E Dau Vakaukauataki Au na Wili iVolatabu

Talanoataka o Marceau Leroy

AU WILIKA lo tiko qo ena noqu rumu: “E nai vakatekivu sa bulia na lomalagi kei vuravura na Kalou.” Na cava au wilika lo tiko kina? Ni na sega ni taleitaka o tamaqu na ivola au wilika tiko—na iVolatabu. E sega tale ga ni vakabauta o koya na Kalou.

Au se bera vakadua ni wilika na iVolatabu ena dua na gauna, ia na itekitekivu ni ka e volai ena Vakatekivu e lauti au sara ga. Au nanuma sara kina, ‘Qo ga na ivakamacala e salavata kei na lawa e vauca na veika bula au dau qoroya tu mai!’ Na levu ni noqu taleitaka, au wiliwili mai na walu ena bogi me yaco ena va ena mataka. Sa tekivu sara ga e kea na noqu dau wilika na Vosa ni Kalou. Meu vakamacalataka mada na sala e dau vakaukauataki au kina na wili iVolatabu.

“Ena Vinakati mo Wilika tu ga e Veisiga”

Au sucu ena 1926, ena dua na koro ena vualiku kei Varanise o Vermelles, e dau keli kina na kola. Donuya na ikarua ni ivalu levu, e ivurevure vinaka ni ilavo ena matanitu na kola. Niu dau keli kola, au vagalalataki meu kua ni lai valu. Ia meu rawata na noqu bula, au vulica kina na ka me baleta na retio kei na livaliva, au qoroya kina ni qori e salavata kei na lawa e vauca na veika bula. Niu sa yabaki 21, a solia vei au e dua na noqu lewe ni kalasi na imatai ni noqu iVolatabu, e volai tu kina, “Qo na ivola e yaga me wiliki.” Ni oti noqu wilika, au vakadeitaka sara ga ni iVolatabu e Vosa ni Kalou, e vakatakila vei keda na kawatamata.

Au nanuma ni ratou na via wilika tale ga o ira keitou tiko veitikivi, au mani kauta kina e walu na kopi. Au kidacala, niu vakalialiai qai tusaqati. Era vakasalataki au na wekaqu era vakabauta tu na vakatevoro, nira tukuna: “Na gauna ga o na tekivu wilika kina na ivola qo, ena vinakati mo na wilika tu ga e veisiga!” Qori sara ga na ka au cakava, au qai sega vakadua ni veivutunitaka. E ivakarau sara ga ni noqu bula qori.

Nira kila o ira na tiko tikivi au niu dau taleitaka na iVolatabu, eso era solia vei au na ivola era ciqoma mai vei ira na iVakadinadina i Jiova. Na ivola lalai me vaka na One World, One Governmenta (na kena vakaVaranise) e vakamacalataka na vuna e dusia kina na iVolatabu ni inuinui duadua ga ni kawatamata na Matanitu ni Kalou. (Maciu 6:10) Au vinakata sara ga meu tukuna na inuinui qo vei ira tale eso.

E dua vei ira e ciqoma na iVolatabu o Noël, keirau se veitokani ena gauna keirau se gone kina. Ni lotu Katolika, a tuvanaka sara me keirau lai raica e dua na turaga e vuli bete tiko. Au a via rere, ia au kila mai na noqu wilika na Same 115:4-8 kei na Maciu 23:9, 10 ni cata na Kalou na vakayagataki ni matakau ena sokalou kei na kena tiko eso na kedra ikacivi na iliuliu ni lotu. E uqeti au qori meu vakamacalataka na noqu vakabauta vou. A yaco kina me ciqoma na dina o Noël, e se dua tiko ga na iVakadinadina yalodina nikua.

