O Vakaraitaka Tiko ni Nomu iVotavota o Jiova?

“Moni vakaliuca tiko ga na matanitu ni Kalou kei na nona yalododonu, ena qai soli vei kemuni na ka kece qo.”—MACIU 6:33.

1, 2. (a) Ena Kalatia 6:16, e dusi cei na “Isireli ni Kalou”? (b) Ena Maciu 19:28, e dusi cei “na yavusa e tinikarua kei Isireli”?

NA CAVA o vakasamataka ni o raica ena iVolatabu na yaca Isireli? O lai nanumi Jekope kina na luvei Aisake, a veisau na yacana me Isireli? Se o nanumi ira na nona kawa, na matanitu makawa o Isireli? Vakacava o Isireli vakayalo? Ni cavuti vakaivakatakarakara na vosa Isireli, e dusi ira vakalevu na “Isireli ni Kalou,” era le 144,000, era lumuti ena yalo tabu mera lai tui ra qai bete e lomalagi. (Kala. 6:16; Vkta. 7:4; 21:12) Ia dikeva mada e dua tale na sala e vakayagataki kina na yaca Isireli, e tukuni tiko ena Maciu 19:28 e baleti ira na yavusa tinikarua e Isireli.

² E tukuna o Jisu: “Ni sa na vakavoui na ka kece ena gauna sa na dabe kina na Luve ni tamata ena nona idabedabe vakaturaga, o kemudou na dau muri au dou na qai dabe tale ga ena idabedabe vakatui e tinikarua mo dou lewa na yavusa e tinikarua kei Isireli.” Ena tikinivolatabu qo, “na yavusa e tinikarua kei Isireli” e dusi ira kece na nuitaka na bula tawamudu ena Parataisi e vuravura, era na lewai vei ira na tisaipeli lumuti i Jisu. Era na vakila na yaga ni nodra veiqaravi vakabete na 144,000.

3, 4. Era ivakaraitaki vinaka vakacava na lotu vaKarisito lumuti?

³ Me vakataki ira na bete kei ira na Livai ena gauna makawa, era raica tale ga na lumuti nikua me ka dokai na nodra veiqaravi. (Tiko 18:20) Era sega tale ga ni namaka na lumuti me soli vei ira e dua na vanua se qele mera taukena. Ia era vakanamata tu mera tui ra qai bete kei Jisu Karisito e lomalagi. Era na tomana tiko ga na nodra qaravi Jiova ena ilesilesi qori, me vaka e cavuti ena Vakatakila 4:10, 11 me baleta na nodra itutu vakalomalagi.—Isik. 44:28.

⁴ Nira se tiko e vuravura na lumuti, ena laurai ena nodra ivakarau ni bula ni nodra ivotavota o Jiova. E bibi duadua vei ira na nodra veiqaravi vua na Kalou. Era vakabauta na isoro ni veivoli i Karisito ra qai muri koya tiko ga, qori na ka era ‘kacivi kina, era digitaki tale ga kina.’ (2 Pita 1:10) E duidui na ituvaki era sotava kei na ka era rawa ni cakava. Ia era sega ni vakaulubaletaka na ka era lekata, me lailai kina na ka era cakava ena nodra qaravi Jiova. Era raica ga vakabibi na nodra qaravi Kalou, ra qai cakava na ka kece era rawata. Era ivakaraitaki vinaka tale ga vei ira na nuitaka na bula ena vuravura parataisi.

