O Bau Kila?

Na cava eda vulica me baleta na yapositolo o Pita ena nona lai tiko ena vale ni dua na daucakaleca ni bera ni tukuni vua me lako vei Konilio?

▪ E vakamacalataki ena Cakacaka ni a tiko o Pita me “vica tale na siga . . . kei Saimoni na daucakaleca, e Jopa, . . . e tiko nona vale mai baravi.” (Cakacaka 9:43; 10:6) Na caka leca e dau raici me cakacaka beci qai tawasavasava vei ira na Jiu. E tukuni ena nodra ivola na Jiu na Talmud nira torosobu na daucakaleca, e vinaka cake na nodra cakacaka na daukumuni benu kei na denimanumanu. Na cakacaka i Saimoni e rawa ni vakavuna me tawasavasava tiko ga ni dau tara na yago ni manumanu mate. (Vunau ni Soro 5:2; 11:39) E laurai ena levu na itukutuku e tabaki me baleti Saimoni ni rairai dau vakayagataka na waitui ena nona cakacaka, qai tiko tale ga ena taudaku ni taoni na vanua ni nona cakacaka ni dau “boica na caka leca.”

A sega ni muria o Pita na rai qori, a lai tiko ga kei Saimoni ena nona vale. Me vaka ga na nona cata e liu na veivakaduiduitaki o Jisu, a rairai vulica tale ga o Pita me cata na rai e takalevu tu vei ira na Jiu ena nodra dau vakaduiduitaki o ira era raici mera tawasavasava.—Maciu 9:11; Luke 7:36-50.

Na cava na ibalebale ni vosa i Jisu “o iko ga o sa tukuna tiko mai qori”?

▪ Ni vakaroti Jisu o Kaiafa na nodra bete levu na Jiu me tukuna e matanalevu ni o koya na Karisito na Luve ni Kalou, e kaya: “O iko ga o sa tukuna tiko mai qori.” (Maciu 26:63, 64) Na cava e vakaibalebaletaka?

A sega ni inaki ni nona tukuna qori o Jisu me kua ni sauma kina na taro i Kaiafa. Na vosa “o iko ga o sa tukuna tiko mai qori” e dua na nodra ivosavosa kilai levu na Jiu me vakadeitaka ni dina e dua na ka e tukuni. Kena ivakaraitaki, e kaya na nodra ivola ni lotu na Jiu na Jerusalem Talmud a volai ena ikava ni senitiuri S.K., ni tarogi e dua na turaga e Jiu se sa mate na rapai, a kaya: “O sa tukuna tiko mai qori.” Qori e vakadeitaka ni sa mate dina na rapai.

E kila o Jisu ni tu vua na bete levu na lewa me vakaroti koya me tukuna na ka dina. Ena yasana adua, ke galu tiko ga e rawa ni vakaraitaka vua na bete levu ni cakitaka ni o koya na Karisito. A sauma gona ena doudou vua na bete levu “o iko ga o sa tukuna tiko mai qori.” Ena itukutuku vata ga oya a vola o Marika, ni tarogi Jisu sara ga vakadodonu o Kaiafa me vakaraitaka ni o koya na Mesaia, a sauma ena doudou: “O yau dina qori.”—Marika 14:62; raica tale ga na Maciu 26:25 kei na Marika 15:2.

[iYaloyalo ena tabana e 18]

Vanua ni caka leca mai Fez, Morocco