Au lai sikovi ganequ tale ga. E tu vei watina na ivola me baleta na vakatevoro, e dau vakasagai koya tale ga na timoni. Au via rere toka ena imatai ni gauna, ia e qai vakaukauataki au na tikinivolatabu me vaka na Iperiu 1:14, oya nira tokoni au tu na agilosi i Jiova. Ni muria o tavalequ na ivakavuvuli vakaivolatabu qai kauta laivi na iyaya kece vakatevoro, sa qai rawa ni galala mai na veivakamuai ni timoni. Erau mani yaco ruarua vakaveiwatini me rau iVakadinadina gugumatua.

Ena 1947 a gole mai vale e dua na iVakadinadina mai Merika o Arthur Emiot. Na levu ni noqu marautaki koya, au taroga vua na vanua era dau soqoni kina na iVakadinadina. E tukuna ni tiko e dua na ilawalawa e Liévin, rauta ni 10 na kilomita na kena yawa. Ena gauna oya e dredre me voli basikeli e dua, e vica gona na vula na noqu dau taubale ena soqoni. E vakatabui tu me walu na yabaki na noda cakacaka na iVakadinadina i Jiova e Varanise. Era le 2,380 ga na iVakadinadina ena matanitu qo—e levu era gole mai Poladi. Ia ena 1 ni Seviteba, 1947, e vakadonui tale vakalawa e Varanise na noda cakacaka. A tauyavutaki tale na valenivolavola ni tabana e Parisi e Villa Guibert. A sega mada ga ni bau dua na painia e Varanise, mani tabaki kina na Informant (nikua sa Cakacaka Vakaitalatala) ni Tiseba 1947 nodra kerei eso mera painia tudei, ena vinakati mera vakayagataka e 150 na aua ena dua na vula. (E sa qai vakalailaitaki qo ena 1949 me 100 na aua.) Au duavata kei na vosa i Jisu ena Joni 17:17, ‘e dina na vosa ni Kalou,’ au mani papitaiso ena 1948, au tekivu painia sara ena Tiseba 1949.

Mai Valeniveivesu Lesu Tale i Dunkerque

A lekaleka ga na imatai ni noqu ilesilesi, e Agen, ena ceva kei Varanise. Niu sa vakacegu mai na keli kola, e dodonu meu na curu ena mataivalu. Ia au bese ni curu ena mataivalu, au bala kina e valeniveivesu. A vakatabui me dua na noqu iVolatabu, ia au a taura rawa eso na drauniveva mai na Same. E uqeti au sara ga na noqu dau wilika. Ena gauna au sere kina, e vinakati meu vakatulewataka e dua na ka: Meu sa kua ga ni veiqaravi tale vakatabakidua se meu qara na ka meu bula kina? E yaga tale eke na ka au wilika mai na iVolatabu. Au vakananuma vakatitobu na vosa i Paula ena Filipai 4:11-13: “Au rawata na ka kece ena vuku i koya e vakaukauataki au.” Au vakadeitaka kina meu tomana ga na noqu painia. Ena 1950, au lesi tale ena dua na vanua—e Dunkerque, qo na vanua au sa vunau oti kina.

Niu yaco yani ena taoni qo, au liga lala sara tu ga. A vakacacani sara vakalevu na taoni qo ena iKarua ni iValu Levu, qai dredre me kune e dua na vanua meu tiko kina. Au nanuma meu lai raica e dua na vuvale au dau lai sikova tu, e marau sara ga na radinivale: “Isa Leroy, vinaka sara ga ni o sa sere! A tukuna o watiqu ke ra vakataki iko e lewe levu ke a sega sara ga na ivalu va qo.” E dua tale tiko na nodrau bure ni vulagi, rau mani solia vei au me yacova na gauna era na tekivu gade tale yani kina na saravanua. Ena siga tiko ga oya a solia sara vei au e dua na cakacaka o Evans, na taci Arthur Emiot.b E dau vakadewa ena wavu qai vinakata e dua me dau yadrava na waqa. E veikilaitaki au sara vua e dua na kavetani ni waqa. Me vaka niu suka mai valeniveivesu, e lutu sara ga na yagoqu. Ni vakamacalataka o Evans na vuna au va kina qori, e tukuna sara vei au o koya na kavetani ni levu tu na kakana ena katoniwaililiwa. Vakasamataka mada, ena siga tiko ga oya, au kunea na vanua meu na tiko kina, dua na noqu cakacaka, eso tale ga na kequ kakana! E vakaukauataki au sara ga na noqu nuitaka na vosa i Jisu ena Maciu 6:25-33.