5. Na sala cava era vakaraitaka kina na lotu vaKarisito ni nodra ivotavota o Jiova, na cava ena dredre kina qori?

⁵ Ke da nuitaka na bula e lomalagi se vuravura, meda ‘kua ni muria na lomada, meda colata ga na noda kaunirarawa qai muri Karisito tiko ga.’ (Maciu 16:24) Era sokaloutaki Jiova ra qai muri Karisito tiko ena sala qori e vica vata na milioni era nuitaka na bula ena vuravura parataisi. Era sega ni lomavakacegu me lailai ga na itavi era qarava, nira kila ni rawa nira cakava e levu tale na ka. E levu era bula rawarawa ga, me rawa nira painia. So tale era painia ena so na vula e veiyabaki. Eso tale era sega ni painia, ia era gumatua ena cakacaka vakavunau. O ira qo era vakataki Meri ni dau yalodina, o koya a lumuti Jisu ena waiwai boivinaka. E tukuna o Jisu: “Sa cakava tiko vei au e dua na cakacaka vinaka. . . . E cakava o koya na ka e sa rawata.” (Mari. 14:6-8) Nida bula tu ena vuravura e lewa tu o Setani, ena sega ni rawarawa meda cakava na ka ena noda vinaka kece. Ia eda na sasaga tiko ga da qai nuitaki Jiova. Meda raica mada e va na ituvaki eda rawa ni cakava kina qori.

Vakaliuca na Matanitu ni Kalou

6. (a) Era vakaraitaka vakacava e levu nikua ni nodra ivotavota na bula qo? (b) Na cava e yaga kina meda vakatotomuri Tevita?

⁶ A vakavulici ira na nona imuri o Jisu mera vakaliuca na matanitu ni Kalou kei na kena yalododonu. Levu nikua era vakaliuca ga na ka e baleti ira nira ‘tamata ni vuravura oqo, e nodrai votavota ga na bula oqo.’ (Wilika Same 17:1, 13-15.) Era sega ni bau kauaitaka na Dauveibuli, e levu era kauaitaka ga na tiko vinaka, mera vakavuvale, ra qai biuta tu mai na ka era taukena. E nodra ivotavota ga na bula qo. Ia o Tevita e kauaitaka me ‘rogo vinaka na yacana’ vei Jiova, me vaka ga e veivakasalataki kina na luvena. (Dauv. 7:1.) Me vakataki Esafa, a raica o Tevita ni bibi duadua na nona veitokani kei Jiova mai na nona qara na ka e baleti koya. E marautaka na nona dau lakovata kei na Kalou. E levu na lotu vaKarisito nikua era vakaliuca na cakacaka vaKarisito mai na nodra cakacaka saumi.

7. E vakalougatataki vakacava e dua na tacida ena nona vakaliuca na Matanitu ni Kalou?

⁷ Vakasamataki Jean-Claude, e cavutu mai na Central African Republic. E dua na qase ni ivavakoso, e tolu na luvena. E dau dredre na vaqara cakacaka ena vanua oya, e levu era na cakava na ka ga e tukuni vei ira mera kua kina ni vakayalia nodra cakacaka. Ena dua na siga a tukuna vei Jean-Claude e dua na nona manidia me sa na cakacaka bogi—me tekivu ena veimama ni ono na yakavi, me vitu na siga ena dua na macawa. A vakamacalataka o Jean-Claude ni sega wale ga ni qarava na nodratou bula vakayago vakavuvale, ia e bibi tale ga me qarava na nodratou bula vakayalo. A tukuna tale ga ni tiko na nona itavi ena ivavakoso. Na cava e tukuna na manidia? “O kalougata ni dua na nomu cakacaka, mo kua gona ni kauaitaka na vo tale ni ka, wili kina o watimu, luvemu kei na nomu leqa. E dodonu mo solia na nomu bula ena cakacaka qo. O cei ena bibi vei iko: nomu lotu se cakacaka.” Na cava o na cakava ena ituvaki qori? E kila o Jean-Claude ke vakasakei, ena vukei koya ga na Kalou. Sa rawa ni levu na ka e cakava ena nona veiqaravi vua na Kalou, o Jiova tale ga ena vukei koya ena ka eratou gadreva vakavuvale. A tiko ena soqoni tarava e caka ena loma ni macawa. Ni oti qori, e vakavakarau me lai cakacaka, e sega ni kila se na cakacaka tale se sega. Vakalailai ga e qiritaki mai ni sa vakasakei na nona manidia, ia e sega ni vakasakei na tacida qo.

