Vakatotomuri Finiasi ni Basika na Leqa

E DUA dina na itavi dokai na qase ni ivavakoso. Ia e tukuna na Vosa ni Kalou ni sega ni rawarawa na nodra veiqaravi. Ena so na gauna, era na rogoca eso na kisi ni nodra cala eso ra qai ‘lewa ena vuku i Jiova.’ (2 Vei. 19:6) Se soli vakasauri vua e dua na qase e dua na itavi, me vakataki Mosese ga, ni a taroga ena gauna e lesi kina: “Ko cei koi au, me’u lako kivei Fero?”—Lako 3:11.

Na iVolatabu e volai ena veidusimaki ni yalo tabu. E veidusimaki tale ga ena nona lesi e dua me qase. E cavuti ena iVolatabu na nodra ivakaraitaki na qase era vosota na veivakatovolei era sotava. E makubui Eroni o Finiasi na luve i Iliesa, ena yaco me dua na bete levu. Ena tolu na ituvaki a sotava e vakaraitaka kina ni bibi vei ira na qase era sotava tiko na ituvaki dredre nikua mera yaloqaqa, yalomatua ra qai vakararavi vei Jiova.

‘Sega Tale ni Qai Wawa’

E se gone o Finiasi ena gauna era keba kina na Isireli ena Buca o Moapi. E tukuna na iVolatabu: ‘A ra sa veibutakoci kei ira na goneyalewa ni Moapi o ira na tamata. A ra sa kana na tamata, ra qai cuva ina nodra kalou na yalewa.’ (Tiko 25:1, 2) E vakamatei ira na cala o Jiova ena dua na mate ca. Vakasamataka mada na nona rogoca o Finiasi na nodra cala kei na mate ca e tauvi ira na Isireli.

E tomana na kena itukutuku: “Raica, sa lako mai e dua vei ira na Isireli, ka kauta mai kivei ira na wekana e dua na yalewa ni Mitiani, e na mata i Mosese, e matadra talega nai soqosoqo taucoko ni Isireli, ni ra sa tagi tiko mai na katuba ni vale ni veitavaki.” (Tiko 25:6) Na cava ena cakava na bete o Finiasi? E se gone o koya, na Isireli tale ga e cala oya e iliuliu ni bete qai dau liutaki ira na lewenivanua ena sokalou.—Tiko 25:14.

Ia e rerevaki Jiova o Finiasi, sega ni tamata. Na gauna ga e raici rau kina na veibutakoci, e taura e dua na moto, muri rau ena valelaca qai cokai rau. E raica vakacava o Jiova na yaloqaqa i Finiasi kei na nona vakatulewa? E sega tale ni cudruvi ira o Jiova qai vakalougatataki Finiasi ena dua na veiyalayalati me na tiko ga ena nona kawa na itavi vakabete me “tawa mudu.”—Tiko 25:7-13.

Macala ga nira na sega ni vakaitavi nikua ena ivalavala kaukaua na qase. Me vakataki Finiasi ga, mera tu vakarau e veigauna na qase mera vakatulewa, mera yaloqaqa tale ga. Kena ivakaraitaki, o Guilherme e dua na qase ni ivavakoso. Ni oti ga e vica na vula na nona qase, e kerei me lewe ni komiti ni veilewai. Na kisi qo e baleta na nona cala e dua na qase ni ivavakoso. Na qase qo a dau uqeti Guilherme ena gauna e se gone kina. E tukuna: “E sega ni ka rawarawa meu vakatulewa ena ituvaki oya. Au sega ni moce vinaka ena bogi. Au vakasamataka vakalevu na vakatulewa me caka ena kisi qo, me kua tale ga ni vakaleqa na noqu muria na ivakatagedegede i Jiova na neirau veikilai kei na qase qo. Au masulaka me vica na siga qai vakadidike ena ivola vakaivolatabu.” Qo e vukei koya me yaloqaqa ena kisi dredre va qo, me vukei koya tale ga na tacina vakayalo e cala.—1 Tim. 4:11, 12.

