega ni mate. Ia a cala na nona nanuma!

12. Cava e dua tale na sala e saga kina o Setani me temaki Jisu, na cava e qai tukuna o Jisu?

¹² Ni vakatauvatani kei Ivi, e duidui sara na ivakaraitaki uasivi ni yalomalumalumu i Jisu! A saga o Setani me temaki koya ena dua tale na sala, ia a sega mada ga ni via vakasamataka o Jisu me cakava e dua na ka me vakatovolea kina na Kalou. E ivakaraitaki ni dokadoka ke cakava qori! E tukuna ga vakamatata qai vakadodonu o Jisu vei Setani: “E volai tale ga, ‘Mo kua ni vakatovolei Jiova na nomu Kalou.’”​—Wilika Luke 4:​9-12.

SALA MEDA TAQOMAKA KINA NODA VEIWEKANI KEI JIOVA

13, 14. Vakamacalataka na sala e vakayagataka kina o Setani eso na ilawaki nikua.

¹³ O Setani e vakayagataka tale ga nikua na dai e tautauvata kei na kena a vakayagataka vei Ivi kei Jisu. E vakayagataka na vuravura na Tevoro me uqeta “na gagadre ni yago” meda temaki ina ivalavala vakasisila, gunu kei na kana vakasivia. E vakayagataka “na gagadre ni mata” me temaki ira na sega ni qaqarauni mera sara iyaloyalo vakasisila, vakabibi ena Internet. E vakayagataka tale ga na ‘dokadokataki ni ka e taukeni’ ena domodomoiyau, veiliutaki kei na rogo!

¹⁴ ‘Na ka era tu e vuravura’ e vaka na nona baca e dua na dausiwa. Era rairai vinaka, ia e toka ena baca yadua na batinisiwa. E vakayagataka o Setani na ka era nanuma na tamata ni gadrevi ena bula e veisiga mera cakava kina na veika e veisaqasaqa kei na lawa ni Kalou. Na ilawaki qaseqase va qori e kena inaki me vakabulabulataka noda gagadre qai vakadukadukalitaka na lomada. E vinakata o Setani meda vakabauta ni bibi cake meda qara na veika eda gadreva kei na noda tiko vinaka, sega ni inaki ni Kalou. Vakacava ena rawai keda na ilawaki qori?

15. Eda na vakatotomuri Jisu vakacava ena nona vorata na veitemaki i Setani?

¹⁵ A rawai o Ivi ena veitemaki i Setani, ia a vorata rawa qori o Jisu. E vakayagataka e veigauna o Jisu na iVolatabu ena nona kaya: “E volai.” Ke da dau vulica vagumatua na iVolatabu, eda na kila vinaka na lewena, ena kasa tale ga vei keda na tikinivolatabu e rawa ni vukei keda nida temaki. (Same 1:​1, 2) Noda dauvakananuma na nodra ivakaraitaki ni yalodina o ira era cavuti ena iVolatabu, ena vukei keda meda vakatotomuri ira. (Roma 15:4) Ke da dokai Jiova dina, taleitaka na ka e taleitaka qai cata na ka e cata, qori ena taqomaki keda.​—Same 97:10.

16, 17. E rawa ni vakamuai keda vakacava na ka eda vakasamataka?

¹⁶ E uqeti keda na yapositolo o Paula meda vakayagataka na “noda vakasama, meda yalomatua,” me moici keda kina na vakasama ni Kalou, sega ni vakasama vakavuravura. (Roma 12:​1, 2) E vakabibitaka o Paula meda qarauna sara na ka eda dau vakasamataka ena nona kaya: “Keitou talaraka na nanuma cala kei na ka kece e vakacerecerei me sabaya na vuku ni Kalou; keitou veisautaka na nanuma kece me vakamalumalumutaki vei Karisito.” (2 Kor. 10:5) Na ka eda vakasamataka e rawa ni moici keda, koya gona meda “dau vakananuma” tiko ga na veika vinaka.​—Fpai. 4:8.

¹⁷ Eda sega ni rawa ni savasava ke da dau vakasamataka se gadreva na veika ca. Meda lomani Jiova, e bibi me “savasava” na lomada. (1 Tim. 1:5) Ia e dauveivakaisini na lomada, de dua eda na sega ni kidava ni sa vakamuai keda tiko “na ka e tu e vuravura.” (Jere. 17:9) Koya gona, e dodonu meda ‘dikevi keda tiko ga se da tudei tiko ena vakabauta se sega, meda vakadeitaka se o cei dina o keda.’ Eda na cakava qori ena noda vakadeitaka ke salavata tiko na noda bula kei na ka eda vulica na iVolatabu.​—2 Kor. 13:5.

18, 19. Na cava meda vakadeitaka kina meda muria na ivakarau ni bula e vinakata o Jiova?

¹⁸ Dua tale na ka ena vukei keda meda vorata “na ka e tu e vuravura,” oya noda nanuma dei tiko na vosa uqeti i Joni: “Sa takali tiko yani na vuravura kei na kena gagadre, ia o koya e cakava na loma ni Kalou ena tu ga me sega ni mudu.” (1 Joni 2:17) De dua e nanumi ni na sega ni muduki rawa na ituvaki kei vuravura qo. Ia wale tiko ga qo ena sega ni laurai na kena o. Ena sega ni dei na ka kece e tu ena vuravura i Setani. Ke da nanuma tiko qori ena vukei keda meda kua ni rawai ena ilawaki ni Tevoro.

¹⁹ E uqeti keda na yapositolo o Pita meda muria na ivakarau ni bula e vakadonuya na Kalou ena noda ‘waraka da qai namaka tiko na kena lako mai na siga i Jiova, me na vakawaicalataki kina na lomalagi e kama tiko, era na vakawaicalataki tale ga ena levu ni katakata na ka era tu e lomalagi kei vuravura!’ (2 Pita 3:12) Sa voleka sara ni yaco qori, ena vakarusa o Jiova na vuravura kece i Setani. Ia ni bera ni yaco qori, ena vakayagataka tiko ga o Setani “na ka e tu e vuravura” meda temaki kina, me vaka ga nona temaki Ivi kei Jisu. Meda kua ni vakataki Ivi ena noda saga meda vakaceguya ga noda gagadre, ke da cakava qori, sa na vaka ga eda vakalou tiko vei Setani. E dodonu meda vakataki Jisu da qai vorata na veitemaki va qori se mani vakacava na kena veirawai kei na kena irairai. Meda vakadeitaka mada ga meda na muria na ivakarau ni bula e vinakata o Jiova.