8, 9. Eda na vakatotomuria vakacava na nodra ivakaraitaki na bete kei ira na Livai ena nodra vakaraitaka ni o Jiova e nodra ivotavota?

⁸ Era na rairai taroga eso era leqataka nira na vakayalia na nodra cakacaka: ‘Au na qaravi ratou vakacava na noqu vuvale?’ (1 Tim. 5:8) Ke o sa sotava na ituvaki va qori, o rawa ni nuidei ni o na sega vakadua ni leqataka e dua na ka ke nomu ivotavota o Jiova, o na vakamareqeta tale ga na nomu qaravi koya. Ena gauna a tukuna kina o Jisu vei ratou na nona tisaipeli me ratou “vakaliuca tiko ga na matanitu ni Kalou,” e vakadeitaka vei ratou: “Na ka kece qo”—na ka me ratou kania, gunuva, kei na ka me ratou dara—‘ena qai soli vei ratou.’—Maciu 6:33.

⁹ Vakasamataki ira na Livai, e sega na nodra ivotavota ni qele. Ni bibi duadua vei ira na sokalou savasava, era vakararavi gona vei Jiova me vakarautaka na ka era gadreva, ni tukuna vei ira: ‘Au sa nomu ivotavota.’ (Tiko 18:20) Eda sega ni veiqaravi tiko ena valenisoro me vaka era cakava na bete kei ira na Livai, ia eda rawa ni vakatotomuria na nodra nuitaki Jiova ni na vakarautaka na ka eda gadreva. Nida sa volekata na icavacava, sa qai bibi sara meda nuitaki Jiova me vukei keda.—Vkta. 13:17.

Vakaliuca na Yalododonu ni Kalou

10, 11. Era vakaraitaka vakacava eso nira nuitaki Jiova ena ka e baleta na nodra cakacaka? Tukuna e dua na kena ivakaraitaki.

¹⁰ A uqeti ira tale ga na nona tisaipeli o Jisu mera ‘vakaliuca tiko ga na yalododonu ni Kalou.’ (Maciu 6:33) Kena ibalebale qori meda vakaliuca na ivakatagedegede i Jiova me baleta na ka e donu kei na ka e cala, me kua na vakasama vakatamata. (Wilika Aisea 55:8, 9.) De dua o kila ni levu era vakaitavi tu e liu ena kena teivaki na tavako se kena volitaki, era veivakavulici ena ivalu se buli iyaragi ra qai volitaka. Ia nira sa vulica na ka dina ena iVolatabu, era veisautaka kina e levu na nodra cakacaka me rawa kina nira papitaiso.—Aisea 2:4; 2 Kor. 7:1; Kala. 5:14.

¹¹ Dua na kena ivakaraitaki o Andrew. Erau vulica vakaveiwatini na ka e baleti Jiova, rau qai vakadeitaka me rau qaravi koya. E dau marautaka o Andrew na nona cakacaka, ia e qai biuta. Na vuna? A cakacaka tiko ena dua na isoqosoqo ena vakaleqa na nona tawaveitovaki, a mani nanuma kina me vakaliuca na yalododonu ni Kalou. Ena gauna a biuta kina na cakacaka qori, e tiko e rua na luvena me qarava, sega tu na ivurevure ni ilavo, qai vo toka ga eso na ilavo me rauta e vica na vula. Ena rai vakatamata, e sega na nona ‘ivotavota.’ Ia e vaqara cakacaka qai nuitaki Jiova tiko ga. Ni raica lesu, e ratou vakadeitaka vakavuvale ni sega ni lekaleka na ligai Jiova. (Aisea 59:1) Ni ratou bula rawarawa ga, a rawa kina me rau cakacaka vakaitalatala vakatabakidua vakaveiwatini. E tukuna: “Eso na gauna keirau nuiqawaqawataka na veika vakailavo, na vale, tauvimate, kei na bula vaqase. Ia e dau tokoni keitou o Jiova. . . . Keirau sega ni lomalomarua ni tukuna ni ka dokai qai yaga na noda sasaga meda qaravi koya.”a—Dauv. 12:13.