Nira yaloqaqa qai vakatulewa vinaka na qase ni basika eso na ituvaki ena ivavakoso, era ivakaraitaki vinaka sara ga ni vakabauta kei na yalodina. Macala ga ni dodonu vei ira kece na lotu vaKarisito mera yaloqaqa, qo na nodra tukuna vei ira na qase na cala bibi era rairai kila. E gadrevi tale ga na yalodina nida tagutuva na noda veimaliwai kei na dua na noda itokani se wekada sa vakasivoi.—1 Kor. 5:11-13.

Kila Vinaka na vu ni Leqa

Na nona yaloqaqa o Finiasi e sega ni baleta na nona sega ni vakasamataka vinaka na ka e cakava, me vaka era dau cakava na gone. Dikeva mada na ka e cakava—na nona vakatulewa kei na nona lewa matau—ena gauna e rogoca tale kina e dua na itukutuku. Na yavusa o Rupeni, Kata, kei na veimama ni yavusa o Manasa era tara e dua na icabocabonisoro volekata na uciwai na Joritani. Era tukuna eso na Isireli ni ka era cakava qori e sokalou lasu ra qai via valuti ira.—Josua 22:11, 12.

Na cava e cakava o Finiasi? E veivosaki o Finiasi, o ira na iliuliu ni veiyavusa e Isireli kei ira na tara na icabocabonisoro. Era qai vakamatatataka na yavusa beitaki qori ni vakayagataki na icabocabonisoro “ena cakacaka i Jiova.” A wali sara ga e kea na duidui qori.—Josua 22:13-34.

Nida rogoca e dua na itukutuku ca se dua na ka e beitaki kina na tacida, e dodonu meda vakatotomuria na ivakaraitaki i Finiasi! Na noda kila vinaka na dina ni itukutuku eda na sega kina ni vakalelewa se tukuna eso na ka ca me baleti ira na tacida.—Vkai. 19:11.

Me vakataki Finiasi ga, ena vukei ira vakacava na qase na nodra kila vinaka na dina ni itukutuku? E tukuna o Jaime sa tini vakacaca na yabaki na nona qase ni ivavakoso: “Ni tukuna vei au e dua na dautukutuku na nodrau veileqaleqati kei na dua, au kerei Jiova ena gauna vata qori me vukei au meu kua ni veitovaki, meu muria ga na veidusimaki vakaivolatabu. A raici au e dua na tacida yalewa ena nona leqa me baleta na ka e cakava vua e dua na tacida tagane matua ena dua tale na ivavakoso. Me vaka ni keirau veitokani vinaka kei na tacida tagane qori, a rawa sara ga meu lai raici koya. Ia keirau veivosakitaka kei na tacida yalewa qori eso na ivakavuvuli vakaivolatabu. E qai nanuma me raici koya mada ga e liu na tacida erau veileqaleqati qori. (Maciu 5:23, 24) Erau sega ni veiyaloni sara. Au mani uqeti koya me dikeva eso tale na ivakavuvuli vakaivolatabu. A nanuma me masulaka tale na ituvaki oya qai saga me veivosoti.”

Na cava e qai yaco? E nanuma lesu o Jaime: “Ni oti e vica na vula e mai raici au tale na tacida yalewa qo. A tukuna ni toso na gauna a qai veivutunitaka na tacida tagane matua qori na ka e tukuna. A tuvanaka na tacida tagane qori me rau cakacaka vata vakavunau qai vakavinavinakataki koya kina. E wali e kea na veileqaleqati. A wali na leqa qori ena sala vinaka duadua baleta niu sega ni vakaitavi ena veivakameautaki, keu a vakaitavi kina au rawa sara ga ni veitovaki.” E veivakasalataki na iVolatabu: “Kakua ni kusarawa ni la’ki veileti.” (Vkai. 25:8) Na qase yalomatua ena uqeti ira na lotu vaKarisito e tiko na nodra duidui mera muria na ivakasala vakaivolatabu ena uqeta qai rawati kina na veiyaloni.