Ni sa tekivu na gauna mera gade mai kina na saravanua, ena vinakati vei keirau kei Simon Apolinarski, noqu itokani painia, me keirau vaqara e dua tale na vanua me keirau lai tiko kina, ia keirau saga ga me keirau tiko ena vanua oya, baleta ni keirau a lesi e kea. E soli sara vei keirau e dua na vale makawa era dau moce kina na ose, keirau davo ena co madu. E levu na gauna keirau dau vunau. Keirau vunau sara vua na itaukei ni vale makawa qori, e dua tale ga vei ira na ciqoma na dina. Sega ni bera sa tabaki sara ena niusiveva mera qaqarauni na lewenivanua e Dunkerque ni sa “tete na nodra cakacaka na iVakadinadina i Jiova ena yasayasa oya.” Ia o keirau ga kei Simon na iVakadinadina ena yasayasa oya! Ni keirau sotava na ituvaki dredre, e dau vakayaloqaqataki keirau na neirau dau vakananuma na noda inuinui kei na sala e karoni keirau tiko kina o Jiova. Ni veisau na vanua au lesi kina ena 1952, sa via rauta e 30 na dautukutuku gugumatua e Dunkerque.

Vakaukauataki ena iTavi Vou

Ni oti ga na noqu tiko vakalekaleka ena siti o Amien, au lesi sara meu dua na painia lavotaki e Boulogne-Billancourt, e dua na taoni lailai e Parisi. E levu na noqu vuli iVolatabu, eso vei ira qori era qai veiqaravi vakatabakidua se dau daukaulotu. E dua na cauravou, o Guy Mabilat, e vulica na iVolatabu, e yaco me dua na ivakatawa ni tabacakacaka oti lai dua sara na ivakatawa ni tikina. Ni toso na gauna, e lai liutaka na kena tara na misini ni itaba ivola ena Peceli e Louviers, e yawa toka mai Parisi. Na levu ni noqu dau veitalanoataka na iVolatabu ena cakacaka vakaitalatala e sa lai kasa vinaka kina vei au na Vosa ni Kalou, qo e dau vakamarautaki au qai vakavinakataka na iwalewale ni noqu veivakavulici.

Ena 1953, au kidacalataka na noqu lesi meu dua na ivakatawa ni tabacakacaka e Alsace-Lorraine, qo e dua na vanua a lewa vakarua o Jamani ena 1871 ina 1945. E vinakati gona meu vulica tale na vosa vakaJamani. Ni tekivu na noqu cakacaka e kea, a bau tiko eso na motoka, na tivi, se na misini ni taipa qai sega na retio lailai e rawa ni veikauyaki se komipiuta. Ia a gauna marautaki duadua vei au qori. Ni muri na ivakasala ni iVolatabu me ‘vinaka na mataqu,’ e lailai kina na ka me vakawelei au ena noqu qaravi Jiova ni vakatauvatani nikua.—Maciu 6:19-22.

Ena 1955 a vakayacori kina na soqo cokovata e Parisi, era sureti kina na iVakadinadina mai na veivanua, e kena usutu “Triumphant Kingdom” (Matanitu Qaqa), qo na yabaki guiguilecavi dredre dina. Au sotavi Irène Kolanski kina, e qai lai watiqu e muri, a veiqaravi vakatabakidua e liu vei keirau, au qai tekivu ni oti e dua na yabaki. Erau kai Poladi na nona itubutubu, erau iVakadinadina gugumatua tale ga ena dua na gauna balavu. A sikovi rau e Varanise o Adolf Weber. A dau qarava na nona lomanibai o Brother Russell, a gole mai Urope me mai tukuna na itukutuku vinaka. Keirau a vakamau kei Irène ena 1956, qai tomani au ena veiqaravi vakaivakatawa ni tabacakacaka. E dau tokoni au vakalevu ena gauna kece qori!