12. Na itovo cava e gadrevi meda vakaliuca kina na ivakatagedegede ni Kalou? Tukuna eso na ivakaraitaki o kila.

¹² E tukuna o Jisu vei ratou na nona tisaipeli: “Ke vaka mada ga na levu ni sore ni musita na nomudou vakabauta, dou rawa ni kaya ina ulunivanua qo, ‘Toki i kea,’ ena toki dina. Ena sega na ka e dredre vei kemudou.” (Maciu 17:20) Vakacava o na vakaliuca tiko ga na ivakatagedegede ni Kalou ke sotavi mada ga kina na dredre? Ke o via lomalomarua, mo kere ivakasala vei ira na tacimu ena ivavakoso. Macala ga ni o na vakaukauataki vakayalo ni o rogoci ira.

Vakamareqeta na Kakana Vakayalo e Vakarautaka o Jiova

13. Nida gugumatua ni qaravi Jiova, na cava eda nuidei kina me baleta na veika vakayalo?

¹³ Ke o vakamareqeta na itavi dokai mo qaravi Jiova, o na nuidei ni na vakarautaka na veika vakayago o gadreva kei na veika vakayalo, me vaka ga a cakava vei ira na Livai. Vakasamataki Tevita mada. A rawa ni nuitaki Jiova me vakarautaka na ka e vinakata dina ni tu ena qaravatu. Eda rawa ni nuitaki Jiova tale ga ena gauna eda gadreva kina na veivuke. Nanuma lesu na nona lako ena “vale tabu ni Kalou” o Esafa, e kila vinaka e kea na vu ni nona rarawa. (Same 73:17) O keda tale ga e dodonu meda rai vei Jiova me vakacegui keda vakayalo. Na noda cakava qo, eda sa vakaraitaka tiko nida vakamareqeta vakalevu na itavi dokai ni noda qaravi Jiova se mani cava e yaco. Qori eda sa vakaraitaka tiko ni noda ivotavota o Jiova.

14, 15. Na cava meda cakava ke vakamatatataki eso na ivakavuvuli vakaivolatabu, na cava na vuna?

¹⁴ Na cava o dau cakava ni vakamatatataka o Jiova, na iVurevure ni rarama vakayalo na ‘ka vuni ni Kalou’ ena iVolatabu? (1 Kor. 2:10-13) E ivakaraitaki vinaka vei keda na ka e cakava na yapositolo o Pita ena gauna e tukuna kina o Jisu vei ira na vakarorogo: “Ke oni sega ni kania na lewe ni Luve ni tamata, moni gunuva tale ga na nona dra oni na sega ni bula.” E levu na tisaipeli era sega ni kila na ibalebale dina ni vosa qori, era tukuna kina: “E dredre me ciqomi na vosa qo, o cei ena muria?” Era “suka tale kina e levu nona tisaipeli.” Ia e tukuna o Pita: “Turaga, me keitou qai lako tale vei cei? Na nomuni vosa ga e vosa ni bula tawamudu.”—Joni 6:53, 60, 66, 68.

¹⁵ A sega ni kila vinaka o Pita na ibalebale ni vosa i Jisu me baleta na kena laukana na lewena kei na gunuvi ni nona dra. Ia na yapositolo qo e nuitaka na Kalou me na veivakararamataki vakayalo. Ni vakamatatataki eso na ivakavuvuli vakaivolatabu, vakacava o saga mo kila na vuna vakaivolatabu e vakayacori kina na veiveisau qori? (Vkai. 4:18) Nira rogoca na kai Peria ena imatai ni senitiuri na vosa ni Kalou “e gu na lomadra mera dikeva na iVolatabu e veisiga.” (Caka. 17:11) Nida vakatotomuri ira eda na vakavinavinakataki Jiova vakalevu ni ka dokai na noda qaravi koya, me noda ivotavota tale ga.