E Vakasaqarai Jiova

A kalougata dina o Finiasi me veiqaravi vakabete ena vukudra na nona tamata digitaki na Kalou. Me vaka ga e laurai vua, e vakasakiti na nona yaloqaqa qai yalomatua dina ga ni se gone. Ia a rawa ni vorata na ituvaki dredre kece ni dau nuitaki Jiova.

Era kucuva ra qai vakamatea na tagane ni Kipea ena yavusa o Penijamini na watina lailai e dua na Livai, era mani nanuma na yavusa kece e Isireli mera valuti ira na yavusa na Penijamini. (Dvei. 20:1-11) Era masuti Jiova ni bera nira lai vala, ia era druka vakarua, qai levu era mate kina. (Dvei. 20:14-25) Vakacava, era nanuma ni sega ni rogoci na nodra masu? A kauaitaka dina o Jiova mera sauma na cala a vakayacori oya?

Sa bete levu qo kei Isireli o Finiase. E nuidei tu ga qai masuti Jiova: “Me’u lako tale me’u veivala kei ira na Penijamini, na taciqu, se me’u kakua?” A saumi na masu qori ena nona soli ira na Penijamini mera vakamatei, e vakarusai tale ga o Kipea.—Dvei. 20:27-48.

Na cava eda vulica rawa e ke? Ke ra sasaga mada ga na qase se kerea na veivuke ni Kalou, ena tiko ga eso leqa ena ivavakoso. Ke yaco qori, mera nanuma tiko na qase na vosa i Jisu: “Dou kerekere tiko ga [se masu], ena qai soli vei kemudou; dou vaqaqara tiko ga, dou na qai kunea, dou tukituki tiko ga, ena qai dolavi vei kemudou.” (Luke 11:9) Ke mani berabera na saumi ni dua na masu, mera nanuma tiko na qase ni o Jiova ena qai sauma ga ena kena gauna.

Kena ivakaraitaki, e dua na ivavakoso e Ailadi a vinakata me tara e dua na nodra Kingdom Hall, ia e sega ni vakadonuya qori e dua na vakailesilesi ni koro oya e dau lewa na tara ni vale. E sega ni vakadonuya na vakatutu kece era nanuma na tacida me tara kina na nodra Hall. E kena irairai ni na rawa ga ni vakadonuya na nodra kerekere na tacida e dua na vakailesilesi e qarava tiko na vanua taucoko o Ailadi. Vakacava, ena yaga na masu me vaka ga na gauna i Finiase?

E tukuna e dua na qase ni ivavakoso: “Keitou masu vakavica, keitou kerekere, oti keitou gole ena nona ofisi na vakailesilesi qori. A tukuni ni rawa ga me keitou raici koya ni oti e vica na macawa. Ia ena loma ga ni lima na miniti sa rawa ni keitou veitalanoa. Ni raica oti ga na peleni ni Hall, e vakadonuya sara me tara na Hall. E saga tale ga ena nona vinaka kece me vukei keitou na vakailesilesi a sega ni vakadonuya e liu na neitou kerekere. Keitou vakadinadinataka na kaukaua ni masu.” Io ke ra nuitaki Jiova vakalevu na qase, ena sauma o koya na nodra masu.

E levu dina na itavi e qarava o Finiase e Isireli, ia ena nona yaloqaqa, yalomatua, kei na nona vakararavi vei Jiova, a rawa kina ni vosota na ituvaki dredre kece. E dau gumatua ni qarava na ivavakoso ni Kalou, e vakadonui koya kina o Jiova. Ni oti tale e 1,000 na yabaki, a uqeti vaKalou o Esera me vola: “Ko Finiase na luvei Eliesa ka tagane, sa lewai ira eliu, a sa totaki koya ko Jiova.” (1 Vei. 9:20) Io, mera vakatotomuria mada ga na ivakaraitaki oya o ira na liutaki keda tiko nikua, vaka tale ga kina o keda kece na lotu vaKarisito yalodina i Jiova.