Ni oti e rua na yabaki, e dua tale na ka veivakurabuitaki au sotava—au lesi meu dua na ivakatawa ni tikina. Ia me vaka ni lailai na tacida tagane era rawata na ivakatagedegede, au lesi tale ga meu veiqaravi vakaivakatawa ni tabacakacaka, ena noqu sikova eso na ivavakoso. E dua dina na gauna osooso qori! Me ikuri ni 100 na aua meu rawata ena vunau ena dua na vula, e veimacawa e vinakati meu vunau ena ivavakoso, sikova e tolu na iwasewase ni vulivola, dikeva na ivolatukutuku ni ivavakoso qai vakarautaka na kena ripote. E macala ga ni na sega na gauna meu wilika kina na vosa ni Kalou. Ia na ka au sa qai cakava qo—au kotiva eso na drauniveva mai na dua na iVolatabu makawa, au qai maroroya eso. Niu waraka tiko e dua me mai raici au, au na wilika sara na drauniveva au kotiva oya. Na gauna lekaleka qori e vakaukauataki au sara ga meu tomana tiko ga na noqu ilesilesi.

Ena 1967, keirau sureti kei Irène me keirau lewe ni vuvale e Peceli e Boulogne-Billancourt. Au a lesi ena Tabana e Qarava na Cakacaka, au se qarava tiko ga na ilesilesi dokai qo me sivia e 40 na yabaki. Dua na ka e marautaki kina na ilesilesi qo oya na noqu dau sauma na taro vakaivolatabu era volai mai. Dua na ka na noqu dau marautaka na vakadikeva na Vosa ni Kalou kei noqu via ‘taqomaka na itukutuku vinaka’! (Fpai. 1:7) Au marautaka tale ga meu liutaka na veitalanoataki ni iVolatabu ni bera na katalau. Ena 1976, au a lesi meu dua na lewe ni Komiti ni Tabana e Varanise.

Na Bula Vinaka Duadua

Au sa sotava mai eso na ituvaki dredre, ia na kena e dredre duadua na bula vaqase, au dau tautauvimate tale ga, qai vakaiyalayala na ka keirau rawa ni cakava kei Irène. Ia na neirau dau wilika kei na neirau dau vulica vata na Vosa ni Kalou e vakaukauataka na neirau inuinui. Keirau dau marautaka na vodo basi ena yalava ni neirau ivavakoso, me keirau lai wasea kina na inuinui qo vei ira tale eso. Ni wiliki vata na dede ni neirau veiqaravi vakatabakidua, e sivia e 120 na yabaki, qo e uqeti keirau sara ga me keirau tukuna kina ni ivakarau ni bula qo e ka marautaki qai yaga vei ira na vinakata mera tovolea. A “qase” tale ga o Tui Tevita ena gauna a vola kina na Same 37:25, ia au duavata kei koya niu se ‘sega ni raica e dua na yalododonu me guilecavi.’

Ena noqu bula taucoko, e vakaukauataki au o Jiova ena nona Vosa. A ratou tukuna na wekaqu ena 60 vakacaca na yabaki sa oti ni na noqu ivakarau ni bula na wili iVolatabu. E dina sara ga qori. Qo e dua na ka au dau cakava e veisiga. Au sega sara ga ni bau veivutunitaka!

[Vakamacala e ra]

[iYaloyalo ena tabana e 5]

O au kei Simon

[iYaloyalo ena tabana e 5]

Niu se veiqaravi tu vakaivakatawa ni tikina

[iYaloyalo ena tabana e 5]

Na iVolatabu e tautauvata kei na kena au ciqoma ena imatai ni gauna

[iYaloyalo ena tabana e 6]

Siga ni neirau vakamau

[iYaloyalo ena tabana e 6]

Keirau dau taleitaka kei Irène na wili iVolatabu kei na kena vulici