Vakawati ga ena Turaga

16. Me salavata kei na ivakaro ena 1 Korinica 7:39, ena rawa vakacava me noda ivotavota o Jiova?

¹⁶ E dua tale na ituvaki ena vinakati kina meda nanuma tiko na inaki ni Kalou, oya na noda muria na ivakaro vakaivolatabu meda vakawati “ga ena Turaga.” (1 Kor. 7:39) Levu era digia mera dawai mai na nodra beca na ivakaro vakalou. E kauaitaki ira dina na Kalou. Na cava e cakava o Tevita ena gauna e galili kina qai sega e dua me vukei koya? E tukuna “Au a sova e matana na [Kalou] noqu tagi; au a vakatakila e matana na noqu rarawa. Ni sa luvu e lomaqu na yaloqu.” (Same 142:1-3) A rairai vakila tale ga qori na parofita o Jeremaia, ni a dawai qai qaravi Jiova ena yalodina ena vica sagavulu na yabaki. De dua o na via vulica na nona ivakaraitaki ena wase 8 ni ivola God’s Word for Us Through Jeremiah.

17. E vosota vakacava e dua na tacida yalewa dawai na nona dau galili ena so na gauna?

¹⁷ “Au sega ni nanuma meu dawai,” e tukuna e dua na tacida yalewa mai Merika. “Au na qai vakawati keu sotava e dua e veiganiti. E uqeti au o tinaqu sega ni vakabauta meu vakawatitaka e dua ga e rawa. Au tarogi koya ke tu vakarau me saumitaro ke leqa na noqu bula vakawati. Ni toso na gauna, e raica o tinaqu ni tiko e dua na noqu cakacaka vinaka, au rawa ni qaravi au ga, au qai marau. A sega tale ni vakasaurarataki au.” Ena so na gauna e dau galili na tacida qo. E kaya, “Ia au dau saga meu nuitaki Jiova. E sega vakadua ni biuti au.” Na cava e uqeti koya me nuitaki Jiova? “E dau vukei au vakalevu na masu meu raica ni bula dina tiko o Jiova, e vukei au tale ga meu kua ni galili. E vakarorogo tu na Kalou Cecere Duadua e lomalagi kei vuravura, macala ga niu na kauaitaki, au na vakila tale ga na marau.” A kila o koya ni “marau vakalevu o koya e solia na ka, vakalailai o koya e taura na ka,” e tukuna kina: “Au dau saga meu vukei ira eso tale, au qai sega ni namaka me na saumi na ka au cakava. Au dau marau vakalevu niu vakasamataka tiko, ‘na cava meu cakava meu vukei koya kina na taciqu qo?’” (Caka. 20:35) Io, e nona ivotavota o Jiova, e marautaka tale ga na itavi dokai me qaravi koya.

18. Ena sala cava e rawa ni nomu ivotavota kina o Jiova?

¹⁸ Se mani ituvaki cava o sotava tiko, e se rawa ga ni nomu ivotavota o Jiova. Ni o cakava qori, o na dua tale ga na nona dauveiqaravi mamarau. (2 Kor. 6:16, 17) Qori ena rawa kina ni nomu ivotavota o koya, me vakataki ira ga na dauveiqaravi ena gauna makawa. (Wilika Vakarua 32:9, 10.) Me vaka ga ni nodra ivotavota na Isireli o Jiova, ena rawa tale ga mo nona tamata, ena taqomaki iko tale ga vakayalololoma.—Same 17:8.

[Vakamacala e ra]

O na Sauma Vakacava?

O na vakaraitaka vakacava ni nomu ivotavota o Jiova

• ena nomu vakaliuca na Matanitu ni Kalou kei na nona yalododonu?

• ena nomu vakavinavinakataka na isolisoli vakayalo?

• ena nomu muria na ivakaro ni Kalou me baleta na vakawati ga ena Turaga?

[Tikina bibi ena tabana e 13]

Ena noda ivotavota o Jiova ke bibi duadua vei keda na noda qaravi koya

[iYaloyalo ena tabana e 15]

E veivakauqeti na ivakaraitaki i Jeremaia