O Sa Bau Lasutaki?

DUA na ka mosimosi me lasutaki iko e dua o nuitaka. O na rairai madua, cudru, se nanuma ni o dabuitaki. Na lasu e vakacacana na veitokani kei na vakawati; era lawakitaki kina e levu ena vica vata na milioni na dola.

Ia vakacava ke lasutaki iko e dua ena veika me baleta na Kalou? Ena rairai tarai iko sara vakalevu qori ke o daulotu, me vaka ga erau vakadinata o rau qo:

● “Au nanuma ni dabuitaki au o lotu.”—DEANNE.

● “Au cudru. Au nanuma niu vakacalai—ni tawayaga na veika au vakanuinui kina kei na noqu isausau.”—LUIS.

O na rairai sega ni vakabauta ni o lasutaki ena veika me baleta na Kalou. Na ka o kila tu qo e rairai tukuna vei iko e dua o nuitaka qai sega ni nona inaki me vakararawataki iko, me vaka na nomu itubutubu, dua na bete, italatala, se na nomu itokani voleka. De dua o sa vakabauta voli mai e dua na ivakavuvuli ena nomu bula taucoko. E rawa beka ni lasu e dua na vakasama sa ciqomi raraba tu? E tukuna na peresitedi vakacegu kei Merika o Franklin D. Roosevelt: “Na kena tukuni vakavica vata e dua na ka e lasutaki ena sega ni lai veisau kina me dina.”

O na kila vakacava ni o lasutaki? A tukuna ena dua na gauna o Jisu ena nona masu vua na Kalou: “E dina na nomuni vosa.” (Joni 17:17) Io, e rawa ni dusimaki keda na Vosa ni Kalou meda kila kina na ka e lasu kei na ka e dina.

Wilika mada na ka e tukuna na iVolatabu me baleta e lima na ivakavuvuli lasu me baleta na Kalou e takalevu tu nikua kei na sala ena vakavinakataka kina na nomu bula na ka dina.